ᑳᐸᔭᐦᑲᐠ ᒦᓇ ᐁᑳ ᑳᐸᔭᐦᑲᐠ
7
ᓈᐣᑕ ᐯᕒᐊᓰᐃᐧᓂᓂᐊᐧᐠ ᒦᓇ ᓈᐣᑕ ᑳᑭᐦᑭᓅᐦᐊᒫᑫᐋᐧᐨ ᐅᓇᐦᔓᐁᐧᐃᐧᓂ ᑳᑮᐱᑕᑯᔑᓄᐋᐧᐨ ᒉᕒᐅᓴᓬᐊᒦᐣᐠ ᐅᑮ ᐋᐧᑳᓑᑲᐋᐧᐋᐧᐣ ᒋᓴᓲᐣ.
2 ᐅᑮ ᐋᐧᐸᒫᐋᐧᐣ ᐋᐣᑕ ᐅᑭᐦᑭᓅᐦᐊᒪᐋᐧᑲᓂᓃᐣ ᐁᐄᐧᐦᓯᓂᓂᐨ ᐁᑳ ᐁᐸᔭᐦᑭᓂᒌᓂᐣᐨ ᐁᑳ ᐁᐅᐣᒋ ᑳᐦᓰᓂᒌᓂᐨ.
3 ᐯᕒᐊᓰᐃᐧᓂᓂᐊᐧᐠ ᒦᓇ ᑲᐦᑭᓇ ᒍᐊᐧᐠ ᑳᐃᐧᐣ ᒋᐄᐧᐦᓯᓂᐋᐧᐨ ᐁᑳ ᒪᐦᔑ ᑲᐧᔭᐠ ᐁᑳᓰᓂᒌᐋᐧᐨ,
ᐁᑲᓇᐧᐁᐧᐣᑕᒧᐋᐧᐨ ᑳᑮᐃᔑ ᐋᓇᐦᑫ ᑭᐦᑭᓅᐦᐊᒫᑫᐋᐧᐨ ᑭᐦᒉᐦᐋᐠ.
4 ᐊᐦᐲ ᐊᑖᐃᐧᑲᒥᑰᐣᐠ ᑳᐅᐣᑐᓭᐋᐧᐨ ᑳᐃᐧᐣ ᒋᐅᐣᒋ ᐄᐧᐦᓯᓄᐋᐧᐨ ᐹᓂᒫ ᐱᑯᐦ ᑮᑭᓰᔮᐹᐊᐧᓂᑎᓱᐋᐧᐨ.
ᒥᔒᐣ ᑲᔦ ᑯᑕᑭᔭᐣ ᑫᑰᓇᐣ ᐅᑮ ᐱᒥᓂᔕᐦᐋᓈᐋᐧ,
ᑑᑳᐣ ᐁᑳᓰᓇᒧᐋᐧᐨ ᒥᓂᑳᐧᑲᓇᐣ,
ᐊᓯᐊᐧᒋᑲᓂᐲᐋᐧᐦᐱᑰᐣ ᒦᓇ ᐊᐦᑭᑲᐧᐣ.
5 ᐯᕒᐊᓰᐃᐧᓂᓂᐊᐧᐠ ᒦᓇ ᑳᑭᐦᑭᓅᐦᐊᒫᑫᐋᐧᐨ ᐅᓇᐦᔓᐁᐧᐃᐧᓂ ᐅᑮᑲᑫᐧᒋᒫᐋᐧᐣ ᒋᓴᓲᐣ,
“ᑫᑯᓀᐣ ᐁᑳ ᑭᑭᐦᑭᓅᐦᐊᒪᐋᐧᑲᓇᐠ ᐁᐧᐣᒌ ᐃᔑᐱᒫᑎᓯᐋᐧᐨ ᑳᐃᓇᐦᑌᐠ ᐁᐧᓑᑲᐨ ᑳᑮᐲᔑᐱᒫᑎᓯᐋᐧᐨ ᑭᐦᒉᐦᐋᐠ ?
ᐁᐄᐧᐦᓯᓂᐋᐧᐨ ᐁᑳ ᐁᐸᔭᐦᑭᓂᒌᐋᐧᐨ.”
6 ᒋᓴᐢ ᐅᑮᓇᐦᑲᐧᐁᐧᔑᐦᐋᐣ,
“ᐋᐃᓴᔭ ᑮᑌᐯᐧ ᑳᑮᑭᐦᑭᐁᐧᐦᐃᑫᐨ ᑮᓇᐋᐧ ᐅᐣᒋ ᐅᑕᔭᒥᐦᐁᑳᓲᐠ ᑳᐃᔑ ᐲᐦᐃᑳᑌᐠ,
‘ᐃᑭᐁᐧᓂᐊᐧᐠ ᐊᐃᐧᔭᐠ ᓂᑭᐦᑌᐣᑖᑯᐦᐃᑯᐠ ᐅᑑᓂᐋᐧ
ᔖᑰᐨ ᐅᑌᐦᐄᐋᐧ ᓂᓈᐋᐧᐸᒥᑰᐠ.
