ᐅᒥᓇᐧᒋᒧᐃᐧᐣ ᓭᐣᐟ ᒪᕒᐠ
ᒐᐧᐣ ᐅᓰᐣᑲᐦᐊᐣᑖᑫ ᑳᑮ ᑲᐧᔮᐣᒋᐦᑑᐨ ᒦᐦᑲᓈᓂ
“ᓂᐣᑲᐱᓃᑳᓂᓂᔕᐦᐋᐧ ᓂᑎᐹᒋᒧᐃᐧᓂᓃᒼ
ᑫᓃᑳᓂ ᑲᐧᔮᐣᒋᐦᑑᐨ ᑭᒦᐦᑲᓈᓂ.”
3 “ᒪᑌ ᑌᐯᐧᐃᐧᑕᒼ ᐯᔑᐠ ᐊᐃᐧᔭ ᐱᑲᐧᑕᐦᑮᐣᐠ ᐁᒪᑌᐃᐦᑭᑐᐨ,
‘ᑲᐧᔮᐣᒋᐦᑖᔪᐠ ᐅᒦᐦᑲᓈᒼ ᑳᑎᐯᐣᒋᑫᐨ,
ᑲᐧᔭᐦᑲᐧᒧᑖᔪᐠ ᑫᐃᔑ ᐱᒥᐊᔮᐨ.’ ”
4 ᒐᐧᐣ ᐅᓰᐣᑲᐦᐊᐣᑖᑫ ᑮᐲᔖ ᐱᑲᐧᑕᐦᑮᐣᐠ ᐁᑮ ᑲᑮᐦᑭᒧᐋᐧᑖᐣᐠ ᑫᐧᐦᑭᐱᒫᑎᓰᐃᐧ ᓰᐣᑲᐦᐊᐣᑖᑫᐃᐧᓂᓂ,
ᒋᑮᐅᐣᒋ ᐴᓀᐣᒋᑳᑌᑭᐣ ᒪᒋᑑᑕᒧᐃᐧᓇᐣ.
5 ᑲᐦᑭᓇ ᐊᐃᐧᔭᐠ ᒍᑎᔭ ᐊᐦᑮᐣᐠ ᒦᓇ ᒉᕒᐅᓴᓬᐊᒦᐣᐠ ᑳᐅᐣᒌᓂᐨ ᐅᑮ ᐱᓈᓯᐦᑳᑰᐣ.
ᐁᑮ ᐋᐧᐄᐧᐣᑕᒧᐋᐧᐨ ᐅᒪᒋᑑᑕᒧᐃᐧᓂᐋᐧ,
ᐅᑮᓰᐣᑲᐦᐊᐣᑖᑯᐋᐧᐣ ᐃᐦᐃᒫ ᒑᕒᑎᐣ ᓰᐲᐣᐠ.
6 ᒐᐧᐣ ᑮᐅᒪᑰᑖ ᐱᐦᑲᐧᑲᓀᐃᐧᐱᔑᓑᑭ ᐅᐊᐧᔮᓇᐣ ᐁᑮ ᐅᐣᒋ ᐅᔑᐦᒋᑳᑌᓂᐠ ᒦᓇ ᐊᐃᐧᔮᔒᓑ ᐊᐧᔮᓇᐣ ᐁᑮ ᑭᐦᒋᐱᓱᐨ.
ᒦᓇ ᐅᑮᐊᒫᐧᐣ ᐅᐸᐸᐦᑭᓀᐣ,
ᒦᓇ ᐋᒨ ᔔᑳᐣ.
7 ᐅᐦᐅᐁᐧ ᑮᐃᔑ ᐃᐧᐣᑕᒫᑫ,
“ᑯᑕᐠ ᑕᐱᑕᑯᔑᐣ ᐊᐊᐧᔑᒣ ᐁᑭᐦᒌᓀᐣᑖᑯᓯᐨ ᐊᐦᐲᐨ ᓃᐣ.
