ᒋᓴᐢ ᑲᐃᐧᒋᐦᐃᑯᓈᐣ
2
ᑳᓵᑭᐦᐃᓂᓈᑯᐠ ᓂᓃᒑᓂᔕᐠ, ᑭᒪᓯᓇᐦᐊᒪᐃᐧᓂᓈᐋᐧ ᐁᑳ ᒋᒪᒋᑑᑕᒣᐠ. ᑮᓑᐱᐣ ᐊᐃᐧᔭ ᒪᒋᑑᑕᐣᐠ, ᑭᑕᔮᐋᐧᒥᐣ ᑳᐊᔭᒥᐦᐋᐨ ᐅᑖᑖᒥᒫᐣ, ᒦᐦᐊᐁᐧ ᒋᓴᐢ ᙭, ᑳᑲᐧᔭᑳᐧᑎᓯᐨ. 2 ᑭᑮᑎᐸᐦᐃᑫᐦᑕᒫᑯᓈᐣ ᑭᒪᒋᑑᑕᒧᐃᐧᓂᓈᐣ, ᑳᐃᐧᓃᐣ ᐱᑯᐦ ᐁᑕᐦ ᑮᓀᐣᑕᐃᐧᐣᐟ ᐱᑯ ᑲᔦ ᒥᓯᐁᐧ ᐅᐦᐅᒫ ᐊᐦᑮᐣᐠ. 3 ᑭᑭᐦᑫᐣᑖᒥᐣ ᐁᑭᐦᑫᓂᒫᔭᐣᐠ, ᑮᓑᐱᐣ ᑲᓇᐁᐧᐣᑕᒪᐣᐠ ᐅᑑᓇᐦᔓᐁᐧᐃᐧᓇᐣ. 4 ᐊᐃᐧᔭ ᑳᐃᐦᑭᑐᐨ, “ᓂᑭᐦᑫᓂᒫ,” ᐁᑳᑕᓑ ᑳᑑᑕᐣᐠ ᐅᑑᓇᐦᔓᐁᐧᐃᐧᓂᓃᐣ ᑲᐧᐣᑕ ᐊᐃᐦᑭᑐ, ᒦᓇ ᑳᐃᐧᐣ ᐅᑭᑭᓑᑳᑯᓰᐣ ᑌᐯᐧᐃᐧᐣ. 5 ᑮᓑᐱᐣ ᐊᐃᐧᔭ ᑳᑲᓇᐁᐧᐣᑕᐣᐠ ᐅᑎᐦᑭᑑᐃᐧᓂᓃᐣ, ᒥᑐᓂ ᑭᔐᒪᓂᑑᐣ ᐅᓵᑭᐦᐃᐁᐧᐃᐧᓂᓃᐣ ᐅᔖᑲᓑᑭᓀᓑᑳᑯᐣ ᐅᐱᒫᑎᓯᐃᐧᓂᐣᐠ. ᒦᐦᐅᒫ ᐁᐧᐣᒋ ᑭᐦᑫᐣᑕᒪᐣᐠ ᐁᐦᑭᑭᓑᑳᑯᔭᐣᐠ, 6 ᐊᐃᐧᔭ ᑳᐃᐦᑭᑐᐨ ᐁᐦᑭᑭᓑᑳᑯᐨ ᐃᓯᐦᓭᓂ ᒋᐃᔑᐱᒫᑎᓯᐸᐣ ᐯᔑᑲᐧᐣ ᒋᓴᓲᐣ ᑳᑮᐃᔑᐱᒫᑎᓯᓂᐨ.
