“ᐋᐣᑎ ᐁᐧᐣᑎᓇᐣᑭᐣ ᐊᐧᐦᐊᐁᐧ ᓈᐯ ᐅᓄᐁᐧᓂᐊᐧᐣ ᑫᑰᓇᐣ ?”

ᑮᐃᔑᑲᑫᐧᑌᐊᐧᐠ.

“ᑫᑯᓀᓂ ᑳᑮᑖᐁᐧᐣᑕᒧᐃᐧᓂ ᑳᒦᓈᑲᓅᐨ ᑲᔦ ᐁᑲᓑᑭᐦᑑᐨ ᒋᒪᒫᑖᐃᐧ ᐃᔑᐦᒋᑫᐨ?

3 ᑳᐃᐧᓇᐃᐧᐣ ᐊᐦᐊᐧ ᒥᑎᑯᓈᐯ?

ᐅᑯᓯᐦᓴᐣ ᒣᕒᐃ,

ᐅᐄᐧᒋᐦᑫᐧᓯᐋᐧ ᒉᒥᐢ,

ᒎᓯᑊ,

ᒎᑕᐢ ᒦᓇ ᓵᐃᒪᐣ ?

ᑳᐃᐧᓇᐃᐧᐣ ᐅᑕᐁᐧᒫᐣ ᒋᐃᐧᒌᐊᔮᒥᑯᔭᐣᐠ ᐅᐦᐅᒫ?”

ᐁᑲᐧᑕᓑ ᐅᑮ ᐋᓇᐁᐧᓂᒫᐋᐧᐣ.

4 ᒋᓴᐢ ᐅᑮᐦᐃᓈᐣ,

“ᐃᐦᐃᒫ ᑎᐱᓇᐁᐧ ᐅᑖᐃᐧᓂᐣᐠ,

ᒣᑫᐧᐦᐃ ᑳᐃᔑᑖᓂᐨ ᐅᐋᐧᐦᑰᒫᑲᓇᐣ ᒦᓇ ᐅᑎᐯᐣᒋᑫᐃᐧᓂᐣᐠ,

ᑳᐃᐧᐣ ᐅᑭᐦᑭᐁᐧᐦᐃᑫ ᒋᑭᐦᑌᓂᒫᑲᓅᐨ.”

5 ᑳᐃᐧᐣ ᐃᐦᐃᒫ ᐅᑮᑲᓑᑭᑑᓰᐣ ᒋᒪᒫᑖᐃᐧ ᐃᔑᐦᒋᑫᐨ,

ᐊᒦᑕᓑ ᒋᓵᒥᓈᐨ ᐋᐣᑕ ᑳᔮᐦᑯᓯᓂᐨ ᑲᔦ ᒋᓇᐣᑕᐃᐧᐦᐋᐨ.

6 ᒋᓴᐢ ᑮᒫᒪᐦᑳᑌᐣᑕᒼ ᐁᑳ ᐁᑌᐯᐧᐦᑕᒥᓂᐨ.

ᐁᑲᐧᑕᓑ ᒋᓴᐢ ᒥᓯᐁᐧ ᑮᐸᐹᒥᐊᐃᔖ ᑖᐃᐧᓇᐣ ᐁᑮ ᐹᐹᒥᑭᐦᑭᓅᐦᐊᒫᑫᐨ.

7 ᐅᑮᓇᐣᑐᒫᐣ ᒥᑖᐦᓱᓃᔓᔖᑊ ᑭᐦᑭᓅᐦᐊᒪᐋᐧᑲᓇᐣ,

ᐅᑮ ᒫᒋᓂᔕᐦᐋᐧᐣ ᓈᓃᔑᐣ ᒦᓇ ᐅᑮᒦᓈᐣ ᑲᓑᑭᐦᐅᐃᐧᐣ ᒋᔖᑯᒋᐦᐋᓂᐣᐨ ᒪᒋᐊᐦᒑᐦᑲᐧᐣ.

8 ᐅᑮ ᐃᐧᐣᑕᒪᐋᐧᐣ ᐁᑳ ᑫᑰᐣ ᒋᑕᐦᑯᓇᒥᓂᐨ,

“ᐊᐦᐱᐣ ᒫᒑᔦᐠ ᒦᐁᑕᐦ ᓴᑲᐦᐅᓇᑎᐠ,

ᑳᐃᐧᐣ ᓃᒫᐃᐧᐣ,

ᑳᐃᐧᐣ ᐲᓇᐦᐃᑲᐣ,

ᑳᐃᐧᐣ ᑲᔦ ᔓᓂᔮᐣ ᒋᐲᓇᐦᐊᐧᔦᐠ.