ᑳᐃᐧᐣ ᓂᑌᐸᑫᐣᑖᑯᓯᓰᐣ ᒋᑮᓇᐊᐧᑮᔮᐣ ᒋᐋᐸᐦᐊᒪᐧᐠ ᐅᒪᐦᑭᓯᓂᔮᐲᐣ.
8 ᓃᐣ ᓂᑮᓰᐣᑲᐦᐊᐣᑖᐃᐧᓈᐋᐧ ᓂᐱ ᐁᐦᐋᐸᒋᐦᑑᔮᐣ,
ᐄᐧᐣ ᑕᔒᐣ ᑲᓰᐣᑲᐦᐊᐣᑖᑯᐋᐧ ᑳᑲᓈᑎᓯᓂᐨ ᐊᐦᒑᐦᑲᐧᐣ.”
ᐅᓰᑲᐦᐊᐣᑖᑯᐃᐧᐣ ᒦᓇ ᐅᑲᑫᐧᒌᐦᐃᑯᐃᐧᐣ ᒋᓴᐢ
9 ᒣᑳᐧᐨ ᐃᐦᐃᐁᐧ ᑳᑮᐃᓯᓭᐠ ᒋᓴᐢ ᑮᐱᑕᑯᐦᔑᐣ,
ᓈᓴᕒᐊᐟ ᑖᐃᐧᓂᐣᐠ ᐃᐦᐃᒫ ᑳᓬᐃᓬᐄ ᐊᐦᑮᐣᐠ ᐁᑮᐅᐣᑐᐦᓭᐨ.
ᐁᑲᐧ ᐅᑮᓰᐣᑲᐦᐊᐣᑖᑰᐣ ᒐᐧᓇᐣ ᐃᐦᐃᒫ ᒑᕒᑎᐣ ᓰᐲᐣᐠ.
10 ᒋᓴᐢ ᐁᐦᐱᐊᑳᐧᓰᐨ ᓂᐲᐦᑲᐣᐠ,
ᐅᑮ ᐋᐧᐸᐣᑖᐣ ᑭᐦᒋᑮᔑᑯᓂ ᐁᐹᐦᑭᐣᑌᓭᓂᐠ ᒦᓇ ᐊᐦᒑᐦᑲᐧᐣ ᐁᐱᓈᔒᓂᑖᑯᐨ ᑖᐱᓑᑯᐨ ᐅᒦᒦ ᐁᐃᔑᓈᑯᓯᓂᐨ.
11 ᓅᐣᑖᑯᓯᐃᐧᐣ ᑮᐦᐅᐣᑐᓭᒪᑲᐣ ᑭᐦᒋᑮᔑᑰᐣᐠ,
“ᑮᐣ ᓂᑯᓯᐢ ᑳᓵᑭᐦᐃᓈᐣ ᑳᓇᐦᐃᓇᐁᐧᐦᐃᔑᔭᐣ.”
12 ᔐᒫᐠ ᐅᑮ ᐃᔑᐃᐧᓂᑰᐣ ᐊᐦᒑᐦᑲᐧᐣ ᐱᑲᐧᑕᐦᑮᐣᐠ.
13 ᑮᐊᔮ ᐱᑲᐧᑕᐦᑮᐣᐠ ᓃᒥᑕᓇ ᑮᔑᑳ,
ᐁᑮ ᑲᑫᐧᒋᐦᐃᑯᐨ ᒪᒋᒪᓂᑑᐣ,
ᐁᑮ ᐄᐧᒌᐋᐧᐨ ᐊᐃᐧᔮᔒᐦᔕᐣ,
ᒦᓇ ᐅᑮᔑᑰᐣ ᐅᑮ ᐸᒥᐦᐃᑰᐣ.
