4 ᐅᑭᐦᑭᓅᐦᐊᒪᐋᐧᑲᓇᐣ ᐅᑮᓇᐦᑲᐁᐧᔑᐦᐃᑰᐣ,

“ᐋᐣᑎ ᑫᑮᐅᐣᑎᓇᒫᐣᐠ ᒦᒋᒼ ᒋᑮᑌᐱᓭᐠ ᒋᐊᔕᒫᑲᓄᐋᐧᐨ ᐊᐃᐧᔭᐠ ᐅᐦᐅᒫ ᐱᑲᐧᑕᐦᑮᐣᐠ ᐁᐦᐊᔮᔭᐣᐠ ?”

5 ᒋᓴᐢ ᐅᑮᑲᑫᐧᒋᒫᐣ,

“ᐋᐣᑕᓯᐣ ᐋᓇᐦᑯᓈᐠ ᐊᔮᐊᐧᔦᐠ ?”

“ᓃᓴᐧᐦᓱ,”

ᑮᐃᐦᑭᑐᐊᐧᐠ.

6 ᒋᓴᐢ ᐅᑮᐦᐃᓈᐣ ᑳᒥᐦᔒᓄᓂᐨ ᐊᓂᔑᓂᓂᐊᐧᐣ ᒋᐊᐱᓂᐨ ᒧᐦᑕᑲᒥᐠ.

ᐅᑮᐅᑖᐦᐱᓈᐣ ᐃᓂ ᓃᓴᐧᐦᓱ ᐋᓇᐦᑯᓈᐣ,

ᑮᓇᓈᐦᑯᒧ,

ᐅᑮᐹᐦᐸᐦᑫᐧᐱᓈᐣ ᐅᑮᒥᓈᐣ ᐅᑭᐦᑭᓅᐦᐊᒪᐋᐧᑲᓇᐣ ᒋᐊᑭᓀᒥᓈᓂᐨ ᐊᐃᐧᔭᐣ.

ᒦᐁᐧ ᑳᑑᑕᒧᐋᐧᐨ ᑭᐦᑭᓅᐦᐊᒪᐋᐧᑲᓇᐠ.

7 ᐸᐣᑮ ᑲᔦ ᐅᑮᐦᐊᔮᐋᐧᐋᐧᐣ ᑭᓅᔐᓴᐣ ᑮᓇᓈᐦᑯᒧ,

ᐅᑮᐦᐃᓈᐣ ᐅᑭᐦᑭᓅᐦᐊᒪᐋᐧᑲᓇᐣ ᒋᐊᑭᓀᒦᓈᐋᐧᐨ.

8 ᑲᐦᑭᓇ ᐊᐃᐧᔭᐠ ᑮᐄᐧᐦᓯᓂᐊᐧᐠ ᒦᓇ ᑮᑌᐱᐄᐧᐦᓯᓄᐊᐧᐠ.

ᑭᐦᑭᓅᐦᐊᒪᐋᐧᑲᓇᐠ ᐅᑮ ᒧᔕᑭᓈᓈᐋᐧ ᑳᐃᓑᑯᓭᓂᑭᐣ ᓂᓴᐧᐦᓱ ᐄᐧᑯᐲᐃᐧᓈᑲᓇᐣ ᑮᔖᑲᓑᑭᓀᐊᐧᐣ.

9 ᓈᐣᑕ ᓃᐋᐧ ᑭᐦᒋᒥᑖᐦᓱᒥᑕᓇ ᑮᑕᔑᐊᐧᐠ ᐃᐦᐃᒫ ᑳᑮᐦᐊᔮᐋᐧᐨ ᐊᐃᐧᔭᐠ.

