2 ᐋᐣᑕ ᐯᕒᐊᓰᐃᐧᓂᓂᐊᐧᐠ ᑮᐲᔕᐋᐧᐠ ᐅᑮᑲᐧᑫᐧᒋᒥᑰᐣ ᐁᑲᑫᐧᒋᐦᐃᑯᐨ,

“ᐃᓇᐦᑌ ᓇ ᐃᐦᐃᐁᐧ ᒋᑑᒋᑳᑌᐠ ᓈᐯ ᒋᐁᐧᐱᓈᐨ ᐅᐃᐧᒋᐋᐧᑲᓇᐣ ?”

3 “ᐋᓃᐣ ᒨᓯᐢ ᑳᐃᓂᑰᔦᐠ ?”

ᒋᓴᐢ ᐅᑮ ᓇᐦᑲᐁᐧᔑᐦᐋᐣ.

4 ᑮᐃᐦᑭᑐᐊᐧᐠ,

“ᒨᓯᐢ ᐅᑮᐸᑭᑎᓈᐣ ᓈᐯᐊᐧᐣ ᒋᒪᓯᓇᐦᐊᒥᓂᐣᐨ ᐁᐧᐱᓂᑐᒪᓯᓇᐦᐃᑲᓀᐢ ᒋᐁᐧᐱᓈᐨ ᐅᐃᐧᒌᐋᐧᑲᓇᐣ.”

5 “ᑮᒪᓑᑲᐋᐧᐦᑌ ᑭᑌᐦᐃᐋᐧ,

ᒦᐦᐃᐁᐧ ᒨᓯᐢ ᑳᑮᐅᐣᒋ ᒪᓯᓇᐦᐊᐣᐠ ᐅᓈᐦᑯᓂᑫᐃᐧᓂ,”

ᒋᓴᐢ ᐅᑮᐃᔑ ᓇᐦᑲᐁᐧᔑᐦᐋᐣ.

6 “ᑲᐦᑭᓇ ᑫᑰᓇᐣ ᑳᑮᐅᔑᐦᑑᒋᐣ ᑭᔐᒪᓂᑑ ᐅᑮ ᐅᔑᐦᐋᐣ ᓈᐯᐊᐧᐣ ᒦᓇ ᐃᐦᑫᐧᐊᐧᐣ.

7 ‘ᒦᐦᐅᐁᐧ ᐅᐣᒋ ᓈᐯ ᑫᐅᐣᒋ ᓇᑲᓈᐨ ᐅᑖᑖᒪᐣ ᒦᓇ ᐅᒫᒫᒪᐣ,

ᐅᐃᐧᒋᐋᐧᑲᓇᐣ ᒋᐃᐧᒌᐊᔮᒫᐨ,

8 ᒦᓇ ᐅᑯᐦ ᐁᐃᔑᓃᔓᐋᐧᐨ ᑕᐯᔓᑯ ᐄᐧᔮᓭᐊᐧᐠ.’

ᒦᓇ ᑳᐃᐧᐣ ᒋᓃᔓᐋᐧᐨ ᐱᑯᐦ ᐯᔑᑯᐊᐧᐠ.

9 ᒦᓇ ᐅᓄᐁᐧᓂᐊᐧᐣ ᑭᔐᒪᓂᑑ ᑳᑮᑕᑯᐱᓈᒋᐣ,

ᑳᐃᐧᐣ ᐊᐃᐧᔭ ᐅᑲᐋᐸᐦᐋᐧᓰᐣ.”

10 ᐊᐦᐲ ᒦᓇᐋᐧ ᐋᐧᑲᐦᐃᑲᓂᐠ ᐁᐦᐊᔮᐋᐧᐨ ᑭᐦᑭᓅᐦᐊᒪᐋᐧᑲᓇᐠ ᐅᑮᑲᑫᐧᒋᒫᐋᐧᐣ ᒋᓴᓲᐣ ᐅᐦᐅᐁᐧᓂ.