ᑳᑮᑲᓅᓂᑰᐃᐧᓯᐋᐧᐨ ᓂᐦᑕᒼ ᑭᐦᑭᓅᐦᐊᒪᐋᐧᑲᓇᐠ
14 ᐊᐦᐱᐣ ᑳᑮᑭᐸᐦᐋᐧᑲᓅᐨ ᒐᐧᐣ,
ᒋᓴᐢ ᑮᐱᑕᑯᐦᔑᐣ ᑳᓬᐃᓬᐄ ᐊᐦᑮᐣᐠ,
ᐁᑲᑮᐦᑭᒧᐁᐧᐨ ᑭᔐᒪᓂᑑᐣ ᐅᒥᓈᐧᒋᒧᐃᐧᓂᓃᐣ.
15 ᑮᐦᐃᑭᑐ,
“ᐋᔕ ᑎᐸᐦᐃᑲᐣ ᐅᒋᒋᐦᓭ,
ᒦᓇ ᐋᔕ ᐯᐦᔑᓈᑲᐧᓂᓂ ᑭᔐᒪᓂᑑ ᐅᑑᑭᒫᐃᐧᐃᐧᐣ.
ᑫᐧᐦᑭᐱᒫᑎᓯᐠ ᒦᓇ ᑌᐯᐧᐦᑕᒧᐠ ᒥᓈᐧᒋᒧᐃᐧᐣ.”
16 ᒣᑳᐧᐨ ᒋᓴᐢ ᐁᐱᒫᔕᑳᒣᐨ ᓈᓀᐤ ᑳᓬᐃᓬᐄ ᓵᑲᐦᐃᑲᓃᐣᐠ,
ᐅᑮᐋᐧᐸᒫᐣ ᓵᐃᒪᓅᐣ ᒦᓇ ᐋᐣᑕᕒᐅᐊᐧᐣ ᐄᐧᒋᐦᑫᐧᓯᐊᐧᐣ ᓵᐃᒪᐣ,
ᐁᐸᑭᑕᐦᐁᐧᓂᐨ ᓵᑲᐦᐃᑲᓃᐣᐠ ᐁᓅᒋᑭᓅᔐᐁᐧᐋᐧᐨ.
17 ᒋᓴᐢ ᐅᑮᑲᓅᓈᐣ,
“ᐱᒥᓂᔕᐦᐅᔑᔪᐠ ᑲᐃᔑᐦᐃᓈᐋᐧ ᒋᓅᒋᑭᓅᔐᐋᐧᓀᑳᐧ ᐊᓂᔑᓂᓂᐊᐧᐠ.”
18 ᔐᒫᐠ ᐅᑮᓇᑲᓈᐋᐧᐣ ᐅᑕᐦᓴᐲᐋᐧ ᐁᑮᐱᒥᓂᔕᐦᐋᐧᐋᐧᐨ ᒋᓴᓲᐣ.
19 ᒦᓇᐋᐧ ᐁᐊᓂᒫᒑᐨ ᐅᑮᐋᐧᐸᒫᐣ ᒉᒥᓲᐣ ᐅᑯᓯᐦᓴᐣ ᓭᐱᑏ,
ᒦᓇ ᒐᐧᐣ ᐅᐄᐧᒋᐦᑫᐧᓯᐊᐧᐣ,
ᒌᒫᓂᐣᐠ ᐁᑲᐧᔮᐣᒋᐦᐋᐋᐧᐨ ᐅᑕᐦᓴᐲᐋᐧᐣ.
20 ᔐᒫᐠ ᒋᓴᐢ ᐅᑮᓇᐣᑐᒫᐣ,
ᐅᑮᓇᑲᓈᐋᐧᐣ ᐅᑖᑖᒧᐋᐧᐣ ᓭᐱᑏᐣ ᒌᒫᓂᐣᐠ,
ᐊᐦᔑᐨ ᑲᔦ ᐊᓄᐦᑮᓈᑲᓇᐣ,
ᐁᑮᐱᒥᓂᔕᐦᐋᐧᐋᐧᐨ ᒋᓴᓲᐣ.
