ᑳᐃᔑ ᐋᓂᒨᑌᐠ ᒍᐊᐧᐠ ᐅᑭᐦᒋᐊᔭᒥᐦᐃᐧᑲᒥᑯᐋᐧ
13
ᐊᐦᐲ ᒋᓴᐢ ᑮᐊᓂᒫᒑ ᐃᐦᐃᒫ ᑭᐦᒋᐊᔭᒥᐦᐁᐃᐧᑲᒥᑯᐣᐠ,
ᐯᔑᐠ ᐅᑭᐦᑭᓅᐦᐊᒪᐋᐧᑲᓇᐣ ᐅᑮᐦᐃᑰᐣ,
“ᐋᐧᐸᒥᐠ,
ᑭᐦᑭᓅᐦᐊᒫᑫ!
ᐁᐲᐦᒋᒥᓄᔑᔑᐋᐧᐨ ᐊᐦᓯᓃᐠ ᒦᓇ ᐁᐲᐦᒋ ᒥᓇᐧᔑᐣᑭᐣ ᐋᐧᑲᐦᐃᑲᓇᐣ!”
2 ᒋᓴᐢ ᑮᐦᐃᑭᑐ,
“ᑭᐋᐧᐸᐣᑖᓇᐣ ᓇ ᐅᓄᐁᐧᓂᐊᐧᐣ ᑲᐦᑭᓇ ᐋᐧᑲᐦᐃᑲᓇᐣ ?
ᑳᐃᐧᐣ ᑲᓇᑫ ᐯᔑᐠ ᐊᐦᓯᐣ ᑕᐲᐦᑕᐊᐧᐱᓰᐣ,
ᑲᐦᑭᓇ ᑕᓃᐦᓯᐁᐧᐱᓈᑲᓅᐊᐧᐠ.”
ᑭᐦᑭᓇᐋᐧᒋᒋᑲᓇᐣ ᒪᐧᔦ ᐴᓂ ᐊᐦᑮᐊᐧᐣᐠ
3 ᒋᓴᐢ ᑮᐦᐊᐱ ᐃᐦᐃᒫ ᐊᓬᐃᑊ ᐱᐦᑳᐧᒪᑎᓈᐣᐠ ᑎᐱᓑᑰᐨ ᑭᐦᒋᐊᔭᒥᐦᐁᐃᐧᑲᒥᑯᐣᐠ,
ᐲᑕᕒ,
ᒉᒥᐢ,
ᒐᐧᐣ ᒦᓇ ᐋᐣᑕᕒᐅ ᐄᐧᓇᐋᐧ ᐱᑯᐦ ᑮᒨᐨ ᐅᑮᑲᑫᐧᒋᒫᐋᐧᐣ,
4 “ᐋᐦᑎ ᐃᐧᐣᑕᒪᐃᐧᔑᓈᐣᐠ,
ᐋᓇᐦᐲ ᐅᐦᐅᐁᐧ ᑫᐃᔑᐁᐧᐸᐠ ᒦᓇ ᑫᑯᓀᓇᐣ ᑫᐃᔑ ᑭᐦᑭᓇᐋᐧᓯᓈᑲᐧᑭᐣ ᐊᐦᐲ ᑲᐦᑭᓇ ᐅᓄᐁᐧᓂᐊᐧᐣ ᑫᑎᐱᐦᓭᑭᐣ ?”
5 ᒋᓴᐢ ᐅᑮᐃᔑ ᐃᐧᐣᑕᒪᐋᐧᐣ,
“ᐊᔕᐋᐧᐸᒥᐦᑯᐠ ᐁᑳ ᐊᐃᐧᔭ ᒋᐊᐧᓂᔑᒥᑯᔦᐠ.
6 ᒥᐦᔒᐣ ᐊᐃᐧᔭᐠ ᑕᐱᑕᑯᐦᔑᓅᐠ ᓂᑎᓯᓂᐦᑳᓱᐃᐧᓂᐣᐠ ᒌᐃᐦᑭᑐᐋᐧᐨ,
‘ᓃᐣ ᙭.’
