ᓂᐦᓵᐧ ᐅᒪᓯᓇᐦᐊᒫᑫᐃᐧᐣ ᒐᐧᐣ
1
ᓃᐣ ᑳᓃᑳᓀᐣᑖᑯᓯᔮᐣ, ᐁᒪᓯᓇᐦᐊᒪᐃᐧᓈᐣ ᓂᑑᑌᒼ ᑳᔭᐢ, ᑳᓵᑭᐦᐊᐠ ᑌᐯᐧᐃᐧᓂᐣᐠ. 2 ᑳᓵᑭᐦᐃᓈᐣ ᓂᑑᑌᒼ, ᓂᑐᐣᒋ ᐊᔭᒥᐦᒋᑫ ᒋᒥᓄᐊᔮᔭᐣ ᒦᓇ ᒥᓯᐁᐧ ᒋᐃᐧᓇᐦᐃᓭᔭᐣ, ᑲᔦ ᐁᐃᔑᒥᓄᐦᓭᔭᐣ ᑭᑕᐦᒑᑯ ᐱᒫᑎᓯᐃᐧᓂᐣᐠ. 3 ᓈᐦᐱᐨ ᓂᑮᒥᓀᐧᐣᑖᐣ ᐊᐦᐲ ᓈᐣᑕ ᐅᑕᔭᒥᐦᐋᐠ ᑳᑮᐱᑕᑯᔑᓄᐋᐧᐨ ᒦᓇ ᐁᑮ ᐄᐧᐣᑕᒧᐋᐧᐨ ᑭᑌᐯᐧᔦᐣᑕᒧᐃᐧᐣ ᐃᐦᐃᒫ ᑌᐯᐧᐃᐧᓂᐣᐠ, ᐁᑲᐧ ᐃᐦᐃᒫ ᑲᐯᐦᐃ ᑌᐯᐧᐃᐧᓂᐣᐠ ᑳᐃᔑ ᐱᒧᐦᓭᔭᐣ. 4 ᒫᐊᐧᐨ ᓂᑭᐦᒋᒥᓀᐧᐣᑖᐣ ᐁᓅᐣᑕᒫᐣ ᓂᑕᐊᐧᔑᔒᒪᐠ ᐁᐃᔑ ᐱᒧᐦᓭᐋᐧᐨ ᑌᐯᐧᐃᐧᓂᐣᐠ. 5 ᑳᓵᑭᐦᐃᓈᐣ, ᑭᑌᐸᑫᓂᒥᑰ ᐃᐦᐃᐁᐧ ᑳᑑᑕᒪᐊᐧᑖᐧ ᐅᑕᔭᒥᐦᐋᐠ, ᒥᓴᐋᐧᐨ ᐁᑳ ᐁᑭᐦᑫᓂᒪᑖᐧ. 6 ᑮᑎᐹᒋᒧᐊᐧᐠ ᑭᓵᑭᐦᐃᐁᐧᐃᐧᓂ ᐃᐦᐃᒫ ᐊᔭᒥᐦᐋᐃᐧᓂᐣᐠ. ᐃᐧᒌᐦᐃᐠ ᐊᓂᒫᒑᐋᐧᐨ ᐁᐃᔑ ᒥᓈᐧᐱᔑᒥᑯᐨ ᑭᔐᒪᓂᑑ. 7 ᐃᐦᐃᒫ ᐅᑎᔑᓂᐦᑳᓱᐃᐧᓂᐣᐠ ᑳᑮᐅᐣᒋ ᒫᒫᒑᐋᐧᐨ, ᑳᐃᐧᐣ ᒋᐅᐣᒋ ᐄᐧᒋᐦᐃᑰᐋᐧᐨ ᐁᑳ ᑳᑌᐯᐧᐦᑕᒥᓂᐨ. 8 ᑮᓇᐃᐧᐣᐟ ᒋᐲᐣᑎᑲᓈᔭᐣᑭᑖᐧ ᐅᑯᐁᐧᓂᐊᐧᐠ ᐊᓂᔑᓂᓂᐊᐧᐠ ᐃᐦᐃᒫ ᒋᐅᐣᒋ ᒫᒪᐤ ᐄᐧᑕᓄᐦᑭᒥᑎᔭᐣᐠ ᑌᐯᐧᐃᐧᓂᐣᐠ.
