9
ᒋᓴᐢ ᐅᑮᐦᐃᓈᐣ,
“ᑌᐯᐧ ᑭᑎᓂᓈᐋᐧ,
ᓈᐣᑕ ᑮᓇᐋᐧ ᐅᐦᐅᒫ ᑳᓃᐸᐃᐧᔦᐠ ᑳᐃᐧᐣ ᑳᐋᐧᐸᐣᑖᓈᐋᐧ ᓂᐴᐃᐧᐣ,
ᐹᓂᒫ ᑮᐋᐧᐸᐣᑕᒣᐠ ᐃᐦᐃᐁᐧᓂ ᐅᑑᑭᒫᐃᐧᐃᐧᐣ ᑭᔐᒪᓂᑑ ᐱᑕᑯᔑᓅᒪᑲᓂᓂᐠ ᑭᑭᒪᓑᑲᐃᐧᓰᐃᐧᐣ.”
ᐅᑫᐧᐦᑭᓈᑯᓯᐃᐧᐣ ᒋᓴᐢ
2 ᑳᐃᓑᑳᐧ ᓂᑯᑕᐧᓱᑮᔑᑳᐠ ᒋᓴᐢ ᐅᑮᐃᐧᒋᐋᐧᐣ ᐲᑕᕒᐊᐧᐣ,
ᒉᒥᓲᐣ ᒦᓇ ᒐᐧᓇᐣ ᐁᑮᐃᔖᐋᐧᐨ ᑳᐃᔑ ᐱᑲᐧᐦᑎᓈᓂᐠ,
ᐃᐧᓀᐦᑕᐋᐧ ᐃᐦᐃᒫ ᑮᐦᐊᔮᐊᐧᐠ.
ᒋᓴᐢ ᑮᐦᐊᓂ ᑫᐧᐦᑭᓈᑯᓯ ᐸᐦᑳᐣ ᐁᑮ ᐃᔑᓈᑯᓯᐨ.
3 ᐅᑭᑭᓑᑭᑲᓇᐣ ᑮᐊᓂ ᐋᐧᓯᐦᑯᐋᐧᐹᓂᐊᐧᐣ,
ᑳᐃᐧᐣ ᐊᐃᐧᔭ ᐅᐦᐅᒫ ᐊᐦᑮᐣᐠ ᐅᑖᐊᐲᐦᒋ ᐋᐧᐱᐢᑳᐹᐊᐧᒋᑫᓰᐣ.
4 ᐃᐦᐃᒫ ᐅᑮ ᓈᑯᓯᐦᑖᑯᐋᐧᐣ ᐃᓬᐋᐃᒐᐊᐧᐣ ᒦᓇ ᒨᓯᓲᐣ ᐁᐦᐊᔭᒥᐦᐋᐋᐧᐨ ᒋᓴᓲᐣ.
5 ᐲᑕᕒ ᐅᑮᐦᐃᓈᐣ ᒋᓴᓲᐣ,
“ᐅᑭᐦᑭᓅᐦᐊᒫᑫ,
ᒥᓇᐧᔑᐣ ᐅᐦᐅᒫ ᑳᐊᔮᔮᐠ.
ᑲᐅᔑᐦᑑᒥᐣ ᓂᐦᓯᐣ ᒪᑎᑳᐧᓇᐣ,
ᐯᔑᐠ ᑮᐣ ᒋᐊᔮᔭᐣ,
ᐯᔑᐠ ᑫᐄᐧᐣ ᒨᓯᐢ ᒦᓇ ᑫᐃᐧᐣ ᐯᔑᐠ ᐃᓬᐋᐃᒐ.”
6 ᑳᐃᐧᐣ ᒋᐅᐣᒋ ᑭᐦᑫᐣᑕᐣᐠ ᐋᓃᐣ ᑫᐃᐦᑭᑐᐨ,
ᓈᐦᐱᐨ ᐁᑮ ᓭᑭᓯᐋᐧᐨ.