ᒋᓴᐢ ᐁᑮᓵᑭᒋᐁᐧᐱᓈᐨ ᒪᒋᐊᒑᐦᑲᐧᐣ
21 ᑮᐃᔖᐊᐧᐠ ᑲᐸᕒᓂᐊᒼ ᑖᐃᐧᓂᐣᐠ,
ᐁᑲᐧ ᐊᐦᐲ ᐅᑕᓀᐧᐱᐃᐧᑮᔑᑳᒥᐋᐧ ᐁᐦᐅᒋᒋᐦᓭᓂᐠ ᒋᓴᐢ ᑮᐲᐣᑎᑫ ᒍᐊᐧᐠ ᐅᑕᔭᒥᐦᐋᐃᐧ ᒫᐊᐧᒋᐦᐃᑐᐃᐧᑲᒥᑯᐋᐧ ᐁᑮ ᒫᒋᑭᐦᑭᓅᐦᐊᒫᑫᐨ.
22 ᐃᐦᐃᒫ ᐊᓂᔑᓂᓂᐊᐧᐠ ᑳᐊᔮᐋᐧᐨ ᑮᒫᒪᐦᑳᑌᐣᑕᒨᐠ ᑳᐃᔑ ᑭᐦᑭᓅᐦᐊᒫᑫᓂᐨ,
ᐁᑮᐃᔑ ᑭᐦᑭᓅᐦᐊᒫᑫᐨ ᑖᐱᓑᑯᐨ ᐊᐃᐧᔭ ᑳᐊᔮᐨ ᑎᐯᓂᒥᑎᓱᐃᐧᐣ,
ᑳᐃᐧᐣ ᑖᐱᓑᑯᐨ ᑳᑭᐦᑭᓅᐦᐊᒫᑫᐋᐧᐨ ᐅᓇᐦᔓᐁᐧᐃᐧᓂ.
23 ᐁᑲᐧ ᑮᐊᔮ ᓈᐯ ᐊᔭᒥᐦᐋᐃᐧ ᒫᐊᐧᒋᐦᐃᑐᐃᐧᑲᒥᑯᐣᐠ ᒪᒋᐊᐦᒑᐦᑲᐧᐣ ᐁᑮᐲᐣᒋᓑᑳᑯᐨ,
ᐁᑮᔖᑯᐁᐧᐨ ᐁᐃᐦᑭᑐᐨ,
24 “ᑫᑯᓀᐣ ᓇᐣᑕᐁᐧᐣᑕᒪᐃᐧᔑᔮᐣᐠ ᑮᐣ ᒋᓴᐢ ᓈᓴᕒᐊᑎᐣᐠ ᑳᐅᐣᒌᔭᐣ ?
ᑭᐱᓂᐦᔑᐊᐧᓈᒋᐦᐃᔑᓈᐣ ᓇ?
ᑭᑭᐦᑫᓂᒥᐣ ᐊᐊᐧᓀᓂᐃᐧᔭᐣ,
ᑮᐣ ᑳᑲᓈᑎᓯᔭᐣ ᑭᔐᒪᓂᑑᐦᑳᐣᐠ ᑳᐅᐣᒌᔭᐣ!”
25 ᒋᓴᐢ ᐅᑮ ᑭᐦᒋᑲᓅᓈᐣ,
“ᓴᑲᒫᒌᐣ!
ᓵᑲᐦᐊᐣ ᐃᐦᐃᒫ ᓈᐯᐦᑳᐣᐠ!”
26 ᓈᐯ ᑳᐃᐧᐣ ᒋᐅᐣᒋ ᓴᑲᒫᒋᐊᔮᐨ ᐁᑮᑭᐦᒋᓂᓂᐣᑭᐦᓭᐨ,
ᐊᐦᐋᐁᐧ ᒪᒋᐊᐦᒑᐠ ᐁᑮᑭᐦᒋᔖᑯᐁᐧᐨ ᑮᐱᓵᑲᐦᐋᐣ.
27 ᑲᐦᑭᓇ ᐊᓂᔑᓂᓂᐊᐧᐠ ᑮᒫᒪᐦᑳᑌᐣᑕᒨᐠ ᒦᓇ ᐁᑮᑲᑫᐧᒋᒥᑐᐋᐧᐨ,
“ᑫᑯᓀᐣ ᐅᐦᐅᐁᐧ?
