ᓃᔖᐧ ᐅᒪᓯᓇᐦᐊᒫᑫᐃᐧᐣ ᒐᐧᐣ
1
ᓃᐣ ᑳᓃᑳᓀᐣᑖᑯᓯᔮᐣ, ᐁᒪᓯᓇᐦᐊᒪᐊᐧᐠ ᑳᑮᓇᐊᐧᔔᓈᑲᓅᐨ ᑭᔐᒪᓂᑑᐣ ᐃᐦᑫᐧ ᒦᓇ ᐅᓃᒑᓂᐦᔕᐣ, ᑳᓵᑭᐦᐊᑳᐧ ᑌᐯᐧᐃᐧᓂᐣᐠ. ᑳᐃᐧᓃᓂᑯ ᐁᐦᑕ ᓃᐣ, ᑲᐦᑭᓇ ᑲᔦ ᑭᓵᑭᐦᐃᑯᐋᐧ ᑌᐯᐧᐃᐧᐣ ᑳᑭᐦᑫᐣᑕᒧᐋᐧᐨ, 2 ᒋᑫᒪ ᐃᐦᐃᐁᐧ ᑌᐯᐧᐃᐧᐣ ᑳᑭᑭᓑᑳᑯᔭᐣᐠ ᒦᓇ ᑲᐯᐦᐄ ᑫᐄᐧᒌᐃᐧᑯᔭᐣᐠ. 3 ᑭᔐᐋᐧᑎᓯᐃᐧᐣ, ᑭᑎᒫᑫᐣᒋᑫᐃᐧᐣ ᒦᓇ ᐯᔭᐦᑕᑫᓂᒧᐃᐧᐣ ᐃᐦᐃᒫ ᐅᐣᒋ ᑭᔐᒪᓂᑑ ᑳᐅᑖᑖᒥᒫᐃᐧᐨ ᑲᔦ ᐃᐦᐃᒫ ᐅᐣᒋ ᒋᓴᐢ ᙭, ᐅᑖᑖᒥᒫ ᐅᑯᓯᐦᓴᐣ, ᑲᐄᐧᒌᐃᐧᑯᓈᐣ ᐃᐦᐃᒫ ᑌᐯᐧᐃᐧᓂᐣᐠ ᒦᓇ ᓵᑭᐦᐃᐁᐧᐃᐧᓂᐣᐠ.
4 ᒥᓑᑕᐦᐃ ᓂᑮᒥᓀᐧᐣᑖᐣ ᐁᑭᐦᑫᐣᑕᒫᐣ ᐋᐣᑕ ᑭᑕᐋᐧᔑᐦᔒᒧᐋᐧ ᐁᐱᒧᐦᓭᐋᐧᐨ ᐃᐦᐃᒫ ᑌᐯᐧᐃᐧᓂᐣᐠ, ᑖᐱᓑᑯᐨ ᐅᑖᑖᒥᒫ ᑳᑮ ᐃᓇᐦᔓᐋᐧᓂᑯᔭᐣᐠ. 5 ᐁᑲᐧ ᒦᓇ ᐁᐃᔑᑲᑫᐧᒋᒥᓈᐣ ᒋᓵᑭᐦᐃᑎᔭᐣᐠ. ᑳᓵᑭᐦᐃᓈᐣ ᐃᐦᑫᐧ, ᑳᐃᐧᓃᐣ ᐃᑯ ᐅᓑᑭ ᐅᓇᐦᔓᐁᐧᐃᐧᐣ ᑳᐅᐣᒋ ᒪᓯᓇᐦᐊᒪᐃᐧᓈᐣ ᐃᐦᐃᐁᐧ ᐱᑯᐦ ᓂᐢᑕᒼ ᐅᐣᒋ ᑳᑮᐦᐊᔮᐠ. 6 ᒦᐦᐅᐁᐧ ᓵᑭᐦᐃᐁᐧᐃᐧᐣ ᒋᐃᔑᐱᒧᐦᓭᔭᐣᐠ ᓇᓇᐦᐃᑕᒧᐃᐧᓂᐣᐠ ᐅᑐᓇᐦᔓᐁᐧᐃᐧᓇᐣ. ᓂᐢᑕᒼ ᑳᑮᐱᔑ ᓅᐣᑕᒪᐣᐠ, ᒦᑕᓑ ᐅᐦᐅᐁᐧ ᐅᑑᓇᔓᐁᐧᐃᐧᐣ ᒋᐱᒥᓂᔕᐦᐊᒪᐣᐠ ᓵᑭᐦᐃᐁᐧᐃᐧᐣ.
7 ᒥᐦᔒᐣ ᐅᐊᐧᓂᔑᒧᐁᐧᐠ ᑮᐸᐹᒥᐊᔮᐊᐧᐠ ᐊᐦᑮᐣᐠ ᐁᑳ ᑳᑌᐯᐧᑕᒧᐋᐧᐨ ᒋᓴᐢ ᙭ᑕᐣ ᐁᑮ ᑕᑯᔑᓂᓂᐨ ᐄᐧᔮᐦᓯᐣᐠ. ᒦᐦᐊᐁᐧ ᐅᐊᐧᓂᔑᒧᐁᐧ ᒦᓇ ᓇᐦᐹᐨ ᙭ ᐅᑭᐦᑭᓄᐦᐊᒫᑫ. 8 ᐊᔮᐣᑳᐧᒥᓰᐠ ᐁᑳ ᒋᐊᐧᓂᐦᑑᔦᐠ ᑳᑮᐊᓄᐦᑳᑕᒪᐣᐠ, ᐃᐦᐃᐁᐧ ᒋᑮᑎᐸᐦᐊᒫᑰᔦᐠ ᒥᓯᐁᐧ. 9 ᐊᐃᐧᔭ ᑳᓃᑲᑌᓑᑳᐨ ᒦᓇ ᐁᑳ ᐁᐦᐊᔮᐨ ᐅᑭᐦᑭᓅᐦᐊᒫᑫᐃᐧᓂᓃᐣ ᙭ᑕᐣ ᑳᐃᐧᐣ ᐅᐃᐧᒌᐋᐧᓰᐣ ᑭᔐᒪᓂᑑᐣ, ᐱᑯᐦ ᐊᐃᐧᔭ ᑳᐊᔮᐨ ᑭᐦᑭᓅᐦᐊᒫᑫᐃᐧᐣ ᐅᐃᐧᒌᐋᐧᐣ ᐅᑖᑖᒥᒫᐣ ᒦᓇ ᐅᑯᓯᐦᓯᒫᐣ. 10 ᑮᓑᐱᐣ ᐊᐃᐧᔭ ᐱᓈᓯᐦᑳᑯᔦᐠ ᐁᑲᐧ ᐁᐲᑑᐨ ᐸᐦᑳᐣ ᑭᐦᑭᓅᐦᐊᒫᑫᐃᐧᐣ, ᑳᐃᐧᐣ ᐲᐣᑎᑲᓂᐠ ᑭᐋᐧᑳᐦᐃᑲᓂᐋᐧ, ᑲᔦ ᑳᐃᐧᐣ ᐋᐧᒋᔦᒥᐠ. 11 ᐊᐃᐧᔭ ᑳᐋᐧᒋᔦᒫᐨ ᑫᐃᐧᐣ ᐃᔑᐃᐧᒋᐦᐃᐁᐧ ᐅᒪᒌᔑᐦᒋᑫᐃᐧᓂᓃᐣ.