ᑌᐯᐧᐃᐧᓂ ᐊᐦᒑᐠ ᒦᓇ ᐊᐧᓂᔑᓄᐃᐧ ᐊᐦᒑᐠ
4
ᑳᓵᑭᐦᐃᓂᓇᑯᐠ, ᑳᐃᐧᐣ ᑌᐯᐧᑕᐃᐧᑯᐠ ᑲᐦᑭᓇ ᐊᐦᒑᑲᐧᐠ, ᔖᑰᐨ ᓇᓈᐣᑕᐃᐧᑭᐦᑫᓂᒥᑯᐠ ᑮᓑᐱᐣ ᑌᐯᐧ ᑭᔐᒪᓂᑑᐦᑳᐣᐠ ᐁᐧᐣᒌᐋᐧᑫᐧᐣ. ᒋᑫᒫ ᒥᐦᔒᐣ ᓇᐦᐹᐨ ᐅᑭᐦᑭᐁᐧᐦᐃᑫᐠ ᒥᓯᐁᐧ ᐃᔑᒫᒑᐊᐧᐠ ᐅᐦᐅᒫ ᐊᐦᑮᐣᐠ. 2 ᐊᒦᐦᐅᒫ ᑫᐅᐣᒋ ᑭᐦᑫᓂᒫᔭᐣᐠ ᑮᓑᐱᐣ ᑌᐯᐧ ᐅᓄ ᑭᔐᒪᓂᑑ ᐅᑕᐦᒑᑲᐧᐣ. ᑲᐦᑭᓇ ᐊᐦᒑᑲᐧᐠ ᑳᑎᐹᒋᒫᐋᐧᐨ ᒋᓴᐢ ᙭ᑕᐣ ᐁᑮ ᑕᑯᔑᐣᐠ ᐃᐦᐃᒫ ᐄᐧᔮᓯᐣᐠ ᑭᔐᒪᓂᑑᐦᑳᐣᐠ ᐅᐣᒌ. 3 ᑳᑕᔑᐨ ᐊᐦᒑᐠ ᐁᑳ ᑳᑎᐹᒋᒫᐨ ᒋᓴᓲᐣ ᑳᐃᐧᐣ ᑭᔐᒪᓂᑑᐦᑳᐣᐠ ᐅᐣᒌᓰᐣ. ᒦᐦᐊᐁᐧ ᐅᑕᐦᒑᑲᐧᐣ ᓇᐦᐹᐨ ᙭ ᑳᑮᓅᐣᑕᒣᐠ ᐁᐱᑕᑯᔑᐣᐠ ᐋᔕ ᐅᐦᐅᒫ ᐊᐦᑮᐣᐠ ᐊᔮ. 4 ᑮᓇᐋᐧ ᑳᓵᑭᐦᐃᓇᑯᐠ ᓂᓃᒑᓂᔕᐠ, ᑭᔐᒪᓂᑑᐦᑳᐣᐠ ᑭᑑᐣᒋᑎᐯᐣᑖᑯᓯᓈᐋᐧ ᒦᓇ ᑭᑮᔕᑯᒋᐦᐋᐋᐧ, ᒋᑫᒪ ᐊᐦᐊᐁᐧ ᑳᑭᑭᓑᑳᑯᔦᐠ ᐊᐊᐧᔑᒣ ᑭᐦᒌᓀᐣᑖᑯᓯ ᐊᐦᐲᐨ ᐊᐦᐊᐁᐧ ᐊᐦᑮᐣᐠ ᑳᐊᔮᐨ. 5 ᐊᐦᑮᑳᐣᐠ ᐅᐣᒋᑎᐯᐣᑖᑯᓯᐊᐧᐠ, ᐁᑲᐧ ᑲᔦ ᐅᑖᓂᒨᑖᓈᐋᐧ ᐊᐦᑮᐃᐧ ᑫᑰᓇᐣ, ᒦᓇ ᐅᓇᐣᑐᑖᑯᐋᐧᐣ ᐊᐦᑮᑳᐣᐠ ᑳᐊᔮᓂᐣᐨ. 6 ᑮᓇᐃᐧᐣᐟ ᑭᔐᒪᓂᑑᐦᑳᐣᐠ ᑭᑑᐣᒋᑎᐯᐣᑖᑯᓯᒥᐣ. ᒦᓇ ᐱᑯᐦ ᐊᐃᐧᔭ ᑳᑭᐦᑫᓂᒫᐨ ᑭᔐᒪᓂᑑᐣ ᑭᓇᐣᑐᑖᑰᒥᐣ. ᔖᑰᐨ ᐱᑯᐦ ᐊᐃᐧᔭ ᐁᑳ ᑭᔐᒫᓂᑑᐦᑳᐣᐠ ᑳᐅᐣᒋ ᑎᐯᐣᑖᑯᓯᐨ ᑳᐃᐧᐣ ᒋᓇᐣᑐᑖᑯᔭᐣᐠ. ᒦᐦᐅᒫ ᐁᐧᐣᒋ ᓂᐦᓯᑕᐁᐧᓂᒫᔭᐣᐠ ᑌᐯᐧᐃᐧᓂ ᐊᐦᒑᐠ ᒦᓇ ᐊᐧᓂᔑᓄᐃᐧ ᐊᐦᒑᐠ.
