ᒋᓴᐢ ᑳᓇᐣᑕᐃᐧᐦᐋᐨ ᑳᓂᐴᐋᐧᐦᐱᓀᓂᐨ
2
ᐊᐦᐲ ᒦᓇ ᐁᓂᑲᑮᔑᑳᓂᐠ ᒋᓴᐢ ᑮᐱᑮᐁᐧᑕᑯᔑᐣ ᑲᐸᕒᓂᐊᒼ ᑖᐃᐧᓂᐣᐠ,
ᐅᑮᓅᐣᑕᓈᐋᐧ ᐁᑮᐱᑮᐁᐧᓂᐨ ᑳᐃᔑᑲᐯᐦᔑᐨ.
2 ᒥᐦᔒᐣ ᑮᒫᐊᐧᒋᐦᐃᑐᐊᐧᐠ ᐲᓂᓑ ᐊᐦᐱᐣ ᐁᑳ ᐁᑮ ᐅᐣᒋᑕᐋᐧᐠ ᑳᐃᐧᐣ ᑲᓇᑫ ᐊᑲᐧᒋᐃᓑᑳᐧᐣᑌᐣᐠ,
ᐁᑲᑮᐦᑭᒫᒋᐣ ᑭᔐᒪᓂᑑ ᐅᑎᐦᑭᑐᐃᐧᐣ.
3 ᓈᐯᐊᐧᐠ ᑮᐲᔖᐊᐧᐠ ᐁᑮᐲᑕᒪᐋᐧᐋᐧᐨ ᑳᓂᐴᐋᐧᐦᐱᓀᓂᐨ,
ᑮᓃᐃᐧᐊᐧᐠ ᐃᑭᐁᐧᓂᐊᐧᐠ ᑳᑮᐱᒥᐃᐧᓂᑯᐨ.
4 ᑳᐃᐧᐣ ᐅᑮᐅᐣᒋ ᑲᓑᑭᐦᑑᓰᓈᐋᐧ ᐯᔓᐣᐨ ᒋᐱᓈᓯᐦᑲᐋᐧᐋᐧᐨ ᒋᓴᓲᐣ ᐊᓂᓑ ᐁᐲᐦᒋ ᒥᐦᔒᓄᓈᓂᐊᐧᐣᐠ,
ᐅᑮ ᐸᑲᐧᓀᐱᑑᓈᐋᐧ ᐊᐧᑭᑕᐸᐠ ᐋᐧᑲᐦᐃᑲᓂᐣᐠ ᑎᐱᓑᑰᐨ ᒋᓴᐢ ᑳᐃᔑᐊᔮᐨ,
ᐁᑮᐅᐣᒋ ᓃᐦᓵᐱᐦᑫᓈᐋᐧᐨ ᑭᑭᐊᐦᐱᐦᔑᒧᐣ ᑳᓂᐴᐋᐧᐦᐱᓀᓂᐨ.
5 ᐊᐦᐲ ᒋᓴᐢ ᑳᐋᐧᐸᐣᑕᐣᐠ ᐅᑌᐯᐧᔦᐣᑕᒧᐃᐧᓂᐋᐧ ᐅᑮᐦᐃᓈᐣ ᐅᓂᐴᐋᐧᐦᐱᓀᐣ,
“ᓂᑯᓯᐢ ᑭᐴᓀᐣᑕᒫᑰ ᑭᒪᒋᑑᑕᒧᐃᐧᓇᐣ.”
6 ᐋᐣᑕ ᐃᐦᐃᒫ ᑮᓇᒪᑕᐱᐊᐧᐠ ᑳᑭᐦᑭᓅᐦᐊᒫᑫᐋᐧᐨ ᐅᓇᐦᔓᐁᐧᐃᐧᓂ ᐁᑮ ᒫᒥᑐᓀᐣᑕᒧᐋᐧᐨ,
7 “ᑫᑯᓀᐣ ᐁᐧᐣᒋ ᐃᔑᐊᔮᒥᐨ ᐊᐧᐦᐊᐁᐧ ᓈᐯ?
ᑳᐸᐹᐦᑖᒧᐨ!
ᐊᐊᐧᓀᐣ ᑫᑮᐴᓀᐣᑕᒫᑫᐨ ᒪᒋᑑᑕᒧᐃᐧᓇᐣ ᐄᐧᐣ ᐱᑯᐦ ᐁᐦᑕ ᑭᔐᒪᓂᑑ?”