7 ᐁᑲᐧᐦᐱᐣ ᐊᐧᐦᑯ ᑮᓈᑲᐧᐣ ᒦᓇ ᐁᑮ ᐱᔮᑲᐃᐧᓑᑳᑰᐋᐧᐨ,
ᐊᐃᐧᔭ ᑮᒪᑌᐃᐦᑭᑐ ᐃᐦᐃᒫ ᐊᐧᐦᑮᐧᐦᑳᐣᐠ,
“ᐊᒥᐦᐋᐁᐧ ᓂᑯᓯᐢ ᑳᓵᑭᐦᐊᐠ.
ᓈᐣᑐᐦᑕᐃᐧᐠ.”
8 ᑫᑕᐦᑕ ᐁᐃᓈᐱᐋᐧᐨ ᑳᐃᐧᐣ ᐊᐦᐱᐣ ᐊᐃᐧᔭᐣ ᐅᑑᐣᒋ ᐋᐧᐸᒫᐋᐧᐣ ᒋᐃᐧᒌᐃᐧᑯᐋᐧᐨ,
ᒦᐁᐦᑕ ᐃᓂ ᒋᓴᓲᐣ.
9 ᒣᑳᐧᐨ ᐁᐦᐊᓂᓃᓵᒪᒋᐁᐧᐋᐧᐨ ᐱᐦᑲᐧᑎᓈᐣᐠ,
ᒋᓴᐢ ᐅᑮ ᐋᐣᑳᐧᒥᒫᐣ ᐁᑳ ᒋᐃᐧᐣᑕᒪᐋᐧᐋᐧᐨ ᐊᐃᐧᔭᐣ ᐃᐦᐃᐁᐧᓂ ᑳᑮᐃᓈᐱᔑᓄᐋᐧᐨ ᐹᓂᒫ ᐃᓂᓃᐤ ᐅᑯᓯᐦᓴᐣ ᑮᐊᐧᓂᓑᑳᐨ ᓂᐴᐃᐧᓂᐣᐠ.
10 ᐅᑮ ᑲᓇᐁᐧᐣᑖᓈᐋᐧ ᐅᐦᐅᐁᐧᓂ ᐃᑭᐦᑐᐃᐧᓂ,
ᑮᐊᔭᒥᐦᐃᑎᐊᐧᐠ ᑫᑯᓀᐣ ᐃᐦᐃᐁᐧᓂ ᒋᓴᐢ ᑳᐃᑕᐣᐠ,
“ᐊᐧᓂᓑᑳᐃᐧᐣ ᓃᐳᐃᐧᓂᐣᐠ.”
11 ᐅᑮ ᑲᑫᐧᒋᒫᐋᐧᐣ ᒋᓴᓲᐣ,
“ᑫᑯᓀᐣ ᐁᐧᐣᒋ ᐃᐦᑭᑐᐋᐧᐨ ᑳᑭᐦᑭᓅᐦᐊᒫᑫᐋᐧᐨ ᐅᓇᐦᔓᐁᐧᐃᐧᓂ,
ᐃᓬᐋᐃᒐ ᐱᓇᒫ ᓃᑳᐣ ᑕᐱᑕᑯᔑᐣ ?”
12 ᒋᓴᐢ ᐅᑮᓇᐦᑲᐁᐧᔑᐦᐋᐣ,
“ᐃᓬᐋᐃᒐ ᑌᐯᐧ ᓃᑳᐣ ᑕᐱᑕᑯᔑᐣ ᒦᓇ ᒋᐋᐧᐁᐧᓇᐦᑑᐨ ᑲᐦᑭᓇ ᑫᑰᓇᐣ.
ᑫᑯᓀᐣ ᐁᐧᐣᒋ ᐃᔑᐱᐦᐃᑳᑌᐠ ᐃᓂᓃᐤ ᐅᑯᓯᐦᓴᐣ ᒥᐢᑕᐦᐃ ᒋᑲᑲᐧᑕᑭᑑᐨ ᒦᓇ ᒋᐋᓇᐁᐧᓂᒫᑲᓅᐨ?