ᑭᔐᒪᓂᑑ ᐅᓵᑭᐦᐃᐁᐧᐃᐧᐣ
7 ᑳᓵᑭᐦᐃᓂᓇᑯᐠ, ᑲᓵᑭᐦᐃᑎᒥᐣ ᒋᑫᒪ ᓵᑭᐦᐃᐁᐧᐃᐧᐣ ᑭᔐᒪᓂᑑᐦᑳᐣᐠ ᐅᐣᒌᒪᑲᐣ. ᑲᐦᑭᓇ ᐊᐃᐧᔭ ᑳᓵᑭᐦᐃᐁᐧᐨ ᑭᔐᒪᓂᑑᐦᑳᐣᐠ ᐅᐣᒋ ᓂᐦᑕᐃᐧᑭ ᒦᓇ ᐅᑭᐦᑫᓂᒫᐣ ᑭᔐᒪᓂᑑᐣ. 8 ᐱᑯᐦ ᐊᐃᐧᔭ ᐁᑳ ᑳᓵᑭᐦᐃᐦᐁᐧᐨ ᑳᐃᐧᐣ ᐅᑭᐦᑭᓂᒪᐦᓰᐣ ᑭᔐᒪᓂᑑᐣ, ᒋᑫᒪ ᑭᔐᒪᓂᑑ ᓵᑭᐦᐃᐁᐧᐃᐧᓂᓃᐃᐧ. 9 ᑭᔐᒪᓂᑑ ᑭᑮᐋᐧᐸᑕᐦᐃᑯᓈᐣ ᐁᓵᑭᐦᐃᑯᔭᐣᐠ. ᐅᑮ ᐲᒋᓂᔕᐦᐋᐧᐣ ᑳᐯᔑᑯᓂᐨ ᐅᑯᓯᐦᓴᐣ ᐅᐦᐅᒫ ᐊᐦᑮᐣᐠ, ᒋᑮᐅᐣᒋ ᐱᒫᑎᓯᔭᐣᐠ. 10 ᒦᐦᐅᐁᐧ ᓵᑭᐦᐃᐁᐧᐃᐧᐣ, ᑳᐃᐧᓃᐣ ᐱᑯᐦ ᐁᑮ ᓵᑭᐦᐋᔭᐣᐠ ᑭᔐᒪᓂᑑ, ᔖᑰᐨ ᐃᐧᐣ ᐁᑮ ᓵᑭᐦᐃᑰᔭᐣᐠ ᒦᓇ ᐁᑮ ᐱᒋᓂᔕᐦᐋᐧᐨ ᐅᑯᓯᐦᓴᐣ ᒋᑎᐸᐦᐃᑫᐦᑕᒫᑯᔭᐣᐠ ᑭᒪᒋᑑᑕᒨᐃᐧᓂᓈᐣ. 11 ᑳᓵᑭᐦᐃᓂᓇᑯᐠ, ᒫᐊᐧᐨ ᑭᑮᓵᑮᐦᐃᑯᓈᐣ ᑭᔐᒪᓂᑑ, ᒦᓇ ᑫᑮᓇᐃᐧᐣᐟ ᒋᓵᑭᐦᐃᑎᔭᐣᐠ. 12 ᑳᐃᐧᐣ ᐃᐧᐦᑳ ᐊᐃᐧᔭ ᐅᐋᐧᐸᒫᓰᐣ ᑭᔐᒪᓂᑑᐣ. ᔖᑰᐨ ᑮᓑᐱᐣ ᓵᑭᐦᐃᑎᔭᐣᐠ, ᑭᔐᒪᓂᑑ ᑭ ᑭᑭᓑᑳᑯᓈᐣ ᒦᓇ ᐅᓵᑭᐦᐃᐁᐧᐃᐧᐣ ᒥᑐᓂ ᑭᔖᑲᓑᑭᓀᓑᑲᑯᓈᐣ.