8 ᔐᒫᐠ ᒋᓴᐢ ᐅᑮᑭᐦᑫᐣᑖᐣ ᐅᑕᐦᒑᐦᑰᐣᐠ ᐋᓃᐣ ᐁᐃᔑ ᒫᒥᑐᓀᐣᑕᒥᓂᐨ ᐅᑌᐦᐄᐋᐧᐣᐠ.
ᐅᑮᐦᐃᓈᐣ,
“ᑫᑯᓀᐣ ᐃᐦᐃᐁᐧ ᐁᐧᐣᒋ ᒫᒥᑐᓀᐣᑕᒣᐠ ᐅᓄᐁᐧᓂᐊᐧᐣ ?
9 ᑫᑯᓀᐣ ᐁᐧᐣᒋ ᐁᐧᐣᑕᐠ ᒋᑮᐃᓈᑲᓄᐦᐸᐣ ᐅᓂᐴᐋᐧᐦᐱᓀ,
‘ᑭᐴᓀᐣᑕᒫᑰ ᑭᒪᒋᑑᑕᒧᐃᐧᓇᐣ,’
ᓈᐣᑕ ᒋᐃᓈᑲᓅᐨ,
‘ᐊᐧᓂᓑᑳᐣ,
ᐅᑖᐦᐱᓇᐣ ᑭᑕᐱᐦᔑᒧᐣ,
ᐱᒧᐦᓭᐣ ’?
10 ᒋᐅᐣᒋ ᑭᐦᑫᐣᑕᒣᐠ ᐃᓂᓃᐤ ᐅᑯᓯᐦᓴᐣ ᐁᐦᐊᔮᐨ ᑲᓑᑭᐦᐅᐃᐧᐣ ᐅᐦᐅᒫ ᐊᐦᑮᐣᐠ ᒋᑮᐴᓀᐣᑕᒫᑫᐨ ᒪᒋᑑᑕᒧᐃᐧᓇᐣ.”
ᐅᑮᐦᐃᓈᐣ ᑳᓂᐴᐋᐧᐦᐱᓀᓂᐨ,
11 “ᐊᐧᓂᓑᑳᐣ ᑭᑎᓂᐣ,
ᐅᑖᐦᐱᓇᐣ ᑭᑕᐱᐦᔑᒧᐣ,
ᑭᐋᐧᑲᐦᐃᑲᓂᐣᐠ ᐃᔑᑮᐁᐧᐣ.”
12 ᔐᒫᐠ ᑮᐊᐧᓂᓑᑳ,
ᐁᑮᐅᑖᐦᐱᓇᐣᐠ ᐅᑕᐱᐦᔑᒧᐣ,
ᐁᑮᒫᒑᐨ ᑲᐦᑭᓇ ᐊᐃᐧᔭᐣ ᐁᑮᐋᐧᐸᒥᑯᐨ,
ᐁᑲᐧ ᑲᐦᑭᓇ ᑮᒫᒪᐦᑳᑌᐣᑕᒨᐠ ᒦᓇ ᐁᑮᒫᒥᐦᒋᒫᐋᐧᐨ ᑭᔐᒪᓂᑑᐣ ᐁᐃᐦᑭᑐᐋᐧᐨ,
“ᑳᐃᐧᓃᐦᑳ ᐅᐦᐅᐁᐧ ᑫᑰᐣ ᒋᐃᔑ ᐋᐧᐸᐣᑕᒫᐣᐠ!”
ᒋᓴᐢ ᑳᑮᓇᐣᑐᒫᐨ ᓬᐄᐸᔭᐣ
13 ᒋᓴᐢ ᒦᓇᐋᐧ ᓈᓀᐤ ᓵᑲᐦᐃᑲᓃᐣᐠ ᑮᐦᐊᓃᔖ,
ᒥᐦᔒᐣ ᐊᐃᐧᔭᐣ ᐅᑮ ᐱᓈᓯᐦᑳᑰᐣ,
ᒦᓇ ᐅᑮ ᐊᓂᒫᒌᑭᐦᑭᓅᐦᐊᒪᐋᐧᐣ.