ᒥᐦᔒᐣ ᐊᐃᐧᔭᐣ ᐅᑲᐊᐧᓂᔑᒫᐋᐧᐣ.
7 ᐊᐦᐲ ᐁᓅᐣᑕᒣᐠ ᓅᑎᓂᑫᐃᐧᓇᐣ ᒦᓇ ᐁᐋᓂᒨᒋᑳᑌᐠ ᓅᑎᓂᑫᐃᐧᓇᐣ,
ᑳᐃᐧᐣ ᒥᑯᓑᑳᑌᐣᑕᒧᐠ.
ᐅᐣᒋᑕ ᐱᑯᐦ ᒋᐊᓃᔑᐁᐧᐸᐠ,
ᑳᐃᐧᐣ ᒪᐦᔑ ᑕᑮᔑᐱᐦᓭᓯᓅᐣ.
8 ᐹᐦᐸᐦᑳᐣ ᐊᓂᔑᓂᓂᐊᐧᐠ ᑕᐸᓯᑮᐧᐦᑖᑐᐊᐧᐠ ᒦᓇ ᑲᔦ ᐅᑭᒫᐃᐧᓇᐣ.
ᐋᐣᑎ ᐱᑯᐦ ᑲᔦ ᒋᑖᓑᑭᐦᑲᒥᑭᐦᓭᐠ ᒦᓇ ᒋᐹᐊᐧᓃᓈᓂᐊᐧᐣᐠ.
ᒦᐦᐃᐁᐧ ᒋᐊᓂᒫᒋᐦᓭᐠ ᑖᐱᓑᑰᐨ ᑕᐃᓀᐣᑖᑲᐧᐣ ᐃᐦᑫᐧ ᐁᐃᐧᓂᐦᑖᐃᐧᑭᓈᐊᐧᐦᓱᐨ.
9 “ᐊᔮᐣᑳᐧᒥᓰᐠ ᑲᐃᔑ ᐸᑭᑎᓂᑰᓈᐋᐧ ᒋᐅᓇᔔᐋᐧᓂᑰᔦᐠ ᑲᔦ ᑭᑲᐸᐸᐦᑭᑌᐦᐅᑰᓈᐋᐧ ᐃᐦᐃᒫ ᐊᔭᒥᐦᐋᐃᐧ ᒫᐊᐧᒋᐦᐃᑐᐃᐧᑲᒥᑯᐣᐠ.
ᑭᑲ ᐅᐣᒋᓑᑲᐃᐧ ᑳᐸᐃᐧᐦᑕᐋᐧᐋᐧ ᐅᓇᐦᔓᐁᐧᐃᐧᑭᒫᐠ ᒦᓇ ᑭᐦᒋᐅᑭᒫᐠ ᓃᐣ ᐅᐣᒋ,
ᒋᐃᐧᐣᑕᒪᐋᐧᔦᑳᐧ ᐁᑌᐯᐧᔦᓂᒥᔑᔦᐠ.
10 ᐃᐦᐃᐁᐧ ᒥᓈᐧᒋᒧᐃᐧᐣ ᐱᓇᒫ ᓃᑳᐣ ᑕᐃᐧᐣᑕᒪᐋᐧᐋᐧᐠ ᑲᐦᑭᓇ ᐊᓂᔑᓂᓂᐊᐧᐠ ᐁᐣᑕᓱᑳᓀᓯᐋᐧᐨ ᑳᐱᒫᑎᓯᐋᐧᐨ.
11 ᐊᐦᐲ ᐱᑯᐦ ᐅᑖᐦᐱᓂᑰᔦᐠ ᒦᓇ ᐃᔑᐃᐧᓂᑰᔦᐠ ᒋᐅᓇᔓᐋᐧᓂᑰᔦᐠ,
ᑳᐃᐧᐣ ᒥᑯᓑᑳᑌᐣᑕᒧᐠ ᐋᓃᐣ ᑫᐃᑭᐦᑐᔦᐠ.
