ᒋᓴᐢ ᐅᑮ ᑑᒥᓂᑰᐣ ᐃᑫᐧᐦᐊᐧᐣ ᐯᐦᑕᓃ ᑖᐃᐧᓂᐣᐠ
14
ᓃᔓᑮᔑᑳ ᑮᐊᐲᐦᓯᓈᑲᐧᐣ ᒋᐅᒋᐦᒋᓭᐠ ᒪᔮᓑᑯᑖᑐ ᒪᑯᔐᐃᐧᐣ ᒦᓇ ᐁᑳ ᑳᐅᒼᐱᔑᐣᐠ ᐋᓇᐦᑯᓈ.
ᑭᐦᒋᐊᔭᒥᐦᐁᐃᐧᑭᒫᐠ ᑲᔦ ᑳᑭᐦᑭᓅᐦᐊᒫᑫᐋᐧᐨ ᐅᓇᐦᔓᐁᐧᐃᐧᓂ,
ᐅᑮᓇᓈᐣᑐᓈᓈᐋᐧ ᐋᐣᑎ ᑫᑮᐅᐣᒋ ᑳᒋᑎᓈᐋᐧᐨ ᒋᓴᓲᐣ ᒦᓇ ᒋᓂᐦᓵᐋᐧᐨ.
2 ᑮᐃᐦᑭᑐᐊᐧᐠ,
“ᑳᐃᐧᐣ ᑕᐅᑖᐦᐱᓈᑲᓅᓰᐣ ᒣᑳᐧᐨ ᒪᑯᔖᓂᐊᐧᓂᐠ,
ᓈᐣᑕ ᑕᐅᒼᐯᑲᒥᑭᓯᐊᐧᐠ ᐊᓂᔑᓂᓂᐊᐧᐠ.”
3 ᒣᑳᐧᐨ ᐯᐦᑕᓃ ᑖᐃᐧᓂᐣᐠ ᒋᓴᐢ ᐁᐦᐊᔮᐨ ᐁᑮᔭᐱᐨ ᐁᐄᐧᐦᓯᓂᐨ ᐅᐋᐧᑲᐦᐃᑲᓂᐣᐠ ᓵᐃᒪᐣ ᑳᒪᒑᐦᐱᓀᐨ,
ᐯᔑᐠ ᐃᐦᑫᐧ ᑮᐱᑕᑯᔑᐣ ᐁᑮᐲᑑᐨ ᐊᐦᓯᓂᐃᐧ ᐊᓯᐊᐧᒋᑲᓂ,
ᐊᓬᐊᐹᐢᑕᕒ ᑳᐃᒋᑳᑌᐠ,
ᒫᐊᐧᐨ ᑳᔮᑲᐧᐣᑭᑌᐠ ᒥᓈᐣᑲᐧᐦᐅᐣ,
ᐃᐦᐃᒫ ᐁᑮᐅᐣᒋ ᐅᔑᐦᒋᑳᑌᐠ ᑑᒥᓂᑲᓈᐴ,
ᓇᕒᐟ ᑳᐃᒋᑳᑌᐠ.
ᐅᑮᐴᑳᐧᐱᐦᑭᓈᐣ,
ᐁᑮᐹᐦᑭᓈᐣᐠ ᐊᓯᐊᐧᒋᑲᓈᐱᐦᑯᓂ ᒦᓇ ᐅᑮᓰᑭᓈᐣ ᒥᓈᐣᑯᐦᐅᓂ ᒋᓴᓲᐣ ᐅᐦᑎᑳᐧᓂᐣᐠ.
4 ᓈᐣᑕ ᐊᐃᐧᔭᐠ ᐃᐦᐃᒫ ᑳᐊᔮᐋᐧᐨ ᑮᐅᐣᒋ ᒪᒉᐣᑕᒨᐠ ᐁᑮᐦᐊᐃᓂᑐᐋᐧᐨ,
“ᑫᑯᓀᐣ ᑲᐧᐣᑕ ᐁᐣᒋ ᓂᔑᐋᐧᓈᒋᑑᐨ ᒥᓈᐣᑲᐧᐦᐅᓂ?
5 ᒋᑮᐊᑖᐋᐧᑌᑭᐸᐣ ᐊᐊᐧᔑᒣ ᓂᐦᓵᐧ ᒥᑕᐦᓱᒥᑕᓇ ᐋᐧᐹᐱᐦᑯᔔᓂᔮᓈᐦᐱᐠ,
ᑲᔦ ᒋᑮᒦᓈᑲᓅᐋᐧᐦᐸᐣ ᑳᑭᑎᒫᑭᓯᐋᐧᐨ.”
ᐅᑮ ᒪᒪᒌᐊᐃᓈᐋᐧᐣ ᐃᓂᐁᐧᓂᐊᐧᐣ ᐃᐦᑫᐧᐊᐧᐣ.
6 “ᑳᐃᐧᐣ ᐱᒣᓂᒥᐠ,”
ᒋᓴᐢ ᑮᐃᐦᑭᑐ.
“ᐋᐣᑕᔑᓂᐦᐃ ᐁᐧᐣᒋ ᒥᑯᓑᑳᒋᐦᐋᔦᐠ ?
ᒫᐊᐧᐨ ᒥᓈᐧᔑᓂᓂ ᐃᐦᐃᐁᐧᓂ ᑳᑮᑑᑕᒪᐃᐧᔑᐨ.
7 ᐅᑭᑎᒫᑭᓴᐠ ᒨᔕᐠ ᑲᐃᐧᒋᐊᔮᒧᑯᐋᐧ,
ᐋᓇᐦᐲ ᐱᑯᐦ ᐃᓀᐣᑕᒣᐠ ᒋᐃᐧᒋᐦᐋᔦᑳᐧ.
ᔖᑰᐨ ᓃᐣ ᑳᐃᐧᐣ ᒨᔕᐠ ᑭᑲᐃᐧᒋᐃᐧᔑᓈᐋᐧ.