11 ᒋᓴᐢ ᐅᑮ ᐃᔑᓇᐦᑲᐁᐧᔑᐦᐋᐣ,

“ᐊᐃᐧᔭ ᑳᐁᐧᐱᓈᐨ ᐅᐃᐧᒌᐋᐧᑲᓇᐣ ᒦᓇᐋᐧ ᐁᐦᐊᓂᐃᐧᒌᐋᐧᐨ ᑯᑕᑭᔭᐣ ᐃᐦᑫᐧᐊᐧᐣ ᐅᐱᔑᑳᐧᒋᐦᐋᐣ.

12 ᑮᓑᐱᐣ ᐃᐦᑫᐧ ᐁᐁᐧᐱᓈᐨ ᐅᐃᐧᒌᐋᐧᑲᓇᐣ ᒦᓇᐋᐧ ᐁᐦᐊᓂᐃᐧᒌᐋᐧᐨ ᑯᑕᑭᔭᐣ ᓈᐯᐊᐧᐣ,

ᐱᔑᑳᐧᑎᓯ.”

13 ᐊᓂᔑᓂᓂᐊᐧᐠ ᐅᑮᐲᓈᐋᐧᐣ ᐊᐋᐧᔑᔕᐣ ᒋᔕᐁᐧᓂᒫᐨ ᒋᓴᐢ,

ᑭᐦᑭᓅᐦᐊᒪᐋᐧᑲᓇᐠ ᐅᑮᑲᓅᓈᐋᐧᐣ ᐃᓂᐁᐧᓂᐊᐧᐣ ᑳᑮᐲᓈᓂᐨ.

14 ᐊᐦᐲ ᒋᓴᐢ ᑳᐋᐧᐸᑕᐣᐠ ᐅᐦᐅᐁᐧᓂ ᑳᐃᐧᐣ ᒋᐅᐣᒋ ᓇᐦᐁᐣᑕᐣᐠ.

ᐅᑮᐦᐃᓈᐣ ᐅᑭᐦᑭᓅᐦᐊᒪᐋᐧᑲᓇᐣ,

“ᐸᑭᑎᓂᑯᐠ ᒋᐱᓈᓯᐦᑲᐃᐧᔑᐋᐧᐨ ᐊᐋᐧᔑᔕᐠ.

ᑳᐃᐧᐣ ᑭᐱᐦᑎᓂᑯᐠ.

ᒦ ᐅᑯᐁᐧᓂᐊᐧᐠ ᑑᑳᐣ ᑭᔐᒪᓂᑑ ᐅᑑᑭᒫᐃᐧᐃᐧᓂᐣᐠ ᑳᐊᔮᐋᐧᐨ.

15 ᑌᐯᐧ ᑭᑎᓂᓈᐋᐧ,

ᐊᐊᐧᓀᐣ ᐁᑳ ᑫᐅᑖᐦᐱᓇᒧᑫᐧᐣ ᑭᔐᒪᓂᑑ ᐅᑑᑭᒫᐃᐧᐃᐧᐣ ᑖᐱᓑᑰᐨ ᐊᐋᐧᔑᓑ ᑳᐃᐧᐣ ᐄᐧᐦᑳ ᑕᑮᐲᐣᑎᑫᓰᐣ.”

16 ᒋᓴᐢ ᐅᑮ ᐅᑖᐦᐱᓈᐣ ᐊᐋᐧᔑᔕᐣ ᐁᑮᓵᒥᓈᐨ ᒦᓇ ᐁᑮᔕᐁᐧᓂᒫᐨ.

