4 ᑲᐦᑭᓇ ᐊᐃᐧᔭ ᑳᒪᒋᑑᑕᐣᐠ ᐅᑖᓇᐁᐧᐣᑖᐣ ᐅᓇᐦᔓᐁᐧᐃᐧᓂ, ᒋᑫᒫ ᒪᒋᑑᑕᒧᐃᐧᐣ ᐊᓇᐁᐧᐣᒋᑫᒪᑲᐣ ᐅᓇᐦᔓᐁᐧᐃᐧᐣ. 5 ᑭᑭᐦᑫᐣᑖᓈᐋᐧ ᐁᑮ ᐱᑕᑯᔑᐣᐠ ᒋᐅᐣᒋ ᓃᑲᑌᓇᐣᑭᐣ ᑭᒪᒋᑑᑕᒧᐃᐧᓂᓈᐣ. ᑳᐃᐧᐣ ᐅᑖᔮᓰᐣ ᒪᒋᑑᑕᒧᐃᐧᐣ. 6 ᐊᐃᐧᔭ ᑳᐦᑭᑭᓑᑳᑯᐨ ᑳᐃᐧᐣ ᐱᒥᐦᒪᒋᑑᑕᓰᐣ, ᐊᐃᐧᔭ ᑳᐱᒥᐦᒪᒋᑑᑕᐣᐠ ᑳᐃᐧᐣ ᐅᑐᐣᒋ ᐋᐧᐸᒫᓰᐣ ᓈᐣᑕ ᑳᐃᐧᐣ ᐅᑐᐣᒋ ᑭᐦᑫᓂᒫᓰᐣ.

7 ᑳᓵᑭᐦᐃᓂᓇᑯᐠ ᓂᓃᒑᓂᔕᐠ, ᑳᐃᐧᐣ ᐊᐃᐧᔭ ᑲᐊᐧᓂᔑᒥᑰᐋᐧ. ᐊᐃᐧᔭ ᑳᑑᑕᐣᐠ ᑳᒥᓈᐧᔑᓂᐠ ᑲᐧᔭᐦᑲᐧᑎᓯ, ᑖᐱᓑᑯᐨ ᑳᐃᔑ ᑲᐧᔭᑲᐧᑎᓯᓂᐣᐨ. 8 ᐊᐃᐧᔭ ᑳᐱᒥᐦᒪᒋᑑᑕᐣᐠ ᒪᒋᒪᓂᑑᑳᐣᐠ ᐅᐣᒋ ᑎᐯᐣᑖᑯᓯ, ᐊᓂᓑ ᒪᒋᒪᓂᑑ ᑮᐅᐣᒋ ᐱᒥᐦᒪᒋᑑᑕᒼ ᑳᐱᒫᒋᐦᓭᓂᐠ. ᐊᒦᐦᐅᐁᐧ ᑳᑮ ᐅᐣᒋ ᐱᑕᑯᔑᐣᐠ ᑭᔐᒪᓂᑑ ᐅᑯᓯᐦᓴᐣ ᒋᓂᔑᐊᐧᓈᒋᑑᐨ ᒪᒋᒪᓂᑑᐣ ᐅᑕᓄᐦᑮᐃᐧᓂᓃᐣ. 9 ᐊᐃᐧᔭ ᑭᔐᒪᓂᑑᐦᑳᐣᐠ ᑳᐅᐣᒋ ᓂᐦᑖᐃᐧᑭᐨ ᑳᐃᐧᐣ ᑕᑮ ᐱᒥᐦᒪᒋᑑᑕᐦᓰᐣ, ᐊᓂᓑ ᐅᓂᐦᑖᐃᐧᑭᐦᐃᑰᐃᐧᓂᓃᐣ ᐅᑭᑭᓑᑳᑯᐣ. ᑳᐃᐧᐣ ᑕᑮᐃᔑ ᐱᒥᐦᒪᒋᑑᑕᐦᓰᐣ, ᐊᓂᓑ ᑭᔐᒪᓂᑑᐦᑳᐣᐠ ᐁᑮ ᐅᐣᒋ ᓂᐦᑖᐃᐧᑭᐨ. 10 ᒦᐦᐅᒫ ᑫᐅᐣᒋ ᑭᐦᑫᐣᑕᒪᐣᐠ ᐊᐊᐧᓀᐣ ᑭᔐᒪᓂᑑ ᐅᑕᐋᐧᔑᔒᒪᐣ ᒦᓇ ᐊᐊᐧᓀᐣ ᒪᒋᒪᓂᑑ ᐅᑕᐋᐧᔑᔒᒪᐣ. ᐊᐃᐧᔭ ᐁᑳ ᑳᑑᑕᐣᐠ ᑳᒥᓈᐧᔑᓂᓂᐠ ᑳᐃᐧᐣ ᑭᔐᒪᓂᑑᐣ ᐅᑑᓃᒑᓂᔑᔑᒥᑯᐦᓰᐣ, ᒦᓇ ᐁᑳ ᐊᐃᐧᔭ ᑳᓵᑭᐦᐋᐨ ᐃᐧᒋᐅᑕᔭᒥᐦᐋᐣ.