8 ᐊᐦᐊᐁᐧ ᐃᐦᑫᐧ ᑳᐃᔑ ᑲᓑᑭᐦᑑᐨ ᐅᑮᑑᑖᐣ.
ᒥᑐᓂ ᑮᔖᐨ ᐅᑮᑑᒥᓈᐣ ᓃᔭᐃᐧᓂ ᐁᑮᑲᐧᔮᐣᒋᐦᑑᐨ ᑳᐃᐧᓇᐦᐃᓂᑰᔮᐣ.
9 ᑌᐯᐧ ᑭᑎᓂᓈᐋᐧ,
ᐱᑯᐦ ᐋᐣᑎ ᒥᓈᐧᒋᒧᐃᐧᐣ ᑫᐃᔑ ᑲᑮᐦᑭᒧᐋᐧᑌᐠ ᒥᓯᐁᐧ ᐁᐲᐦᑕᑲᒥᑳᐠ ᐊᐦᑭ,
ᐊᐦᐊᐁᐧ ᐃᐦᑫᐧ ᑳᑮᐃᔒᒋᑫᐨ ᑕᔮᓂᒨᑌᓂ ᒋᐅᐣᒋ ᒥᑲᐃᐧᓂᐦᑕᐋᐧᑲᓅᐨ.”
10 ᐁᑲᐧᐦᐱᐣ ᒍᑕᐢ ᐃᐢᑳᕒᐃᔭᐟ,
ᐊᐦᐊᐁᐧ ᐯᔑᐠ ᑳᒥᑖᓱ ᓃᔓᔖᐳᐋᐧᐨ ᑭᐦᑭᓅᐦᐊᒪᐋᐧᑲᓇᐠ,
ᑮᒫᒑ ᐁᑮᓈᓯᐦᑲᐋᐧᐨ ᑭᐦᒋᐊᔭᒥᐦᐁᐃᐧᑭᒫᐣ ᐁᑮ ᐊᐣᑕᐃᐧᒪᒥᔑᒫᐨ ᒋᓴᓲᐣ.
11 ᑮᒥᓀᐧᐣᑕᒧᐠ ᐊᐦᐲ ᑳᓅᐣᑕᒧᐋᐧᐨ ᐅᐦᐅᐁᐧᓂ ᒦᓇ ᐅᑮ ᐊᔓᑕᒪᐋᐧᐋᐧᐣ ᒋᒦᓈᐋᐧᐨ ᔔᓂᔮᓇᐣ.
ᒍᑕᐢ ᐅᑮᓇᓈᐣᑐᓈᐣ ᐋᐣᑎ ᐊᐊᐧᔑᒣ ᑫᐃᔑ ᓇᐦᐃᓭᓂᐠ ᒋᐊᐧᔦᔑᐸᑭᑎᓈᐨ.
ᒋᓴᐢ ᐁᐃᐧᒋᐄᐧᐦᓯᓃᒫᐨ ᐅᑭᐦᑭᓅᐦᐊᒪᐋᐧᑲᓇᐣ
12 ᐃᐦᐃᐁᐧ ᓂᐢᑕᒼ ᐁᑮᔑᑳᐠ ᑳᐃᐧᒪᑯᔖᓂᐊᐧᐣᐠ ᐁᑳ ᑳᐅᐣᐱᔑᐣᐠ ᐋᓇᐦᑯᓈᐣ,
ᐃᐦᐃᒫ ᑳᐸᑭᑎᓈᓱᐋᐧᑳᓂᐊᐧᐣᐠ ᒫᔭᑎᐦᑲᐧᐠ ᒪᔮᓑᑯᑖᑐ ᒪᑯᔐᐃᐧᓂᐣᐠ,
ᒋᓴᐢ ᐅᑭᐦᑭᓅᐦᐊᒪᐋᐧᑲᓇᐣ ᐅᑮᑲᑫᐧᒋᒥᑰᐣ,
“ᐋᐣᑎ ᐁᐃᔑ ᓇᐣᑕᐁᐧᐣᑕᒪᐣ ᒋᐃᔑ ᑲᐧᔮᐣᒋᐦᑑᔮᐣᐠ ᑫᑕᔑᐄᐧᐦᓯᓃᔭᐣᐠ ᒪᔮᓑᑯᑖᑐ ᒪᑯᔐᐃᐧᐣ ?”
13 ᒋᓴᐢ ᐅᑮᐃᔑᓂᔖᐊᐧᐣ ᓃᔑᐣ ᐅᑭᐦᑭᓅᐦᐊᒪᐋᐧᑲᓇᐣ ᐁᑮᐦᐃᓈᐨ,
“ᐃᔖᔪᐠ ᑭᐦᒋᑖᐃᐧᓂᐣᐠ,
ᓈᐯ ᑲᓇᑭᓑᑳᑯᐋᐧ ᒋᐱᒨᐃᐧᑑᐨ ᓂᐲᐃᐧ ᐊᓯᐊᐧᒋᑲᓂ ᒋᔖᑲᓑᑭᓀᓂᐠ.
ᒦᐦᐋᐁᐧ ᐱᒥᓂᔕᐦᐅᐠ.
14 ᐊᐦᐲ ᐲᑎᑫᐨ ᐋᐧᑲᐦᐃᑲᓂᐣᐠ,
ᐅᐦᐅᐁᐧ ᑲᐃᓈᐋᐧ ᑳᑎᐯᐣᑕᐣᐠ,
‘ᐅᑭᐦᑭᓅᐦᐊᒫᑫ ᑲᑫᐧᑌ,
ᐋᐣᑎ ᐁᔮᐠ ᑮᐃᐧᑌᐃᐧᑲᒥᐠ,
ᑫᑕᔑ ᐃᐧᒋᐄᐧᐦᓯᓃᒪᑳᐧ ᓂᑭᐦᑭᓅᐦᐊᒪᐋᐧᑲᓇᐠ ᒪᔮᓑᑯᑖᑐ ᒪᑯᔐᐃᐧᐣ.’