13 ᑭᐄᐧᐣᑕᒪᐃᐧᓂᓈᐋᐧ ᐃᓬᐋᐃᒐ ᐋᔕ ᑮᑕᑯᔑᐣ ᒦᓇ ᑫᑰᐣ ᐱᑯᐦ ᑳᔭᐃᓀᐣᑕᒧᐋᐧᐨ ᐅᑮᐦᑑᑕᐋᐧᐋᐧᐣ,
ᑖᐱᓑᑰᐨ ᑳᐃᔑ ᐱᐦᐃᑳᑌᓂᐠ ᐅᑖᓂᒧᒥᑰᐃᐧᐣ.”
ᒋᓴᐢ ᐅᓇᐣᑕᐃᐧᐦᐋᐣ ᓇᐯᓴᐣ ᑳᑭᑭᓑᑲᐋᐧᓂᐨ ᒪᒋᐊᒑᐦᑲᐧᐣ
14 ᐊᐦᐲ ᑳᐱᓈᓯᐦᑲᐋᐧᐋᐧᐨ ᑯᑕᑭᔭᐣ ᑭᐦᑭᓅᐦᐊᒪᐋᐧᑲᓇᐣ ᐅᑮᐋᐧᐸᒫᐋᐧᐣ ᒥᐦᔒᐣ ᐊᐃᐧᔭᐣ ᐁᐋᐧᑳᓑᑳᑯᐋᐧᐨ ᒦᓇ ᐃᑭᐁᐧᓂᐊᐧᐠ ᑳᑭᐦᑭᓅᐦᐊᒫᑫᐋᐧᐨ ᐅᓇᐦᔓᐁᐧᐃᐧᓂ ᐁᐊᔭᒥᐦᐃᑯᐋᐧᐨ.
15 ᐊᐦᐲ ᑲᐦᑭᓇ ᐊᐃᐧᔭᐠ ᑳᐋᐧᐸᒫᐋᐧᐨ ᒋᓴᓲᐣ,
ᓈᐦᐱᐨ ᑮᒫᒪᐦᑳᑌᐣᑕᒨᐠ ᑮᐸᐦᐃᑐᐊᐧᐠ ᐁᑮ ᐋᐧᒋᔦᒫᐋᐧᐨ.
16 ᒋᓴᐢ ᐅᑮᑲᑫᐧᒋᒫᐣ,
“ᑫᑯᓀᐣ ᐃᐦᐃᐁᐧ ᑳᐊᓂᒧᑕᒣᐠ?”
17 ᐃᐦᐃᒫ ᑳᐃᔑ ᒥᐦᔒᓄᓈᓂᐊᐧᐣᐠ ᐯᔑᐠ ᓈᐯᐊᐧᐣ ᐅᑮ ᓇᐦᑲᐁᐧᔑᐦᐃᑰᐣ,
“ᐅᑭᐦᑭᓅᐦᐊᒫᑫ,
ᑭᐲᑕᒪᐃᐧᐣ ᓂᑯᓯᐢ ᐁᐲᐣᒋᓑᑳᑯᐨ ᒪᒋᐊᐦᒑᐦᑲᐧᐣ ᐁᑳ ᐁᓂᐦᑖᐁᐧᐨ.
18 ᐊᐦᐲ ᐱᑯᐦ ᒪᒋᐊᐦᒑᐦᑲᐧᐣ ᑳᐅᑎᐦᑎᓂᑯᐨ,
ᐅᐸᐣᑭᔑᒥᑰᐣ ᒧᑕᐦᑲᒥᐠ,
ᐁᐲᐦᑌᐊᐧᓈᒨᐨ,
ᐁᒪᑌᐧᔮᐱᑌᓑᑳᐨ ᒦᓇ ᐁᐅᒋᐱᓂᑰᓑᑳᑯᐨ.
ᓂᑮᑲᑫᐧᒋᒫᐠ ᑭᑭᐦᑭᓅᐦᐊᒪᐋᐧᑲᓇᐠ ᒋᓵᑭᒋᐦᐋᐋᐧᐨ ᒪᒋᐊᐦᒑᐦᑲᐧᐣ ᑳᐃᐧᐣ ᒋᐅᐣᒋ ᑲᓑᑭᐦᑑᐋᐧᐨ.”