ᐅᓑᑭ ᐅᓈᐦᑯᓂᑫᐃᐧᐣ ᑳᐃᔑ ᐋᓂᒨᑌᐠ
7 ᑳᓵᑭᐦᐃᓂᓇᑯᐠ ᓂᑑᑌᒪᐠ, ᑳᐃᐧᓃᐣ ᐅᓑᑭ ᐅᓇᐦᔓᐁᐧᐃᐧᐣ ᑳᒪᓯᓇᐦᐊᒫᐃᐧᓇᑯᐠ, ᐃᐦᐃᐁᐧ ᐱᑯᐦ ᑲᔮᓑ ᐅᓇᐦᔓᐁᐧᐃᐧᐣ, ᑳᑮᐊᔮᔦᐠ ᓂᓑᑕᒼ. ᐅᐦᐅᐁᐧ ᑲᔮᓑ ᐅᓇᐦᔓᐁᐧᐃᐧᐣ ᒦᐦᐅᐁᐧ ᐃᐦᑭᑐᐃᐧᐣ ᑳᑮᐱᓅᐣᑕᒣᐠ. 8 ᔖᑰᐨ ᑭᑐᐣᒋ ᒪᓯᓈᐦᐊᒪᐃᐧᓂᓈᐋᐧ ᐅᓑᑭ ᐅᓇᐦᔓᐁᐧᐃᐧᐣ, ᐁᑲᐧ ᐊᒦᐦᐅᐁᐧ ᐁᔑᓈᑲᐧᐠ ᑌᐯᐧᐃᐧᐣ ᑳᐃᐧᒋᐃᐧᑯᐨ ᒦᓇ ᑫᑮᓇᐋᐧ, ᐊᓂᓑ ᐊᒦᐦᐃᐁᐧ ᐊᐧᓃᑎᐱᐦᑳ ᐁᐦᐊᓂᒫᒑᒪᑲᐠ ᒦᓇ ᑳᑌᐯᐧᐃᐧᓂᐊᐧᐠ ᐋᐧᐦᑌᐃᐧᐣ ᐋᔕ ᒐᐦᑳᑌ.
9 ᐱᑯᐦ ᐊᐃᐧᔭ ᑳᐃᐦᑭᑐᐨ ᑳᐃᔑ ᐋᐧᓭᔮᓂᐠ ᐁᐦᐊᔮᐨ ᐁᑲᐧᑕᓑ ᐁᐸᑳᐧᓈᐨ ᐃᐧᒋᐅᑕᔭᒥᐦᐋᐣ ᑭᔮᐸᐨ ᐃᐦᐃᒫ ᐊᔮ ᑳᐃᔑ ᑲᓑᑮᑎᐱᐦᑳᓂᐠ. 10 ᐱᑯᐦ ᐊᐃᐧᔭ ᑳᓵᑭᐦᐋᐨ ᐃᐧᒋᐅᑕᔭᒥᐦᐋᐣ ᐃᐦᐃᒫ ᐊᔮ ᑳᐃᔑ ᐋᐧᓭᔮᓂᐠ, ᒦᓇ ᑳᐃᐧᐣ ᑫᑰᐣ ᒋᑭᑭᓑᑲᐣᐠ ᑫᐅᐣᒋ ᐸᐣᑭᔑᐣᐠ. 11 ᐱᑯᐦ ᐊᐃᐧᔭ ᑳᐸᑳᐧᓈᐨ ᐃᐧᒋᐅᑕᔭᒥᐦᐋᐣ ᑳᐃᔑ ᑲᓑᑮᑎᐱᐦᑳᓂᐠ ᐊᔮ, ᒦᓇ ᐸᐹᒥᐊᔮ ᑳᐃᔑ ᑲᓑᑮᑎᐱᐦᑳᓂᐠ. ᑳᐃᐧᐣ ᐅᑭᐦᑫᐣᑕᓰᐣ ᐊᐣᑎ ᑫᐃᔖᐨ, ᐊᓃᓑ ᑳᑲᓑᑮᑎᐱᐦᑳᓂᐠ ᐁᐊᑳᐧᓂᒑᐱᓑᑳᑯᐨ.
12 ᑭᒪᓯᓇᐦᐊᒪᐃᐧᓂᓈᐋᐧ, ᐊᐋᐧᔑᔕᐠ,
ᑭᒪᒋᑑᑕᒧᐃᐧᓂᐋᐧ ᑭᑮᐴᓀᐣᑕᒫᑯᓈᐋᐧ
ᐃᐦᐃᒫ ᐅᑎᔑᓂᑳᓲᐃᐧᓂᐣᐠ ᒋᓴᐢ ᙭.
13 ᑭᒪᓯᓇᐦᐊᒪᐃᐧᓂᓈᐋᐧ, ᑮᓇᐋᐧ ᑳᑫᐦᑌᔮᑎᓯᔦᐠ,
ᑭᑭᐦᑫᓂᒫᐋᐧ ᐊᐦᐊᐁᐧ ᓂᓑᑕᒼ ᑳᑮᐊᔮᐨ ᑳᐱᒫᒋᓭᓂᐠ.