15 ᑭᑲ ᐋᐧᐸᐣᑕᐦᐃᑰᐋᐧ ᒋᒥᔖᐠ ᐸᐦᑫᑲᒥᐠ ᐃᓑᐱᒥᐣᐠ ᒥᑐᓂ ᐁᑲᐧᔮᐣᑕᐣᐠ.
ᒦᐦᐃᒫ ᐃᔑᑲᐧᔮᐣᒋᒋᑫᔪᐠ ᑫᑕᔑᐄᐧᐦᓯᓃᔭᐣᐠ.”
16 ᑭᐦᑭᓅᐦᐊᒪᐋᐧᑲᓇᐠ ᑮᒫᒑᐊᐧᐠ ᑮᐃᔖᐊᐧᐠ ᑭᐦᒋᑖᐃᐧᓂᐣᐠ ᒦᓇ ᐅᑮᒥᐦᑳᓈᐋᐧ ᒪᔮᒼ ᒋᓴᓲᐣ ᑳᑮᐃᔑ ᐃᐧᐣᑕᒫᑯᐋᐧᐨ.
ᐁᑲᐧ ᐅᑮᑲᐧᔮᐣᒋᐦᑑᓈᐋᐧ ᒪᔮᓑᑯᑖᑐ ᒪᑯᔐᐃᐧᐣ.
17 ᐊᐦᐲ ᐁᐊᓅᓈᑯᔑᐣᐠ ᒋᓴᐢ ᑮᐱᑕᑯᔑᐣ ᐊᐦᔑᐨ ᑲᔦ ᑳᒥᑖᓱ ᓃᔓᔖᐱᓂᐨ.
18 ᒣᑳᐧᐨ ᐁᐦᐊᐳᐋᐧᐨ ᐄᐧᐦᓯᓃᐃᐧᓈᑎᑯᐣᐠ ᐁᐄᐧᐦᓯᓄᐋᐧᐨ ᒋᓴᐢ ᑮᐦᐃᑭᑐ,
“ᑌᐯᐧ ᑭᑎᓂᓈᐋᐧ,
ᐯᔑᐠ ᑮᓇᐋᐧ ᓂᑲᒪᒥᔑᒥᐠ,
ᐊᐦᐊᐁᐧ ᑳᐃᐧᒋᐄᐧᐦᓯᓃᒥᔑᐨ.”
19 ᑭᐦᑭᓅᐦᐊᒪᐋᐧᑲᓇᐠ ᑮᒪᒉᐣᑕᒧᐠ,
ᐁᔑᐹᐯᔑᑯᐋᐧᐨ ᐅᑮᐦᐃᓈᐋᐧᐣ,
“ᑌᐯᐧᓇ ᑳᐃᐧᐣ ᓃᐣ ?”
20 ᒋᓴᐢ ᐅᑮᓇᐦᑲᐧᐁᐧᔑᐦᐋᐣ,
“ᑮᓇᐋᐧ ᔕ ᐯᔑᐠ ᑳᒥᑖᓱ ᓃᔓᔖᐱᔦᐠ,
ᐊᐦᐋᐁᐧ ᑫᐄᐧᐣ ᑳᑯᐣᑖᓈᐨ ᐋᓇᐦᑯᓈᐣ ᑳᐄᐧᑕᑐᐦᐴᒥᔑᐨ ᐅᓈᑲᓂᐣᐠ.
21 ᐊᐦᐊᐁᐧ ᐃᓂᓃᐤ ᐅᑯᓯᐦᓴᐣ ᑕᓂᐳ ᑖᐱᓑᑰᐨ ᑳᐃᔑᐱᐦᐃᑳᑌᐠ ᑳᐃᓈᒋᒫᑲᓅᐨ.
ᐁᑲᐧ ᐊᐦᐊᐁᐧ ᑕᑲᑲᐧᑕᑭᓯ ᓈᐯ ᑳᒪᒥᔑᒫᐨ ᐃᓂᓃᐤ ᐅᑯᓯᐦᓴᐣ!
ᓇᐊᐧᐨ ᑕᑮᒥᓇᐧᔑᓅᐸᐣ ᑮᓑᐱᐣ ᐁᑳ ᑮᓂᐦᑕᐃᐧᑭᑯᐸᓀᐣ.”
22 ᒣᑳᐧᐨ ᐁᐄᐧᐦᓯᓄᐋᐧᐨ,
ᒋᓴᐢ ᐅᑮᐅᑖᐦᐱᓈᐣ ᐋᓇᐦᑯᓈᐣ,
ᑮᓇᓈᐦᑯᒥ ᒦᓇ ᐅᑮᐸᐦᑫᐧᓈᐣ,
ᐅᑮᒦᓈᐣ ᐅᑭᐦᑭᓅᐦᐊᒪᐋᐧᑲᓇᐣ ᐁᐃᐦᑭᑐᐨ,
“ᐅᑖᐦᐱᓂᐠ,
ᐊᒦᐦᐅᐁᐧ ᓃᔭᐤ.”
23 ᐅᑮᐅᑖᐦᐱᓈᐣ ᒥᓂᐦᑳᐧᑲᓂᓂ,
ᑮᓇᓈᐦᑯᒥ ᒦᓇ ᐅᑮᒦᓈᐣ,
ᑲᐦᑭᓇ ᐃᐦᐃᒫ ᑮᐅᐣᒋ ᒥᓂᐦᑫᐧᐊᐧᐠ.
24 ᐅᑮᐦᐃᓈᐣ,
“ᒦᐦᐅᐁᐧ ᓂᒥᐢᑯ ᐅᓑᑭ ᐊᔓᑕᒫᑫᐃᐧᐣ,
ᒥᐦᔒᐣ ᐅᐣᒋ ᑲᓰᑭᓂᑳᑌᐠ.