17 ᒋᓴᐢ ᑮᐊᓂᒫᒑ,

ᐯᔑᐠ ᓈᐯᐊᐧᐣ ᐅᑮ ᐱᓈᓯᑳᑰᐣ ᐅᑮ ᐅᐣᒋᒌᑲᐧᓇᐦᐲᑖᑰᐣ ᐁᑮᑲᑫᐧᒋᒥᑯᐨ,

“ᑳᒥᓈᐧᑎᓯᔮᐣ ᐅᑭᐦᑭᓅᐦᐊᒫᑫ,

ᑫᑯᓀᐣ ᑫᑮᑑᑕᒫᒼᐹᐣ ᒋᑮᐊᔮᔮᐣ ᑳᑭᑫ ᐱᒫᑎᓯᐃᐧᐣ ?”

18 ᒋᓴᐢ ᐅᑮᓇᐦᑲᐁᐧᔑᐦᐋᐣ,

“ᑫᑯᓀᐣ ᑳᒥᓈᐧᑎᓯᔮᐣ ᐁᐧᐣᒋ ᐃᔑᓂᐦᑳᓂᔑᔭᐣ ?

ᑳᐃᐧᐣ ᐊᐃᐧᔭ ᒋᒥᓈᐧᑎᓯᐨ,

ᐯᔑᐠ ᐁᐦᑕ ᐊᐦᐊᐁᐧ ᑭᔐᒪᓂᑑ.

19 ᑭᑭᐦᑫᐣᑖᐣ ᐅᓇᐦᔓᐁᐧᐃᐧᓇᐣ,

‘ᑳᐃᐧᐣ ᑲᓂᐦᓯᐁᐧᓰᐣ,

ᑳᐃᐧᐣ ᑲᐱᔑᑳᐧᑎᐢ,

ᑳᐃᐧᐣ ᑲᑭᒨᑎᓰᐣ,

ᑳᐃᐧᐣ ᑲᐧᐣᑕ ᑲᐃᓈᒋᒧᓰᐣ,

ᑳᐃᐧᐣ ᑲᐊᐧᔦᔑᐦᐃᐁᐧᓰᐣ,

ᑭᐦᑌᓂᒼ ᑭᑖᑖ ᒦᓇ ᑭᒫᒫ.’ ”

20 “ᑭᐦᑭᓅᐦᐊᒫᑫ,

ᑲᐦᑭᓇ ᐅᓄᐁᐧᓂᐊᐧᐣ ᓂᑮᐱᑲᓇᐁᐧᐣᑖᓇᐣ ᑳᐴᓑᑭᓃᑮᐃᐧᔮᐣ.”

21 ᒋᓴᐢ ᐅᑮ ᑲᓇᐋᐧᐸᒫᐣ ᐁᑮᓵᑭᐦᐋᐨ ᒦᓇ ᐅᑮᐦᐃᓈᐣ,

“ᐯᔑᐠ ᑫᑰᐣ ᑭᓅᐣᑌᐦᓭ.

ᒫᒑᐣ ᑕᓑ,

ᐊᐣᑖᐃᐧᐊᑖᐋᐧᑫᐣ ᑲᐦᑭᓇ ᑫᑰᓇᐣ ᑳᐊᔮᔮᓂᐣ ᒦᓂᐠ ᑳᑭᑎᒫᑭᓯᐋᐧᐨ,

ᐁᑲᐧᑕᓑ ᑲᐊᔮᐣ ᐁᐧᓅᑎᓯᐃᐧᐣ ᑭᐦᒋᑮᔑᑯᐣᐠ.

ᐁᑲᐧ ᐱᒥᓂᔕᐦᐅᔑᐣ.”

22 ᓈᐯ ᑳᐃᐧᐣ ᒋᐅᐣᒋ ᓇᐦᐁᐣᑕᐣᐠ.

ᑮᓂᑲᑌᓑᑳ ᐁᑮᒪᒉᐣᑕᐣᐠ ᐊᓂᓑ ᐁᑮ ᑭᐦᒋᐁᐧᓅᑎᓯᐨ.

