ᐋᐁᐧᐦᒋᑲᐣ ᔔᒥᓈᐦᑎᑯ ᑭᐦᑎᑳᐣ ᐅᐣᒋ
12
ᒋᓴᐢ ᐅᑮᐊᔭᒥᐦᐋᐣ ᐁᑮ ᒫᒌᐃᐧᐣᑕᒪᐋᐧᐨ ᐋᐁᐧᐦᒋᑲᓂ,
“ᐯᔑᐠ ᓈᐯ ᐅᑮᑭᐦᑎᑳᓈᐣ ᔔᒥᓈᐦᑎᑯ ᑭᐦᑎᑳᓂ.
ᐁᑮ ᑌᑎᐹ ᒣᓂᑲᓂᐦᑫᐨ,
ᒦᓇ ᐁᑮ ᐋᐧᓇᐦᐃᑫᐨ ᑫᐃᔑ ᐅᐣᒋᑲᐃᐧᓂᐠ ᔔᒥᓈᐳᓂ,
ᑲᔦ ᐁᑮ ᐅᔑᐦᑑᐨ ᐊᔕᐋᐧᐲᐃᐧᑲᒥᐠ.
ᐅᑮᒦᓈᐣ ᒋᐊᐦᐲᒋ ᐋᐸᒋᑑᓂᐨ ᓈᐣᑕ ᐅᑭᐦᑎᑫᐣ ᐁᑲᐧ ᐊᐦᐱᐣ ᑮᒫᒑ ᐋᐧᐦᓴ ᐁᑮᐦᐃᔖᐨ.
2 ᐊᐦᐲ ᑭᐦᑎᑫᐃᐧᐣ ᐁᐦᐅᒋᐦᒋᓭᐠ ᒋᒫᐊᐧᐣᑑᓂᑳᑌᑭᐣ,
ᐅᑮᐃᔑᓂᔕᐦᐋᐧᐣ ᐊᓄᐦᑮᓈᑲᓇᐣ ᒋᐸᐦᑫᐧᓇᒫᑯᐨ ᒦᓂᔕᐣ ᐃᐦᐃᒫ ᔔᒥᓈᐦᑎᑯ ᑭᐦᑎᑳᓂᐠ.
3 ᐅᑮ ᐅᑎᐦᑎᓈᐋᐧᐣ ᐃᓂ ᐊᓄᐦᑮᓈᑲᓇᐣ,
ᐅᑮ ᐸᐦᑭᑌᐦᐋᐧᐋᐧᐣ ᐊᓑᑰᓇ ᐊᐦᐱᐣ ᐁᑮ ᑮᐁᐧᓂᔕᐦᐋᐧᐋᐧᐨ.
4 ᐁᑲᐧ ᑯᑕᑭᔭᐣ ᐊᓄᐦᑮᓈᑲᓇᐣ ᐅᑮᐃᔑᓂᔕᐦᐊᐧᐣ,
ᐅᑮ ᐸᐦᑭᑌᐦᐋᐧᐋᐧᐣ ᐅᑎᐦᑲᐧᓂᐣᐠ ᑲᔦ ᑳᓇᓀᐯᐁᐧᐣᑖᑲᐧᓂᐠ ᐅᑮᑑᑕᐋᐧᐋᐧᐣ.
5 ᑯᑕᑭᔭᐣ ᐅᑮᐃᔑᓂᔕᐦᐋᐧᐣ,
ᐅᑮᓂᐦᓵᐋᐧᐣ ᐃᓂᐁᐧᓂᐊᐧᐣ.
ᒥᐦᔒᐣ ᑯᑕᑭᔭᐣ ᐅᑮ ᐃᔑᓂᔕᐦᐋᐧᐣ.
ᓈᐣᑕ ᐅᑮ ᐸᐦᑭᑌᐦᐋᐧᐋᐧᐣ,
ᓈᐣᑕ ᒦᓇ ᐅᑮᓂᓵᐋᐧᐣ.
6 “ᑮᔮᐱᐨ ᐯᔑᐠ ᐅᑮᐊᔮᐊᐧᐣ ᑫᐃᔑᓂᔕᐦᐋᐧᐨ ᐊᒦᐅᓄᐁᐧᓂᐊᐧᐣ ᑳᓵᑭᐦᐋᐨ ᐅᑯᓯᐦᓴᐣ.