14 ᐁᐦᐊᓂ ᐹᐱᒧᐦᓭᐨ ᐅᑮᐋᐧᐸᒫᐣ ᓬᐄᐹᔭᐣ ᐅᑯᓯᐦᓴᐣ ᐊᓬᐱᐊᐢ ᐁᐦᐊᐱᓂᐨ,
ᐃᐦᐃᒫ ᑳᐃᔑ ᒫᐊᐧᐣᑑᓈᐨ ᑎᐸᐦᐃᑫᐃᐧ ᔔᓂᔮᓇᐣ.
ᒋᓴᐢ ᐅᑮᐦᐃᓈᐣ,
“ᐱᒥᓂᔕᐦᐅᔑᐣ.”
ᐁᑲᐧ ᓬᐄᐸᔾ ᑮᐸᓯᑮᐧ ᐁᑮᐱᒥᓂᔕᐦᐋᐧᐨ.
15 ᒣᑳᐧᐨ ᒋᓴᐢ ᐁᐄᐧᐦᓯᓂᐨ ᓬᐄᐹᔭᐣ ᐅᐋᐧᑲᐦᐃᑲᓂᐣᐠ,
ᒥᐦᔒᐣ ᑳᒫᐊᐧᐣᑑᓈᐋᐧᐨ ᑎᐸᐦᐃᑫᐃᐧ ᔔᓂᔮᓇᐣ ᒦᓇ ᐅᒪᒋᐱᒫᑎᓴᐠ ᐅᑮ ᐄᐧᒋᐄᐧᐦᓯᓃᒥᑰᐣ ᑕᑯ ᑲᔦ ᐅᑭᐦᑭᓅᐦᐊᒪᐋᐧᑲᓇᐣ,
ᑮᒥᐦᔒᓄᐊᐧᐣ ᑳᑮᐱᒥᓂᔕᐦᐅᑯᐨ.
16 ᐁᑲᐧᐦᐱᐣ ᑳᑭᐦᑭᓅᐦᐊᒫᑫᐋᐧᐨ ᐅᓇᐦᔓᐁᐧᐃᐧᓂ ᐃᑭᐁᐧᓂᐊᐧᐠ ᐯᕒᐊᓰᐃᐧᓂᓂᐊᐧᐠ ᑳᐋᐧᐸᒫᐋᐧᐨ ᐁᐄᐧᒋᐄᐧᐦᓯᓃᒫᓂᐨ ᑳᒫᐊᐧᐣᑑᓈᓂᐨ ᑎᐸᐦᐃᑫᐃᐧ ᔔᓂᔮᓇᐣ ᒦᓇ ᐅᒪᒋᐱᒫᑎᓴᐣ,
ᐅᑮ ᑲᑫᐧᒋᒫᐋᐧᐣ ᐅᑭᐦᑭᓅᐦᐊᒪᐋᐧᑲᓂᓃᐣ,
“ᐋᐣᑕᔒᓂᐦᐃ ᐁᐧᐣᒋ ᐄᐧᒋᐄᐧᐦᓯᓃᒫᒋᐣ ᑳᒫᐊᐧᐣᑑᓈᓂᐨ ᑎᐸᐦᐃᑫᐃᐧ ᔔᓂᔮᓇᐣ ᒦᓇ ᐅᒪᒋᐱᒫᑎᓴᐣ ?”
17 ᐊᐦᐲ ᒋᓴᐢ ᑳᓅᐣᑕᐣᐠ ᐅᑮᐦᐃᓈᐣ,
“ᐃᑭᐁᐧᓂᐊᐧᐠ ᑳᒥᓄᐊᔮᐋᐧᐨ ᑳᐃᐧᐣ ᐅᓇᐣᑕᐁᐧᓂᒫᐋᐧᓰᐣ ᒪᓑᑭᐦᑮᐃᐧᓂᓂᐊᐧᐣ,
ᐃᑭᐁᐧᓂᐊᐧᐠ ᑕᓑ ᑳᔮᐦᑯᓯᐋᐧᐨ.
ᑳᐃᐧᓃᐣ ᐃᑭᐁᐧᓂᐊᐧᐠ ᐅᑲᐧᔭᐦᑳᐧᑎᓴᐠ ᑳᐅᐣᒋ ᐲᔖᔮᐣ,
ᐃᑭᐁᐧᓂᐊᐧᐠ ᐅᔕ ᐅᒪᒋᐱᒫᑎᓴᐠ.”