ᐊᐦᐲ ᐃᐦᐃᐁᐧ ᐃᓯᐦᓭᐠ,
ᐃᐦᑭᑐᐠ ᐊᓃᐣ ᑫᐃᔑ ᒦᓂᑯᐃᐧᓯᔦᐠ.
ᑳᐃᐧᓃᐣ ᑮᓇᐋᐧ ᑳᑲᑭᑐᔦᐠ,
ᐱᑯᐦ ᐊᐦᐊᐁᐧ ᑳᑲᓈᑎᓯᐨ ᐊᐦᒑᐠ.
12 “ᐅᐄᐧᒋᐦᑫᐧᓰᒫ ᐅᑲᒪᒥᔑᒫᐋᐧᐣ ᐅᐄᐧᒋᐦᑫᐧᓰᐊᐧᐣ ᒋᓂᐦᓯᒥᐨ,
ᑲᔦ ᐅᑖᑖᒥᒫ ᐅᓃᒑᓂᔕᐣ.
ᐊᐋᐧᔑᔕᐠ ᐅᑲᐸᓯᑮᐧᐦᑕᐋᐧᐋᐧᐣ ᐅᓃᑭᐦᐃᑯᐋᐧᐣ ᑲᔦ ᐅᑲᐸᑭᑎᓈᐋᐧᐣ ᒋᓂᐦᓯᒥᐨ.
13 ᑲᐦᑭᓇ ᐊᐃᐧᔭᐠ ᑲᐸᑳᐧᓂᑰᐋᐧ ᓃᐣ ᐅᐣᒋ,
ᔖᑰᐨ ᐊᐃᐧᔭ ᑫᒥᔕᑳᒣ ᒪᓑᑲᐃᐧ ᑳᐸᐃᐧᐨ ᑕᐱᒫᒋᐦᐋᑲᓅ.
ᑳᐸᑳᐧᓂᐁᐧᐨ ᑳᐃᐧ ᓂᔑᐊᐧᓈᒋᐦᒋᑫᐨ
14 “ᐊᐦᐲ ᐋᐧᐸᒫᔦᐠ ‘ᑳᐸᑳᐧᓂᐁᐧᐨ ᑳᐃᐧ ᓂᔑᐊᐧᓈᒋᐦᒋᑫᐨ ’ ᐁᓃᐸᐃᐧᐨ ᐃᐦᐃᒫ ᑫᐄᐧᐣ ᐁᑳ ᑳᐅᐣᒋ ᑎᐯᐣᑖᑯᓯᐨ (ᐊᐦᐊᐁᐧ ᑳᐊᔭᒥᐦᑑᐨ ᐅᑲᓂᓯᑐᐦᑖᐣ) ᐃᐦᐃᒫ ᑳᐊᔮᐋᐧᐨ ᒍᑎᔭ ᐊᐦᑮᐣᐠ ᑕᒫᒋᔮᒧᐊᐧᐠ ᑳᐃᔑ ᐱᐦᑲᐧᑎᓈᓂᐠ.
15 ᑮᓑᐱᐣ ᐊᐃᐧᔭ ᐊᐧᑭᒋᐋᐧᑲᐦᐃᑲᐣ ᑳᐊᔮᐨ,
ᑳᐃᐧᐣ ᑕᓃᓵᐣᑕᐁᐧᓰᐣ ᓈᐣᑕ ᒋᐲᐣᑎᑫᐨ ᐋᐧᑲᐦᐃᑲᓂᐣᐠ ᒋᐅᑖᐦᐱᓇᐣᐠ ᑫᑰᓂᓂ.