23 ᒋᓴᐢ ᑮᐸᐹᒥᐊᐃᓈᐱ ᒦᓇ ᐅᑮᐦᐃᓈᐣ ᐅᑭᐦᑭᓅᐦᐊᒪᐋᐧᑲᓇᐣ,

“ᒫᐊᐧᐨ ᑕᔮᓂᒪᐣ ᑳᐁᐧᓄᑎᓯᐋᐧᐨ ᒋᑮᐲᐣᑎᑫᐋᐧᐨ ᑭᔐᒪᓂᑑ ᐅᑑᑭᒫᐃᐧᓂᐣᐠ.”

24 ᑭᐦᑭᓅᐦᐊᒪᐋᐧᑲᓇᐠ ᐅᑮ ᒫᒪᐦᑳᓯᑕᓈᐋᐧ ᒋᓴᓲᐣ ᐅᑎᐦᑭᑐᐃᐧᓂᓃᐣ.

ᒦᓇᐋᐧ ᒋᓴᐢ ᑮᐊᓃᐦᑭᑐ,

“ᓂᓃᒐᓂᔕᐠ,

ᒫᐊᐧᐨ ᑕᔮᓂᒪᐣ ᐊᐃᐧᔭ ᒋᑮᐱᐣᑎᑫᐨ ᑭᔐᒪᓂᑑ ᐅᑑᑭᒫᐃᐧᓂᐣᐠ.

25 ᐁᐧᐣᑕᐣ ᐱᐦᑲᐧᑲᓀᐃᐧᐱᔑᐢᑭ ᒋᔖᐳᓑᑳᐨ ᑳᐃᔑ ᐸᑯᓀᔮᐱᑲᓂᓂᐠ ᔖᐳᓂᑲᓂ,

ᐊᐲᐨ ᑳᐁᐧᓅᑎᓯᐨ ᐊᐃᐧᔭ ᒋᑮᐲᐣᑎᑫᐨ ᑭᔐᒪᓂᑑ ᐅᑑᑭᒫᐃᐧᓂᐣᐠ.”

26 ᑭᐦᑭᓅᐦᐊᒪᐋᐧᑲᓇᐠ ᐊᐊᐧᔑᒣ ᑮᒫᒪᐦᑳᑌᐣᑕᒨᐠ ᒦᓇ ᑮᐊᐃᓂᑐᐊᐧᐠ,

“ᐊᐊᐧᓀᐣ ᑫᑮᐱᒫᒋᐦᐅᐨ?”

27 ᒋᓴᐢ ᐅᑮᑲᓇᐋᐧᐸᒫᐣ ᒦᓇ ᐁᐃᐦᑭᑐᐨ,

“ᑳᐃᐧᐣ ᐊᐃᐧᔭ ᐅᑖᑲᓑᑭᐦᑑᓰᐣ,

ᐁᑲᐧᐃᐧᐣ ᑭᔐᒪᓂᑑ ᑲᐦᑭᓇ ᑫᑰᓂ ᐅᑲᓑᑭᐦᑑᐣ.”

28 ᐲᑕᕒ ᐅᑮᐦᐃᓈᐣ ᒋᓴᓲᐣ,

“ᓂᑮᓇᑲᑖᒥᐣ ᑲᐦᑭᓇ ᑫᑰᓇᐣ ᐁᐃᐧᐱᒥᓂᔕᐦᐅᑰᔭᐣ.”