ᐃᓑᑳᐧᔮᐨ ᐅᑮᐃᔑᓂᔕᐦᐋᐧᐣ ᐁᑮᐦᐃᑭᑐᐨ,
‘ᐅᑲ ᑭᐦᒌᓀᓂᒫᐋᐧᐣ ᓂᑯᓯᓴᐣ.’
7 “ᐅᑭᐦᑎᑫᐠ ᑮᐊᐃᓂᑎᐊᐧᐠ,
‘ᒦᐦᐊᐧᐁᐧ ᑫᓂᑎᐯᐣᑕᐣᐠ ᔔᒥᓈᐦᑎᑯ ᑭᐦᑎᑳᓂ.
ᐁᑲᐧ ᑲᓂᓵᒥᐣ ᐃᐦᐃᐁᐧᓂ ᑳᐃᐧᑎᐯᐣᑕᐣᐠ ᑮᓇᐃᐧᐣᐟ ᒋᑎᐯᐣᑕᒪᐣᐠ.’
8 ᐅᑮ ᐅᑎᐦᑎᓈᐋᐧᐣ ᒦᓇ ᐁᑮᓂᓵᐋᐧᐨ,
ᐅᑮ ᓵᑭᒋᐁᐧᐱᓈᐋᐧᐣ ᐃᐦᐃᒫ ᔔᒥᓈᐦᑎᑯ ᑭᐦᑎᑳᓂᐣᐠ.
9 “ᐋᓃᐣ ᑫᑑᑕᐣᐠ ᐊᐦᐊᐁᐧ ᑳᑎᐯᐣᑕᐣᐠ ᔔᒥᓈᐦᑎᑯ ᑭᐦᑎᑳᓂ?
ᐅᑲ ᐱᓂᔓᐊᐧᓈᒋᐦᐋᐣ ᐃᓂᐁᐧᓂᐊᐧᐣ ᑭᐦᑎᑫᐃᐧᓂᓂᐊᐧᐣ,
ᐅᑮ ᒦᓈᐣ ᑯᑕᑭᔭᐣ ᔔᒥᓈᐦᑎᑯ ᑭᐦᑎᑳᓂ.
10 ᑭᑕᔭᒥᐦᑑᓈᐋᐧ ᓇᐦᑯ ᑭᐦᒋᒪᓯᓇᐦᐃᑫᐃᐧᐣ ᑳᐃᐦᑭᑐᒪᑲᐠ ?
“ ‘ᐊᐦᐊᐁᐧ ᐊᐦᓯᐣ ᐅᐋᐧᑲᐦᐃᑫᐠ ᑳᑮᐋᓇᐁᐧᓂᒫᐋᐧᐨ
ᒦᐦᐋᐁᐧ ᒫᐊᐧᐨ ᑳᑮᐊᓂᑭᐦᒌᓀᐣᑖᑯᓯᐨ ᐊᐦᓯᐣ,
11 ᑳᑎᐯᐣᒋᑫᐨ ᐅᐦᐅᐁᐧᓂ ᑳᑮᐃᔒᒋᑫᐨ,
ᒦᓇ ᐁᒫᒪᑳᓵᐱᔑᓂᔭᐣᐠ ᐃᐦᐃᒫ ᑭᓑᑮᔑᑯᓈᐣ.’ ”
12 ᑳᑭᐦᒌᓀᐣᑖᑯᓯᐋᐧᐨ ᐅᑮᓇᓈᐣᑐᓈᓈᐋᐧ ᐋᐣᑎ ᑫᑮᐅᐣᒋ ᑳᒋᑎᓈᐋᐧᐨ ᒋᓴᓲᐣ,
ᐊᓂᓑ ᐅᑮᑭᐦᑫᐣᑖᓈᐋᐧ ᐄᐧᓇᐋᐧ ᐁᐦᐋᓂᒨᒥᑯᐋᐧᐨ ᐋᐁᐧᐦᒋᑲᓂᐣᐠ.