25 ᑌᐯᐧ ᑭᑎᓂᓈᐋᐧ,
ᑳᐃᐧᐣ ᒦᓇᐋᐧ ᓂᑲᒥᓂᐦᑫᐧᓰᐣ ᔔᒥᓈᐴ ᐹᓂᒫ ᐃᐦᐃᐁᐧ ᑮᔑᑳᐠ ᐊᐦᐱᐣ ᒥᓂᐦᑫᐧᔮᐣ ᐅᓑᑭ ᔔᒥᓈᐴ ᑭᔐᒪᓂᑑ ᐅᑑᑭᒫᐃᐧᓂᐣᐠ.”
26 ᐊᐦᐲ ᑳᐃᓑᑲᐧ ᓂᑲᒧᐋᐧᐨ,
ᑮᐃᔖᐊᐧᐠ ᐊᓬᐃᑊ ᐱᐦᑳᐧᒪᑎᓈᐣᐠ.
ᒋᓴᐢ ᐅᓃᑳᓂᐃᐧᑖᐣ ᐲᑕᕒᐊᐧᐣ ᒋᐊᓇᐁᐧᓂᒥᑯᐨ
27 ᒋᓴᐢ ᐅᑮᐦᐃᓈᐣ,
“ᑲᐦᑭᓇ ᑳᓇᑲᓂᐦᔑᓈᐋᐧ,
ᒋᑫᒪ ᐁᐃᓇᓯᓇᐦᐃᑳᑌᐠ,
“ ‘ᓂᑲᐸᐦᑭᐦᑌᐦᐋᐧ ᐅᑲᓇᐃᐧᒫᔭᑎᐦᑫᐧ,
ᑕᐊᐧᓭᐸᓄᐦᐅᐊᐧᐠ ᒫᔭᑎᐦᑲᐧᐠ.’
28 ᐊᐦᐲ ᐃᓑᑳᐧ ᐊᐧᓂᓑᑳᔮᐣ,
ᓂᑲᓂ ᓃᑳᓂᓑᑳ ᑳᓬᐃᓬᐄᐣᐠ.”
29 ᐲᑕᕒ ᐅᑮᐦᐃᓈᐣ,
“ᐋᓇ ᐄᐧᓂᑯ ᑲᐦᑭᓇ ᒋᓇᑲᓂᐦᑳᐧ,
ᑳᐃᐧᐣ ᓃᐣ ᑲᓇᑲᓂᓯᓅᐣ.”
30 ᒋᓴᐢ ᐅᑮᓇᐦᑲᐁᐧᔑᐦᐋᐣ,
“ᑌᐯᐧ ᑭᑎᓂᐣ,
ᓅᐣᑯᒼ ᑫᑎᐱᐦᑳᐠ ᐁᒪᐧᔦ ᓃᔖᐧ ᓅᐣᑖᑯᓯᐨ ᐹᑲᐦᐋᑳᐧᐣ,
ᓂᐦᓵᐧ ᑭᑲᐃᐦᑭᐟ ᐁᑳ ᐁᑭᐦᑫᓂᒥᔑᔭᐣ.”
31 ᐲᑕᕒ ᐅᑮᑭᔒᑲᓅᓈᐣ,
“ᒥᓴᐋᐧᐨ ᐱᑯᐦ ᐄᐧᒋᓂᐴᒥᓈᐣ,
ᑳᐃᐧᐣ ᐃᐧᐦᑳ ᓂᑲᐃᐦᑭᑐᓰᐣ ᐁᑳ ᐁᑭᐦᑫᓂᒥᓈᐣ.”
ᒦᐦᐃ ᐯᔑᑲᐧᐣ ᑯᑕᑭᔭᐠ ᑳᐃᐦᑭᑐᐋᐧᐨ.
ᑫᐟᓭᒪᓃ ᑭᐦᑎᑳᓂᐣᐠ
32 ᑮᐦᐃᔖᐊᐧᐠ ᑫᐟᓭᒪᓂ ᑭᐦᑎᑳᓂᐣᐠ ᑳᐃᔑᓂᐦᑳᑌᐠ,
ᒋᓴᐢ ᐅᑮᐦᐃᓈᐣ ᐅᑭᐦᑭᓅᐦᐊᒪᐋᐧᑲᓇᐣ,
“ᐅᐦᐅᒫ ᐊᐲᐦᒋᐊᐱᔫᐠ ᒣᑳᐧᐨ ᐊᐣᑕᐃᐧ ᐊᔭᒥᐦᒋᑫᔮᐣ.”
33 ᐅᑮᐃᐧᒌᐋᐧᐣ ᐲᑕᕒᐊᐧᐣ,
ᒉᒥᓲᐣ ᒦᓇ ᒐᐧᓇᐣ,
ᐁᑲᐧ ᑮᒫᒌ ᐋᓂᒣᐣᑕᒼ ᒦᓇ ᑮᒥᑯᓑᑳᑌᐣᑕᒼ.
34 “ᓂᑕᐦᒑᐠ ᒥᐢᑕᐦᐃ ᒥᔕᒣᐣᑕᒼ ᓂᐳᐃᐧᓂᐣᐠ ᐃᓀᐦᑫ.
ᐅᐦᐅᒫ ᐊᔮᔫᐠ ᒦᓇ ᐊᔕᐋᐧᐱᐠ,”
ᐅᑮᐦᐃᓈᐣ.
35 ᐸᐣᑮ ᓃᑲᑌ ᑮᐦᐃᔖ,
ᒋᓴᐢ ᑮᐸᐣᑭᔑᐣ ᒧᑕᐦᑲᒥᐠ ᒦᓇ ᐁᑮᐃᔑ ᐊᔭᒥᐦᒋᑫᐨ,
“ᑮᓑᐱᐣ ᑫᑮᐃᓯᐦᓭᑫᐧᐣ ᐅᐦᐅᐁᐧ ᑎᐸᐦᐃᑲᐣ ᑮᔮᒼ ᓂᑲᒪᔮᓑᑳᑰᐣ ᑲᑳᐧᑕᑭᑐᐃᐧᐣ.”