ᐅᓑᑭ ᑭᐦᑭᓅᐦᐊᒫᑫᐃᐧ ᓇ ᐅᐦᐅᐁᐧ?
ᑖᐱᓑᑯᐨ ᑎᐯᓂᒥᑎᓱᐃᐧᓂᐣᐠ ᐁᐃᔑᑲᓅᓈᐨ ᒪᒋᐊᐦᒑᐦᑲᐧᐣ ᑲᔦ ᐁᓇᓈᐦᐃᑖᑯᐨ.”
28 ᐅᑎᐹᒋᒥᑰᐃᐧᐣ ᐄᐧᐸᐨ ᑮᒥᓯᐦᑌᓭᓂ ᐃᐦᐃᒫ ᒥᓯᐁᐧ ᑳᓬᐃᓬᐄ ᐊᐦᑮᐣᐠ.
ᒋᓴᐢ ᐁᓇᐣᑕᐃᐧᐦᐋᐨ ᒥᐦᔒᐣ ᐊᐃᐧᔭᐣ
29 ᐁᑲᐧᐦᐱᐣ ᑳᐱᓵᑲᐦᐊᒧᐦᐋᐧᐨ ᐅᑕᔭᒥᐦᐋᐃᐧ ᒫᐊᐧᒋᐦᐃᑐᐃᐧᑲᒥᑯᐋᐧ ᐁᑮᐄᐧᒌᐋᐧᐋᐧᐨ ᒉᒥᓲᐣ ᒦᓇ ᒐᐧᓇᐣ ᑮᐲᐣᑎᑫᐊᐧᐠ ᓵᐃᒪᓅᐣ ᒦᓇ ᐋᐣᑕᕒᐅᐊᐧᐣ ᐅᐋᐧᑲᐦᐃᑲᓂᓃᐣ.
30 ᓵᐃᒪᐣ ᐅᓯᑯᐦᓴᐣ ᑮᐱᒥᐦᔑᓅᐣ ᐁᑮ ᑭᓯᓲᐦᓭᓂᐨ,
ᐁᑲᐧ ᔐᒫᐠ ᐅᑮᐄᐧᐣᑕᒪᐋᐧᐋᐧᐣ ᒋᓴᓲᐣ.
31 ᒋᓴᐢ ᐅᑮᓈᓯᐦᑲᐋᐧᐣ ᐁᑮᓴᑭᓂᐣᒌᓈᐨ ᒦᓇ ᐁᑮᐄᐧᒋᐦᐋᐨ ᒋᐊᐧᓂᓑᑳᓂᐨ.
ᐅᑮᓇᑲᓂᑯᐣ ᑭᓯᓱᐋᐧᐦᐱᓀᐃᐧᓂ ᒦᓇ ᐅᑮᐊᓂᒫᒌ ᐸᒥᐦᐃᑯᐋᐧᐣ.
32 ᐃᐦᐃᐁᐧ ᐁᐦᐊᓅᓈᑯᐦᔑᐣᐠ ᐁᐃᓑᑳᐧᐸᐣᑭᐦᔑᒧᐣᐠ ᐊᐃᐧᔭᐠ ᐅᑮᐦᐲᑕᒪᐋᐧᐋᐧᐣ ᒋᓴᓲᐣ ᑲᐦᑭᓇ ᑳᔮᐦᑯᓯᓂᐨ,
ᒦᓇ ᑳᐲᐣᒋᓑᑳᑯᐋᐧᐨ ᒪᒋᐊᐦᒑᐦᑲᐧᐣ.
33 ᑲᐦᑭᓇ ᐊᐃᐧᔭᐠ ᐃᐦᐃᒫ ᑖᐃᐧᓂᐣᐠ ᑮᒫᐊᐧᒋᐦᐃᑎᐊᐧᐠ ᐃᓑᑳᐧᐣᑌᒥᐣᐠ.