16 ᑮᓑᐱᐣ ᐊᐃᐧᔭ ᐃᐦᐃᒫ ᑳᐊᔮᐨ ᑭᐦᑎᑳᓂᐣᐠ,
ᑳᐃᐧᐣ ᐅᑲᑮᐦᑮᐁᐧᓈᐢᑲᓰᐣ ᐅᒪᑰᐟ.
17 ᐃᐦᐃᐁᐧ ᐁᑲᑮᔑᑳᐠ ᐅᒫᒫᒥᒫᐠ ᑕᑲᑲᐧᑕᑭᑐᐊᐧᐠ ᑳᑭᑭᓑᑲᐋᐧᐊᐧᓱᐋᐧᐨ ᒦᓇ ᑳᓅᓂᐦᐊᐊᐧᓱᐋᐧᐨ.
18 ᐊᔭᒥᐦᒋᑫᔪᐠ ᐁᑳ ᐅᐦᐅᐁᐧ ᒋᐃᔑᐁᐧᐸᐣᐠ ᒣᑳᐧᐨ ᐱᐴᐣᐠ.
19 ᒋᑫᒪ ᐅᓄᐁᐧᓂᐊᐧᐣ ᑮᔑᑳᐊᐧᐣ ᑕᐊᔮ ᐋᓂᒥᓯᐃᐧᐣ ᐁᑳ ᐄᐧᐦᑳ ᑳᑮᐲᔑᐁᐧᐸᐠ,
ᐊᐦᐲ ᓂᓑᑕᒼ ᑭᔐᒪᓂᑑ ᑳᑮᐅᔑᐦᑑᐸᐣ ᐊᐦᑮᓂ ᐲᓂᓑ ᓅᐣᑯᒼ,
ᑳᐃᐧᐣ ᐄᐧᐦᑳ ᒦᓇᐋᐧ ᐅᐦᐅᐁᐧ ᑕᐃᔑᐁᐧᐸᐦᓯᓅᐣ.
20 ᑮᓑᐱᐣ ᑳᑎᐯᐣᒋᑫᐨ ᐁᑳ ᑮᐅᐣᒋ ᐊᒎᓇᒥᑯᐸᓀᐣ ᐅᓄᐁᐧᓂᐊᐧᐣ ᑮᔑᑳᐊᐧᐣ,
ᑳᐃᐧᐣ ᐊᐃᐧᔭ ᑕᑮᐱᒫᑎᓰᐸᐣ.
ᐅᓄᐁᐧᓂᐊᐧᐣ ᐅᐣᒋ ᑳᑮᐅᓈᐸᒫᒋᐣ ᐅᑮ ᐊᔐᓇᒪᐋᐧᐣ.
21 ᐃᐦᐃᐁᐧ ᒣᑳᐧᐨ ᑮᓑᐱᐣ ᐊᐃᐧᔭ ᐃᑯᔦᐠ,
‘ᐃᓈᐱᔪᐠ,
ᒦᐦᐋᐁᐧ ᙭!’
ᓈᐣᑕ ᑲᔦ,
‘ᐃᓈᐱᔪᐠ ᐊᐦᐋᐁᐧᑎ!’
ᑳᐃᐧᐣ ᑌᐯᐧᐦᑕᒧᐠ.
22 ᑕᐱᒨᐦᑮᐊᐧᐠ ᓇᐦᐹᐨ ᙭ᑕᐠ ᒦᓇ ᓇᐦᐹᐨ ᐅᑭᐦᑭᐁᐧᐦᐃᑫᐠ ᒦᓇ ᑕᐋᐧᐸᐣᑕᐦᐃᐁᐧᐊᐧᐠ ᒪᒫᐣᑖᐃᐧ ᑫᑰᓇᐣ ᑫᐅᐣᒋ ᐊᐧᓂᔑᒫᐋᐧᐨ ᐊᐧᐁᐧᓈᐸᒫᑲᓇᐣ ᑮᓑᐱᐣ ᑲᓑᑭᐦᑑᐋᐧᐨ.