13 ᒦᐦᐅᒫ ᐁᐧᐣᒋ ᑭᐦᑫᐣᑕᒪᐣᐠ ᐁᑭᑭᐢᑲᐋᐧᔭᐣᐠ ᒦᓇ ᐁᑭᑭᓑᑳᑯᔭᐣᐠ, ᐁᑮ ᒦᓂᑯᔭᐣᐠ ᐅᑕᒑᐦᑲᐧᐣ. 14 ᑮᓇᐃᐧᐣᐟ ᔕ ᑭᑮᐋᐧᐸᐣᑖᒥᐣ ᑲᔦ ᑭᑮᑎᐹᒋᒫᒥᐣ ᐊᐦᐊᐁᐧ ᐅᑕᑖᒥᒫ ᐁᑮ ᐲᒋᓂᔕᐦᐋᐧᐨ ᐅᑯᓯᐦᓴᐣ ᒋᐱᒫᒋᐦᐃᐁᐧᓂᐨ ᐅᐦᐅᒫ ᐊᐦᑮᐣᐠ. 15 ᑮᓑᐱᐣ ᐊᐃᐧᔭ ᑫᑎᐹᒋᒫᑫᐧᐣ, ᒋᓴᓲᐣ ᒦᐦᐊᐁᐧ ᑭᔐᒪᓂᑑ ᐅᑯᓯᐦᓴᐣ, ᐅᑭᑭᓑᑲᐋᐧᐣ ᑭᔐᒪᓂᑑᐣ ᒦᓇ ᐅᑭᑭᓑᑳᑰᐣ ᑭᔐᒪᓂᑑᐣ. 16 ᐁᑲᐧ ᑮᓇᐃᐧᐣᐟ ᑭᑭᐦᑫᐣᑖᒥᐣ ᒦᓇ ᑭᑌᐯᐧᐦᑖᒥᐣ ᑳᑮᐃᔑ ᓵᑭᐦᐃᑯᔭᐣᐠ ᑭᔐᒪᓂᑑ.
ᑭᔐᒪᓂᑑ ᓵᑭᐦᐃᐁᐧᐃᐧᓂᓃᐃᐧ. ᐱᑯᐦ ᐊᐃᐧᔭ ᑫᐃᔑ ᐱᒫᑎᓯᑫᐧᐣ ᓵᑭᐦᐃᐁᐧᐃᐧᓂᐣᐠ ᐅᑭᑭᓑᑲᐋᐧᐣ ᑭᔐᒪᓂᑑᐣ, ᒦᓇ ᑭᔐᒪᓂᑑᐣ ᐅᑭᑭᓑᑳᑰᐣ. 17 ᐊᒦᐦᐅᐁᐧ ᓵᑭᐦᐃᐁᐧᐃᐧᐣ ᐁᐃᔑ ᔖᑲᓑᑭᓀᓑᑳᑯᔭᐣᐠ ᒋᑮᐅᐣᒋ ᐊᔮᔭᐣᐠ ᑌᐸᑫᓂᒧᐃᐧᐣ ᐊᐦᐲ ᐅᓇᐦᔓᐁᐧᐃᐧᑮᔑᑳᐠ, ᐊᓂᓑ ᑳᐃᔑᓈᑲᐧᓂᓂᐠ ᐅᐱᒫᑎᓯᐃᐧᐣ ᒦᐦᐃ ᑫᑮᓇᐃᐧᐣᐟ ᐁᐃᔑ ᐱᒫᑎᓯᔭᐣᐠ ᐅᐦᐅᒫ ᐊᐦᑮᐣᐠ. 18 ᑳᐃᐧᐣ ᑫᑯᐣ ᓭᑭᓯᐃᐧᐣ ᐊᔮᓯᓅᐣ ᓵᑭᐦᐃᐁᐧᐃᐧᓂᐣᐠ, ᔖᑯᐨ ᓵᑭᐦᐃᐁᐧᐃᐧᐣ ᓃᑲᑌᓂᒨᒪᑲᐣ ᓭᑭᓯᐃᐧᐣ, ᒋᑫᒪ ᓭᑭᓯᐃᐧᐣ ᐊᔮᒪᑲᐣ ᐅᓇᔓᐋᐧᓂᑰᐃᐧᐣ. ᐊᐃᐧᔭ ᑳᓭᑭᓯᐨ ᑳᐃᐧᐣ ᒥᑐᓂ ᐅᔖᑲᓑᑭᓀᓑᑳᑯᓰᐣ ᓵᑭᐦᐃᐁᐧᐃᐧᐣ.