7 ᑲᐧᐣᑕ ᐱᑯᐦ ᓂᑕᐊᔭᒥᐦᐁᑖᑰᐠ,
ᐊᓂᓑ ᑭᐦᑭᓅᐦᐊᒫᑫᐋᐧᐠ ᐱᑯᐦ ᐊᐦᑮᐃᐧ ᐅᓈᐦᑯᓂᑫᐃᐧᓇᐣ.’
8 ᑭᑮᓇᑳᑕᓈᐋᐧ ᑭᔐᒪᓂᑑ ᐅᑑᓇᐦᔓᐁᐧᐃᐧᓇᐣ ᒦᓇ ᑭᐱᒥᓂᔕᐦᐊᓈᐋᐧ ᐊᐦᑮᐃᐧ ᑭᐦᑭᓅᐦᐊᒫᑫᐃᐧᐣ.”
9 ᒋᓴᐢ ᑮᐊᓃᐦᑭᑐ,
“ᒫᒪᑳᐨ ᑳᐋᓇᐁᐧᐣᑕᒣᐠ ᑭᔐᒪᓂᑑ ᐅᑑᓇᐦᔓᐁᐧᐃᐧᓇᐣ ᓇᐊᐧᐨ ᐁᐃᐧᑲᓇᐁᐧᐣᑕᒣᐠ ᑮᓇᐋᐧ ᑭᑖᓇᐦᑫ ᑭᐦᑭᓅᐦᐊᒫᑫᐃᐧᓂᐋᐧ.
10 ᒨᓯᐢ ᐁᑮᐦᐃᑭᑐᐨ,
‘ᑭᐦᑌᓂᒼ ᑭᑖᑖ ᒦᓇ ᑭᒫᒫ,’
ᐁᑲᐧ ᒦᓇ ‘ᐊᐊᐧᓀᐣ ᑫᒪᒋᓂᐦᑳᓈᑫᐧᐣ ᐅᑖᑖᒪᐣ ᒦᓇ ᐅᒫᒫᒪᐣ ᑕᓂᓵᑲᓅ.’
11 ᐁᑲᐧ ᑮᓇᐋᐧ ᑭᑎᐦᑭᑐᓈᐋᐧ ᑮᓑᐱᐣ ᐊᐃᐧᔭ ᑫᐃᓈᑫᐧᐣ ᐅᑖᑖᒪᐣ ᒦᓇ ᐅᒫᒫᒪᐣ,
‘ᑫᑯᐃᐧᒋᐦᐃᐁᐧᐃᐧᐣ ᑫᑮᒦᓂᓇᑰᑭᐸᐣ ᒦᐦᐋᐁᐧ ᑲᕒᐸᐣ ’ (ᒦᐦᐅᐁᐧ ᐸᑭᑎᓂᑫᐃᐧᐣ ᑭᔐᒪᓂᑑ ᐁᒦᓈᑲᓅᐨ).
12 ᐁᑲᐧᐦᐱᐣ ᑳᐃᐧᐣ ᐊᐋᐧᔑᒣ ᐁᓇᐣᑕᐁᐧᐣᑕᒪᐣ ᑫᑰᐣ ᒋᐃᔑᐃᐧᒋᐦᐋᐨ ᐅᑖᑖᒪᐣ ᒦᓇ ᐅᒫᒫᒪᐣ.
13 ᐁᑳ ᐁᐸᐱᐢᑫᐣᑕᒣᐠ ᑭᔐᒪᓂᑑ ᐅᑎᐦᑭᑐᐃᐧᐣ,
ᑮᓇᐋᐧ ᐱᑯᐦ ᐁᑭᐦᑭᓅᐦᐊᒫᑫᔦᐠ ᑭᑖᓇᐦᑫ ᑭᐦᑭᓄᐦᐊᒫᑯᐃᐧᓂᐋᐧ.
ᒥᐦᔒᐣ ᐅᓄᐁᐧᓂᐊᐧᐣ ᑑᑳᐣ ᑫᑰᓇᐣ ᐁᑑᑕᒣᐠ.”