ᐅᑮᑯᐦᓵᐋᐧᐣ ᐊᓂᔑᓂᓂᐊᐧᐣ,
ᐅᑮᓇᑲᓈᐋᐧᐣ ᒦᓇ ᑮᒫᒑᐊᐧᐠ.
ᐁᑎᐸᐦᐊᒪᐋᐧᑲᓅᐨ ᑎᐸᐦᐃᑫᐃᐧᔓᓂᔮᐣ ᓰᓴᕒ
13 ᓈᑫ ᐅᑮ ᐃᔑᓂᔕᐦᐋᐧᐋᐧᐣ ᓈᐣᑕ ᐯᕒᐊᓰᐃᐧᓂᓂᐊᐧᐣ ᒦᓇ ᑳᐱᒥᓂᔕᐦᐋᐧᐋᐧᐨ ᑭᐦᒋᐅᑭᒫᐣ ᐁᕒᐅᐟ ᑫᑮᐅᐣᒋ ᑳᐦᒋᑎᓈᐋᐧᐨ ᒋᓴᓲᐣ ᐅᑎᐦᑭᑐᐃᐧᓂᓃᐣ.
14 ᐅᑮᐱᓈᓯᐦᑲᐋᐧᐋᐧᐣ ᒋᓴᓲᐣ ᐁᑲᐧ ᑮᐃᐦᑭᑐᐊᐧᐠ,
“ᐅᑭᐦᑭᓅᐦᐊᒫᑫ,
ᓂᑭᐦᑫᐣᑖᒥᐣ ᐁᑌᐯᐧᔭᐣ.
ᑳᐃᐧᐣ ᐊᐃᐧᔭᐠ ᑭᑲᑫᐧᒋᒫᓰᐠ,
ᑳᐃᐧᐣ ᑭᑐᐣᒋ ᐸᐱᐢᑫᓂᒫᓰᐠ ᐊᐊᐧᓀᓄᐃᐧᐋᐧᐨ ᔖᑰᐨ ᑌᐯᐧᐃᐧᓂᐠ ᐁᑮ ᐃᔑᑭᐦᑭᓅᐦᐊᒫᑫᔭᐣ ᑭᔐᒪᓂᑑ ᑳᐃᔑᓇᐣᑕᐁᐧᐣᑕᐣᐠ.
ᐃᓇᐦᑌ ᓇ ᒋᑎᐸᐦᐊᒪᐋᐧᔮᐣᐠ ᑎᐸᐦᐃᑫᐃᐧᔓᓂᔮᓇᐣ ᒫᐊᐧᒋ ᑭᐦᒋᐅᑭᒫ ᓰᓴᕒ ᐃᓯᐦᓭ ᒋᒦᓈᑲᓅᐨ ᑭᐦᒋᐅᑭᒫ ᑖᑭᐢ ᔔᓂᔮᓇᐣ ᐃᐧᐣ ᓈᐣᑕ ᑳᐃᐧᐣ ?
15 ᑲᑎᐸᐦᐋᒥᐣ ᓇ ᓈᐣᑕ ᑳᐃᐧᐣ ?”
ᔖᑰᐨ ᒋᓴᐢ ᐅᑮᑭᐦᑫᓂᒫᐣ ᐁᐊᐧᔦᔑᒥᑯᐨ.
ᐅᑮᑲᑫᐧᒋᒫᐣ,
“ᐊᓃᐣ ᐁᐧᐣᒋ ᑲᑫᐧᒋᐦᐃᔑᔦᐠ ?
ᐲᓂᐠ ᔔᓂᔮᓈᐱᐠ ᒋᐋᐧᐸᒪᐠ.”
16 ᐅᑮᐲᓈᐋᐧᐣ ᔔᓂᔮᓈᐱᑰᐣ.
ᒋᓴᐢ ᐅᑮᑲᑫᐧᒋᒫᐣ,
“ᐊᐊᐧᓀᐣ ᐊᐧᐦᐊᐁᐧ ᑳᒪᓯᓈᐱᐦᑭᔑᐣᐠ,
ᒦᓇ ᐊᐊᐧᓀᐣ ᐊᐧᐦᐊᐁᐧ ᑳᒪᓯᓇᐦᐃᑳᓱᐨ?”