36 ᒦᓇ ᑮᐦᐃᑭᑐ,
“ᐋᐸ,
ᓂᑖᑖ,
ᑲᐦᑭᓇ ᑫᑰᐣ ᑭᑲᓑᑭᐦᑑᐣ.
ᐅᑖᐦᐱᓇᐣ ᐅᐦᐅᐁᐧ ᒥᓂᐦᑳᐧᑲᐣ ᓂᑲᑳᐧᑕᑭᑑᐃᐧᓂᐣᐠ.
ᑳᐃᐧᐣ ᓃᐣ ᐁᐃᔑ ᓇᐣᑕᐁᐧᐣᑕᒫᐣ,
ᑮᐣ ᐱᑯ ᐁᐃᔑ ᓇᐣᑕᐁᐧᐣᑕᒪᐣ.”
37 ᐁᑲᐧᐦᐱᐣ ᒋᓴᐢ ᐅᑮᑮᐁᐧᓈᓯᐦᑲᐋᐧᐣ ᐅᑭᐦᑭᓅᐦᐊᒪᐋᐧᑲᓇᐣ ᒦᓇ ᐅᑮᒥᐦᑲᐋᐧᐣ ᐁᓂᐹᓂᐨ.
ᒋᓴᐢ ᐅᑮᑲᓅᓈᐣ ᐲᑕᕒᐊᐧᐣ,
“ᓵᐃᒪᐣ,
ᑭᓂᐹᓇ?
ᑳᐃᐧᓇ ᒋᑲᓑᑭᑑᔭᐣ ᐯᔑᑯ ᑎᐸᐦᐃᑲᐣ ᒋᑮᐊᔕᐋᐧᐱᔭᐣ ?
38 ᐊᔕᐋᐧᐱᐠ ᒦᓇ ᐊᔭᒥᐦᐋᐠ ᐁᑳ ᒋᐸᐣᑭᔑᓂᔦᐠ ᑲᑫᐧᒋᐦᐃᐁᐧᐃᐧᓂᐣᐠ.
ᐊᐦᒑᐠ ᐁᐃᔑ ᓇᐣᑕᐁᐧᐣᑕᐣᐠ,
ᔖᑰᐨ ᒦᔭᐤ ᓃᓇᒥᓰᒪᑲᐣ.”
39 ᒦᓇᐋᐧ ᑮᓃᑲᑌᓑᑳ ᐯᔑᑲᐧᐣ ᑮᐦᐃᑭᑐ ᐁᐊᔭᒥᐦᒋᑫᐨ.
40 ᐊᐦᐲ ᐁᐱᑮᐁᐧᓑᑳᐨ,
ᒦᓇᐋᐧ ᐅᑮᒥᐦᑲᐋᐧᐣ ᐁᓃᐹᓂᐨ,
ᐁᑮ ᓅᐣᑌᑲᐧᔑᐋᐧᐨ.
ᑳᐃᐧᐣ ᒋᐅᐣᒋ ᑭᐦᑫᐣᑕᒧᐋᐧᐨ ᐊᓃᐣ ᑫᐃᓈᐋᐧᐨ.
41 ᓂᐦᓴᐧ ᐁᐱᑮᐁᐧᓑᑳᐨ,
ᒋᓴᐢ ᐅᑮᐦᐃᓈᐣ,
“ᑮᔮᐱᐨ ᓇ ᑭᓂᐹᓈᐋᐧ ᒦᓇ ᑭᑕᓀᐧᔑᓂᓈᐋᐧ?
ᒦᐦᐃᐁᐧ ᒥᓂᑯᐠ!
ᐋᔕ ᐅᒋᐦᒋᓭ ᑎᐸᐦᐃᑲᐣ.
ᐃᓈᐱᐠ,
ᐃᓂᓃᐤ ᐅᑯᓯᐦᓴᐣ ᑕᐊᐧᔦᔑᐸᑭᑎᓈᑲᓅ ᒋᐅᑖᐦᐱᓂᑯᐨ ᐅᒪᒋᐱᒫᑎᓴᐣ.
42 ᐊᐧᓂᓑᑳᐠ!
ᐁᑲᐧ ᑲᒫᒑᒥᐣ,
ᐋᔕ ᑕᑯᔑᐣ ᑳᐃᐧ ᐊᐧᔦᔑᐸᑭᑎᓂᔑᐨ.”
ᒋᓴᐢ ᑳᑮᐃᔑ ᐅᑖᐦᐱᓈᑲᓅᐨ
43 ᒣᑳᐧᐨ ᒋᓴᐢ ᐁᑲᑭᑐᐨ,
ᑮᐱᑕᑯᔑᐣ ᐊᐦᐊᐁᐧ ᒍᑕᐢ,
ᐯᔑᐠ ᑳᒥᑖᐦᓱ ᓂᔓᔖᐳᐋᐧᐨ ᑭᐦᑭᓅᐦᐊᒪᐋᐧᑲᓇᐠ.
ᐁᐃᐧᒌᐃᐧᑯᐨ ᑳᑭᐦᒋᒥᐦᔒᓄᓂᐨ ᐊᐃᐧᔭᐣ ᐁᑭᑭᒨᐦᑯᒫᓀᓂᐨ ᒦᓇ ᒥᐦᑎᑯ ᐸᑭᑌᐦᐃᑲᓈᐦᑎᑰᐣ ᐁᑖᐦᑯᓇᒧᐋᐧᐨ,
ᐅᑮ ᐲᒋᓂᔕᐦᐅᑰᐋᐧᐣ ᑭᐦᒋᐊᔭᒥᐦᐁᐃᐧᑭᒫᐣ,
ᑳᑭᐦᑭᓅᐦᐊᒫᑫᐋᐧᐨ ᐅᓇᐦᔓᐁᐧᐃᐧᓂ,
ᒦᓇ ᑳᓃᑳᓀᐣᑖᑯᓯᐋᐧᐨ.