ᐁᑲᐧᐦᐱᐣ ᐅᑮᐦᑮᐁᐧᓂᔕᐦᐊᐧᐣ ᒋᑮᐁᐧᓂᐨ,

10 ᑮᐴᓯ ᒌᒫᓂᐣᐠ ᐊᐦᔑᐨ ᑲᔦ ᐅᑭᐦᑭᓅᐦᐊᒪᐋᐧᑲᓇᐣ ᐁᑮᐃᔖᐋᐧᐨ ᑕᓬᒪᓅᐦᑕ ᐊᐦᑮᐣᐠ.

11 ᐯᕒᐊᓰᐃᐧᓂᓂᐊᐧᐠ ᑮᐱᑕᑯᐦᔑᓅᐠ ᒦᓇ ᐅᑮᒫᒌᑲᑫᐧᒋᒫᐋᐧᐣ ᒋᓴᓲᐣ.

ᐁᐃᐧᑲᑫᐧᒋᐦᐋᐋᐧᐨ,

ᐅᑮᓇᐣᑕᐁᐧᐣᑖᓈᐋᐧ ᒪᒫᐣᑖᐃᐧ ᐃᔑᐦᒋᑫᐃᐧᐣ ᑭᐦᒋᑮᔑᑰᐣᐠ ᑳᐅᐣᒋᓭᓂᐠ.

12 ᒋᓴᐢ ᑮᑭᐦᒋᐸᑭᑕᓈᒧ ᒦᓇ ᐁᑮᐦᐃᑭᑐᐨ,

“ᐋᐣᑕᔒᓂᐦᐃ ᐅᑯᐁᐧᓂᐊᐧᐠ ᒣᑳᐧᐨ ᑳᐱᒫᑎᓯᐋᐧᐨ ᐁᐧᐣᒋᓇᑕᐁᐧᐣᑕᒧᐋᐧᐨ ᒪᒫᐣᑖᐃᐧ ᐃᔑᐦᒋᑫᐃᐧᐣ ?

ᑌᐯᐧ ᑭᑎᓂᓈᐋᐧ ᑳᐃᐧᐣ ᑫᑰᐣ ᑕᒦᓈᓰᐊᐧᐠ ᒪᒫᐣᑖᐃᐧ ᐃᔑᐦᒋᑫᐃᐧᐣ.”

13 ᐁᑲᐧᐦᐱᐣ ᒋᓴᐢ ᐅᑮᓇᑲᓈᐣ.

ᑮᑮᐁᐧ ᐴᓯ ᒌᒫᓂᐣᐠ,

ᐁᑮ ᐊᔔᑳᒣᐦᐊᐣᐠ ᑫᐧᐦᑲᑳᒼ ᐁᑮᐦᐃᔖᐨ.

14 ᑭᐦᑭᓅᐦᐊᒪᐋᐧᑲᓇᐠ ᑮᐊᐧᓃᐦᑫᐊᐧᐠ ᒋᓃᒫᐋᐧᐨ ᐋᓇᐦᑯᓈᐣ,

ᒦᐁᐦᑕ ᐯᔑᐠ ᐋᓇᐦᑯᓈᐣ ᐁᑮ ᐊᔮᐋᐧᐋᐧᐨ ᒌᒫᓂᐣᐠ.

15 ᒋᓴᐢ ᐅᑮᐊᔮᐣᑳᐧᒥᒫᐣ ᐅᑭᐦᑭᓅᐦᐊᒪᐋᐧᑲᓇᐣ,

“ᐊᔮᐣᑳᐧᒥᓯᑕᒨᐠ ᐅᑑᒼᐱᓯᒋᑲᓂᐋᐧ ᐯᕒᐊᓰᐃᐧᓂᓂᐊᐧᐠ ᒦᓇ ᐦᐁᕒᐅᐟ.”

16 ᑭᐋᓂᒧᑕᒫᑎᐊᐧᐠ ᐅᐦᐅᐁᐧᓂ ᒦᓇ ᐁᑮᐦᐃᑐᐋᐧᐨ,

“ᐅᐦᐅᐁᐧᓇ ᑳᐅᐣᒌᑭᑐᐨ ᐁᑳ ᑳᐅᑖᓇᐦᑯᓈᒥᔭᐣᐠ.”