29 ᒋᓴᐢ ᑮᐦᐃᑭᑐ,

“ᑌᐯᐧ ᑭᑎᓂᓈᐋᐧ,

ᐊᐃᐧᔭ ᑳᓇᑲᑕᐣᐠ ᐅᑲᐯᔑᐃᐧᐣ,

ᓈᐣᑕ ᐄᐧᒋᐦᑫᐧᓯᐊᐧᐣ,

ᐅᑕᐁᐧᒫᐣ,

ᐅᒫᒫᒪᐣ,

ᐅᑖᑕᒪᐣ,

ᐅᓃᒑᓂᔕᐣ,

ᑭᐦᑎᑳᓇᐦᑭ ᐅᐣᒋ ᒦᓇ ᒥᓈᐧᒋᒧᐃᐧᐣ,

30 ᑕᒦᓈᑲᓅ ᒥᑖᐦᓱᒥᑕᓇ ᐊᐊᐧᔑᒣ ᒥᓂᑯᐠ ᓅᐣᑯᒼ ᒣᑳᐧᐨ ᐁᐱᒫᑎᓯᐨ,

ᑲᐯᔑᐃᐧᓇᐣ,

ᐅᐄᐧᒋᐦᑫᐧᓯᐊᐧᐣ,

ᐅᑕᐁᐧᒫᐣ,

ᐅᒫᒫᒪᐣ,

ᐅᓃᒑᓂᔕᐣ ᒦᓇ ᐅᑭᑎᐦᑳᓇᐦᑭ ᐁᑲᐧ ᑲᔦ ᒋᑲᑳᐧᑕᑭᐦᑑᐋᐧᐨ.

ᐃᔑᓃᑳᐣ ᐅᑲᐊᔮᓈᐋᐧ ᑳᑭᑫ ᐱᒫᑎᓯᐃᐧᐣ.

31 ᔖᑰᐨ ᒥᐦᔒᐣ ᑳᓃᑳᓃᐋᐧᐨ ᐅᑖᓈᐣᐠ ᑕᐃᓯᐦᓭᐊᐧᐠ,

ᒦᓇ ᐃᑭᐁᐧᓂᐊᐧᐠ ᐅᑖᓈᐣᐠ ᑳᐊᔮᐋᐧᐨ ᑕᓃᑳᓃᐊᐧᐠ.”

32 ᑮᐦᐊᓂᒫᒑᐊᐧᐠ ᒉᕒᐅᓴᓬᐊᒥᐣᐠ ᐁᑮᐃᔖᐋᐧᐨ,

ᒋᓴᐢ ᑮᓃᑳᓂᓑᑳ.

ᑭᐦᑭᓅᐦᐊᒪᐋᐧᑲᓇᐠ ᑮᒫᒪᑳᑌᐣᑕᒧᐠ,

ᐃᑭᐁᐧᓂᐊᐧᐠ ᑳᐱᒥᓂᔕᐦᐃᑫᐋᐧᐨ ᐁᑮᓭᑭᓯᐋᐧᐨ.

ᒦᓇ ᒋᓴᐢ ᐅᐱᒣᐦᐃ ᐅᑮᐃᔑᐃᐧᓈᐣ ᒥᑖᓱᐦ ᓃᔓᔖᑊ ᐅᑮᐃᐧᐣᑕᒪᐋᐧᐣ ᑫᐊᓃᔑᐁᐧᐱᔑᐨ.

33 “ᒉᕒᐅᓴᓬᐊᒼ ᑭᑎᔖᒥᐣ,”

ᒋᓴᐢ ᑮᐦᐃᑭᑐ,

“ᐃᓂᓃᐤ ᐅᑯᓯᐦᓴᐣ ᑕᐊᐧᔦᔑᐸᑭᑎᓈᑲᓅ ᒋᐅᑖᐦᐱᓂᑯᐨ ᑭᐦᒋᐊᔭᒥᐦᐁᐃᐧᑭᒫᐣ ᒦᓇ ᑳᑭᐦᑭᓅᐦᐊᒫᑫᐋᐧᐨ ᐅᓇᐦᔓᐁᐧᐃᐧᓂ.