9 ᑭᑲᐦᑭᓯᓀᔪᐠ ᑳᐃᐧᐣ ᓃᔑᐣ ᑭᓑᑭᑲᓇᐣ ᒫᒋᐃᐧᑑᔪᐠ.

10 ᐊᐦᐱᐣ ᐲᐣᑎᑫᔦᐠ ᐋᐧᑲᐦᐃᑲᓂᐣᐠ,

ᒦᐱᑯᐦ ᐃᐦᐃᒫ ᐊᔮᔪᐠ ᐱᓂᓑ ᐃᐦᐃᒫ ᒋᐊᓅᒋᒫᒑᔦᐠ.

11 ᑮᓑᐱᐣ ᐊᐃᐧᔭ ᐁᑳ ᐲᐣᑎᑲᓂᑯᔦᐠ ᓈᐣᑕ ᐁᑳ ᓇᐣᑐᐦᑖᑯᔦᐠ,

ᐸᐦᐸᐃᐧᐦᐊᒧᐠ ᓀᐊᐧᐣᐠ ᑭᓯᑎᐋᐧ ᐊᓂᒫᒑᔦᐠ,

ᒋᐅᐣᒋ ᑭᐦᑫᐣᑕᒧᐋᐧᐨ ᑳᑮᐃᔑ ᒪᒋᑑᑕᒧᐋᐧᐨ.”

12 ᑮᒫᒑᐊᐧᐠ ᑭᐦᑭᓅᐦᐊᒪᐋᐧᑲᓇᐠ ᐁᑮᐃᔑ ᑲᑮᐦᑫᐧᐋᐧᐨ ᒋᑫᐧᐦᑳᑎᓯᐋᐧᐨ ᐊᓂᔑᓂᓂᐊᐧᐠ.

13 ᒥᐦᔒᐣ ᒪᒋᐊᐦᒑᐦᑲᐧᐣ ᐅᑮ ᓵᑭᒋᐦᐋᐋᐧᐣ ᒦᓇ ᐁᑮ ᑑᒥᓈᐋᐧᐨ ᑳᔮᐦᑯᓯᓂᐣᐨ ᒦᓇ ᐁᑮ ᓇᓈᐣᑕᐃᐧᐦᐋᐋᐧᐨ.

14 ᑭᐦᒋᐅᑭᒫ ᐦᐁᕒᐅᐟ ᐅᑮᓅᐣᑖᐣ ᐁᐃᔑ ᐸᐹᒫᒋᒥᒥᐨ ᒋᓴᓲᐣ ᒥᓯᐁᐧ ᐁᑮᑭᐦᑫᐣᑖᑯᓯᓂᐨ.

ᐋᐣᑕ ᑮᐃᐦᑭᑐᐊᐧᐠ,

“ᐊᒦᐦᐋᐁᐧ ᒐᐧᐣ ᐅᓰᐣᑲᐦᐊᐣᑖᑫ,

ᑮᐊᐧᓂᓑᑳᓈᑲᓅ ᐃᐦᐃᒫ ᓂᐳᐃᐧᓂᐣᐠ,

ᒦᐦᐅᐁᐧ ᑳᐅᐣᒋ ᐊᔮᐨ ᒪᓑᑲᐃᐧᓰᐃᐧᓂ ᐁᑭᐦᑭᐢᑳᑯᐨ ᒋᑲᓑᑭᐦᑑᐨ ᒋᑑᑕᐣᑭᐣ ᒪᒫᑖᐃᐧ ᐃᔑᐦᒋᑫᐃᐧᓇᐣ.”

15 ᑮᐃᐦᑭᑐᐊᐧᐠ ᑯᑕᑭᔭᐠ,

“ᒦᐦᐊᐁᐧ ᐃᓬᐋᐃᒐ,”

ᒦᓇ ᑯᑕᑭᔭᐠ ᑮᐦᐃᑭᑐᐊᐧᐠ,

“ᒦᐦᐋᐁᐧ ᐅᑭᐦᑭᐁᐧᐦᐃᑫ,

ᑖᐱᓑᑰᐨ ᐯᔑᑲᐧᐣ ᐃᑭᐁᐧᓂᐊᐧᐠ ᐁᐧᓑᑲᐨ ᐅᑭᐦᑭᐁᐧᐦᐃᑫᐠ.”