9 ᓂᑮᒪᓯᓇᐦᐊᒪᐋᐧᐠ ᐅᑕᔭᒥᐦᐋᐠ, ᐁᑲᐧᐦᑕᓑ ᑖᔮᑕᕒᐃᐱᐢ ᑳᒥᓀᐧᐣᑕᐣᐠ ᒋᓃᑳᓀᐣᑖᑯᓯᐨ, ᑳᐃᐧᐣ ᒋᐅᐣᒋ ᐅᑖᐦᐱᓂᑰᔮᐣᐠ. 10 ᐁᑲᐧ ᐊᐦᐲ ᐱᑕᑯᔑᓂᔮᐣ, ᓂᑲᐋᓂᒨᑕᒫᐧᐣ ᑳᐃᔑᐦᒋᑫᐨ, ᑲᐧᐣᑕ ᐁᐃᓈᒋᒥᑰᔭᐣᐠ. ᑳᐃᐧᐣ ᐅᒥᓀᐧᐣᑕᒥᐦᐃᑯᓰᐣ ᐅᐦᐅᐁᐧᓂ, ᑳᐃᐧᐣ ᑲᔦ ᐅᐲᐣᑎᑲᓈᐦᓰᐣ ᑯᑕᑭᔭᐣ ᐅᑕᔭᒥᐦᐋᐣ. ᐅᑭᐱᐦᑎᓈᐣ ᑲᔦ ᐃᓂᐁᐧᓂᐊᐧᐣ ᑳᐃᐧ ᐲᐣᑎᑲᓈᒋᐣ ᒦᓇ ᐅᓵᑭᒋᓂᔕᐦᐋᐧᐣ ᑳᐃᔑᒫᐊᐧᒋᐦᐃᑎᓂᐨ.
11 ᑳᓵᑭᐦᐃᓈᐣ, ᑳᐃᐧᐣ ᓈᐱᑐᑕᐣ ᐁᑳ ᑳᒥᓈᐧᔑᐣᐠ ᐱᑯᐦ ᐃᐦᐃᐁᐧ ᑳᒥᓈᐧᔑᐣᐠ. ᐊᐃᐧᔭ ᑳᑑᑕᐣᐠ ᑳᒥᓈᐧᔑᓂᓂᐠ ᑭᔐᒪᓂᑑᐦᑳᐣᐠ ᐅᐣᒌᒪᑲᐣ. ᐊᐃᐧᔭ ᑳᑑᑕᐣᐠ ᐁᑳ ᑳᒥᓈᐧᔑᓂᓂᐠ ᑳᐃᐧᐣ ᐅᑐᐣᒋ ᐋᐧᐸᒫᐦᓰᐣ ᑭᔐᒪᓂᑑᐣ. 12 ᑎᒦᑕᕒᐃᔭᐢ ᐅᒥᓈᐧᒋᒥᑰᐣ ᑲᐦᑭᓇ ᐊᐃᐧᔭᐣ ᐃᐦᐃᒫ ᒦᓇ ᑲᔦ ᑌᐯᐧᐃᐧᓂᐣᐠ ᐅᒥᓈᐧᒋᒥᑰᐣ. ᑫᑮᓇᐃᐧᐣᐟ ᑭᒥᓈᐧᒋᒫᓈᐣ, ᒦᓇ ᑭᑭᐦᑫᐣᑖᐣ ᑭᑎᐹᒋᒧᐃᐧᓂᓈᐣ ᐁᑌᐯᐧᒪᑲᐠ.