14 ᒦᓇᐋᐧ ᒋᓴᐢ ᐅᑮᓇᐣᑐᒫᐣ ᑳᒥᐦᔒᓄᓂᐣᐨ ᐊᐃᐧᔭᐣ ᐁᑮᐦᐃᑭᑐᐨ,
“ᓇᐣᑐᑕᐃᐧᔑᔫᐠ ᑲᐦᑭᓇ ᒦᓇ ᓂᓯᑐᐦᑕᒧᐠ ᐅᐦᐅᐁᐧ.
15 ᑳᐃᐧᐣ ᑫᑰᐣ ᐊᔮᒪᑲᓯᓅᐣ ᐊᑲᐧᒋᔮᐦᐄᐣᐠ ᐊᐃᐧᔭ ᑳᐲᐣᒋᓑᑳᑯᐨ ᐁᑳ ᑫᐅᐣᒋ ᐸᔮᐦᑭᓯᐸᐣ.
ᐁᑲᐧ ᒦᓇ ᐅᓄᐁᐧᓂᐊᐧᐣ ᑫᑰᓇᐣ ᑳᓵᑳᐦᐊᒨᒪᑲᐦᑭᐣ ᒦᐦᐃᐁᐧᓂ ᐁᑳ ᑳᐸᔭᐦᑭᐦᐃᑯᐨ ᐊᐃᐧᔭ.”
17 ᐊᐦᐲ ᒋᓴᐢ ᑳᓇᑲᓈᐨ ᑳᒥᐦᔒᓄᓂᐣᐨ ᐊᐃᐧᔭᐣ ᑮᐲᐣᑎᑫ ᐊᐧᑲᐦᐃᑲᓂᐣᐠ,
ᐅᑭᐦᑭᓅᐦᐊᒪᐋᐧᑲᓇᐣ ᐅᑮᑲᑫᐧᒋᒥᑰᐣ ᐅᐦᐅᐁᐧᓂ ᐋᐁᐧᐦᒋᑲᐣ.
18 ᒋᓴᐢ ᐅᑮᐦᐃᓈᐣ,
“ᑳᐃᐧᓇ ᑫᑮᓇᐋᐧ ᒋᓂᓯᑐᐦᑕᒣᐠ ?
ᑳᐃᐧᓇ ᒋᐋᐧᐸᐣᑕᒣᐠ ?
ᐱᑯᐦ ᑫᑰᐣ ᐊᑲᐧᒋᔭᐦᐄᐣᐠ ᑳᐅᐣᑐᓭᒪᑲᐠ ᐁᐲᐣᒋᓑᑳᑰᐨ ᐊᐃᐧᔭ,
ᑳᐃᐧᐣ ᐅᑲᐯᔮᐦᑭᐦᐃᑯᓰᐣ.
19 ᑳᐃᐧᐣ ᐃᐦᐃᒫ ᒋᐃᔑ ᐲᐣᑎᑫᓑᑳᒪᑲᓂᓂᐠ ᐅᑌᐦᐄᐣᐠ,
ᐃᐦᐃᒫ ᐅᒥᓴᑖᐣᐠ ᐃᔖᒪᑲᓂᓂ ᒦᓇ ᒦᐦᐃᒫ ᐁᐧᐅᐣᒋ ᓵᑲᐦᐊᒨᒪᑲᓂᓂᐠ.”
ᑮᐦᐃᑭᑐ ᒋᓴᐢ,
ᐁᑮ ᐃᐧᐣᑕᐣᐠ ᑲᐦᑭᓇ ᒦᒋᒫᐣ ᐁᐸᔭᐦᑲᑭᐣ.
20 ᒦᓇ ᑮᐃᐦᑭᑐ,
“ᐃᐦᐃᐁᐧ ᑳᐱᓵᑲᐦᐊᒧᒪᑲᐠ ᐊᐃᐧᔭ ᐅᑌᐦᐄᐣᐠ ᒦᐦᐃᐁᐧᓂ ᐁᑳ ᑳᐸᔮᐦᑭᐦᐃᑯᐨ.
21 ᐃᐦᐃᒫ ᐅᑌᐦᐄᐋᐧᐣᐠ ᐅᐣᒌᒪᑲᓂᓂ ᐅᒪᒋᐃᓀᐣᑕᒧᐃᐧᓂᐋᐧ ᐊᐃᐧᔭᐠ,
ᐱᔑᑲᐧᒋᐱᒫᑎᓯᐃᐧᐣ,
ᑭᒨᑎᐃᐧᐣ,
ᓂᓯᐁᐧᐃᐧᐣ,
22 ᐱᔑᑳᐧᑎᓯᐃᐧᐣ,
ᒥᓴᐁᐧᐣᑕᒫᑫᐃᐧᐣ,
ᒪᒋᐃᔒᐦᒋᑫᐃᐧᐣ,
ᑲᑲᔦᔑᐦᒋᑫᐃᐧᐣ,
ᓇᓀᐯᐃᐧᒥᓴᐁᐧᐣᑕᒨᐃᐧᐣ,
ᒥᓴᐃᐧᓇᒫᑫᐃᐧᐣ,
ᒪᒋᐋᓂᒨᒥᑎᐃᐧᐣ,
ᐃᓑᐯᓂᒥᑎᓱᐃᐧᐣ,
ᑲᑮᐹᑎᓯᐃᐧᐣ.