ᐅᑲᐃᓇᐦᔓᐋᐧᓈᐋᐧᐣ ᒋᓂᐦᓯᒥᓂᐨ ᒦᓇ ᐅᑲᐃᔔᐦᑕᒪᐋᐧᐋᐧᐣ ᒉᐣᑖᓬᐃᓂᓂᐊᐧᐣ,

34 ᐅᑲᒣᑕᐋᐧᑳᓈᐋᐧᐣ ᒦᓇ ᒋᓴᓰᑲᐧᓈᐋᐧᐨ,

ᒋᐸᐸᐦᓯᑌᐦᐋᐧᐋᐧᐨ ᒦᓇ ᒋᓂᓵᐋᐧᐨ.

ᑮᐃᓑᑳᐧ ᓂᐦᓱᑮᔑᑳᓂᐠ ᑕᐊᐧᓂᓑᑳ.”

35 ᒉᒥᐢ ᒦᓇ ᒐᐧᐣ ᐅᑯᓯᐦᓴᐣ ᓭᐱᑏ ᐅᑮᐱᓈᓯᐦᑲᐋᐧᐋᐧᐣ ᒋᓴᓲᐣ.

“ᐅᑭᐦᑭᓅᐦᐊᒫᑫ,”

ᑮᐦᐃᑭᑐᐊᐧᐠ,

“ᑭᓇᐣᑕᐁᐧᓂᒥᑰ ᒋᑑᒋᑫᑕᒪᐃᐧᔑᔮᐣᐠ ᑫᑰᐣ ᐱᑯᐦ ᑫᑲᑫᐧᒋᒥᑰᔭᐣ.”

36 “ᑫᑯᓀᐣ ᓇᐣᑕᐁᐧᐣᑕᒣᐠ ᑫᑑᑕᒪᐃᐧᓂᓇᑯᐠ ?”

ᐅᑮᐦᐃᔑ ᑲᑫᐧᒋᒫᐣ.

37 ᐅᑮᓇᐦᑲᐧᐁᐧᔑᐦᐋᐋᐧᐣ,

“ᒦᓂᔑᓈᐣ ᐃᐦᐃᒫ ᒋᐊᐱᔮᐣᐠ ᐯᔑᐠ ᑭᓇᐦᐃᐃᐧᓂᐣᐠ ᒦᓇ ᐯᔑᐠ ᑭᓇᒪᐣᒌᐃᐧᓂᐣᐠ ᑭᑭᐦᑌᐣᑖᑯᓯᐃᐧᓂᐣᐠ.”

38 ᒋᓴᐢ ᑮᐃᐦᑭᑐ,

“ᑳᐃᐧᐣ ᑭᑭᐦᑫᐣᑕᓰᓈᐋᐧ ᑫᑯᓀᐣ ᑳᓇᐣᑐᑕᒫᑫᔦᐠ.

ᑭᑖᑲᓑᑭᑐᓈᐋᐧ ᓇ ᒋᐅᐣᒋ ᒥᓂᐦᑫᐧᔦᐠ ᒥᓂᑲᐧᑲᓂᐣᐠ ᑲᑲᐧᑕᑭᓯᐃᐧᓂᐣᐠ ᐅᐣᒋ ᓃᐣ ᑫᐅᐣᒋ ᒥᓂᐦᑫᐧᔮᐣ,

ᓈᐣᑕ ᒋᓰᐣᑲᐦᐊᐣᑖᑯᔦᐠ ᓃᐣ ᑫᐅᐣᒋ ᓰᐣᑲᐦᐋᐣᑖᑯᔮᐣ ?”

39 “ᓂᑖᑲᓑᑭᐦᑑᒥᐣ,”

ᑮᐦᑭᑐᐊᐧᐠ.

ᒋᓴᐢ ᐅᑮᐦᐃᓈᐣ,

“ᑲᒥᓂᐦᑫᐧᓈᐋᐧ ᑫᐅᐣᒋ ᒥᓂᐦᑫᐧᔮᐣ ᒦᓇ ᑫᐅᐣᒋ ᓰᐣᑲᐦᐊᐣᑖᑯᔮᐣ ᑲᓰᐣᑲᐦᐊᐣᑖᑯᓈᐋᐧ.