34 ᒋᓴᐢ ᐅᑮ ᓇᐣᑕᐃᐧᐦᐋᐣ ᒥᐦᔒᐣ ᐋᓃᓂᑯ ᓇᓈᐣᑐᐠ ᑳᐃᓈᐦᐱᓀᓂᐨ,
ᒥᐦᔒᐣ ᑲᔦ ᐅᑮᓵᑭᒋᐦᐋᐣ ᒪᒋᐊᐦᒑᐦᑲᐧᐣ,
ᒋᓴᐢ ᑳᐃᐧᐣ ᒋᐅᐣᒋ ᐸᑭᑎᓈᐨ ᒋᑲᑭᐦᑐᓂᐨ ᒪᒋᐊᐦᒑᐦᑲᐧᐣ,
ᐊᓂᓑ ᐁᑮᑭᐦᑫᓂᒥᑯᒋᐣ ᐊᐊᐧᓀᓂᐃᐧᐨ.
ᒋᓴᐢ ᐁᑮᐸᐹᒥᑲᑮᐦᑫᐧᐨ ᑳᓬᐃᓬᐄ ᐊᐦᑮᐣᐠ
35 ᐄᐧᐸᐨ ᐁᑭᔐᐹᔮᓂᐠ,
ᑭᔮᐸᐨ ᐁᑎᐱᐦᑳᐠ,
ᒋᓴᐢ ᑮᐊᐧᓂᓑᑳ,
ᐃᐦᐃᒫ ᑮᐅᐣᒋ ᒫᒑ ᐋᐧᑲᐦᐃᑲᓂᐣᐠ ᐄᐧᓀᐦᑕ ᑮᐃᔖ ᑳᐃᔑ ᐸᔭᐦᑕᑫᐣᑖᑲᐧᓂᓂᐠ ᐁᑮᐊᐣᑕᐃᐧ ᐊᔭᒥᐦᒋᑫᐨ.
36 ᓵᐃᒪᐣ ᒦᓇ ᑳᐄᐧᒌᐊᐧᒋᐣ ᑮᒫᒑᐊᐧᐠ ᐁᑮ ᓇᓈᐣᑐᓇᐋᐧᐋᐧᐨ.
37 ᐁᑲᐧᐦᐱᐣ ᑳᒥᐦᑲᐋᐧᐋᐧᐨ ᐅᑮᐦᐃᓈᐋᐧᐣ,
“ᑲᐦᑭᓇ ᐊᐃᐧᔭᐠ ᑭᓇᓈᐣᑐᓈᑰᐠ.”
38 ᒋᓴᐢ ᐅᑮᓇᐦᑲᐁᐧᔑᐦᐋᐣ,
“ᐁᑲᐧ ᑲᒫᒑᒥᐣ ᑯᑕᑭᔭᐣ ᑖᐃᐧᓇᐣ ᑳᐃᔑᐊᔮᑭᐣ ᒋᐃᔖᔭᐣᐠ,
ᐃᐦᐃᒫ ᑲᔦ ᒋᐊᐣᑕᐃᐧ ᑲᑮᐦᑭᒥᐁᐧᔮᐣ ᐊᓂᓑ ᒦᐦᐅᐁᐧ ᑳᑮᐅᐣᒋ ᐲᔖᔮᐣ.”
39 ᒥᓯᐁᐧ ᑮᐸᐹᒥᐊᔮ ᐃᐦᐃᒫ ᑳᓬᐃᓬᐄ ᐊᐦᑮᐣᐠ,
ᐁᑮ ᑲᑮᐦᑭᒥᐁᐧᐨ ᒍᐊᐧᐠ ᐅᑕᔭᒥᐦᐋᐃᐧ ᒫᐊᐧᒋᐦᐃᑐᐃᐧᑲᒥᑯᐋᐧᐣᐠ ᒦᓇ ᐁᑮᓵᑭᒋᐦᐋᒋᐣ ᒪᒋᐊᐦᒑᐦᑲᐧᐣ.
