ᒋᓴᐢ ᑳᑮᐲᐣᑎᑫᓑᑳᐨ ᒉᕒᐅᓴᓬᐊᒥᐣᐠ
11
ᐊᐦᐲ ᐁᐊᓂᑕᑯᔑᓄᐋᐧᐨ ᐃᐦᐃᒫ ᒉᕒᐅᓴᓬᐊᒼ ᑮᐃᔖᐊᐧᐠ ᐃᐦᐃᒫ ᐯᐟᐯᐨ ᒦᓇ ᐯᐦᑕᓃ ᑳᐃᒋᑳᑌᐠ ᑖᐃᐧᓂᐣᐠ ᐯᔓᐨ ᐃᐦᐃᒫ ᐊᓬᐃᑊ ᐱᑳᐧᒪᑎᓈᐣᐠ,
ᒋᓴᐢ ᐅᑮᒫᒋᓂᔕᐦᐋᐧᐣ ᓃᔑᐣ ᐅᑭᐦᑭᓅᐦᐊᒪᐋᐧᑲᓇᐣ.
2 ᐅᑮᐦᐃᓈᐣ,
“ᐃᔖᔪᐠ ᑕᐃᐧᓂᐣᐠ ᑎᐱᓑᑰᐨ ᑳᓂᐊᔮᐠ,
ᐊᓂᐲᐣᑎᑫᓑᑳᔦᐠ ᑲᐋᐧᐸᒫᐋᐧ ᔓᔓᒥᐢᑕᑐᒼ ᒋᓴᑲᐦᐱᓱᐨ,
ᐁᑳᐃᐧᐦᑳ ᒪᐦᔑ ᐊᐃᐧᔭ ᐁᐦᐱᒧᐃᐧᓂᑯᐨ.
ᐋᐸᐦᐅᐠ ᒦᓇ ᐲᓂᐠ ᐅᐦᐅᒫ.
3 ᑮᓑᐱᐣ ᐊᐃᐧᔭ ᑲᑫᐧᒋᒥᑰᔦᐠ,
‘ᑫᑯᓀᐣ ᐁᐧᐣᒋᑑᑕᒣᐠ ?’
ᐅᐦᐅᐁᐧ ᑲᐃᓈᐋᐧ,
‘ᑳᑎᐯᐣᒋᑫᐨ ᐅᓇᐣᑕᐁᐧᓂᒫᐣ,
ᔐᒪᐠ ᑕᐱᑮᐁᐧᐃᐧᓈᑲᓅ.’ ”
4 ᑮᒫᒑᐊᐧᐠ ᒦᓇ ᐅᑮᒥᑲᐋᐧᐋᐧᐣ ᔓᔓᒥᐢᑕᑐᒼ ᐊᑲᐧᒋᐣᐠ ᐁᑭᐦᒋᐊᐧᐱᓱᓂᐣᐨ ᐃᐦᐃᒫ ᒦᐦᑲᓈᐣᐠ ᐃᓑᑳᐧᑌᐣᐠ ᒦᓇ ᐅᑮᐊᐸᐧᐦᐋᐧᐋᐧᐣ.
5 ᐋᐣᑕ ᐊᐃᐧᔭᐠ ᑮᓃᐸᐃᐧᐊᐧᐠ ᐃᐦᐃᒫ ᐅᑮᑲᑫᐧᒋᒥᑯᐋᐧᐣ,
“ᑫᑯᓀᐣ ᐁᐧᐣᒋᑑᑕᒣᐠ ᑳᔮᐸᐧᐦᐋᐧᔦᐠ ᔓᔓᒥᐢᑕᑐᒼ? ”
6 ᐅᑮ ᓇᐦᑲᐁᐧᔑᐦᐋᐋᐧᐣ ᒋᓴᓲᐣ ᑳᑮᐃᔑ ᐄᐧᐣᑕᒫᑯᐋᐧᐨ,
ᐅᑮᐸᑭᑎᓂᑰᐋᐧᐣ ᒋᒫᒋᐃᐧᓈᐋᐧᐨ.
7 ᐊᐦᐲ ᑳᐲᐣᑕᒪᐋᐧᐋᐧᐨ ᒋᓴᓲᐣ ᔓᔓᒥᐢᑕᑐᒨᐣ,
ᐅᑮ ᐊᐧᑭᐦᑕᑐᓈᐋᐧ ᐅᒪᑰᑖᐋᐧ ᒋᐊᐸᐱᓂᐨ.