“ᒫᐊᐧᒋ ᑭᐦᒋᐅᑭᒫ ᓰᓴᕒ,”
ᑮᐃᐦᑭᑐᐊᐧᐠ.
17 ᒋᓴᐢ ᐅᑮᐦᐃᓈᐣ,
“ᒦᓂᐠ ᓰᓴᕒ ᑳᐅᑕᔮᓂᐨ,
ᒦᓇ ᒦᓂᐠ ᑭᔐᒪᓂᑑ ᑳᐅᑕᔮᓂᐨ.”
ᐅᑮ ᒫᒪᐦᑳᑌᐣᑖᓈᐋᐧ.
ᑫᐃᔑᓈᑲᐧᐠ ᐃᐧᑭᐦᑐᐃᐧᐣ ᐊᐧᓂᓑᑳᐃᐧᑮᔑᑳᐠ
18 ᓵᑕᓰᐃᐧᓂᓂᐊᐧᐠ ᑳᐃᐦᑭᑐᐋᐧᐨ ᐁᑳ ᐊᐃᐧᔭ ᒋᐊᐧᓂᓑᑳᐨ ᑳᐃᓑᑲᐧ ᐱᒫᑎᓯᐨ,
ᐅᑮ ᐱᓈᓯᐦᑲᐋᐧᐋᐧᐣ ᒋᓴᓲᐣ ᐁᑮᑲᑫᐧᒋᒫᐋᐧᐨ.
19 “ᐅᑭᐦᑭᓅᐦᐊᒫᑫ,”
ᑮᐃᐦᑭᑐᐊᐧᐠ,
“ᒨᓯᐢ ᓂᑮᐃᓇᓯᓇᐦᐊᒫᑯᓈᐣ ᑮᓑᐱᐣ ᓈᐯ ᐁᐃᓑᑳᐧ ᐱᒫᑎᓯᐨ,
ᐁᓇᑲᓈᐨ ᐅᐄᐧᒋᐋᐧᑲᓇᐣ ᐁᑳᑕᓑ ᐁᐅᐣᒋ ᐅᓃᒑᓂᔑᐋᐧᐨ,
ᐊᐦᐊᐁᐧ ᓈᐯ ᐅᐄᐧᒋᐦᑫᐧᓯᐊᐧᐣ ᐅᑲᐃᐧᒋᐋᐧᐣ ᐃᓂᐁᐧᓂᐊᐧᐣ ᔒᑲᐃᐧᐦᑫᐧᐣ ᒋᓂᐦᑖᐃᐧᑮᐦᐋᐋᐧᐨ ᐊᐋᐧᔑᔕᐣ ᐅᐄᐧᒋᐦᑫᐧᓯᐊᐧᐣ ᐅᐣᒋ.
20 ᑮᓃᓵᐧᓱᐊᐧᐠ ᐃᑭᐁᐧᓂᐊᐧᐠ ᑳᑮᐄᐧᒋᐦᑫᐧᓰᒥᑐᐋᐧᐨ.
ᐊᐦᐊᐁᐧ ᓂᐢᑕᒼ ᑮᐅᐄᐧᒋᐋᐧᑲᓂ ᑮᐃᓑᑳᐧ ᐱᒫᑎᓯ,
ᑳᐃᐧᐣ ᒋᐅᐣᒋ ᐅᓃᒑᓂᔑᐋᐧᐨ.
21 ᐊᐦᐊᐁᐧ ᑯᑕᐠ ᐅᑮᐄᐧᒌᐋᐧᐣ ᐃᓂᐁᐧᓂᐊᐧᐣ ᔒᑲᐃᐧᐦᑫᐧᐣ,
ᑫᐃᐧᐣ ᑮᐃᓑᑳᐧ ᐱᒫᑎᓯ ᑳᐃᐧᐣ ᒋᐅᐣᒋ ᐅᓃᒑᓂᔑᐨ.
ᒦᐦᐃ ᐯᔑᑲᐧᐣ ᑯᑕᐠ ᑳᐃᔑᐦᓭᐨ.
22 ᑳᐃᐧᐣ ᐯᔑᐠ ᐅᑯᐁᐧᓂᐊᐧᐠ ᑳᑮᓃᓴᐧᓱᐋᐧᐨ ᒋᐅᐣᒋ ᐅᓃᒑᓂᔑᐋᐧᐨ.