19 ᒋᓴᐢ ᐅᑮᓇᐦᑲᐁᐧᔑᐦᐋᐣ,
“ᑮᓇᐋᐧ ᐁᑳ ᑳᐅᑌᐯᐧᔦᐣᑕᒧᐃᐧᓂᔦᐠ,
ᐋᓃᐣ ᒥᓂᑯᐠ ᑫᐃᐧᒌᐃᐧᓇᑯᐠ ?
ᐋᓃᐣ ᒥᓂᑯᐠ ᑫᔖᔒᐯᓂᒥᓇᑯᐠ ?
ᐲᑕᒪᐃᐧᔑᔪᐠ ᐊᐦᐊᐁᐧ ᓈᐯᐢ.”
20 ᐁᑲᐧᑕᓑ ᐅᑮᐲᓈᐋᐧᐣ ᓈᐯᓴᐣ.
ᐊᐦᐲ ᒪᒋᐊᐦᒑᐠ ᑳᐋᐧᐸᒫᐨ ᒋᓴᓲᐣ,
ᔐᒫᐠ ᐅᑮ ᐅᒋᐱᓂᑯᓑᑳᐋᐧᐣ ᓈᐯᓴᐣ.
ᑮᐸᐣᑭᔑᐣ ᒧᐦᑕᑲᒥᐠ ᒦᓇ ᐁᑮ ᑎᐦᑎᐱᐸᓄᐦᐅᐨ ᑲᔦ ᐁᑮ ᐲᐦᑌᐊᐧᓈᒨᐨ.
21 ᒋᓴᐢ ᐅᑮᑲᑫᐧᒋᒫᐣ ᓈᐯᓭᓴᐣ ᐅᑖᑖᒥᓃᐣ,
“ᐋᓃᐣ ᒥᓂᑯᐠ ᐋᔕ ᐁᐅᐣᒋ ᐃᔑᐊᔮᐨ?”
“ᑳᐱᐊᐋᐧᔑᔒᐃᐧᐨ ᐱᑯᐦ,”
ᐅᑮᐦᐃᓈᐣ.
22 “ᐁᓑᑲᒼ ᑲᔦ ᐁᐃᔑᐁᐧᐱᓂᑯᐨ ᐃᓑᑯᑌᐦᑳᐣᐠ ᓈᐣᑕ ᓂᐲᐦᑳᐣᐠ ᐁᐃᐧᓂᐦᓯᑯᐨ.
ᑮᓑᐱᐣ ᑫᑮᑲᓑᑭᑐᐊᐧᓀᐣ ᑫᑰᐣ ᒋᑮᑑᑕᒪᐣ,
ᑭᑎᒫᑫᓂᒥᔑᓈᐣ ᒦᓇ ᐃᐧᒋᐦᐃᔑᓈᐣ.”
23 ᒋᓴᐢ ᑮᐃᐦᑭᑐ,
“ᑮᓑᐱᐣ ᓇ ᑮᑑᑕᒫᐣ ?
ᑲᐦᑭᓇ ᑫᑰᐣ ᑕᑮᐃᔑᓈᑲᐧᐣ ᐊᐦᐊᐁᐧ ᑳᑌᐯᐧᐦᑕᐣᐠ.”
24 ᔐᒫᐠ ᐊᐦᐊᐁᐧ ᓈᐯᐢ ᐅᑖᑖᒪᐣ ᑮᐦᐃᑭᑐ,
“ᓂᑌᐯᐧᔦᐣᑖᐣ,
ᐃᐧᒌᐦᐃᔑᐣ ᐁᑳ ᒋᐅᑖᓀᐧᐦᑕᒧᐃᐧᓂᔮᐣ.”
25 ᐊᐦᐲ ᒋᓴᐢ ᑳᐋᐧᐸᑕᐣᐠ ᒥᐦᔒᐣ ᐊᐃᐧᔭᐣ ᐁᐲᐦᒋᐸᐦᐃᑎᓂᐣᐨ,
ᐅᑮᑭᐦᒋᑲᓅᓈᐣ ᐃᓂ ᒪᒋᐊᐦᒑᐦᑲᐧᐣ.