16 ᐊᐦᐲ ᑳᓅᐣᑕᐣᐠ ᐦᐁᕒᐅᐟ ᑮᐦᐃᑭᑐ,

“ᒐᐧᐣ ᑳᑮᑮᓑᑭᑫᐧᑕᐦᐋᐧᑭᐸᐣ ᑮᐊᐧᓂᓑᑳᓈᑲᓅ ᐃᐦᐃᒫ ᓂᐳᐃᐧᓂᐣᐠ.”

17 ᐄᐧᐣ ᐱᑯᐦ ᐦᐁᕒᐅᐟ ᑮᐊᓅᐦᑮᐸᐣ ᒋᐅᑖᐦᐱᓂᒥᐣᐨ ᒐᐧᓇᐣ,

ᒦᓇ ᒋᒪᒫᐣᒋᑲᐧᐱᑲᐦᐅᒥᐣᐨ ᑭᐸᐦᐅᑐᐃᐧᑲᒥᑯᐣᐠ.

ᐅᐦᐅᐁᐧᓂ ᑳᑮᐅᐣᒋᑑᑕᐣᐠ ᐦᐁᕒᐅᐟ ᐁᑮ ᐄᐧᒋᐋᐧᐨ ᐅᐄᐧᒋᒧᔕᐣ ᐦᐁᕒᐅᑎᔭᓴᐣ ᐅᐄᐧᒋᐦᑫᐧᓯᐊᐧᐣ ᐱᓬᐃᑊ ᐅᐄᐧᒋᐋᐧᑲᓂᓃᐣ.

18 ᒐᐧᐣ ᐅᑮ ᐱᐊᐃᓈᐸᓃᐣ ᐦᐁᕒᐅᑕᐣ,

“ᑳᐃᐧᐣ ᐃᓇᐦᑌᓰᓅᐣ ᒋᐄᐧᒋᐊᐧᐨ ᑮᒋᐦᑫᐧᓯ ᐅᐄᐧᒋᐊᐧᑲᓇᐣ.”

19 ᐁᑲᐧᑕᓑ ᐦᐁᕒᐅᑎᔭᐢ ᐅᑮᓂᓑᑫᓂᒫᐣ ᒑᐧᓇᐣ ᐁᑮᐃᐧᓂᓵᐨ.

ᑳᐃᐧᐣ ᐅᑐᐣᒋ ᑲᓑᑭᐦᑑᓰᐣ,

20 ᑖᓇᐦᑳ ᐦᐁᕒᐅᐟ ᐅᑮᑯᐦᓵᐣ ᒐᐧᓇᐣ ᒦᓇ ᐅᑮ ᐅᐣᒋ ᑲᓇᐁᐧᓂᒫᐣ,

ᐁᑮ ᑭᐦᑫᓂᒫᐨ ᐁᑲᐧᔭᐦᑳᐧᑎᓯᓂᐨ ᒦᓇ ᐁᑲᓈᑎᓯᓂᐨ.

ᐊᐦᐲ ᐦᐁᕒᐅᐟ ᐁᓅᐣᑕᐋᐧᐨ ᒐᐧᓇᐣ,

ᒫᐊᐧᐨ ᑮᒥᑯᓑᑳᑌᐣᑕᒼ,

ᔖᑰᐨ ᐅᑮ ᒥᓀᐧᐣᑖᐣ ᐁᓇᐣᑐᑕᐋᐧᐨ.

21 ᐊᐦᐲ ᑳᐅᒋᐦᒋᓭᓂᐠ ᐅᑎᐱᓑᑲᒨᑮᔑᑳᒼ ᐦᐁᕒᐅᐟ ᑮᒪᑯᔐᐃᐧᓂᐦᑫ ᐅᑮᓇᐣᑐᒫᐣ ᑳᓃᑳᓀᐣᑖᑯᓯᓂᐣᐨ ᐅᑭᒫᐣ,

ᒦᓇ ᔑᒫᑲᓂᔑᐃᐧᑭᒫᐣ ᑲᔦ ᑳᓃᑳᓀᐣᑖᑯᓯᓂᐣᐨ ᐃᐦᐃᒫ ᑳᐊᔮᓂᐨ ᑳᓬᐃᓬᐄᐣᐠ.

22 ᐊᐦᐲ ᐦᐁᕒᐅᑎᔭᐢ ᐅᑖᓂᓴᐣ ᑳᐱᐲᐣᑎᑫᓂᐨ ᑮᓃᒥ,

ᑮᒥᓀᐧᐣᑕᒼ ᐦᐁᕒᐅᐟ ᒦᓇ ᑳᐃᐧᒋᐃᐧᓯᓃᒥᑯᐨ.