ᑭᒪᓯᓇᐦᐊᒪᐃᐧᓂᓈᐋᐧ, ᑮᓇᐋᐧ ᑳᐅᓑᑳᑎᓯᔦᐠ,
ᑭᑮᔖᑰᒋᐦᐋᐋᐧ ᒪᒋᒪᓂᑑ.
14 ᑭᒪᓯᓇᐦᐊᒪᐃᐧᓂᓈᐋᐧ, ᐊᐋᐧᔑᔕᐠ,
ᑭᑭᐦᑫᓂᒫᐋᐧ ᐅᑖᑖᒥᒫ.
ᑭᒪᓯᓇᐦᐊᒪᐃᐧᓂᓈᐋᐧ, ᑮᓇᐋᐧ ᐅᑖᑖᒥᒫᐠ,
ᑭᑭᐦᑫᓂᒫᐋᐧ ᐊᐦᐊᐁᐧ ᓂᓑᑕᒼ ᑳᑮᐊᔮᐨ ᑳᐱᒫᒋᓭᓂᐠ.
ᑭᒪᓯᓇᐦᐊᒪᐃᐧᓂᓈᐋᐧ, ᑮᓇᐋᐧ ᑳᐅᓑᑳᑎᓯᔦᐠ,
ᐁᒪᓑᑲᐃᐧᓯᔦᐠ, ᒦᓇ ᑭᔐᒪᓂᑑ ᐅᑎᐦᑭᑐᐃᐧᐣ ᐁᑭᑭᓑᑳᑯᔦᐠ, ᒦᓇ ᑭᑮᔖᑰᒋᐦᐋᐋᐧ ᒪᒋᒪᓂᑑ.
ᑳᐃᐧᐣ ᓵᑭᐦᑑᐣ ᐊᐦᑭ
15 ᑳᐃᐧᐣ ᓵᑭᐦᑑᐠ ᐊᐦᑭ, ᑲᔦ ᐅᐦᐅᒫ ᐊᐦᑮᐣᐠ ᑳᐊᔮᑭᐣ. ᑮᓑᐱᐣ ᐊᐃᐧᔭ ᓵᑭᐦᑑᐨ ᐊᐦᑮᓂ, ᑳᐃᐧᐣ ᐅᑭᑭᓑᑳᑯᓰᐣ ᐅᑖᑖᒥᒫᐣ ᐅᓵᑭᐦᐃᐁᐧᐃᐧᓂᓃᐣ. 16 ᑲᐦᑭᓇ ᑫᑰᓇᐣ ᑳᐊᔮᑭᐣ ᐊᐦᑮᑳᐣᐠ, ᑳᒪᒋᒥᐦᓴᐁᐧᐣᑕᒨᒪᑲᐦᑭᐣ ᐃᐧᔮᓯᐱᒫᑎᓯᐃᐧᓂᐣᐠ, ᒦᓇ ᑳᐃᔑ ᒪᒋᒥᓴᐁᐧᐣᑕᒨᒪᑲᓂᓂᐠ ᐅᓑᑮᔑᑰᐣ, ᒦᓇ ᐁᑲᑭᐦᒋᒧᐋᐧᑫᐨ ᐱᒫᑎᓯᐃᐧᓂᐣᐠ ᐃᐦᐃᐁᐧᓂ ᑳᐊᔮᐨ, ᑳᐃᐧᐣ ᐅᑖᑖᒥᑳᐣᐠ ᐅᐣᒌᒪᑲᓯᓅᐣ, ᐊᐦᑮᑳᐣᐠ ᐅᐣᒌᒪᑲᐣ. 17 ᐊᐦᑭ ᑕᑭᔑᐱᓭ ᐊᔑᐨ ᑲᐦᑭᓇ ᒥᐦᓴᐁᐧᐣᑕᒧᐃᐧᓇᐣ, ᐁᑲᐧᐄᐧᐣ ᐊᐃᐧᔭ ᑳᑑᑕᐣᐠ ᑭᔐᒪᓂᑑ ᐅᓇᐣᑕᐁᐧᐣᑕᒧᐃᐧᓂᓃᐣ ᑳᑭᑫ ᑕᐊᔮ.