“ᑮᐣ ᐁᑳ ᑳᐅᐣᓯᑌᔭᐣ ᒦᓇ ᐁᑳ ᑳᓂᐦᑖᐁᐧᔭᐣ ᐊᐦᒑᐠ,
ᑭᑎᓇᔓᐋᐧᓂᐣ ᒋᐱᓵᑲᐦᐊᒪᐣ ᒦᓇ ᐁᑳ ᐄᐧᐦᑳ ᒦᓇ ᒋᑮᐁᐧᐱᐣᑎᑫᔭᐣ.”
26 ᑮᔖᑯᐁᐧ ᒪᒋᐊᐦᒑᐠ,
ᐁᑮ ᐅᒋᐱᓂᑯᓑᑳᐨ ᐁᑲᐧ ᑮᐱᓵᑲᐦᐊᒼ.
ᑖᐱᓑᑰᐨ ᐁᑳ ᑳᐱᒫᑎᓯᐨ ᑮᐃᔑᓈᑯᓯ ᐊᐦᐊᐁᐧ ᓈᐯᐢ.
ᒥᐦᔒᐣ ᑮᐃᐦᑐᐊᐧᐠ ᐁᑳ ᐁᐱᒫᑎᓯᐨ.
27 ᒋᓴᐢ ᐅᑮᓴᑭᓂᑫᓈᐣ ᐁᑮ ᐸᓯᑮᐧᐦᐋᐨ.
ᑮᓃᐸᐧᐃᐧ ᐊᐦᐊᐁᐧ ᓈᐯᓭᐢ.
28 ᐊᐦᐲ ᒋᓴᐢ ᑳᐲᐣᑎᑫᐨ ᐋᐧᑳᐦᐃᑳᓂᐣᐠ,
ᑮᒨᐨ ᐅᑮ ᑲᑫᐧᒋᒥᑰᐣ ᐅᑭᐦᑭᓅᐦᐊᒪᐋᐧᑲᓇᐣ,
“ᑫᑯᓀᐣ ᓃᓇᐃᐧᐣᐟ ᐁᑳ ᐁᐅᐣᒋ ᑲᓑᑭᑐᔮᐣᐠ ᒋᓵᑭᒋᐦᐋᔮᐣᐠ ?”
29 ᒋᓴᐢ ᐅᑮᓇᐦᑲᐁᐧᔑᐦᐋᐣ,
“ᐅᐦᐅᐁᐧ ᑑᐦᑳᐣ ᑫᑰᐣ ᒋᑮᐅᐣᒋ ᓵᑲᐦᐊᐠ ᐊᔭᒥᐦᐋᐃᐧᓂᐣᐠ ᐁᐦᑖ.”
ᒋᓴᐢ ᒦᓇᐋᐧ ᐁᐋᓂᒧᑕᐣᐠ ᐅᓂᐳᐃᐧᐣ
30 ᑮᐊᓅᐣᒋᒫᒑᐊᐧᐠ ᐃᐦᐃᒫ ᑖᐃᐧᓂᐣᐠ ᒦᓇ ᑮᐊᓂᔖᐳᓑᑳᐊᐧᐠ ᑳᓬᐃᓬᐄ ᐊᐦᑮᐣᐠ.
ᑳᐃᐧᐣ ᒋᐅᐣᒋ ᓇᑕᐁᐧᐣᑕᐣᐠ ᒋᓴᐢ ᐊᐃᐧᔭᐣ ᒋᑭᐦᑫᐣᑕᒥᓂᐨ ᐋᐣᑎ ᐁᔮᐋᐧᐨ,
31 ᐁᑮ ᑭᐦᑭᓄᐦᐊᒪᐋᐧᐨ ᐅᑭᐦᑭᓅᐦᐊᒪᐋᐧᑲᓇᐣ.
ᒋᓴᐢ ᐅᑮᐦᐃᓈᐣ,
“ᐃᓂᓃᐤ ᐅᑯᓯᐦᓴᐣ ᑕᐸᑭᑎᓈᑲᓅ ᐃᐦᐃᒫ ᐅᓃᐣᒌᐋᐧ ᐊᐃᐧᔭᐠ.