23 ᐊᔮᐣᑳᐧᒥᓰᔪᐠ,
ᓃᑳᐣ ᑲᐦᑭᓇ ᑫᑰᐣ ᑭᑮᐃᐧᐣᑕᒪᐃᐧᓂᓈᐋᐧ.
ᐁᐊᓂᒨᑕᐣᐠ ᒋᓴᐢ ᐅᑕᑯᔑᓅᐃᐧᐣ
24 “ᐃᐦᐃᐁᐧ ᑮᔑᑳᐠ ᑮᐃᓑᑳᐧ ᑲᑲᐧᑕᑭᑑᓈᓂᐊᐧᐣᐠ,
‘ᐲᐦᓯᒼ ᑕᑲᓑᑮᑎᐱᑭᓯ,
ᑲᔦ ᑎᐱᐦᑭ ᐲᐦᓯᒼ ᑖᐴᓂᐋᐧᐦᓭᔮᓯᑫ,
25 ᐊᐧᓇᐣᑯᔕᐠ ᑕᐅᐣᒋᐸᐣᑭᔑᓅᐠ ᐃᓑᐱᒥᐣᐠ,
ᒦᓇ ᑳᓲᐣᑫᐣᑖᑲᐧᑭᐣ ᐃᓑᐱᒥᐣᐠ ᑳᐊᔮᑭᐣ ᑕᐊᐧᐦᑲᐃᐧᓭᐊᐧᐣ.’
26 “ᐃᐦᐃᐁᐧ ᐊᐦᐲ ᐊᐃᐧᔭᐠ ᐅᑲᐋᐧᐸᒫᐋᐧᐣ ᐃᓂᓃᐤ ᐅᑯᓯᐦᓴᐣ ᒋᐱᓈᑯᓯᓂᐣᐨ ᐊᐧᐦᑮᐧᐣᐠ ᑭᑭᒪᓑᑲᐃᐧᓰᐃᐧᐣ ᒦᓇ ᑭᐦᑌᐣᑖᑯᓯᐃᐧᐣ.
27 ᐅᑲᐲᒋᓂᔕᐦᐋᐧᐣ ᐅᑮᔑᑰᒪᐣ ᒦᓇ ᐅᑲᒫᐊᐧᐣᑑᓈᐣ ᑳᑮᐅᓈᐸᒫᒋᐣ,
ᐃᐦᐃᒫ ᐅᐣᒋ ᓃᐊᐧᔦᐠ ᑳᐅᐣᒋᓄᐁᐧᐠ,
ᐃᐦᐃᒫ ᐅᐣᒋ ᐁᑭᔑᐸᐦᑲᒥᑳᐠ ᒦᓇ ᑮᔑᐱᑮᔑᑰᐊᐧᐣᐠ.
ᒦᓂᔖᐦᑎᐠ ᑳᐃᔑ ᐋᓂᒨᒫᑲᓅᐨ
28 “ᑭᐦᑫᐣᑕᒧᐠ ᐋᐧᐁᐧᐦᒋᑲᐣ ᐊᐦᐊᐁᐧ ᒦᓂᔖᐦᑎᐠ ᐅᐣᒋ.
ᐊᐧᑎᑲᐧᓇᐣ ᐁᐦᐊᓂᓅᑳᑭᐣ ᒦᓇ ᐊᓃᐲᔕᐣ ᐁᓂᓈᑲᐧᐦᑭᐣ,
ᑭᑭᐦᑫᐣᑖᓈᐋᐧ ᐋᔕ ᐁᐯᔑᓈᑲᐧᐠ ᒋᓃᐱᐣᐠ.
29 ᐁᑲᐧ ᐊᐦᐲ ᐁᐋᐧᐸᐣᑕᒣᐠ ᐅᓄᐁᐧᓂᐊᐧᐣ ᑫᑰᓇᐣ ᑫᐃᓯᐦᓭᑭᐣ,
ᑭᑭᐦᑫᐣᑕᒨᐠ ᐋᔕ ᐁᐯᔑᓈᑲᐧᐠ,
ᐃᐦᐃᒫ ᐃᓑᑳᐧᐣᑌᐣᐠ.