17 ᒋᓴᐢ ᐅᑮᑭᐦᑫᐣᑖᐣ ᐁᔮᓂᒨᑕᒫᑎᓂᐣᐨ ᐅᑮᑲᑫᐧᒋᒫᐣ,

“ᑫᑯᓀᐣ ᐁᐧᐣᒋ ᐋᓂᒧᑕᒫᑎᔦᐠ ᐁᑳ ᐁᐦᐊᔮᐋᐧᔦᐠ ᐋᓇᐦᑯᓈ?

ᑳᐃᐧᓇ ᒪᐦᔑ ᒋᑮᓂᓯᑕᐁᐧᐣᑕᒣᐠ ᑲᔦ ᑳᐃᐧᓇ ᒪᐦᔑ ᒋᑮᓂᓯᑐᐦᑕᒣᐠ ?

ᑭᒪᓑᑲᐃᐧᑌᐦᐁᓈᐋᐧ ᓇ ?

18 ᐁᐅᓑᑮᔑᑯᔦᐠ ᑳᐃᐧᐣ ᑭᐋᐧᐱᓰᓈᐋᐧ ᒦᓇ ᐁᐅᑕᐊᐧᑳᔦᐠ ᑳᐃᐧᐣ ᒋᓅᐣᑕᒣᐠ.

ᑳᐃᐧᓇ ᒋᑲᓅᐦᑫᔦᐠ ?

19 ᐊᐦᐲ ᑳᑮᐸᐦᑫᐧᓇᑳᐧ ᓂᔮᓇᐣ ᐋᓇᐦᑯᓈᐠ ᐁᐃᐧᐊᔕᒫᐨ ᓃᔮᓇᐧ ᑭᐦᒋᒥᑖᐦᓱᒥᑕᓇ ᐊᐃᐧᔭᐣ,

ᐋᐣᑕᓯᐣ ᐄᐧᑯᐲᐃᐧᓈᑲᓇᐣ ᑳᔖᑲᓑᑭᓀᑭᐣ ᑳᑮᒫᐊᐧᐣᑑᓇᒣᑭᐣ ?”

“ᓃᔓᔖᑊ,”

ᑮᐃᐦᑭᑐᐊᐧᐠ.

20 “ᐊᐦᐲ ᑳᑮᐸᐦᑫᐧᓇᑳᐧ ᓂᓴᐧᐦᓱ ᐋᓇᐦᑯᓈᐠ ᐁᐃᐧᐊᔕᒫᐨ ᓃᐋᐧ ᑭᐦᒋᒥᑖᓱᒥᑕᓇ ᐊᐃᐧᔭᐠ,

ᐋᐣᑕᓰᐣ ᐄᐧᑯᐲᐃᐧᓈᑲᓇᐣ ᑳᔖᑲᓑᑭᓀᑭᐣ ᑳᑮᒨᔕᑭᓇᒣᐠ ᑳᑮᐃᓑᑯᓭᑭᐣ ?”

“ᓃᓴᐧᓱ,”

ᑮᐃᐦᑭᑐᐊᐧᐠ.

21 “ᑳᐃᐧᓇ ᒪᐦᔑ ᒋᓂᓯᑐᐦᑕᒣᐠ ?”

22 ᑮᐱᑕᑯᐦᔑᓅᐠ ᐃᐦᐃᒫ ᐯᐟᓭᑕ ᑖᐃᐧᓂᐣᐠ,

ᓈᐣᑕ ᐊᐃᐧᔭᐠ ᐅᑮᐲᓈᐋᐧᐣ ᓈᐯᐊᐧᐣ ᐁᑳ ᐁᐋᐧᐱᓂᐨ ᒦᓇ ᐁᑮᐸᑯᐦᓭᓂᒫᐋᐧᐨ ᒋᓴᓲᐣ ᒋᓵᒥᓈᓂᐣᐨ.