ᐃᓑᑳᐧᔮᐨ ᐊᐦᐱᐣ ᐃᐦᑫᐧ ᑫᐄᐧᐣ ᑮᐃᓑᑲᐧᐱᒫᑎᓯ.
23 ᐊᐦᐲ ᐊᐧᓂᓑᑳᐃᐧᑮᔑᑳᐠ ᐊᐊᐧᓀᐣ ᐃᐦᑫᐧᐊᐧᐣ ᑫᐅᐄᐧᒌᐋᐧᑲᓂᐨ,
ᐊᓂᓑ ᐃᐦᑫᐧᓂᐊᐧᐠ ᑲᐦᑭᓇ ᑳᓃᓴᐧᓱᐋᐧᐨ ᐅᑮᐄᐧᒌᐋᐧᐋᐧᐣ ?”
24 ᒋᓴᐢ ᐅᑮᐦᐃᓈᐣ,
“ᑳᐃᐧᐣ ᒪᔮᒼ ᒋᐦᐃᑭᑐᔦᐠ ᐊᓂᓑ ᐁᑳ ᐁᑭᐦᑫᐣᑕᒣᐠ ᑭᐦᒋᒪᓯᓇᐦᐃᑫᐃᐧᓇᐣ ᒦᓇ ᑭᔐᒪᓂᑑ ᐅᒪᓑᑲᐃᐧᓰᐃᐧᐣ.
25 ᐊᐦᐲ ᐅᓂᐳᐊᐧᐠ ᐊᐧᓂᓑᑳᐋᐧᐨ ᑳᐃᐧᐣ ᓈᐯᐊᐧᐠ ᑕᐄᐧᐦᑭᑐᓰᐊᐧᐠ ᑲᔦ ᑳᐃᐧᐣ ᐃᐦᑫᐧᐊᐧᐣ ᐅᑲᐃᐧᒌᐋᐧᐋᐧᓰᐣ,
ᑕᐃᔑᐊᔮᐊᐧᐠ ᑖᐱᓑᑯᐨ ᐅᑮᔑᑰᐊᐧᐠ ᑭᐦᒋᑮᔑᑯᐣᐠ ᑳᔮᐋᐧᐨ.
26 ᐁᑲᐧᐦᐲ ᐅᓂᐳᐊᐧᐠ ᐊᐧᓂᓑᑳᐋᐧᐨ,
ᑳᐃᐧᐣ ᓇ ᒋᐅᐣᒋ ᐊᔭᒥᐦᑑᔦᐠ ᒨᓯᐢ ᐅᒪᓯᓇᐦᐃᑲᐣ,
ᐃᐦᐃᒫ ᑳᐃᔑ ᐋᓂᒨᑌᐠ ᑳᑮᐱᐢᑲᓀᐠ ᐱᑲᐧᐦᑰᐹ,
ᑭᔐᒪᓂᑑᐣ ᑳᑮᐅᐣᒋ ᐊᔭᒥᐦᐃᑯᐨ,
‘ᓃᐣ ᐅᑭᔐᒪᓂᑑᒪᐣ ᐁᑊᕒᐊᐦᐋᒼ,
ᐅᑭᔐᒪᓂᑑᒪᐣ ᐋᐃᓴᐠ,
ᒦᓇ ᐅᑭᔐᒪᓂᑑᒪᐣ ᒉᑲᑊ ’?
27 ᑳᐃᐧᐣ ᐅᑭᔐᒪᓂᑑᒥᐋᐧᐣ ᑳᓂᐳᐋᐧᐨ,
ᐃᑭᐁᐧᓂᐊᐧᐠ ᐅᑭᔐᒪᓂᑑᒥᐋᐧᐣ ᑳᐱᒫᑎᓯᐋᐧᐨ.
ᒥᐢᑕᐦᐃ ᑭᐊᐧᓂᔑᓈᐋᐧ!”