23 ᐅᓄᐁᐧᓂᐊᐧᐣ ᑲᐦᑭᓇ ᒪᒋᑫᑰᓇᐣ ᐲᐣᒋᔭᐦᐄ ᐅᐣᒌᒪᑲᓅᐣ ᐁᑳ ᑳᐸᔮᐦᑭᐦᐃᑯᐨ ᐊᐃᐧᔭ.”
ᐅᑌᐯᐧᔦᑕᒧᐃᐧᐣ ᒉᐣᑕᐧᓬ ᐃᐦᑫᐧ
24 ᒋᓴᐢ ᐃᐦᐃᒫ ᑮᐊᓅᒋᒫᒑ ᒦᓇ ᐋᐧᑲᐦᐃ ᐁᑮᐦᐃᔖᐨ ᑖᔭᕒ ᒦᓇ ᓵᐃᑕᐣ ᑭᐦᒋᑖᐃᐧᓂᐣᐠ.
ᑮᐲᐣᑎᑫ ᐋᐧᑲᐦᐃᑲᓂᐣᐠ ᑳᐃᐧᐣ ᐅᑑᐣᒋ ᓇᐣᑕᐁᐧᐣᑕᓰᐣ ᐊᐃᐧᔭᐣ ᒋᑭᐦᑫᑕᒥᓂᐣᐨ,
ᑳᐃᐧᐣ ᒋᑮᐃᔑᓈᑲᐧᓂᓂᐠ ᐁᑳ ᒋᑮᑭᐦᑫᓂᒫᑲᓅᐨ.
25 ᐊᐦᐲ ᑳᓅᐣᑕᐣᐠ ᐁᐦᐊᔮᓂᐣᐨ ᒋᓴᓲᐣ,
ᐃᐦᑫᐧ ᑮᐲᔖ.
ᐅᑖᓂᓭᓴᐣ ᐁᑭᑭᓑᑳᑯᓂᐨ ᒪᒋᐊᐦᒑᐦᑲᐧᐣ.
ᑮᐸᐣᑭᔑᐣ ᒋᓴᓲᐣ ᐅᓯᑎᓃᐣ.
26 ᐊᐦᐊᐁᐧ ᐃᐦᑫᐧ ᑲᕒᐄᐠ ᑮᐅᐣᑕᑳᓀᓯ,
ᓵᕒᐃᔭᐣ ᐳᓃᔑᔭ ᐁᑮ ᐅᐣᒋᓂᑖᐃᐧᑭᐨ.
ᐁᑮᐸᑯᐦᓭᓂᒫᐨ ᒋᓴᓲᐣ ᒋᓵᑭᒋᐦᐋᓂᐨ ᒪᒋᐊᐦᒑᐦᑲᐧᐣ ᑳᑭᐦᑭᓑᑳᑯᓂᐣᐨ ᐅᑖᓂᓴᐣ.
27 “ᐱᓇᒫ ᓃᑳᐣ ᐊᐊᐧᔑᔕᐠ ᑕᑌᐱᐄᐧᐦᓯᓂᐊᐧᐠ,”
ᐅᑮᐦᐃᓈᐣ ᐃᐦᑫᐧᐊᐧᐣ,
“ᑳᐃᐧᐣ ᒋᓇᐦᐃᓈᑲᐧᐠ ᒋᒪᑲᒫᑲᓅᐋᐧᐨ ᐊᐋᐧᔑᔕᐠ ᐅᑖᓇᐦᑯᓈᒧᐋᐧ ᒦᓇ ᒌᔑᐁᐧᐱᓇᒪᐃᐧᐣᑖᐧ ᐊᓂᒧᔕᐠ.”
28 “ᐁᐦᐁ ᑎᐯᐣᒋᑫᔭᐣ,”
ᐅᑮ ᐃᔑᓇᐦᑲᐁᐧᔒᐦᐋᐣ,
“ᔖᑰᐨ ᐊᓂᒧᔕᐠ ᐅᒦᒋᓈᐋᐧ ᐊᐋᐧᔑᔕᐠ ᐅᐲᐊᐧᒋᑲᓂᓃᐣ ᔒᐹᐦᐃ ᐄᐧᐦᓯᓂᐃᐧᓈᐦᑎᑯᐣᐠ.”