40 ᐃᐦᐃᒫ ᒋᑮᐃᔑᐊᐱᐋᐧᐨ ᓇᐦᐃᐃᐧᓂᐣᐠ ᓈᐣᑕ ᓇᒪᐣᒌᐃᐧᓂᐣᐠ ᑳᐃᐧᐣ ᓃᐣ ᓂᑲᐅᓀᐣᑕᓰᐣ.

ᐃᑭᐁᐧᓂᐊᐧᐠ ᑕᒦᓈᐊᐧᐠ ᑳᑲᐧᔮᐣᒋᐦᑕᒪᐃᐧᐣᑖᐧ ᑳᑮᐅᓀᓂᒫᒋᐣ ᑭᔐᒪᓂᑑ.”

41 ᐊᐦᐲ ᐃᑭᐁᐧᓂᐊᐧᐠ ᑯᑕᑭᔭᐠ ᑳᒥᑖᐦᓱᐋᐧᐨ ᑭᐦᑭᓅᐦᐊᒪᐋᐧᑲᓇᐠ ᑳᓅᐣᑕᒧᐋᐧᐨ ᐅᐦᐅᐁᐧᓂ,

ᑳᐃᐧᐣ ᒋᐅᐣᒋ ᓇᐦᐁᓂᒫᐋᐧᐨ ᒉᒥᓲᐣ ᒦᓇ ᒐᐧᓇᐣ.

42 ᒋᓴᐢ ᐅᑮᒫᒪᐤ ᓇᐣᑐᒫᐣ ᒦᓇ ᑮᐃᐦᑭᑐ,

“ᑭᑭᐦᑫᓂᒫᐋᐧᐠ ᐃᑭᐁᐧᓂᐊᐧᐠ ᑳᐅᑭᒫᑲᐣᑕᐋᐧᐋᐧᐨ ᒉᐣᑖᓬᐃᓂᓂᐊᐧᐣ ᐁᑎᐯᓂᒥᑯᐋᐧᐨ,

ᐃᑭᐁᐧᓂᐊᐧᐠ ᑳᑭᐦᒋᓀᐣᑖᑯᓯᓂᐣᐨ ᐁᒪᓑᑲᐋᐧᐦᑯᓂᑰᐋᐧᐨ.

43 ᑳᐃᐧᐣ ᑮᓇᐋᐧ ᐃᔑᓈᑯᓯᐠ,

ᐊᐃᐧᔭ ᑳᐃᐧ ᓃᑳᓀᐣᑖᑯᐦᐃᑎᓱᐨ ᑕᐃᔑᐊᔮ ᑖᐱᓑᑯᐨ ᒫᒪᐤ ᐊᓄᐦᑮᓈᑲᐣ.

44 ᐊᐃᐧᔭ ᑳᐃᐧ ᓂᑳᓀᐣᑖᑯᐦᐃᑎᓱᐨ ᑕᒫᒪᐤ ᐊᓄᐦᑮᓈᑲᓂᐃᐧ.

45 ᐃᓂᓃᐤ ᐅᑯᓯᐦᓴᐣ ᑳᐃᐧᓂᐣ ᐃᐦᐃᐁᐧᓂ ᑮᐅᐣᒋ ᐲᔖᓰᐣ ᒋᐸᒥᐦᐋᑲᓅᐨ,

ᐱᑯᐦ ᒋᐸᒥᐦᐃᐁᐧᐨ ᒋᐸᑭᑎᓇᐣᐠ ᐅᐱᒫᑎᓯᐃᐧᐣ ᒥᐦᔒᐣ ᐊᐃᐧᔭᐠ ᒋᑮᐅᐣᒋ ᐱᒫᒋᐦᐃᐣᑖᐧ.”