ᑳᑭᐦᒌᓀᐣᑖᑲᐧᐠ ᑭᐦᒋᐅᓇᐦᔓᐁᐧᐃᐧᐣ
28 ᐯᔑᐠ ᑳᑭᐦᑭᓅᐦᐊᒫᑫᐨ ᐅᓇᐦᔓᐁᐧᐃᐧᓂ ᑮᐱᑕᑯᔑᐣ ᒦᓇ ᐅᑮᓅᑕᐋᐧᐣ ᐁᐊᔭᒥᐦᐃᑐᐋᐧᐨ.
ᐅᑮᑭᐦᑫᐣᑖᐣ ᒋᓴᓲᐣ ᑲᐧᔭᐠ ᐁᑮᓇᐦᑫᐧᑕᒥᓂᐨ,
ᐅᑮᑲᑫᐧᒋᒫᐣ,
“ᑫᑯᓀᐣ ᒫᐊᐧᐨ ᑭᐦᒌᓀᐣᑖᑲᐧᐠ ᑭᐦᒋᐅᓇᐦᔓᐁᐧᐃᐧᓇᐣ ?”
29 ᒋᓴᐢ ᐅᑮᓇᐦᑲᐧᐁᐧᔑᐦᐋᐣ ᐁᑮᐃᐦᑭᑐᐨ,
“ᒫᐊᐧᐨ ᑳᑭᐦᒌᓀᐣᑖᑲᐧᐠ,
‘ᓇᐣᑐᑕᒧᐠ ᐃᐢᕒᐁᐃᓬ,
ᑳᑎᐯᐣᒋᑫᐨ ᑭᑭᔐᒪᓂᑑᒥᓈᐣ,
ᑳᑎᐯᐣᒋᑫᐨ ᐯᔑᑯ.
30 ᑭᑲᓵᑭᐦᐋ ᑳᑎᐯᐣᒋᑫᐨ ᑭᑭᔐᒪᓂᑑᒼ ᒥᓯᐁᐧ ᑭᑌᐦᐄᐣᐠ,
ᒦᓇ ᒥᓯᐁᐧ ᑭᑕᐦᒑᑯᐣᐠ,
ᒦᓇ ᒥᓯᐁᐧ ᑭᒫᒥᑐᓀᐣᒋᑲᓂᐣᐠ,
ᒦᓇ ᒥᓯᐁᐧ ᑭᒪᓑᑲᐃᐧᓰᐃᐧᓂᐣᐠ.’
31 ᒦᓇ ᑯᑕᐠ ᐁᓂᐋᓂᐦᑰᑌᐠ,
‘ᑭᑲᓵᑭᐦᐋ ᑮᒋᐱᒫᑎᐢ ᐯᔑᑲᐧᐣ ᑳᐃᔑ ᓵᑭᐦᐃᑎᓯᔭᐣ.’
ᑳᐃᐧᐣ ᒋᐊᔮᐠ ᑯᑕᐠ ᐅᓇᐦᔓᐁᐧᐃᐧᐣ ᐊᐊᐧᔑᒣ ᒋᑭᐦᒌᓀᐣᑕᑲᐧᐠ ᐊᐦᐲᐨ ᐅᓄᐁᐧᓂᐊᐧᐣ.”
32 “ᑲᐧᔭᐠ ᑭᑎᐦᑭᐟ,
ᐅᑭᐦᑭᓅᐦᐊᒫᑫ,”
ᓈᐯ ᐅᑮᐦᐃᓈᐣ,
“ᑭᑌᐯᐧ ᐃᐦᐃᐁᐧ ᑳᐃᑭᐦᑐᔭᐣ ᐯᔑᐠ ᐁᐦᑕ ᐊᔮ ᑭᔐᒪᓂᑑ ᒦᓇ ᑳᐃᐧᐣ ᑯᑕᐠ ᐊᔮᓰᐣ ᐃᐧᐣ ᐱᑯ.