44 ᐊᐦᐊᐁᐧ ᑳᐃᐧ ᐊᐧᔦᔑᐸᑭᑎᓈᐨ ᐅᑮ ᐅᓇᐦᑑᐣ ᐋᐣᑎ ᑫᐅᐣᒋ ᑭᐦᑫᓂᒥᒥᐨ,
“ᐊᐦᐋᐁᐧ ᑫᐅᒌᒪᐠ,
ᒦᐦᐋᐁᐧ ᑫᐅᑖᐦᐱᓈᔦᐠ ᒦᓇ ᑫᒫᒋᐃᐧᓈᔦᐠ.”
45 ᔐᒫᐠ ᐅᑮᓈᓯᐦᑲᐋᐧᐣ ᒋᓴᓲᐣ,
ᒍᑕᐢ ᑮᐃᐦᑭᑐ,
“ᐅᑭᐦᑭᓅᐦᐊᒫᑫ,”
ᒦᓇ ᐅᑮ ᐅᒌᒫᐣ.
46 ᐅᑮ ᐅᑎᐦᑎᓈᐋᐧᐣ ᒋᓴᓲᐣ ᒦᓇ ᐅᑮ ᐅᑖᐦᐱᓈᐋᐧᐣ.
47 ᐯᔑᐠ ᐃᐦᐃᒫ ᑳᓃᐸᐃᐧᐨ ᐅᑮ ᑭᒋᐱᑑᐣ ᐅᒨᐦᑯᒫᐣ ᐁᑮ ᐸᐦᑭᑌᐦᐋᐧᐨ ᐯᔑᐠ ᒫᐊᐧᒋ ᑭᐦᒋᐊᔭᒥᐦᐁᐃᐧᑭᒫᐣ ᐅᑕᓄᐦᑮᓈᑲᓂᓃᐣ,
ᐁᑮ ᒪᓂᑕᐦᐊᐧᑭᐁᐧᐸᐦᐋᐧᐨ.
48 ᒋᓴᐢ ᐅᑮᐦᐃᓈᐣ,
“ᑭᑎᔑ ᒪᐃᐧᓀᐦᐃᔑᓈᐋᐧ ᑖᐱᓑᑰᐨ ᐊᐃᐧᔭ ᑳᔭᑲᐧᑎᓯᐨ,
ᐁᑭᑮᔦᐠ ᒨᐦᑯᒫᓇᐣ ᒦᓇ ᐸᐦᑭᑌᐦᐃᑲᓈᐦᑎᑰᐣ ᐁᐅᑖᐦᐱᓂᔑᔦᐠ.
49 ᑕᐦᓱᑮᔑᐠ ᑭᑮᐃᐧᒌᐃᐧᓂᓈᐋᐧ,
ᐁᑭᐦᑭᓅᐦᐊᒫᑫᔮᐣ ᑭᐦᒋᐊᔭᒥᐦᐁᐃᐧᑲᒥᑯᐣᐠ.
ᑳᐃᐧᐣ ᒋᐅᐣᒋ ᐅᑖᐦᐱᓂᔑᔦᐠ.
ᔖᑰᐨ ᑭᐦᒋᒪᓯᓇᐦᐃᑫᐃᐧᓇᐣ ᑳᐃᔑᐱᐦᐃᑳᑌᑭᐣ ᒋᐊᓂᑎᐱᐦᓭᐠ.”
50 ᑲᐦᑭᓇ ᐊᐃᐧᔭᐠ ᑳᑮᐃᐧᒌᐃᐧᑯᐨ ᑮᒫᒌᔮᒧᐊᐧᐠ ᐁᑮᓇᑲᓂᑯᐨ.
51 ᐯᔑᐠ ᐅᓑᑭᓃᑭ ᐁᒥᓈᐧᔑᓂᓂᐠ ᐸᑳᐧᓃᑭᓄᓂ ᐁᑲᓑᑮᑮᐨ,
ᐅᑮ ᐱᒥᓂᔕᐋᐧᐣ ᒋᓴᓲᐣ.
ᐅᑮ ᑲᑫᐧᑳᐦᒋᑎᓈᐋᐧᐣ,
52 ᑮᒫᒌᔮᒧ ᐁᐋᐧᓵᐦᑯᓇᐁᐧᐨ,
ᐁᑮᓇᑲᒋᐸᐦᑐᐋᐧᐨ ᐸᑳᐧᓃᑭᓄᓂ.
ᒋᓴᐢ ᐁᐅᓇᔓᐋᐧᓈᑲᓅᐨ
53 ᐅᑮ ᐃᔑᐃᐧᓈᐋᐧᐣ ᒋᓴᓲᐣ ᐁᑮ ᐃᔔᑕᒪᐋᐧᐋᐧᐨ ᒫᐊᐧᒋ ᑭᐦᒋᐊᔭᒥᐦᐁᐃᐧᑭᒫᐣ ᑳᐃᔑ ᐊᔮᓂᐣᐨ,
ᒦᓇ ᐃᑭ ᑲᐦᑭᓇ ᑭᐦᒋᐊᔭᒥᐦᐁᐃᐧᑭᒫᐠ,
ᒦᓇ ᑳᓃᑳᓀᐣᑖᑯᓯᐋᐧᐨ ᒦᓇ ᑳᑭᐦᑭᓅᐦᐊᒫᑫᐋᐧᐨ ᐅᓇᐦᔓᐁᐧᐃᐧᓂ ᑮᒫᒪᐤ ᒫᐊᐧᒋᐦᐃᑎᐋᐧᐠ.
54 ᐲᑕᕒ ᓇᐊᐧᐨ ᐋᐧᐦᓴ ᐅᑮᐃᔑᓂᔕᐦᐋᐧᐣ ᒋᓴᓲᐣ,
ᐁᑮᐱᐣᑎᑫᐨ ᐃᐦᐃᒫ ᑳᐃᔑ ᐋᐧᐦᑳᒣᓂᑲᓂᐊᐧᓂᓂᐠ ᒫᐊᐧᒋ ᑭᐦᒋᐊᔭᒥᐦᐁᐃᐧᑭᒫᐣ ᐅᐋᐧᑲᐦᐃᑲᓂᐣᐠ.