29 ᒋᓴᐢ ᐅᑮᐦᐃᓈᐣ ᐃᑫᐧᐦᐊᐧᐣ,
“ᒪᔮᒼ ᑭᑎᔑᓇᑫᐧᑕᐧ,
ᒦᐦᐃ ᐃᔑᒫᒑᐣ,
ᒪᒋᐊᐦᒑᐠ ᐋᔕ ᐅᑮᓇᑲᓈᐣ ᑭᑖᓂᐦᓴᐣ.”
30 ᐃᐦᑫᐧ ᑮᑮᐁᐧ ᒦᓇ ᐅᑮᐋᐧᐸᒫᐣ ᐅᓃᒑᓂᔕᐣ ᐁᐱᒥᔑᓂᓂᐨ ᓂᐯᐃᐧᓂᐣᐠ ᐁᑮᓇᑲᓂᑯᐨ ᒪᒋᐊᐦᒑᐦᑲᐧᐣ.
ᒋᓴᐢ ᑳᑮᓇᐣᑕᐃᐧᐦᐊᐨ ᑳᑭᐳᐦᑌᓂᐨ ᒦᓇ ᐁᑳ ᑳᓂᐦᑖᐁᐧᓂᐨ ᓈᐯᐊᐧᐣ
31 ᐁᑲᐧᐦᐱᐣ ᒋᓴᐢ ᐃᐦᐃᒫ ᑮᐅᐣᑐᓭ ᑲᑕᑲᐧᓂᓂᐠ ᑖᔭᕒ ᑭᐦᒋᑖᐃᐧᓂᐣᐠ ᒦᓇ ᐁᑮ ᐊᓂᔖᐳᓑᑳᐨ ᓴᐃᑕᐣ ᑭᐦᒋᑖᐃᐧᓂᐣᐠ,
ᐁᑮᐦᐊᓃᔖᐨ ᑳᓬᐃᓬᐄ ᓵᑲᐦᐃᑲᓃᐣᐠ,
ᒦᓇ ᐃᐦᐃᒫ ᑭᐦᒋᑖᐃᐧᓂᐣᐠ ᑎᑲᐳᓬᐃᐢ ᐊᐦᑮᐣᐠ.
32 ᓈᐣᑕ ᐊᐃᐧᔭᐠ ᐅᑮ ᐲᑕᒫᑰᐣ ᓈᐯ ᐁᑳ ᐁᐦᐅᓯᑌᐨ ᒦᓇ ᐁᑳ ᑲᐧᔭᐠ ᐁᑮ ᑲᑭᑐᐨ,
ᐅᑮ ᐸᑯᐦᓭᓂᒫᐋᐧᐣ ᒋᓵᒥᓈᐨ ᓈᐯᐊᐧᐣ.
33 ᐅᐱᒣᐦᐃ ᐅᑮ ᐃᔑᐃᐧᓈᐣ,
ᐁᑳ ᑳᐃᔑ ᒥᐦᔒᓄᓈᓂᐊᐧᓂᓂᐠ,
ᒋᓴᐢ ᐅᑮ ᓵᒥᑕᐊᐧᑫᓈᐣ.
ᐁᑲᐧᐱᐣ ᑮᓯᐦᑯ ᒦᓇ ᐁᑮᓵᒥᓇᐣᐠ ᐅᑌᓇᓃᐣ ᓈᐯᐊᐧᐣ.
34 ᐃᓑᐱᒥᐣᐠ ᑭᐦᒋᑮᔑᑯᐣᐠ ᑮᐦᐃᓈᐱ ᒦᓇ ᐁᑭᐦᒋᐸᑲᑕᓈᒧᐨ ᐁᑮᐦᐃᓈᐨ,
“ᐁᐦᐸᐦᑖ,”
(ᒦᐦᐅᐁᐧ ᑳᐃᑕᐣᐠ,
ᐹᐦᑭᓭᐣ!)
35 ᓭᒫᐠ ᓈᐯ ᑮᐹᐦᑭᓭᓂᐊᐧᐣ ᐅᐦᑕᐊᐧᑲᐣ,
ᐅᑌᓇᐣ ᑮᐋᐱᐢᑯᐦᓭᓂ,
ᒦᓇ ᑲᐧᔭᐠ ᐊᐦᐱᐣ ᑮᐊᓂᑲᑭᑐ.