11 ᒦᐦᐅᐁᐧ ᐃᐦᑭᑐᐃᐧᐣ ᓂᓑᑕᒼ ᑳᑮᓅᐣᑕᒣᐠ, ᒋᓵᑭᐦᐃᑎᔭᐣᐠ. 12 ᑳᐃᐧᐣ ᐃᔑᐊᔮᔪᐠ ᑖᐱᓑᑰᐨ ᑫᐣ ᑳᑮᐃᔑᐊᔮᐨ, ᒪᒋᒪᓂᑑᑳᐣᐠ ᐁᑮ ᐅᐣᒋ ᑎᐯᐣᑖᑯᓯᐨ ᒦᓇ ᐁᑮᓂᐦᓵᐨ ᐅᔒᒣᔕᐣ. ᑫᑰᓀᐣ ᑳᑮ ᐅᐣᒋ ᓂᐦᓵᐨ? ᒋᑫᒫ ᑎᐱᓇᐁᐧ ᐅᑎᔑᒋᑫᐃᐧᓇᐣ ᐁᑮ ᒪᒋᓈᑲᐧᓂᓂᑭᐣ, ᒦᓇ ᐅᔒᒣᔕᐣ ᐅᑎᔑᒋᑫᐃᐧᓂᓃᐣ ᐁᑮ ᒥᓈᐧᔑᓂᓂᑭᐣ.

13 ᓃᒋᐅᑕᔭᒥᐦᐋᐠ, ᑳᐃᐧᐣ ᒫᒪᐦᑳᑌᐣᑕᒧᐠ ᐊᐦᑭ ᐸᑳᐧᓂᑯᔦᐠ. 14 ᑭᑭᐦᑫᐣᑖᒥᐣ ᐋᔕ ᐁᑮ ᐸᐦᐲᔭᐣᐠ ᓂᐴᐃᐧᓂᐣᐠ, ᐋᔕ ᑭᑕᔮᒥᐣ ᐱᒫᑎᓯᐃᐧᐣ, ᒋᑫᒫ ᐁᓵᑭᐦᐃᑎᔭᐣᐠ. ᐊᐃᐧᔭ ᐁᑳ ᑳᓵᑭᐦᐃᐁᐧᐨ ᓂᐴᐃᐧᓂᐣᐠ ᐊᔮ. 15 ᐊᐃᐧᔭ ᑳᐸᑳᐧᓈᐨ ᐃᐧᒋᐅᑕᔭᒥᐦᐋᐣ ᒦᐦᐊᐁᐧ ᐅᓂᐸᐦᑖᑫ. ᒦᓇ ᑭᑭᐦᑫᐣᑖᓈᐋᐧ ᐅᓂᐸᐦᑖᑫ ᐁᑳ ᐁᐦᐊᔮᐨ ᑳᑭᑫ ᐱᒫᑎᓯᐃᐧᓂ.

16 ᒦᐦᐅᐁᐧ ᑫᐅᐣᒋ ᑭᐦᑫᐣᑕᒪᐣᐠ ᑫᑯᓀᐣ ᐃᐦᐃᐁᐧ ᓵᑭᐦᐃᐁᐧᐃᐧᐣ, ᐁᑮ ᐸᑭᑎᓇᐣᐠ ᒋᓴᐢ ᙭ ᐅᐱᒫᑎᓯᐃᐧᐣ ᑮᓇᐃᐧᐣᐟ ᐅᐣᒋ. ᒦᑕᓑ ᑫᑮᓇᐃᐧᐟ ᐁᔑᓈᑲᐧᐠ ᒋᐸᑭᑎᓇᒪᐣᑭᐸᐣ ᑭᐱᒫᑎᓯᐃᐧᓂᓈᐣ ᐁᐅᐃᐧᒋᐋᐧᔭᐣᐠ ᑮᒋᐅᑕᔭᒥᐦᐋᓈᐣ. 17 ᑮᓑᐱᐣ ᐊᐃᐧᔭ ᐁᒥᓄᑌᐱᐦᓭᐨ ᑫᑰᓇᐣ, ᐁᐋᐧᐸᒫᐨ ᑕᓑ ᐃᐧᒋᐅᑕᔭᒥᐦᐋᐣ ᐁᓅᐣᑌᐦᓯᓂᐣᐨ ᐁᑳ ᑕᓑ ᐁᑭᑎᒫᑫᓂᒫᐨ, ᐊᓃᐣ ᑕᓑ ᑭᔐᒪᓂᑑᐣ ᐅᓵᑭᐦᐃᐁᐧᐃᐧᓂᓃᐣ ᐁᐃᔑᑭᑭᓑᑳᑯᐨ? 18 ᑳᓵᑭᐦᐃᓂᓇᑯᐠ ᓂᓃᒑᓂᔕᐠ, ᑳᐃᐧᓃᐣ ᐁᐦᑕ ᑭᑎᐦᑭᑐᐃᐧᓂᓈᐣ ᑲᐅᐣᒋ ᓵᑭᐦᐃᐁᐧᓰᒥᐣ, ᓈᐣᑕ ᒥᑌᓇᓃᐣᐠ ᐅᐣᒋ, ᐃᐦᐃᒫ ᐱᑯᐦ ᑑᑕᒧᐃᐧᓂᐣᐠ ᒦᓇ ᑌᐯᐧᐃᐧᓂᐣᐠ.