ᐊᔮᐣᑲᐧᒥᓰᑕᐃᐧᑯᐠ ᓇᐦᐹᐨ ᙭ ᐅᑭᐦᑭᓄᐦᐊᒫᑫᐠ
18 ᓂᓃᒑᓂᔕᐠ, ᐋᔖ ᐃᓑᑳᐧᔮᐨ ᐊᓂᑲᑮᔑᑳ, ᒦᓇ ᑳᑮᐃᔑ ᓅᐣᑕᒣᐠ ᓇᐦᐹᐨ ᙭ ᐁᐃᐧᐱᑕᑯᔑᐣᐠ, ᐅᐦᐅᐁᐧ ᓅᐣᑯᒼ ᐋᔕ ᒥᐦᔒᐣ ᓇᐦᐹᐨ ᙭ ᐅᑭᐦᑭᓄᐊᐦᒫᑫᐠ ᑮᑕᑯᔑᓅᐠ. ᐊᒦᐦᐅᒫ ᑫᐅᐣᒋ ᑭᐦᑫᐣᑕᒪᐣᐠ ᐋᔕ ᐃᓑᑳᐧᔮᐨ ᐁᓂᑲᑮᔑᑳᐠ. 19 ᑭᑮᓇᑲᓂᑯᓈᓈᐠ, ᒋᑫᒫ ᑳᐃᐧᐣ ᑌᐯᐧ ᒋᐅᐣᒋ ᑎᐯᓂᒪᐣᑭᑖᐧ. ᑮᓑᐱᐣ ᑎᐯᓂᒪᐣᑭᑖᐧᐸᐣ, ᑭᔮᐸᐨ ᑭᑖᑮᐃᐧᒋᐃᐧᑯᓈᓇᐠ. ᐁᑲᐧ ᑕᓑ ᐁᑮ ᒫᒑᐋᐧᐨ ᐊᒦᑕᓑ ᐁᐃᔑᓈᑲᐧᓂᓂᐠ ᐁᑳ ᐁᐅᐣᒋ ᑎᐯᓂᒪᐣᑭᑖᐧ.
20 ᔖᑰᐨ ᑮᓇᐋᐧ ᐃᐧᐣ ᑭᑕᔮᓈᐋᐧ ᑑᒥᓂᐁᐧᐃᐧᐣ ᐃᐦᐃᒫ ᐅᐣᒋ ᑳᐯᔑᑯᐨ ᑳᑲᓈᑎᓯᐨ, ᒦᓇ ᑲᐦᑭᓇ ᑭᑭᐦᑫᐣᑖᓈᐋᐧ ᑌᐯᐧᐃᐧᐣ. 21 ᑳᐃᐧᓃᐣ ᐁᑳ ᐁᑭᐦᑫᐣᑕᒣᐠ ᑌᐯᐧᐃᐧᐣ ᑳᐅᐣᒋ ᒪᓯᓇᐦᐊᒪᐃᐧᓇᑯᐠ, ᔖᑰᐨ ᑭᑭᐦᑫᐣᑖᓈᐋᐧ ᒦᓇ ᑳᐃᐧᐣ ᑲᑮᓇᐃᐧᓑᑮᐃᐧᐣ ᐅᐣᒌᒪᑲᓯᓅᐣ ᑌᐯᐧᐃᐧᓂᐣᐠ. 22 ᐊᐊᐧᓀᐣ ᑳᑲᑮᓇᐃᐧᓑᑮᐨ? ᐊᒦᐦᐊᐁᐧ ᑳᐊᓀᐧᑕᐣᐠ ᒋᓴᓲᐣ ᐁ᙭ᑎᐃᐧᓂᐨ. ᒦᐦᐊᐁᐧ ᓇᐹᐨ ᙭, ᑳᐊᓀᐧᑕᐋᐧᐨ ᐅᑖᑖᒥᒫᐣ ᒦᓇ ᐅᑯᓯᐦᓯᒫᐣ. 23 ᐱᑯᐦ ᐊᐃᐧᔭ ᑳᐊᓀᐧᑕᐋᐧᐨ ᐅᑯᓯᐦᓯᒫᐣ ᑳᐃᐧᐣ ᐅᑖᔮᐊᐧᓰᐣ ᐅᑖᑖᒥᒫᐣ, ᐱᑯᐦ ᐊᐃᐧᔭ ᑳᑎᐹᒋᒫᐨ ᐅᑯᓯᐦᓯᒫᐣ ᐅᑖᔮᐋᐧᐣ ᑲᔦ ᐃᓂ ᐅᑖᑖᒥᒫᐣ.