8 ᒥᐦᔒᐣ ᐅᑮᑕᔐᐧᑭᓯᑑᓈᐋᐧ ᐅᒪᑰᑖᐋᐧ ᒦᐦᑲᓈᐣᐠ,
ᑲᔦ ᑯᑕᑭᔭᐠ ᐅᑮ ᓃᐱᑌᓯᑑᓈᐋᐧ ᐊᐧᑎᑲᐧᓇᐣ ᑳᐊᓃᐱᔑᐊᐧᓂᑭᐣ ᐁᑮ ᒪᓂᑲᐦᐊᒪᐋᐧᐨ ᐅᐱᒣᐦᑲᓇ.
9 ᐃᑭᐁᐧᓂᐊᐧᐠ ᑳᑮᓃᑳᓃᐋᐧᐨ ᒦᓇ ᑳᑮᐱᒥᓂᔕᐦᐃᑫᐋᐧᐨ ᑮᔖᑯᐁᐧᐊᐧᐠ,
“ᐦᐅᓵᓇ!”
“ᔕᐁᐧᐣᑖᑯᓯ ᐊᐦᐊᐁᐧ ᑳᐱᑕᑯᔑᐣᐠ ᐃᐦᐃᒫ ᐅᑎᓯᓂᐦᑳᓱᐃᐧᓂᐣᐠ ᑳᑎᐯᐣᒋᑫᐨ!”
10 “ᔕᐁᐧᐣᑖᑲᐧᐣ ᑳᑕᑯᔑᓅᒪᑲᓂᐠ ᐅᑑᑭᒫᐃᐧᐃᐧᐣ ᑭᑖᑖᒥᓈᐣ ᑌᐱᐟ!”
“ᐦᐅᓵᓇ ᑳᐃᓑᐯᐣᑖᑯᓯᐨ!”
11 ᒋᓴᐢ ᑮᐲᐣᑎᑫ ᒉᕒᐅᓴᓬᐊᒼ,
ᑮᐃᔖ ᑭᐦᒋᐊᔭᒥᐦᐁᐃᐧᑲᒥᑯᐣᐠ,
ᒦᓇ ᑲᐦᑭᓇ ᑫᑰᓇᐣ ᐅᑮ ᑲᓇᐋᐧᐸᐣᑖᓇᐣ.
ᐋᔕ ᐃᐦᐃᐁᐧ ᑮᐊᓅᓈᑯᔑᐣ,
ᒋᓴᐢ ᑮᐊᓂᒫᒑ ᐯᐦᑕᓃ ᐁᑮᐦᐃᔖᐨ ᐊᔑᐨ ᑕᑯ ᑳᒥᑖᐦᓱ ᓃᔓᔖᐳᓂᐨ ᑭᐦᑭᓅᐦᐊᒪᐋᐧᑲᓇᐣ.
ᒋᓴᐢ ᑳᑮᑲᓅᓈᐨ ᒦᓂᔖᐦᑎᑰᐣ ᒋᓃᐳᓂᐨ
12 ᐁᑲᐧ ᒦᓇᐋᐧ ᐁᐊᓂᑮᔑᑳᐠ ᑮᐊᓂᒫᒑᐋᐧᐠ ᐃᐦᐃᒫ ᐯᐦᑕᓃ,
ᒋᓴᐢ ᑮᐹᐊᐧᓃ.
13 ᐋᐧᐦᓴ ᐅᑮ ᐅᐣᒋ ᑌᐹᐸᒫᐣ ᒦᓂᔖᐦᑎᑰᐣ ᐁᐦᐊᓃᐱᔑᐃᐧᓂᐣᐨ,
ᐅᑮᓈᓯᐦᑲᐋᐧᐣ ᐁᑮ ᓇᓈᐣᑕᐃᐧᑭᐦᑫᑕᐣᐠ ᑮᓑᐱᐣ ᒦᓂᔑᐃᐧᓂᑫᐧᐣ.
ᐊᐦᐲ ᐁᐦᐊᓅᑎᑕᐣᐠ,
ᑳᐃᐧᐣ ᑫᑰᓂ ᒋᐅᐣᒋ ᒥᐦᑲᐣᐠ,
ᐊᓃᐲᔕᐣ ᐁᐦᑕ,
ᐊᓂᓑ ᑳᐃᐧᐣ ᒪᐦᔑ ᐅᒋᐦᒋᓭᓯᓅᐣ ᒋᓂᐦᑖᐃᐧᑭᐦᑭᐣ ᒦᓂᔕᐣ.
14 ᒋᓴᐢ ᐅᑮᑲᓅᓈᐣ ᒥᐦᑎᑰᐣ,
“ᑳᐃᐧᐣ ᐄᐧᐦᑳ ᒦᓇᐋᐧ ᐊᐃᐧᔭ ᑕᐅᐣᒋ ᐊᒨᒥᓀᓰᐣ.”