19 ᐊᒦᐦᐅᒫ ᑫᐅᐣᒋ ᑭᐦᑫᐣᑕᒪᐣᐠ ᑌᐯᐧᐃᐧᐣ ᐁᐅᐣᒋ ᑎᐯᐣᑖᑯᓯᔭᐣᐠ ᒦᓇ ᒋᐅᓇᐦᑐᔭᐣᐠ ᑭᑌᐦᐃᓈᐣ ᒋᐊᓀᐧᔑᓅᒪᑲᐠ ᑳᐃᓈᐦᓴᒦᐨ ᑭᔐᒪᓂᑑ, 20 ᐊᐦᐲ ᐱᑯᐦ ᑭᑌᐦᐃᓈᐣ ᐁᓈᓂᐳᒥᑰᔭᐣᐠ. ᑭᔐᒪᓂᑑ ᐊᐊᐧᔑᒣ ᑭᐦᒌᓀᐣᑖᑯᓯ ᐊᐦᐲᐨ ᑭᑌᐦᐃᓈᐣ, ᒦᓇ ᐅᑭᐦᑫᐣᑖᓇᐣ ᑲᐦᑭᓇ ᑫᑰᓇᐣ. 21 ᑳᓵᑭᐦᐃᓂᓇᑯᐠ, ᑮᓑᐱᐣ ᑭᑌᐦᐃᓈᐣ ᐁᑳ ᓈᓂᐴᒥᑯᔭᐣᐠ, ᐁᐦᐊᔮᔭᐣᐠ ᑌᐸᐦᑫᓂᒧᐃᐧᐣ ᐁᓈᓴᒦᐨ ᑭᔐᒪᓂᑑ, 22 ᒦᓇ ᐱᑯᐦ ᑫᑰᐣ ᐁᑲᑫᐧᒋᒫᔭᐣᐠ ᑭᒦᓂᑯᓈᐣ, ᒋᑫᒪ ᐁᑲᓇᐁᐧᐣᑕᒪᐣᐠ ᐅᑑᓇᐦᔓᐁᐧᐃᐧᓇᐣ ᒦᓇ ᐁᑑᑕᒪᐣᐠ ᐁᔑᒥᓈᐧᐱᔑᒥᑯᐨ. 23 ᒦᐦᐅᐁᐧᓂ ᐅᑑᓇᐦᔓᐁᐧᐃᐧᐣ, ᒋᑌᐯᐧᐦᑕᒪᐣᐠ ᐃᐦᐃᒫ ᐅᑎᔑᓂᐦᑳᓱᐃᐧᓂᐣᐠ ᐅᑯᓯᐦᓴᐣ ᒋᓴᐢ ᙭ ᒦᓇ ᒋᓵᑭᐦᐃᑎᔭᐣᐠ ᑳᑮ ᐃᓇᐦᔓᐋᐧᓂᑰᔭᐣᐠ. 24 ᐊᐃᐧᔭ ᑳᑲᓇᐁᐧᐣᑕᐣᐠ ᑭᔐᒪᓂᑑᐣ ᐅᑐᓇᐦᔓᐁᐧᐃᐧᓂᓃᐣ ᐅᑮᑭᓑᑳᑯᐣ, ᒦᓇ ᐅᐃᐧᒋᐃᐧᑯᐣ. ᒦᐦᐃᒫ ᐁᐧᐣᒋ ᑭᐦᑫᐣᑕᒪᐣᐠ ᐁᑭᑭᓑᑳᑯᔭᐣᐠ ᐊᐦᐊᐁᐧ ᑳᑲᓈᑎᓯᐨ ᐊᐦᒑᐠ ᑳᑮᒦᓂᑰᔭᐣᐠ.