24 ᒋᒥᐣᒋᒥᓇᒣᐠ ᐃᐦᐃᐁᐧ ᓂᓑᑕᒼ ᑳᑮᐱᓅᐣᑕᒣᐠ. ᑮᓑᐱᐣ ᐃᐦᐃᐁᐧ ᐃᓯᐦᓭᐠ, ᑲᔦ ᑲᑭᑭᓑᑳᑯᐋᐧ ᐅᑯᓯᐦᓯᒫ ᒦᓇ ᐅᑖᑕᒥᒫ. 25 ᒦᐦᐅᐁᐧᓂ ᑳᑮ ᐊᔓᑕᒫᑯᔭᐣᐠ ᑳᑭᑫ ᐱᒫᑎᓯᐃᐧᓂ.
26 ᑭᒪᓯᓇᐦᐊᒪᐃᐧᓂᓈᐋᐧ ᐃᑭᐁᐧᓂᐊᐧᐠ ᐅᐣᒋ ᑳᑲᑫᐧᐊᐧᓂᔑᒥᑰᔦᑳᐧ. 27 ᐁᑲᐧ ᑮᓇᐋᐧ, ᐃᐦᐃᐁᐧ ᑑᒥᓂᐁᐧᐃᐧᐣ ᑳᑮ ᒦᓂᑰᔦᐠ ᑭᑭᓑᑳᑯᓈᐋᐧ, ᒦᓇ ᑳᐃᐧᐣ ᐊᐃᐧᔭ ᑭᑲᓇᐣᑕᐁᐧᓂᒫᓰᐋᐧᐋᐧ ᒋᑭᐦᑭᓄᐦᐋᒫᑰᔦᐠ. ᔖᑰᐨ ᐅᑑᒥᓂᐁᐧᐃᐧᐣ ᑭᐦᑭᓅᐦᐋᒫᑯᓈᐋᐧ ᑲᐦᑭᓇ ᑫᑰᓇᐣ ᒦᓇ ᐃᐦᐃᐁᐧ ᑑᒥᓂᐁᐧᐃᐧᐣ ᑌᐯᐧᐃᐧᓂᐊᐧᐣ, ᑳᐃᐧᐣ ᑲᑮᓇᐃᐧᓑᑭᒪᑲᐦᓯᓅᐣ. ᐱᑯᐦ ᐃᐦᐃᐁᐧ ᑳᑮᐃᔑ ᑭᐦᑭᓄᐦᐊᒫᑯᔦᐠ ᒋᑭᑭᓑᑳᑯᔦᐠ.
28 ᑮᓇᐋᐧ ᑳᓵᑭᐦᐃᓂᓇᑯᐠ ᓂᓃᒑᓂᔕᐠ, ᒋᐄᐧᒋᐋᐧᔦᐠ, ᐊᐦᐲ ᓈᑯᓯᐨ ᐁᑳ ᔖᑫᐧᓂᒨᐃᐧᐣ ᒋᐊᔮᔭᐣᐠ ᒦᓇ ᐁᑳ ᒋᓇᓀᐯᐃᐧᓯᑕᐋᐧᔭᐣᐠ ᐊᐦᐲ ᐱᑕᑯᔑᐣᐠ.
29 ᑭᑭᐦᑫᐣᑖᒥᐣ ᐃᑐᐠ ᙭ ᐁᑲᐧᔭᐦᑳᐧᑎᓯᐨ, ᑭᑭᐦᑫᐣᑖᓇᐋᐧ ᑲᔦ ᑲᐦᑭᓇ ᐊᐃᐧᔭ ᑳᑑᑕᐣᐠ ᑳᒥᓈᐧᔑᓂᐠ ᐁᑮ ᓂᐦᑖᐃᐧᑭᐦᐃᑯᐨ.