ᐅᑲᓂᐦᓵᐋᐧᐣ ᐁᑲᐧ ᒦᓇ ᑮᐃᓑᑳᐧ ᓂᐦᓱᑮᔑᑳᓂᐠ ᑕᐊᐧᓂᐢᑳ.”
32 ᔖᑰᐨ ᑳᐃᐧᐣ ᒋᐅᐣᒋ ᓂᓯᑐᐦᑕᒧᐋᐧᐨ ᑫᑯᓀᓂ ᐋᓂᒨᑕᒥᓂᐣᐨ ᒦᓇ ᑮᔖᑫᐧᓂᒧᐊᐧᐠ ᒋᑲᑫᐧᒋᒫᐋᐧᐨ.
ᐊᐊᐧᓀᐣ ᒫᐋᐧᐨ ᐁᑭᐦᒌᓀᐣᑖᑯᓯᐨ
33 ᑮᐱᑕᑯᐦᔑᓅᐠ ᐃᐦᐃᒫ ᑲᐸᕒᓂᐊᒼ ᑖᐃᐧᓂᐣᐠ.
ᒣᑳᐧᐨ ᐃᐦᐃᒫ ᒋᓴᐢ ᐁᐦᐊᔮᐨ ᐋᐧᑲᐦᐃᑲᓂᐣᐠ ᐅᑮᑲᑫᐧᒋᒫᐣ ᐅᑭᐦᑭᓅᐦᐊᒪᐋᐧᑲᓇᐣ,
“ᑫᑯᓀᐣ ᐁᐧᐣᒋ ᐊᔭᒥᐦᐃᑎᔦᐠ ᒣᑳᐧᐨ ᑳᐱᒥᐊᔮᔭᐣᐠ ᒦᐦᑲᓈᐣᐠ ?”
34 ᑳᐃᐧᐣ ᑫᑰᐣ ᒋᐅᐣᒌᑭᑐᐋᐧᐨ ᐊᓃᓑ ᐃᐦᐃᐁᐧ ᒣᑳᐧᐨ ᑳᐱᒥᐊᔮᐋᐧᐨ ᑳᑮᐅᐣᒋ ᐊᔭᒥᐦᐃᑎᐋᐧᐨ ᐊᐊᐧᓀᐣ ᒫᐋᐧᐨ ᐁᑭᐦᒌᓀᐣᑖᑯᓯᐨ.
35 ᒋᓴᐢ ᐁᑮᐦᐊᐱᐨ ᐅᑮᓇᐣᑐᒫᐣ ᑳᒥᐦᑖᓲᓃᔓᔖᐱᓂᐨ ᐅᑭᐦᑭᓅᐦᐊᒪᐋᐧᑲᓇᐣ ᐁᑮᐃᐦᑭᑐᐨ,
“ᐊᐃᐧᔭ ᐃᐧᓃᑳᓀᐣᑖᑯᐦᐃᑎᓱᐨ,
ᐅᑖᓈᐣᐠ ᑕᐊᔮ ᒦᓇ ᐅᑲᐊᓄᐦᑮᑕᐋᐧᐣ ᑲᐦᑭᓇ ᐊᐃᐧᔭᐣ.”
36 ᒋᓴᐢ ᐅᑮᐅᑖᐦᐱᓈᐣ ᐊᐋᐧᔑᔕᐣ ᒦᓇ ᐁᑮᓃᐸᐃᐧᓂᐨ ᒣᑫᐧᐦᐃ.
ᐅᑮᓴᑭᓂᑫᓈᐣ ᐁᑮᐦᐃᓈᐨ,
37 “ᐊᐊᐧᓀᐣ ᑫᐅᑖᐦᐱᓈᑫᐧᐣ ᐯᔑᐠ ᐅᓄ ᐊᐋᐧᔑᔕᐣ ᐃᐦᐃᒫ ᓂᑎᓯᓂᐦᑳᓱᐃᐧᓂᐣᐠ ᓃᐣ ᑳᐅᑖᐦᐱᓂᔑᐨ,
ᒦᓇ ᐊᐊᐧᓀᐣ ᑳᐅᑖᐦᐱᓂᔑᐨ ᑳᐃᐧᓃᐣ ᓃᐣ ᐁᐦᑕ ᑳᐅᑖᐦᐱᓂᔑᐨ,
ᐃᓂᐁᐧᓂᐊᐧᐣ ᑳᐅᑖᐦᐱᓈᐨ ᑳᑮᐲᒋᓂᔕᐦᐅᔑᓂᐨ.”