46 ᑮᐱᑕᑯᐦᔑᓅᐠ ᐃᐦᐃᒫ ᒉᕒᐃᑯ ᑭᐦᒋᑖᐃᐧᓂᐣᐠ.

ᑮᐦᐊᓄᐣᒋ ᒫᒑᐊᐧᐠ ᒋᓴᐢ ᐁᑮᐃᐧᒌᐋᐧᐨ ᐅᑭᐦᑭᓅᐦᐊᒪᐋᐧᑲᓇᐣ ᑕᑯᐦ ᑭᐦᒋᒥᔒᐣ ᐊᐃᐧᔭᐠ,

ᐁᑳ ᑳᐋᐧᐱᐨ ᓈᐯ ᐹᕒᑎᒣᐊᐢ ᐅᑯᓯᐦᓴᐣ ᑎᒣᐊᐢ ᑮᐦᐊᐱ ᒦᐦᑲᓈᐣᐠ ᑳᑭᑎᒫᑭᓯᐨ.

47 ᐊᐦᐲ ᑳᓅᐣᑕᐣᐠ ᒋᓴᓲᐣ ᓈᓴᕒᐊᑎᐣᐠ ᑳᐅᐣᒌᓂᐨ ᐁᐱᒧᓭᓂᐨ,

ᑮᔖᑯᐁᐧ,

“ᒋᓴᐢ,

ᑌᐱᐟ ᐅᑯᓯᐦᓴᐣ,

ᐃᐧᒋᐦᐃᔑᐣ.”

48 ᒥᐦᔒᐣ ᐅᑮᑲᓅᓈᐋᐧᐣ ᐁᑳ ᒋᐃᐦᑭᑐᓂᐨ,

ᐋᐣᒋᑯ ᐊᐊᐧᔑᒣ ᑮᔖᑯᐁᐧ,

“ᑌᐱᐟ ᐅᑯᓯᐦᓴᐣ,

ᐃᐧᒋᐃᐦᔑᐣ.”

49 ᒋᓴᐢ ᑮᑭᐦᐱᒋᑳᐸᐃᐧ ᑮᐦᐃᑭᑐ,

“ᓇᐣᑐᒥᐠ.”

ᐅᑮᑲᓅᓈᐋᐧᐣ ᐃᓂᐁᐧᓂᐊᐧᐣ ᐁᑳ ᑳᐋᐧᐱᓂᐨ,

“ᒥᓀᐧᐣᑖᐣ,

ᐸᓯᑮᐧᐣ,

ᒋᓴᐢ ᑭᓇᐣᑐᒥᐠ.”

50 ᐸᓇᑫᐦᐃ ᐅᑮᐃᔑᐁᐧᐱᓈᐣ ᐅᒪᑰᐟ,

ᑮᐸᓯᑮᐧ ᐁᑮᓈᓯᐦᑲᐋᐧᐨ ᒋᓴᓲᐣ.

51 ᒋᓴᐢ ᐅᑮᑲᑫᐧᒋᒫᐣ,

“ᑫᑯᓀᐣ ᓇᐣᑕᐁᐧᓂᒥᔑᔭᐣ ᒋᑐᒋᑫᐦᑕᒪᐃᐧᓈᐣ ?”

“ᐅᑭᐦᑭᓅᐦᐊᒫᑫ,

ᓂᓇᐣᑕᐁᐧᐣᑖᐣ ᒋᐋᐧᐱᔮᐣ.”

52 ᒋᓴᐢ ᐅᑮᐦᐃᓈᐣ,

“ᒫᒑᐣ,

ᑭᑌᐯᐧᔦᐣᑕᒧᐃᐧᐣ ᑮᓇᐣᑕᐃᐧᐦᐃᑯᐣ.”

ᔐᒫᐠ ᑮᐋᐧᐱ ᒦᓇ ᐅᑮᐱᒥᓂᔕᐧᐦᐋᐧᐣ ᒋᓴᓲᐣ.