ᑭᐦᒋᐅᑭᒫ ᐅᑮᐦᐃᓈᐣ ᐅᓑᑭᓃᑭᐦᑫᐧᐣ,

“ᑫᑯᓀᐣ ᐱᑯᐦ ᒥᓴᐁᐧᐣᑕᒪᐣ ᑲᑫᐧᒋᒥᔑᐣ ᑲᒦᓂᐣ.”

23 ᐦᐁᕒᐅᐟ ᐅᑮᑭᐦᒋᐊᔓᑕᒪᐋᐧᐣ ᐅᓑᑭᓂᑭᑫᐧᐣ,

“ᑫᑯᓀᐣ ᐱᑯᐦ ᑫᑲᑫᐧᒋᒥᔑᔭᐣ ᑲᒦᓂᐣ,

ᐋᐱᐦᑕ ᒥᓂᑯᐠ ᑳᑎᐯᐣᑕᒫᐣ ᑲᒦᓂᐣ.”

24 ᐅᓑᑭᓃᑭᐦᑫᐧ ᑮᓴᑲᐦᐊᒼ ᐅᑮᑲᑫᐧᒋᒫᐣ ᐅᒫᒫᒪᐣ “ᑫᑯᓀᐣ ᑫᓇᐣᑐᑕᒫᔮᐣ ?”

“ᐅᑎᐦᑳᐧᐣ ᒐᐧᐣ ᐅᓰᐣᑲᐦᐊᐣᑖᑫ,”

ᐅᑮᐃᔑ ᓇᐦᑲᐁᐧᔑᐦᐃᑰᐣ ᐅᒫᒫᒪᐣ.

25 ᐄᐧᐸᐨ ᐅᓑᑭᓂᑭᑫᐧ ᐅᑮ ᓈᒋᐸᐦᐋᐣ ᑭᐦᒋᐅᑭᒫᐣ ᐁᑮ ᓇᐣᑐᑕᒪᐋᐧᐨ ᐁᑮᐦᐃᓈᐨ,

“ᔐᒫᐠ ᑭᓇᐣᑕᐁᐧᓂᒥᐣ ᒋᒦᓂᔑᔭᐣ ᐅᑎᐦᑳᐧᐣ ᒐᐧᐣ ᐅᓰᐣᑲᐦᐊᐣᑖᑫ ᐅᓈᑲᓂᐣᐠ ᒋᐊᐦᑌᐠ.”

26 ᑭᐦᒋᐅᑭᒫ ᑮᒥᒋᓇᐁᐧᓯ ᐊᓂᓑ ᐁᑮᐊᔓᑕᒪᐋᐧᐨ ᒦᓇ ᐃᓂᐁᐧᓂᐊᐧᐣ ᐁᑮᓅᐣᑖᑯᐨ ᑳᑮᐃᐧᒋᐃᐧᓯᓃᒫᐨ,

ᑳᐃᐧᐣ ᒋᑮᐋᓀᐧᐦᑕᐋᐧᐨ ᐅᓑᑭᓂᑭᐦᑫᐧᐣ.

27 ᔐᒫᐠ ᐦᐁᕒᐅᐟ ᐅᑮᐃᔑᓂᔕᐦᐋᐧᐣ ᐯᔑᐠ ᔑᒫᑲᓂᔕᐣ ᐁᑮᐃᓇᐦᔓᐁᐧᐨ ᒋᐲᒋᑳᑌᓂᐠ ᒐᐧᐣ ᐅᑎᐦᑲᐧᐣ.

ᓈᐯ ᑮᒫᒑ ᐁᑮᐊᐣᑕᐃᐧ ᑮᓑᑭᑫᐧᑕᐦᐋᐧᐨ ᒐᐧᓇᐣ ᐲᐣᒋ ᑭᐸᐦᐅᑐᐃᐧᑲᒥᑰᐣᐠ.

28 ᐁᑲᐧ ᐅᑮᐲᑑᐣ ᐅᑎᐦᑲᐧᓂᓃᐣ ᐅᓈᑲᓂᐣᐠ ᐁᐊᐧᑭᑕᐦᑌᓂᐠ.

ᐅᑮᒦᓈᐣ ᐅᓑᑭᓃᑭᐦᑫᐧᐣ,

ᐁᑲᐧ ᐄᐧᐣ ᐅᑮᒦᓈᐣ ᐅᒫᒫᒪᐣ.