ᐊᐃᐧᔭ ᐁᑳ ᑳᓇᑳᓑᑳᑯᔭᐣᐠ ᑭᐃᐧᒋᐃᐧᑯᓈᐣ
38 “ᐅᑭᐦᑭᓅᐦᐊᒫᑫ” ᒐᐧᐣ ᑮᐃᐦᑭᑐ,
“ᓂᑮᐋᐧᐸᒫᒥᐣ ᓈᐯ ᐁᓵᑭᒋᐦᐋᐨ ᒪᒋᐊᐦᒑᐦᑲᐧᐣ ᑭᑎᓯᓂᐦᑳᓱᐃᐧᓂᐣᐠ,
ᐁᑲᐧ ᓂᑮᐃᐧᐣᑕᒪᐋᐧᒥᐣ ᐁᑳ ᐅᐦᐅᐁᐧ ᒋᑑᑕᐣᐠ ᐊᓂᓑ ᐁᑳ ᐁᐃᐧᒋᐃᐧᑯᔭᐣᐠ.”
39 ᒋᓴᐢ ᑮᐃᐦᑭᑐ,
“ᑳᐃᐧᐣ ᑭᐱᐦᑎᓂᐠ.
ᑳᐃᐧᐣ ᐊᐃᐧᔭ ᐅᑲᓑᑭᑑᐦᓰᐣ ᒋᑑᑕᐣᐠ ᒪᒫᑖᐃᐧᔑᐦᒋᑫᐃᐧᐣ ᐃᐦᐃᒫ ᓂᑎᓯᓂᑳᓱᐃᐧᓂᐣᐠ,
ᐊᐦᐱᐣ ᒋᐃᔑᒪᒋᐋᓂᒨᒥᔑᐨ.
40 ᐱᑯᐦ ᐊᐃᐧᔭ ᐁᑳ ᑳᓇᑳᓑᑳᑯᔭᐣᐠ ᑮᐃᐧᒋᐃᐧᑯᓈᐣ.
41 ᑌᐯᐧ ᑭᑎᓂᓈᐋᐧ,
ᐊᐊᐧᓀᐣ ᑫᒦᓂᑯᔦᐠ ᐯᔑᑯ ᒥᓂᐦᑲᐧᑲᐧᐣ ᓂᐲᓂ ᐃᐦᐃᒫ ᓂᑎᓯᓂᐦᑳᓱᐃᐧᓂᐣᐠ ᙭ ᑭᑎᐯᓂᒥᐠ,
ᑳᐃᐧᐣ ᐅᑲᐊᐧᓂᐦᑑᓰᐣ ᐅᑎᐸᐦᐊᒫᑰᐃᐧᐣ.
ᒪᒋᑑᑕᒧᐃᐧᐣ ᐁᑕᔑᐣᑕᐣᐠ ᒋᓴᐢ
42 “ᑮᓑᐱᐣ ᐊᐃᐧᔭ ᑫᒪᒋᑑᑕᒧᐦᐋᑫᐧᐣ ᐯᔑᐠ ᐅᓄ ᑳᔮᑲᔐᔑᓂᐨ ᐊᐋᐧᔑᔕᐣ,
ᑳᑌᐯᐧᔦᓂᒥᔑᓂᐨ,
ᑫᐅᐣᒋ ᐱᓯᑫᐧᐦᔑᓂᓂᐨ,
ᓇᐊᐧᐨ ᑕᒥᓇᐧᔑᓂ ᐊᐦᓯᓃᐣ ᒋᑕᐦᑯᐱᓂᒥᐨ ᐅᑲᐧᔭᐊᐧᐣᐠ ᒋᐸᐦᑯᐱᐁᐧᐱᓈᑲᓅᐨ ᑭᐦᒋᑲᒦᐣᐠ.