ᒋᓴᐢ ᑮᑲᑫᐧᑌ ᐹᐊᐧᓃᐦᐃᑎᓯᐃᐧᐣ
18 ᒐᐧᐣ ᐅᑭᐦᑭᓅᐦᐊᒪᐋᐧᑲᓇᐣ ᒦᓇ ᐯᕒᐊᓰᐃᐧᓂᓂᐊᐧᐠ ᑮᑑᑕᒨᐠ ᐁᐹᐊᐧᓃᐦᐃᑎᓯᐋᐧᐨ.
ᓈᐣᑕ ᐊᐃᐧᔭᐠ ᐅᑮᐱᓈᓯᐦᑲᐋᐧᐋᐧᐣ ᒋᓴᓲᐣ ᐁᑲᑫᐧᒋᒫᐋᐧᐨ,
“ᐋᐣᑕᔒᓂᐦᐃ ᐁᐧᐣᒋᑑᑕᒥᓂᐨ ᒐᐧᐣ ᐅᑭᐦᑭᓅᐦᐊᒪᐋᐧᑲᓇᐣ ᒦᓇ ᐯᕒᐊᓰᐃᐧᓂᓂᐊᐧᐠ ᐅᑭᐦᑭᓅᐦᐊᒪᐋᐧᑲᓄᐋᐧ ᐁᐹᐊᐧᓃᐦᐃᑎᓯᐋᐧᐨ,
ᐁᑲᐧ ᑮᐣ ᑭᐦᑭᓅᐦᐊᒪᐋᐧᑲᓇᐠ ᐁᑳ ᐁᐹᐊᐧᓃᐦᐃᑎᓯᐋᐧᐨ?”
19 ᒋᓴᐢ ᐅᑮᓇᐦᑲᐁᐧᔑᐦᐋᐣ,
“ᐋᓃᐣ ᑕᓑ ᑫᑮᑑᑕᒧᐋᐧᐦᐸᐣ ᑳᓇᐣᑐᒫᒋᐣ ᐅᐄᐧᑭᐦᑑ ᒋᐹᐊᐧᓃᐦᐃᑎᓱᐋᐧᐨ ᒣᑳᐧᐨ ᐁᐄᐧᒌᐋᐧᒋᐣ ?
ᑳᐃᐧᐣ ᑕᑮᑑᑖᓰᐊᐧᐠ ᒣᑳᐧᐨ ᐁᐄᐧᒌᐋᐧᐋᐧᐨ ᐅᐄᐧᑭᐦᑑᐣ.
20 ᐯᔑᑳᐧ ᑎᐸᐦᐃᑲᐣ ᑕᐅᒋᐦᒋᓭ ᐊᐦᐊᐁᐧ ᓈᐯ ᑳᐄᐧᑭᐦᑐᐨ ᒋᐅᑖᐦᐱᓈᑲᓅᐨ,
ᒦᐦᐃᒫᑕᓑ ᑮᔑᑳᐠ ᐁᑲᐧ ᑫᐹᐊᐧᓃᐦᐃᑎᓯᐋᐧᐨ.
21 “ᑳᐃᐧᐣ ᐊᐃᐧᔭ ᐅᑕᑯᐦᑕᐦᐋᓰᐣ ᐅᓑᑭ ᐸᑳᐧᓃᑭᓄᓂ ᒋᐸᑲᐧᐦᐊᐣᐠ ᑫᐦᑌᒪᑰᑖᓂ.
ᑮᓑᐱᐣ ᐅᐦᐅᐁᐧ ᑑᑕᐣᐠ ᐃᐦᐃᐁᐧ ᐅᓑᑭᐸᑳᐧᓃᑭᐣ ᑕᐊᒍᐁᐧᑭᐦᓭ ᐊᐊᐧᔑᒣ ᐱᑯᐦ ᑕᓈᓂᑭᐦᓭ.
22 ᒦᓇ ᑳᐃᐧᐣ ᐊᐃᐧᔭ ᐅᓰᑭᓈᐦᓰᐣ ᐅᓑᑭ ᔔᒥᓈᐳᓂ ᐃᐦᐃᒫ ᑫᐦᑌ ᔔᒥᓈᐳᐊᐧᔑᐣᐠ.