ᐅᑭᐦᑭᓅᐦᐊᒪᐋᐧᑲᓇᐣ ᐅᑮᓅᐣᑖᑰᐣ ᐅᐦᐅᐁᐧ ᑳᑮᐃᐦᑭᑐᐨ.
ᒋᓴᐢ ᑮᐦᐃᔖ ᑭᐦᒋᐊᔭᒥᐦᐁᐃᐧᑲᒥᑯᐣᐠ
15 ᑮᐱᑕᑯᐦᔑᓅᐠ ᒉᕒᐅᓴᓬᐊᒦᐣᐠ ᒋᓴᐢ ᑮᐲᐣᑎᑫ ᑭᐦᒋᐊᔭᒥᐦᐁᐃᐧᑲᒥᑯᐣᐠ ᒦᓇ ᐅᑮ ᓵᑭᒋᓂᔕᐦᐋᐧᐣ ᐃᓂᐁᐧᓂᐊᐧᐣ ᑳᔮᑖᐁᐧᓂᐨ ᑲᔦ ᑳᐊᑖᐋᐧᑫᓂᐨ ᐃᐦᐃᒫ.
ᐅᑮ ᑲᐧᓇᐱᐁᐧᐱᓈᓇᐣ ᐅᑕᒋᑲᓈᐦᑎᑰᓃᐣ ᐃᓂᐁᐧᓂᐊᐧᐣ ᔔᓂᔮᓇᐣ ᑳᒣᓑᑲᐧᑑᓈᐋᐧᐨ ᒦᓇ ᐅᑌᐦᓴᐳᐃᐧᓂᓃᐣ ᐃᓂᐁᐧᓂᐊᐧᐣ ᑳᔭᑖᐋᐧᑫᓂᐨ ᐅᒦᒦᐣ.
16 ᑳᐃᐧᐣ ᐅᑑᐣᒋ ᐸᑭᑎᓈᐦᓰᐣ ᐊᐃᐧᔭᐣ ᑳᐃᐧᐊᑖᐋᐧᑫᓂᐨ ᑫᑯᓂ ᒋᔖᐳᐃᐧᑑᓂᐨ ᐃᐦᐃᒫ ᑭᐦᒋᐊᔭᒥᐦᐁᐃᐧᑲᒥᑯᐣᐠ.
17 ᑮᐃᔑ ᑭᐦᑭᓅᐦᐊᒫᑫ ᒦᓇ ᑮᐦᐃᑭᑐ,
“ᐃᓇᓯᓇᐦᐃᑳᑌ,
‘ᓂᐋᐧᑲᐦᐃᑲᐣ ᐅᐦᐅᒫ ᑫᑕᔑ ᐊᔭᒥᐦᒋᑫᐋᐧᐨ ᑲᐦᑭᓇ ᐁᐣᑕᓱᑳᓀᓯᐋᐧᐨ ᐊᐃᐧᔭᐠ ’?
ᑮᓇᐋᐧᑕᓑ ᑭᑎᔑᓈᑯᑑᓈᐋᐧ ᐅᐋᐧᔓᐋᐧ ᐅᑭᒨᒋᓑᑲᐠ.”
18 ᑭᐦᒋᐊᔭᒥᐦᐁᐃᐧᑭᒫᐠ ᒦᓇ ᑳᑭᐦᑭᓅᐦᐊᒫᑫᐋᐧᐨ ᐅᓇᐦᔓᐁᐧᐃᐧᓂ ᐅᑮᓅᐣᑖᓈᐋᐧ ᐅᐦᐅᐁᐧᓂ ᒦᓇ ᐅᑮ ᒫᒌᓇᓈᐣᑐᓈᓈᐋᐧ ᐋᓃᐣ ᑫᑮᐃᔑ ᓂᓵᐋᐧᐦᐸᐣ,
ᐅᑮᑯᐦᓵᐋᐧᐣ ᐊᓂᓑ ᑲᐦᑭᓇ ᑳᑮᑭᐦᒋᒥᔒᓄᐋᐧᐨ ᐊᐃᐧᔭᐠ ᐅᑮ ᒫᒪᐦᑳᑌᐣᑖᓈᐋᐧ ᐅᑭᐦᑭᓅᐦᐊᒫᑫᐃᐧᓂᓃᐣ.
19 ᐊᐦᐲ ᐁᐦᐊᓅᓈᑯᔑᓂᓂᐣᐠ ᒋᓴᐢ ᒦᓇ ᐅᑭᐦᑭᓅᐦᐊᒪᐋᐧᑲᓇᐠ ᑮᐦᐊᓅᐣᒋ ᒫᒑᐊᐧᐠ ᐃᐦᐃᒫ ᑭᐦᒋᑖᐃᐧᓂᐣᐠ.