ᐅᑮᐄᐧᐣᑕᐱᒫᐣ ᐅᑲᓇᐁᐧᐣᒋᑫᐣ ᐁᑮᐦᐊᐊᐧᓱᐨ ᐃᓑᑯᑌᐦᑳᐣᐠ.
55 ᑭᐦᒋᐊᔭᒥᐦᐁᐃᐧᑭᒫᐠ ᒦᓇ ᑲᐦᑭᓇ ᐅᓇᐦᔓᐁᐧᐃᐧᓂᓂᐊᐧᐠ ᐅᑮ ᓇᓈᐣᑐᓈᓈᐋᐧ ᑫᐃᓈᒋᒥᒥᐣᐨ ᒋᓴᓲᐣ,
ᑫᐅᐣᒋ ᓂᐦᓵᐋᐧᐨ,
ᑳᐃᐧᐣ ᒋᐅᐣᒋ ᒥᐦᑲᒧᐋᐧᐨ ᑫᑰᓂ.
56 ᒥᐦᔒᐣ ᑲᐧᐣᑕ ᐅᑮ ᐊᐃᓈᒋᒫᐋᐧᐣ,
ᔖᑰᐨ ᑳᐃᐧᐣ ᐯᔑᑲᐧᐣ ᒋᐅᐣᒋ ᐃᓈᒋᒧᐋᐧᐨ.
57 ᓈᐣᑕ ᐁᐦᑕ ᑮᐸᓯᑮᐧᐊᐧᐠ ᒦᓇ ᑲᐧᐣᑕ ᐁᑮ ᐃᓈᒋᒫᐋᐧᐨ,
58 “ᓂᑮᓅᐣᑕᐋᐧᒥᐣ ᒋᓴᐢ ᐁᐃᐦᑭᑐᐨ,
‘ᓂᑲᓂᐦᔓᐊᐧᓈᒋᑑᐣ ᐅᐦᐅᐁᐧ ᑭᐦᒋᐊᔭᒥᐦᐁᐃᐧᑲᒥᐠ ᒥᓂᐣᒌᐣ ᑳᑮᐅᐣᒋ ᐅᔑᐦᒋᑳᑌᐠ,
ᑮᓂᐦᓱᑮᔑᑳᐠ ᒦᓇᐋᐧ ᑯᑕᐠ ᓂᐣᑲᐅᔑᐦᑑᐣ ᐁᑳ ᒥᓂᐣᒌᐣᐠ ᑳᐅᐣᒋ ᐅᔑᐦᒋᑳᑌᐠ.
’ ”
59 ᐁᑲᐧ ᑳᐃᐧᐣ ᐯᔑᑲᐧᐣ ᒋᐅᐣᒋ ᐃᓈᒋᒧᐋᐧᐨ.
60 ᐁᑲᐧᐦᐱᐣ ᒫᐊᐧᒋ ᑭᐦᒋᐊᔭᒥᐦᐁᐃᐧᑭᒫ ᑮᐸᓯᑮᐧ ᐃᐦᐃᒫ ᓀᓇᐁᐧᐦᐃ ᑮᓃᐸᐃᐧ,
ᐁᑮᑲᑫᐧᒋᒫᐨ ᒋᓴᓲᐣ,
“ᑳᐃᐧᐣ ᓇ ᑫᑰᐣ ᒋᐃᐧᐃᔑ ᓇᐦᑲᐁᐧᔑᐦᑑᔭᐣ ?
ᐃᑭᐁᐧᓂᐊᐧᐠ ᑳᐃᓈᒋᒥᑳᐧ?”
61 ᑳᐃᐧᐣ ᑫᑰᐣ ᑮᐅᒌ ᐃᐦᑭᑐᓰᐣ ᒋᓴᐢ ᒦᓇ ᑳᐃᐧᐣ ᒋᐅᐣᒋ ᓇᐦᑲᐁᐧᔑᐦᐋᐨ.
ᒦᓇᐋᐧᑕᓑ ᐅᑮ ᑲᑫᐧᒋᒥᑰᐣ ᒫᐊᐧᒋ ᑭᐦᒋᐊᔭᒥᐦᐁᐃᐧᑭᒫᐣ,
“ᑮᓂᓇ ᙭,
ᐅᑯᓯᐦᓴᐣ ᑳᑭᐦᑌᐣᑖᑯᓯᐨ?”
62 ᒋᓴᐢ ᑮᐦᐃᑭᑐ,
“ᓃᐣ ᐅᔕ,
ᑲᐋᐧᐸᒫᐋᐧ ᐃᓂᓃᐤ ᐅᑯᓯᐦᓴᐣ ᒋᐊᐱᐨ ᓇᐦᐃᐃᐧᓂᐣᐠ ᐊᐦᐊᐁᐧ ᑳᑭᐦᑌᐣᑖᑯᓯᐨ,
ᒋᐱᑕᑯᔑᐣᐠ ᐊᐧᐦᑮᐧᐣᐠ ᑭᐦᒋᑮᔑᑯᐣᐠ.”
63 ᒫᐊᐧᒋ ᑭᐦᒋᐊᔭᒥᐦᐁᐃᐧᑭᒫ ᐅᑮᓈᓂᑭᐱᑑᐣ ᐅᒪᑰᐟ.
“ᐊᐣᑕᔑᓂᐦᐃ ᑮᔮᐱᐨ ᑫᐅᐣᒋ ᓇᐣᑕᐁᐧᓂᒫᔭᐣᐠ ᑫᑎᐹᒋᒧᐋᐧᐨ?”
ᑮᐃᐦᑭᑐ.
64 “ᑭᓅᐣᑕᐋᐧᐋᐧ ᓇ ᐁᒪᒋᐋᓂᒨᒫᐨ?