43 ᑮᓑᐱᐣ ᐊᐧᓂᑑᑕᒨᐦᐃᑯᔭᐣ ᑭᓂᐣᐨ ᑮᓑᑭᔕᐣ.
ᓈᐊᐧᐨ ᑕᒥᓇᐧᔑᐣ ᒋᐲᐣᑎᑫᔭᐣ ᐱᒫᑎᓯᐃᐧᓂᐣᐠ ᓇᐸᓀᓂᒌᔭᐣ,
ᐊᐲᐨ ᓃᔑᐣᑭᐣ ᑭᓂᒌᐣ ᒋᐃᔖᔭᐣ ᐃᐦᐃᒫ ᒪᒌᓑᑯᑌᐣᐠ ᐁᑳᐃᐧᐦᑳ ᑳᔮᐦᑕᐁᐧᐠ.
45 ᑮᓑᐱᐣ ᐊᐧᓂᑑᑕᒨᐦᐃᑯᔭᐣ ᑭᓯᐟ ᑮᓑᑭᔕᐣ.
ᓇᐊᐧᐨ ᑕᒥᓇᐧᔑᐣ ᒋᐲᐣᑎᑫᔭᐣ ᐱᒫᑎᓯᐃᐧᓂᐣᐠ ᒋᒫᑭᓯᔭᐣ,
ᐊᐲᐨ ᓃᔑᐣᑭᐣ ᑭᓯᑕᐣ ᒋᐃᔑᐁᐧᐱᓂᑯᔭᐣ ᒪᒌᓑᑯᑌᐣᐠ.
47 ᑮᓑᐱᐣ ᑭᓑᑮᔑᐠ ᐊᐧᓂᑑᑕᒨᐦᐃᑯᔭᐣ ᐅᑖᐦᐱᓇᐣ.
ᓇᐊᐧᐨ ᑕᒥᓇᐧᔑᐣ ᒋᐲᐣᑎᑫᔭᐣ ᑭᔐᒪᓂᑑ ᐅᑑᑭᒫᐃᐧᐃᐧᓂᐣᐠ ᒋᓇᐸᓀᔮᐱᔭᐣ,
ᐊᐲᐨ ᓃᔑᐣᑭᐣ ᑭᓑᑮᔑᑰᐣ ᒦᓇ ᒋᐃᔑᐁᐧᐱᓂᑯᔭᐣ ᒪᒌᓑᑯᑌᐣᐠ,
48 ᐃᐦᐃᒫ,
‘ᐅᒪᓂᒎᔑᒧᐋᐧ ᐁᑳ ᐄᐧᐦᑳ ᑳᓂᐴᓂᐨ,
ᒦᓇ ᐃᐦᐃᐁᐧ ᐃᓑᑯᑌ ᑳᐃᐧᐣ ᐄᐧᐦᑳ ᑳᔮᐦᑕᐁᐧᐠ.’
49 ᑲᐦᑭᓇ ᐊᐃᐧᔭᐠ ᑕᑲᓈᑕᐣᑭᒋᑳᓱ ᐃᓑᑯᑌᓂ ᐅᐣᒋ.
50 “ᒥᓇᐧᔑᐣ ᐃᐦᐃᐁᐧ ᔑᐃᐧᑖᑲᐣ,
ᔖᑯᐨ ᐊᐦᐱᐣ ᐁᑳ ᐁᔒᐋᐧᐠ,
ᐋᓃᐣ ᑫᑑᑕᒪᐣ ᒦᓇᐋᐧ ᒋᑮᑮᐁᐧᔑᐃᐧᑖᑲᓂᐊᐧᐣᐠ ?
ᑭᑭᓑᑲᒧᐠ ᔑᐃᐧᑖᑲᐣ ᑭᐱᒫᑎᓯᐃᐧᓂᐋᐧ ᒦᓇ ᐯᔭᐦᑕᑫᓂᒧᐃᐧᓂᐣᐠ ᒥᓄᐃᐧᒋᐃᐧᑎᔪᐠ.”