33 ᑭᑲᓵᑭᐦᐋ ᒥᓯᐁᐧ ᑭᑌᐦᐄᐣᐠ ᒦᓇ ᒥᓯᐁᐧ ᑭᓂᓯᑐᐦᑕᒧᐃᐧᓂᐣᐠ ᒦᓇ ᒥᓯᐁᐧ ᑭᒪᓑᑲᐃᐧᓰᐃᐧᓂᐣᐠ,
ᑭᑲᓵᑭᐦᐋ ᑮᒋᐱᒫᑎᐢ ᑖᐱᓑᑯᐨ ᑳᐃᔑ ᓵᑭᐦᐃᑎᓯᔭᐣ,
ᐊᐊᐧᔑᒣ ᑭᒌᓀᐣᑖᑲᐧᐣ ᐊᐦᐲᐨ ᐅᑖᓈᐣᐠ ᑳᑮᒑᑭᓯᑳᑌᑭᐣ ᐸᑭᑎᓂᑫᐃᐧᓇᐣ ᒦᓇ ᐸᑭᑎᓈᓱᐃᐧᓇᐣ.”
34 ᐊᐦᐱᐣ ᒋᓴᐢ ᑳᐋᐧᐸᐣᑕᐣᐠ ᑳᑮᑖᐁᐧᐣᑕᒨᐃᐧᓂᐣᐠ ᐁᑮᐃᔑ ᓇᐦᑲᐁᐧᔑᑑᓂᐨ,
ᐅᑮᐦᐃᓈᐣ,
“ᑳᐃᐧᐣ ᒋᓈᐋᐧᐸᐣᑕᒪᐣ ᑭᔐᒪᓂᑑ ᐅᑑᑭᒫᐃᐧᐣ.”
ᐃᐦᐃᐁᐧ ᐊᐦᐲ ᑳᐃᐧᐣ ᐊᐃᐧᔭ ᑮᔮᐱᐨ ᒋᐅᐣᒋ ᐃᐧᑲᑫᐧᒋᒫᐨ ᑫᑰᐣ.
ᐋᐣᑎ ᑳᐅᐣᒌᐨ ᙭
35 ᒣᑳᐧᐨ ᒋᓴᐢ ᐁᑭᐦᑭᓅᐦᐊᒫᑫᐨ ᑭᐦᒋᐊᔭᒥᐦᐁᐃᐧᑲᒥᑯᐣᐠ ᑮᑲᑫᐧᑌᐧ,
“ᐋᓃᐣ ᐁᐧᐣᒌ ᐃᐦᑭᑐᐋᐧᐨ ᑳᑭᐦᑭᓅᐦᐊᒫᑫᐋᐧᐨ ᐅᓇᐦᔓᐁᐧᐃᐧᓂ,
ᐊᐦᐊᐁᐧ ᙭ ᐃᐦᐃᒫ ᑌᐱᑎᑳᐣᐠ ᑮᐅᐣᒌ?
36 ᑌᐱᐟ ᐄᐧᐣ ᑎᐱᓇᐁᐧ ᑮᐦᐃᑭᑐ ᐃᐦᐃᒫ ᐁᑮᐅᐣᒌᑭᑐᐨ ᑳᑲᓈᑎᓯᓂᐨ ᐊᐦᒑᑯᐣᐠ,
“ ‘ᑳᑎᐯᐣᒋᑫᐨ ᑮᐦᐃᑭᑐ ᓂᑎᐯᐣᒋᑫᒪᐣ,
“ᐊᐱᐣ ᐃᐦᐃᒫ ᓂᓇᐦᐃᐃᐧᓂᐣᐠ
ᐃᓂᑯᐠ ᑫᔖᑯᒋᐦᐊᑳᐧ ᒋᑕᐦᑯᑳᓇᑖᐧ
ᐅᑯᐁᐧᓂᐊᐧᐠ ᑳᐸᑲᐧᓂᐦᑳᐧ.” ’
37 ᑌᐱᐟ ‘ᓂᑎᐯᐣᒋᑫᒼ ’ ᐅᑮᐃᔑᓂᐦᑳᓈᐣ.
ᐋᓃᐣ ᑫᑮᐅᐣᒋ ᐅᑯᓯᐦᓯᒥᑯᐦᐸᐣ ?”
ᒥᐦᔒᐣ ᐊᐃᐧᔭᐠ ᑮᒥᓀᐧᑕᒨᐠ ᐁᑮ ᓇᐣᑐᑕᐋᐧᐋᐧᐨ.