30 ᑌᐯᐧ ᑭᑎᓂᓈᐋᐧ,
ᓅᐣᑯᒼ ᑳᐊᔮᐋᐧᐨ ᑳᐊᓇᐦᑫ ᐱᒫᑎᓯᐋᐧᐨ ᑳᐃᐧᐣ ᑕᐴᓂᐊᔮᓰᐊᐧᐠ ᒥᓂᑯᐠ ᑲᐦᑭᓇ ᑫᑰᓇᐣ ᑫᐅᒋᐦᒋᓭᑭᐣ.
31 ᑮᔑᐠ ᒦᓇ ᐊᐦᑭ ᑕᑭᔑᐱᐦᓭᐊᐧᐣ,
ᐁᑲᐧᐄᐧᐣ ᓂᑎᐦᑭᑐᐃᐧᓇᐣ ᑳᐃᐧᐣ ᐃᐧᑳ ᑕᐃᓑᑳᐧᐦᓭᓯᓅᐊᐧᐣ.
ᑳᐃᐧᐣ ᐊᐃᐧᔭ ᐅᑭᐦᑫᐣᑕᓰᐣ ᐋᓇᐦᐲ ᑫᐅᒋᐦᒋᓭᐠ ᑎᐸᐦᐃᑲᐣ
32 “ᑳᐃᐧᐣ ᐊᐃᐧᔭ ᐅᑭᐦᑫᐣᑖᓰᐣ ᐋᓇᐦᐲ ᐃᐦᐃᐁᐧ ᑮᔑᑳᐠ ᒦᓇ ᑎᐸᐦᐃᑲᐣ,
ᑳᐃᐧᐣ ᑲᔦ ᐅᑮᔑᑰᐠ ᑭᐦᒋᑮᔑᑯᐣᐠ ᐅᑭᐦᑫᐣᑕᓰᓈᐋᐧ,
ᑳᐃᐧᐣ ᑲᔦ ᐅᑯᓯᓯᒫ,
ᐱᑯᐦ ᐁᐦᑕ ᐅᑖᑖᒥᒫ ᐅᑭᐦᑫᐣᑖᐣ.
33 ᐊᔮᐣᑳᐧᒥᓰᐠ,
ᐊᔕᐋᐧᐱᔪᐠ,
ᒦᓇ ᐊᔭᒥᐦᒋᑫᔪᐠ.
ᑳᐃᐧᐣ ᑭᑭᐦᑫᐣᑕᓰᓈᐋᐧ ᐋᓇᐦᐲ ᐊᐦᐱᐣ ᑫᐅᒋᐦᒋᓭᐠ ᑎᐸᐦᐃᑲᐣ.
34 ᑕᐃᓀᐣᑖᑲᐧᐣ ᐯᔑᐠ ᓈᐯ ᐁᒫᒑᐨ.
ᐁᓇᐣᑲᑕᐣᐠ ᐅᐋᐧᑲᐦᐃᑲᐣ ᒦᓇ ᐁᑲᓇᐁᐧᐣᑕᐦᐋᒋᐣ ᐅᑕᓄᐦᑮᓈᑲᓇᐣ,
ᐁᐣᑕᓱ ᐯᐦᐯᔑᑯᓂᐨ ᐁᑮᒫᒦᓈᐨ ᑫᐃᓇᓄᐦᑮᓂᐨ,
ᒦᓇ ᐅᐃᐧᐣᑕᒪᐋᐧᐣ ᑳᑲᓇᐁᐧᐣᑕᒥᓂᐨ ᐃᓑᑳᐧᐣᑌᒼ ᒋᐊᔕᐋᐧᐱᓂᐨ.