ᐋᓃᐣ ᑮᓇᐋᐧ ᐁᓀᐣᑕᒣᐠ ?”
ᑲᐦᑭᓇ ᐅᑮ ᓈᓂᐳᒫᐋᐧᐣ ᒋᓂᐦᓯᒥᐣᐨ ᒋᓴᓲᐣ.
65 ᐁᑲᐧᐦᐱᐣ ᓈᐣᑕ ᐅᑮ ᓯᐦᑳᐧᓈᐋᐧᐣ,
ᐅᑮ ᐋᑲᐧᐋᐧᐸᐦᐲᓈᐋᐧᐣ,
ᐅᑮ ᐸᐦᑭᑌᐦᐋᐧᐋᐧᐣ,
ᐁᑮᐦᐃᓈᐋᐧᐨ,
“ᑭᐦᑭᐁᐧᐦᐃᑫᐣ!”
ᑳᑲᓇᐁᐧᐣᒋᑫᐋᐧᐨ ᐅᑮ ᒫᒋᐃᐧᓈᐋᐧᐣ ᒦᓇ ᐅᑮ ᐸᐦᑭᑌᐦᐋᐋᐧᐣ.
ᐲᑕᕒ ᐁᐦᐋᓇᐁᐧᓂᒫᐨ ᒋᓴᓲᐣ
66 ᒣᑳᐧᐨ ᐲᑕᕒ ᐁᐦᐊᔮᐨ ᓃᐦᓯᔭᐦᐃ ᑳᐃᔑ ᒣᓂᑲᓂᐊᐧᓂᓂᐠ,
ᐯᔑᐠ ᐅᑕᓄᐦᑮᓈᑲᓂᐦᑫᐧᒥᓃᐣ ᒫᐊᐧᒋ ᑭᐦᒋᐊᔭᒥᐦᐁᐃᐧᑭᒫ ᑮᐅᐣᒋ ᐲᔖᐊᐧᐣ.
67 ᐅᑮ ᐋᐧᐸᒫᐣ ᐲᑕᕒᐊᐧᐣ ᐁᐦᐊᐊᐧᓱᓂᐣᐨ,
ᐯᔓᐣᐨ ᐅᑮ ᑲᓇᐋᐧᐸᒫᐣ.
“ᑫᑮᐣ ᑭᑮᐃᐧᒋᐋᐧ ᒋᓴᐢ ᓈᓴᕒᐊᑎᐣᐠ ᑳᐅᐣᒌᐨ,”
ᐅᑮᐦᐃᓈᐣ.
68 ᐲᑕᕒ ᑮᐋᓀᐧᐦᑕᒼ ᐁᐃᐦᑭᑐᐨ,
“ᑳᐃᐧᐣ ᓂᑭᐦᑫᐣᑕᓰᐣ ᒦᓇ ᑳᐃᐧᐣ ᒋᓂᓯᑐᐦᑕᒫᐣ ᑫᑯᓀᐣ ᑳᐋᓂᒨᑕᒪᐣ.”
ᒦᓇ ᑮᐊᓂᓵᑲᐦᐊᒼ ᐱᑕᐃᐧᓑᑲᐧᐣᑌᐣᐠ.
ᐁᑲᐧᐦᐱᐣ ᐹᑲᐦᐋᑳᐧᐣ ᑮᓅᐣᑖᑯᓯ.
69 ᐊᐦᐲ ᑳᐋᐧᐸᒥᑯᐨ ᐊᓄᐦᑮᓈᑲᓂᐦᑫᐧᐣ ᐃᐦᐃᒫ ᐁᐦᐊᔮᐨ,
ᒦᓇᐋᐧ ᐅᑮᐦᐃᓈᐣ ᐃᓂᐁᐧᓂᐊᐧᐣ ᑳᓈᓃᐸᐃᐧᓂᐨ,
“ᒦᐦᐊᐁᐧ ᐯᔑᐠ ᑳᐃᐧᒋᐋᐧᐦᐸᐣ.”
70 ᒦᓇᐋᐧ ᐅᑮ ᐋᓀᐧᐦᑖᐣ.
ᐃᔑᓈᑫ ᐃᑭᐁᐧᓂᐊᐧᐠ ᐃᐦᐃᒫ ᑳᓈᓃᐸᐃᐧᐋᐧᐨ ᒦᓇᐋᐧ ᐅᑮᐦᐃᓈᐋᐧᐣ ᐲᑕᕒᐊᐧᐣ,
“ᑫᐦᒋᓈᐨ ᑮᐣ ᐯᔑᐠ ᑳᐃᐧᒌᐋᐧᐨ ᒋᓴᐢ,
ᑳᓬᐃᓬᐃ ᐁᐦᐅᐣᒌᔭᐣ.”
71 ᐲᑕᕒ ᑮᒪᒋᑲᑭᑐ,
ᒦᓇ ᐅᑮᑲᓅᓈᐣ,
“ᑳᐃᐧᐣ ᓂᑭᐦᑫᓂᒫᓰᐣ ᐊᐧᐦᐊᐁᐧ ᓈᐯ ᑳᐊᓂᒨᒫᔦᐠ.”
72 ᔐᒫᐠ ᓃᔖᐧ ᑮᓅᐣᑖᑯᓯ ᐹᑲᐦᐋᑳᐧᐣ.
ᐲᑕᕒ ᑮᑲᓅᐦᑫ ᒋᓴᓲᐣ ᑳᑮᐃᓂᑯᐦᐸᐣ,
“ᐁᑳ ᒪᐦᔑ ᓅᐣᑖᑯᓯᐨ ᐹᑲᐦᐊᑲᐧᐣ ᓃᔖᐧ,
ᓂᐦᓵᐧ ᑭᑲᐃᐦᑭᐟ ᐁᑳ ᑭᐦᑫᓂᒥᔑᔭᐣ.”
ᐲᑕᕒ ᑮᒥᒋᓇᐁᐧᓯ ᒦᓇ ᑮᒪᐃᐧ.