ᒌᓴᐢ ᐁᔮᐣᑲᐧᒥᒫᐨ ᐁᓈᑎᓯᓂᐨ ᑳᑭᐦᑭᓅᐦᐊᒫᑫᐋᐧᐨ ᐅᓇᐦᔓᐁᐧᐃᐧᓂ
38 ᐁᑲᐧ ᒣᑳᐧᐨ ᐁᑭᐦᑭᓅᐦᐊᒫᑫᐨ ᒋᓴᐢ ᑮᐦᐃᑭᑐ,
“ᐊᔔᓂᐦᑯᐠ ᑳᑭᐦᑭᓅᐦᐊᒫᑫᐋᐧᐨ ᐅᓇᐦᔓᐁᐧᐃᐧᓂ.
ᐅᒥᓀᐧᐣᑕᓈᐋᐧ ᐁᐸᐹᒧᐦᓭᐋᐧᐨ ᐁᐦᑭᓀᐧᑲᓂᓂᑭᐣ ᐅᒫᑯᑖᐋᐧ ᑲᔦ ᒋᑭᐦᒌᓀᐣᓂᒫᑲᓅᐋᐧᐨ ᐃᐦᐃᒫ ᑳᑕᔑ ᐊᐧᑖᐋᐧᓂᐊᐧᐣᐠ.
39 ᒫᐊᐧᐨ ᑮᑲᑫᐧᔒᐊᐳᐊᐧᐠ ᐊᐳᐃᐧᓇᐣ ᑳᐃᔑ ᓃᑳᓀᐣᑖᑲᐧᓂᓂᐠ ᐃᐦᐃᒫ ᐅᑕᔭᒥᐦᐋᐃᐧ ᒫᐊᐧᒋᐦᐃᑐᐃᐧᑲᒥᑯᐋᐧ,
ᑲᔦ ᐃᐦᐃᒫ ᑳᐃᔑ ᒪᑯᔖᓂᐊᐧᓂᓂᐠ ᑳᐃᔑ ᐊᐱᓂᐣᐨ ᑳᓃᑳᓀᐣᑖᑯᓯᓂᐣᐨ.
40 ᑲᐧᐣᑕ ᐁᐃᐣᑑᑕᐋᐧᐋᐧᐨ ᔒᑲᐃᐧᐦᑫᐣ ᐁᒪᐦᑲᒫᐋᐧᐨ ᐅᐋᐧᑲᐦᐃᑲᓂᓃᐣ ᑲᔦ ᒋᐋᐧᐸᒫᑲᓅᐋᐧᐨ ᑭᓇᐧᑳᓑ ᐁᐦᐊᔭᒥᐦᒋᑫᐋᐧᐨ.
ᐊᐊᐧᔑᒣ ᑕᑭᐦᒋᑎᐹᐦᑯᓈᑲᓅᐊᐧᐠ.”
ᔒᑲᐃᐧᐦᑫᐧ ᐅᐸᑭᑎᓂᑫᐃᐧᐣ
41 ᒋᓴᐢ ᑮᓇᒪᑕᐱ ᐃᐦᐃᒫ ᑎᐱᓑᑰᐨ ᑳᐃᔑ ᐊᐦᑌᓂᐠ ᐸᑭᑎᓈᓱᐃᐧᓈᐱᐦᑯᓂ ᒦᓇ ᐁᑮᑲᓇᐋᐧᐸᒫᐨ ᐊᐃᐧᔭᐣ ᑳᐸᑭᑎᓂᑫᓂᐨ ᐸᑭᑎᓈᓱᐃᐧᓈᐱᑯᐣᐠ.
ᒥᐦᔒᐣ ᑳᐁᐧᓄᑎᓯᐋᐧᐨ ᒥᐢᑕᐦᐃ ᑮᐸᑭᑎᓂᑫᐊᐧᐠ.
42 ᐁᑲᐧᐃᐧᐣ ᑳᑰᐹᑎᓯᐨ ᔒᑲᐃᐧᐦᑫᐧ ᑮᐲᔖ ᐁᑮ ᐸᑭᑎᓂᑫᐨ ᓃᔑᐣ ᐅᔖᐋᐧᐱᐦᑯᔕᐣ ᑫᑳᐟ ᐯᔑᐠ ᐅᔖᐋᐧᐱᑯᓑ ᐁᐃᓇᐣᑭᓱᓂᐨ.