ᑭᐦᑭᓅᐦᐊᒫᑫᐃᐧᐣ ᒦᓂᔖᐦᑎᑯᐣᐠ ᐅᐣᒋ
20 ᐁᑫᑭᔐᐹᔮᐠ,
ᑮᐊᓂᐱᒧᓭᐊᐧᐠ ᐁᑲᐧ ᐅᑮᐋᐧᐸᒫᐋᐧᐣ ᒦᓂᔖᐦᑎᑰᐣ ᐁᐹᐦᓯᓂᐣᐨ ᐅᒌᐱᐦᑯᐣᐠ ᐃᓀᐦᑫ.
21 ᐲᑕᕒ ᑮᑲᓅᐦᑫᐦᓭ ᒦᓇ ᐅᑮᐦᐃᓈᐣ ᒋᓴᓲᐣ,
“ᐅᑭᐦᑭᓅᐦᐊᒫᑫ,
ᐃᓈᐱᐣ ᐊᐦᐊᐁᐧ ᒦᓂᔖᐦᑎᐠ ᑳᑮᒪᒐᐣᑭᒪᐨ ᒥᑐᓂ ᐁᐹᐦᓱᐨ.”
22 “ᑌᐯᐧᔦᓂᒥᐠ ᑭᔐᒪᓂᑑ,”
ᒋᓴᐢ ᐅᑮ ᐃᔑᓇᐦᑲᐁᐧᔑᐦᐋᐣ.
23 “ᑌᐯᐧ ᑭᑎᓂᓈᐋᐧ,
ᑮᓑᐱᐣ ᐊᐃᐧᔭ ᑫᑲᓅᑕᒧᑫᐧᐣ ᐱᐦᑲᐧᑎᓈᓂ,
‘ᒫᒑᐣ,
ᐊᐣᑕᐃᐧᐸᑯᐲᑲᐧᓑᑰᓂᐣ ᑭᐦᒋᑲᒦᐣᐠ,’
ᐁᑳ ᐅᑖᓀᐧᐣᑕᒧᐃᐧᓂᐨ ᐅᑌᐦᐄᐣᐠ,
ᑌᐯᐧᐦᑕᐣᐠ ᑳᐃᐦᑭᑐᐨ ᑕᐃᓯᐦᓭᓂ,
ᑌᐯᐧ ᑕᐃᔑ ᐋᐧᐸᐣᑕᐦᐃᑯᐃᐧᓯ.
24 ᐊᒦᐦᐅᐁᐧ ᑳᐅᐣᒋ ᐃᐧᐣᑕᒪᐃᐧᓇᑯᐠ,
ᑫᑰᓀᐣ ᐱᑯ ᐁᓇᑐᑕᒫᑫᔦᐠ ᐊᔭᒥᐦᒋᑫᐃᐧᓂᐣᐠ,
ᑌᐯᐧᐦᑕᒧᐠ ᐋᔕ ᐁᑮ ᒦᓂᑰᔦᐠ ᐁᑲᐧ ᑭᑲᐊᔮᓈᐋᐧ.
25 ᐊᐦᐲ ᐁᓃᐸᐃᐧᔭᐣ ᐁᐊᔭᒥᐦᒋᑫᔭᐣ,
ᑮᓑᐱᐣ ᐁᐊᐧᓂᑐᑖᑯᔦᐠ ᐊᐃᐧᔭ,
ᐴᓀᐣᑕᒪᐃᐧᐠ,
ᑫᐄᐧᐣ ᑭᑖᑖ ᑭᐦᒋᑮᔑᑯᐣᐠ ᑳᐊᔮᐨ ᑲᐴᓀᐣᑕᒫᑯᐋᐧ ᑭᒪᒋᑑᑕᒨᐃᐧᓂᐋᐧ.”
ᒋᓴᐢ ᐅᑲᑫᐧᒋᒥᑰᐣ ᐋᐣᑎ ᑳᐅᐣᒋᐦᓭᓂᐠ ᐅᑲᓑᑭᐦᐅᐃᐧᐣ
27 ᒦᓇᐋᐧ ᑮᐱᑕᑯᐦᔑᓅᐠ ᐃᐦᐃᒫ ᒉᕒᐅᓴᓬᐊᒼ.