23 ᐅᑮᓴᑭᓂᑫᓈᐣ ᐁᑳ ᑳᐋᐧᐱᓂᐣᐨ ᓈᐯᐊᐧᐣ ᐁᑮᐃᔓᐃᐧᓈᐨ ᐊᑲᐧᒌᐣᐠ ᑖᐃᐧᓂᐣᐠ.

ᐊᐦᐲ ᑳᓯᑳᐧᑕᐣᐠ ᓈᐯᐧᐋᐧᐣ ᐅᓑᑮᔑᑯᓃᐣ ᒦᓇ ᐁᑮᓵᒥᓈᐨ,

ᒋᓴᐢ ᐅᑮᑲᑫᐧᒋᒫᐣ,

“ᑭᐋᐧᐸᐣᑖᐣ ᓇ ᑫᑰᐣ ?”

24 ᓈᐯ ᑮᐊᐧᓂᓑᑳᐦᑫᐧᓂ ᒦᓇ ᐁᐃᐦᑭᑐᐨ,

“ᓂᐋᐧᐸᒫᐠ ᐊᐃᐧᔭᐠ ᑖᐱᓑᑰᐨ ᐱᑯᐦ ᔑᑰᐲᐠ ᑳᐸᐹᒧᓭᐋᐧᐨ ᐁᐃᔑᓈᑯᓯᐋᐧᐨ.”

25 ᒦᓇᐋᐧ ᒋᓴᐢ ᐅᑮᓵᒥᓈᐣ ᓈᐯᐧᐊᐧᐣ ᐅᓑᑮᔑᑯᓃᐣ.

ᐁᑲᐧᐦᐱᐣ ᔐᒫᐠ ᑮᐋᐧᐱ ᒦᓇ ᑲᐦᑭᓇ ᑫᑯᓈᐣ ᐁᑮ ᐸᔭᐦᑌᔮᐸᐣᑕᑭᐣ.

26 ᒋᓴᐢ ᐅᑮᑮᐁᐧᓂᔕᐦᐋᐧᐣ ᒋᑮᐁᐧᓂᐣᐨ ᐁᑮᐦᐃᓈᐨ,

“ᑳᐃᐧᐣ ᐲᐣᑎᑫᐣ ᑖᐃᐧᓂᐣᐠ.”

27 ᒋᓴᐢ ᒦᓇ ᐅᑭᐦᑭᓅᐦᐊᒪᐋᐧᑲᓇᐣ ᑮᐊᓃᔖᐊᐧᐠ ᐃᐦᐃᒫ ᑖᐃᐧᓀᓴᐣ ᑳᐃᔑᐊᔮᑭᐣ ᒌᑭᐨ ᐃᐦᐃᒫ ᓯᓴᕒᐃᔭ ᐱᓬᐃᐸᐧᐃ ᑖᐃᐧᓂᐣᐠ.

ᒣᑳᐧᐨ ᐁᐊᓂᐱᒥᐊᔮᐋᐧᐨ ᒋᓴᐢ ᐅᑮᑲᑫᐧᒋᒫᐣ,

“ᐋᓃᐣ ᐁᑭᐦᑐᐋᐧᐨ ᐊᐃᐧᔭᐠ ᐁᐦᐋᐃᐧᔮᐣ ?”

28 ᐅᑮᓇᐦᑲᐧᐁᐧᔑᐦᐋᐋᐧᐣ,

“ᓈᐣᑕ ᐃᑭᐦᑐᐊᐧᐠ ᒐᐧᐣ ᐅᓰᐣᑲᐦᐊᐣᑖᑫ,

ᓈᐣᑕ ᐃᑭᐦᑐᐊᐧᐠ ᐃᓬᐋᐃᒐ ᒦᓇ ᑯᑕᑭᔭᐠ ᑮᐦᐃᑭᑐᐊᐧᐠ,

ᐯᔑᐠ ᐅᑭᐦᑭᐁᐧᐦᐃᑫ.”