ᒋᓴᐢ ᐅᓇᐣᑕᐃᐧᐦᐋᐣ ᐅᐊᐧᔕᑳᐣᐠ ᑳᒪᒑᐦᐱᓀᓂᐨ
40 ᐯᔑᐠ ᓈᐯᐊᐧᐣ ᐅᐊᐧᔕᑳᐣᐠ ᑳᒪᒑᐦᐱᓀᓂᐨ ᐅᑮᐱᓈᓯᐦᑳᑰᐣ ᒋᓴᐢ,
ᐅᑮᐸᑯᐦᓭᓂᒥᑰᐣ ᐁᐦᐆᒋᐦᒌᑲᐧᓇᐲᐦᑖᑯᐨ ᐁᐦᐃᑯᐨ,
“ᑮᓑᐱᐣ ᐃᓀᐣᑕᒪᐣ ᑲᑮᓇᐣᑕᐃᐧᐦᐃᓑ.”
41 ᒋᓴᐢ ᒥᑐᓂ ᐁᑮᑭᑎᒫᑫᓂᒫᐨ ᑮᔔᓂᐦᑫᓂ,
ᐅᑮᓵᒥᓈᐣ ᐁᑮᐦᐃᓈᐨ,
“ᓂᑎᓀᐣᑖᐣ ᑲᓇᐣᑕᐃᐧᐦᐃᑰᐃᐧᐢ.”
42 ᔐᒫᐠ ᐅᑮᓇᑲᓂᑯᐣ ᒪᒑᐦᐱᓀᐃᐧᓂ ᒦᓇ ᑮᒥᓄᐊᔮ.
43 ᐁᑲᐧ ᒋᓴᐢ ᔐᒫᐠ ᐅᑮᓃᑲᑌᓂᔕᐦᐋᐧᐣ ᐁᑮᑲᓅᓈᐨ,
44 “ᑳᐃᐧᐣ ᐊᐃᐧᔭ ᐄᐧᐣᑕᒪᐤ,
ᒫᒑᐣ ᐊᐣᑕᐋᐧᐸᒼ ᐊᔭᒥᐦᐁᐃᐧᑭᒫ ᒋᐋᐧᐸᒥᐠ ᒦᓇ ᓇᐣᑕᐃᐧ ᐸᑭᑎᓇᐣ ᑭᐸᑭᑎᓈᐦᓱᐣ,
ᑖᐱᓑᑯᐨ ᒨᓯᐢ ᑳᑮᐃᔑ ᐄᐧᐣᑕᒫᑯᔦᐠ ᑭᐸᔭᐦᑭᐦᐃᑯᐃᐧᐣ ᐅᐣᒋ,
ᒦᓇ ᒋᐅᐣᒋ ᑭᐦᑫᐣᑕᒧᐋᐧᐨ ᐊᐃᐧᔭᐠ ᐁᒥᓄᐊᔮᔭᐣ.”
45 ᐊᐦᐊᐁᐧ ᓈᐯ ᑮᒫᒑ ᐋᐣᒋᑯ ᐱᑯᐦ ᐊᐃᐧᔭᐣ ᐁᑮᐄᐧᐣᑕᒪᐋᐧᐨ,
ᐁᑲᐧᐦᐱᐣ ᒋᓴᐢ ᑳᐃᐧᐣ ᒋᑮᐅᐣᒋ ᐲᐣᑎᑫᐨ ᑖᐃᐧᓂᐣᐠ ᒥᐦᓴᐋᐧᐨ ᐱᑯᐦ ᐊᐦᐱᐣ ᒋᐋᐧᐸᒫᑲᓅᐨ.
ᐁᑲᐧ ᐱᑲᐧᑕᐦᑮᐣᐠ ᑮᐊᔮ ᐁᑳ ᐊᐃᐧᔭᐣ ᑳᐃᔑ ᐊᔮᓂᐣᐨ,
ᔖᑰᐨ ᐱᑯᐦ ᐅᑮᐱᓈᓯᐦᑳᑰᐣ ᐊᐃᐧᔭᐣ ᐱᑯᐦ ᐋᐣᑎ ᐁᐅᐣᑐᐦᓭᓂᐨ.