ᑮᓑᐱᐣ ᐅᐦᐅᐁᐧ ᑑᑕᐣᐠ,
ᑕᐲᑯᐦᓭ ᔔᒥᓈᐳᐊᐧᓑ ᒦᓇ ᔔᒥᓈᐳ ᑕᓂᐦᔑᐊᐧᓈᑕᐣ.
ᐅᑲᓰᑭᓈᐣ ᐅᓑᑭᔔᒥᓈᐳᓂ ᐃᐦᐃᒫ ᐅᓑᑭ ᔔᒥᓈᐳᐊᐧᔑᐣᐠ.”
ᒋᓴᐢ ᐁᑲᑫᐧᒋᒫᑲᓅᐨ ᐊᓀᐧᐱᐃᐧᑮᔑᑳᓂ ᐅᐣᒋ
23 ᐯᔑᑳᐧ ᒣᑳᐧᐨ ᒍᐊᐧᐠ ᐅᑕᓀᐧᐱᐃᐧᑮᔑᑳᒥᐋᐧ ᒋᓴᐢ ᑮᐊᓂᔖᐳᓑᑳ ᐃᐦᐃᒫ ᐸᐦᑫᐧᔑᑲᓂ ᑭᐦᑎᑳᓂᐣᐠ ᒦᓇ ᐅᑭᐦᑭᓅᐦᐊᒪᐋᐧᑲᓇᐣ ᐁᐊᓂᐱᒧᐦᓭᐋᐧᐨ ᐅᑮ ᐊᓂᒫᒪᓂᐱᑑᓈᐋᐧ ᐸᐦᑫᐧᔑᑲᓂ ᑭᐦᑎᑳᓇᐣ.
24 ᐯᕒᐊᓰᐃᐧᓂᓂᐊᐧᐠ ᐅᑮᐦᐃᓈᐋᐧᐣ,
“ᐃᓈᐱᐠ,
ᐋᓃᐣ ᐁᐧᐣᒋᑑᑕᒧᐋᐧᐨ ᐅᐦᐅᐁᐧᓂ ᐁᑳ ᐁᐦᐃᓇᐦᑌᐠ ᒋᑑᒋᑳᑌᑭᐸᐣ ᐁᐊᓀᐧᐱᐃᐧᑮᔑᑳᐠ ?”
25 ᐅᑮᓇᐦᑲᐁᐧᔑᐦᐋᐣ ᒋᓴᐢ,
“ᑳᐃᐧᐣ ᓇ ᐄᐧᐦᑳ ᑭᑕᔭᒥᐦᑑᓰᓈᐋᐧ ᐃᐦᐃᐁᐧ ᑳᑮᑑᑕᐣᑭᐸᐣ ᑌᐱᐟ,
ᐊᐦᐲ ᑫᐄᐧᐣ ᒦᓇ ᑳᑮᐄᐧᒌᐃᐧᑯᐨ ᑳᑮᓅᐣᑌᔮᑲᑎᓱᐋᐧᐨ ᒦᓇ ᑳᑮᓅᐣᑌᐦᓭᐋᐧᐨ.
26 ᒣᑳᐧᐨ ᑳᐅᑮᔑᑳᒥᐨ ᒫᐊᐧᒋ ᑭᐦᒋᐊᔭᒥᐦᐁᐃᐧᑭᒫ ᐊᐹᔭᑕᕒ,
ᑌᐱᐟ ᑮᐲᐣᑎᑫ ᑭᔐᒪᓂᑑ ᐅᐋᐧᑲᐦᐃᑲᓂᐣᐠ ᒦᓇ ᐁᑮᐦᐊᒫᐧᐨ ᑳᑮᒥᓇᐧᐣᑭᒫᐣᑲᓅᓂᐨ ᐋᓇᐦᑯᓈᐣ,
ᑳᑮᐃᓇᐦᑌᐠ ᐅᓇᐦᔓᐁᐧᐃᐧᐣ ᐊᔭᒥᐦᐁᐃᐧᑭᒫᐠ ᐁᐦᑕ ᒋᑮᐊᒫᐧᐋᐧᐨ,
ᑲᔦ ᐅᑮ ᐅᐣᒋ ᒦᓈᐣ ᑳᐄᐧᒌᐋᐧᒋᐣ.”