29 ᒋᓴᐢ ᐅᑮᑲᑫᐧᒋᒫᐣ,

“ᐋᓃᐣ ᑮᓇᐋᐧ ᐁᑭᑐᔦᐠ ᐊᐊᐧᓀᐣ ᐁᐦᐋᐃᐧᔮᐣ ?”

ᐲᑕᕒ ᐅᑮ ᓇᐦᑲᐁᐧᔑᐦᐋᐣ,

“ᑮᐣ ᔕ ᙭.”

30 ᒋᓴᐢ ᐅᑮᐊᔮᐣᑳᐧᒥᒫᐣ ᐅᑭᐦᑭᓅᐦᐊᒪᐋᐧᑲᓇᐣ ᐁᑳ ᐊᐃᐧᔭᐣ ᒋᐸᐹᒫᒋᒥᑯᐨ.

31 ᐁᑲᐧᐦᐱᐣ ᐅᑮ ᐊᓂᒫᒌᑭᐦᑭᓄᐦᐊᒪᐋᐧᐣ ᐅᑭᐦᑭᓅᐦᐊᒪᐋᐧᑲᓇᐣ ᐊᐦᐊᐁᐧ ᐃᓂᓃᐤ ᐅᑯᓯᐦᓴᐣ ᒥᐢᑕᐦᐃ ᒋᑲᑲᐧᑕᑭᑑᐨ ᒦᓇ ᒋᐋᓇᐁᐧᓂᒥᑯᐨ ᑳᓃᑳᓀᐣᑖᑯᓯᓂᐨ,

ᑭᐦᒋᐊᔭᒥᐦᐁᐃᐧᑭᒫᐣ ᒦᓇ ᑳᑭᐦᑭᓅᐦᐊᒫᑫᐋᐧᐨ ᐅᓇᐦᔓᐁᐧᐃᐧᓂ,

ᒋᓂᓵᑲᓅᐨ ᐁᑲᐧ ᑮᐃᓑᑳᐧ ᓂᐦᓱᑮᔑᑳᓂᐠ ᒦᓇ ᒋᐊᐧᓂᓑᑳᐨ.

32 ᒋᓴᐢ ᐯᔭᐦᑕᐠ ᐅᑮᐋᐧᐃᐧᐣᑕᒪᐋᐧᐣ ᐅᐦᐅᐁᐧᓂ,

ᐲᑕᕒ ᐅᐱᒣᐦᐃ ᐅᑮᐃᔑᐃᐧᓈᐣ ᒋᓴᓲᐣ ᐁᑮ ᑭᐦᒋᑲᓅᓈᐨ.

33 ᐊᐦᐲ ᒋᓴᐢ ᐁᑫᐧᐦᑭᑳᐸᐃᐧᐨ ᐅᑮ ᑲᓇᐋᐧᐸᒫᐣ ᐅᑭᐦᑭᓅᐦᐊᒪᐋᐧᑲᓇᐣ,

ᐁᑮ ᑭᐦᒋᑲᓅᓈᐨ ᐲᑕᕒᐊᐧᐣ.

“ᓃᑲᑌᓑᑳᐣ ᒪᒋᒪᓂᑑ,”

ᑮᐦᐃᑭᑐ.

“ᑳᐃᐧᐣ ᑭᒫᒥᑐᓀᐣᑕᓰᐣ ᐃᐦᐃᐁᐧᓂ ᑭᔐᒪᓂᑑ ᑳᐃᔑ ᓇᐣᑕᐁᐧᐣᑕᐣᐠ,

ᐱᑯᐦ ᐄᐧᓇᐋᐧ ᐊᐃᐧᔭᐠ ᑳᐃᔑ ᓇᐣᑕᐁᐧᐣᑕᒧᐋᐧᐨ ᐅᐦᐅᒫ ᐊᐦᑮᐣᐠ.”