ᒣᑳᐧᐨ ᒋᓴᐢ ᐁᐱᒧᐦᓭᐨ ᑭᐦᒋᐊᔭᒥᐦᐁᐃᐧᑲᒥᑯᐣᐠ,
ᐅᑮᐱᓈᓯᐦᑳᑰᐣ ᑭᐦᒋᐊᔭᒥᐦᐁᐃᐧᑭᒫᐣ,
ᑳᑭᐦᑭᓅᐦᐊᒫᑫᐋᐧᐨ ᐅᓇᐦᔓᐁᐧᐃᐧᓂ ᒦᓇ ᑳᓃᑳᓀᐣᑖᑯᓯᓂᐣᐨ.
28 “ᑫᑯᓀᐣ ᑲᓑᑭᐦᐅᐃᐧᐣ ᑳᑑᑕᒪᐣ ᐅᓄᐁᐧᓂᐊᐧᐣ ᑫᑰᓇᐣ ?”
ᐅᑮᐃᔑ ᑲᑫᐧᒋᒫᐋᐧᐣ.
“ᒦᓇ ᐊᐊᐧᓀᐣ ᑳᒦᓂᐠ ᑲᓑᑭᐦᐅᐃᐧᐣ ᒋᑑᑕᒪᐣ ᐅᓄᐦ ᑫᑰᓇᐣ ?”
29 ᒋᓴᐢ ᐅᑮᓇᐦᑲᐧᐁᐧᔑᐦᐋᐣ,
“ᑫᓃᐣ ᐯᔑᐠ ᑫᑰᐣ ᑲᑲᑫᐧᒋᒥᓂᓈᐋᐧ.
ᓇᐦᑲᐧᐁᐧᔑᐦᐃᔑᔦᐠ,
ᑲᐃᐧᐣᑕᒪᐃᐧᓂᓈᐋᐧ ᑫᑯᓀᐣ ᑲᓑᑭᐦᐅᐃᐧᐣ ᑳᑑᑕᒫᓂᐣ ᐅᓄᐦ ᑫᑰᓇᐣ.
30 ᐅᓰᐣᑲᐦᐊᐣᑖᑫᐃᐧᐣ ᒐᐧᐣ,
ᑭᐦᒋᑮᔑᑰᐣᐠ ᓇ ᑮᐅᐣᒌᒪᑲᓂᓂ ᓈᐣᑕ ᑲᔦ ᐊᓂᔑᓃᑳᐣᐠ ᐅᐦᐅᒫ ᐊᐦᑮᐣᐠ ᐅᐣᒋ?
ᐄᐧᐣᑕᒪᐃᐧᔑᔪᐠ.”
31 ᑮᐋᓂᒨᑕᒫᑎᐊᐧᐠ ᐃᑭᐁᐧᓂᐊᐧᐠ ᐁᑮᐦᐃᑭᑐᐋᐧᐨ,
“ᑮᓑᐱᐣ ᐃᐦᑭᑐᔭᐣᑭᐸᐣ,
‘ᑭᐦᒋᑮᔑᑰᐣᐠ,’
ᑕᑲᑫᐧᑌᐧ,
‘ᑫᑯᓀᐣ ᐁᑳ ᑳᑮᐅᐣᒋ ᑌᐯᐧᐦᑕᐋᐧᔦᐠ ?’
32 ᓈᓑᑫ ᑮᓑᐱᐣ ᐃᑭᐦᑐᔭᐣᑭᐸᐣ,
‘ ᐊᓂᔑᓃᐦᑳᐣᐠ ᑮᐅᐣᒋᐦᓭᓂ ’… .”
(ᐅᑮᑯᐦᓵᐋᐧᐣ ᐊᓂᔑᓂᓂᐊᐧᐣ,
ᐊᓂᓑ ᑲᐦᑭᓇ ᑌᐯᐧ ᐱᑯᐦ ᐅᑭᐦᑭᐁᐧᐦᐃᑫ ᐅᑮᐃᓀᓂᒫᐋᐧᐣ ᒐᐧᓇᐣ.)
33 ᐅᑮᓇᐦᑲᐧᐁᐧᔑᐦᐋᐋᐧᐣ ᒋᓴᓲᐣ,
“ᑳᐃᐧᐣ ᒋᑭᐦᑫᐣᑕᒫᐣᐠ.”
ᒋᓴᐢ ᑮᐃᐦᑭᑐ,
“ᑳᐃᐧᐣ ᑫᓃᐣ ᑲᑮᐄᐧᐣᑕᒪᐃᐧᓂᓈᐋᐧᓰᐣ ᑫᑯᓀᐣ ᑲᓑᑭᐦᐅᐃᐧᐣ ᑳᑑᑕᒫᓂᐣ ᐅᓄᐦ ᑫᑰᓇᐣ.”