34 ᒋᓴᐢ ᐅᑮᓇᐣᑐᒫᐣ ᑳᒥᐦᔒᓄᓂᐨ ᐊᐃᐧᔭᐣ ᐊᐦᔑᐨ ᑲᔦ ᐅᑭᐦᑭᓅᐦᐊᒪᐋᐧᑲᓇᐣ ᐁᐃᐦᑭᑐᐨ,

“ᑮᓑᐱᐣ ᐊᐃᐧᔭ ᐃᐧᐱᒥᓂᔕᐦᐅᔑᐨ ᑮᔮᒼ ᑕᔮᓇᐁᐧᓂᒥᑎᓱ ᒦᓇ ᒋᐅᑖᐦᐱᓈᐨ ᐅᑖᓯᑌᔮᑎᑯᒪᐣ ᒋᐱᒥᓂᔕᐦᐅᔑᐨ.

35 ᐱᑯᐦ ᐊᐊᐧᓀᐣ ᐋᐧᐱᒫᒋᑑᑫᐧᐣ ᐅᐱᒫᑎᓯᐃᐧᐣ ᐅᑲᐊᐧᓂᑑᐣ,

ᐱᑯᐦ ᐊᐊᐧᓀᐣ ᑫᐊᐧᓂᐦᑑᑫᐧᐣ ᐅᐱᒫᑎᓯᐃᐧᐣ ᓃᐣ ᐅᐣᒋ ᒦᓇ ᒥᓈᐧᒋᒧᐃᐧᓂᓂ ᐅᐣᒋ,

ᐅᑲᐱᒫᒋᑑᐣ ᐅᐱᒫᑎᓯᐃᐧᐣ.

36 ᑫᑯᓀᓂ ᐊᐃᐧᔭ ᑫᐅᐣᑎᓯᐸᐣ ᒥᓯᐁᐧ ᑫᑯᓂ ᑌᐱᓇᐣᐠ ᐅᐦᐅᒫ ᐊᐦᑮᐣᐠ,

ᐋᐧᓂᐦᐋᐨ ᑕᓑ ᐅᑕᐦᒑᐦᑲᐧᐣ ?

37 ᓈᐣᑕ ᑫᑯᓀᓂ ᐊᐃᐧᔭ ᑫᒦᓑᑲᐧᒋᒦᓂᐁᐧᐦᐸᐣ ᐅᑕᐦᒑᐦᑲᐧᐣ ᐅᐣᒋ?

38 ᑮᓑᐱᐣ ᐅᐦᐅᐁᐧ ᒣᑳᐧᐨ ᑳᐃᔑ ᐱᒫᑎᓯᓈᓂᐊᐧᐣᐠ ᐱᓯᑳᐧᑎᓯᐃᐧᓂᐣᐠ ᒦᓇ ᒪᒋᐱᒫᑎᓯᐃᐧᓂᐣᐠ,

ᐊᐃᐧᔭ ᑫᓇᓀᐯᐃᐧᓯᑫᐧᐣ ᓃᐣ ᐅᐣᒋ ᒦᓇ ᓂᑎᐦᑭᑐᐃᐧᓇᐣ,

ᐃᓂᓃᐤ ᐅᑯᓯᐦᓴᐣ ᑫᐄᐧᐣ ᐅᑲᓇᓀᐯᐃᐧᓯᑲᐣᑕᐋᐧᐣ ᐊᐦᐲ ᐱᑕᑯᔑᐣᐠ ᐃᐦᐃᒫ ᐅᑖᑖᒪᐣ ᐅᑭᐦᑌᐣᑖᑯᓯᐃᐧᓂᐣᐠ,

ᐊᐦᔑᐨ ᑲᔦ ᑳᑲᓈᑎᓯᐋᐧᐨ ᐅᑮᔑᑰᐠ.”