29 ᐊᐦᐲ ᑳᓅᐣᑕᒧᐋᐧᐨ ᒐᐧᐣ ᐅᑭᐦᑭᓅᐦᐊᒪᐋᐧᑲᓇᐣ ᑮᐱᔖᐊᐧᐠ ᐁᑮ ᐱᓈᓯᐦᑲᒧᐋᐧᐨ ᐅᐃᐧᔭᐃᐧᓃᐣ ᒦᓇ ᐁᑮ ᓇᐦᐃᓇᒧᐋᐧᐨ ᓇᐦᐃᓂᑐᐃᐧᑲᒥᑰᐣᐠ.

30 ᑭᐦᑭᓅᐦᐊᒪᐋᐧᑲᓇᐠ ᑮᒫᐊᐧᒋᐦᐃᑐᐊᐧᐠ ᑳᐃᔑ ᐊᔮᓂᐣᐨ ᒋᓴᓲᐣ ᒦᓇ ᐁᑮᐃᐧᐣᑕᒪᐋᐧᐋᐧᐨ ᑲᐦᑭᓇ ᑫᑰᓂ ᑳᑮᑑᑕᒧᐋᐧᐨ ᑲᔦ ᑳᑮᑭᐦᑭᓅᐦᐊᒫᑫᐋᐧᐨ.

31 ᓈᐦᐱᐨ ᐁᑮᒥᐦᔒᓄᐋᐧᐨ ᐊᐃᐧᔭᐠ ᑳᐱᑕᑯᔑᓄᐋᐧᐨ ᑲᔦ ᑳᒫᒑᐋᐧᐨ ᑳᐃᐧᐣ ᒋᑮᐅᐣᒋ ᐃᓯᐦᓭᓂᐠ ᒋᑮᐄᐧᐦᓯᓄᐋᐧᐨ,

ᒋᓴᐢ ᐅᑮᐦᐃᓈᐣ ᐅᑭᐦᑭᓅᐦᐊᒪᐋᐧᑲᓇᐣ,

“ᐲᔖᔪᐠ ᑮᓇᐋᐧ ᐄᐧᒌᐃᐧᔑᔪᐠ ᐃᐦᐃᒫ ᑳᐃᔑ ᐸᔭᐦᑕᑫᐣᑖᑲᐧᐠ ᒋᐊᓀᐧᔑᓂᔦᐠ ᐊᒋᓇ.”

32 ᒦᑕᓑ ᑳᐃᔑ ᒫᒑᐋᐧᐨ ᐃᐧᓀᐦᑕᐋᐧ ᐃᐦᐃᒫ ᒌᒫᓂᐣᐠ ᐁᑮᐃᔖᐋᐧᐨ ᑳᐃᔑ ᐸᔭᐦᑕᑫᐣᑖᑲᐧᓂᓂᐠ.

33 ᔖᑰᐨ ᒥᐦᔒᐣ ᐅᑮ ᐋᐧᐸᒥᑯᐋᐧᐣ ᐁᓃᑲᑌᓑᑳᐋᐧᐨ ᐁᑮᓂᐦᓯᑕᐃᐧᓈᑰᐋᐧᐨ ᒦᓇ ᐁᑮ ᒧᐦᒋᐸᐦᐃᑎᐋᐧᐨ ᑲᐦᑭᓇ ᑖᐃᐧᓂᐣᐠ ᐅᐣᒋ ᐁᑮ ᐊᓂᓃᑳᓂ ᑕᑯᔑᓄᐋᐧᐨ.

34 ᐊᐦᐲ ᒋᓴᐢ ᑳᑲᐹᐨ ᐅᑮ ᐋᐧᐸᒫᐣ ᐁᒥᐦᔒᓄᓂᐨ ᐊᐃᐧᔭᐣ,

ᐅᑮᑭᑎᒫᑫᓂᒫᐣ ᐊᓂᓑ ᐁᑮ ᐃᔑᐊᔮᐋᐧᐨ ᑖᐱᓑᑰᐨ ᒫᔭᐦᑎᑲᐧᐠ ᐁᑳ ᑳᐊᔮᐋᐧᐋᐧᐨ ᐅᑲᓇᐃᐧᒫᔭᑎᐦᑫᐧᐣ.

ᒋᓴᐢ ᐅᑮ ᐊᓂᒫᒌ ᑭᐦᑭᓄᐦᐊᒪᐋᐧᐣ ᒥᐦᔒᐣ ᑫᑰᓇᐣ.

35 ᐃᐦᐃᐁᐧ ᒣᑳᐧᐨ ᐁᐦᐊᓅᓈᑯᔑᐣᐠ,

ᐅᑭᐦᑭᓅᐦᐊᒪᐋᐧᑲᓇᐣ ᐅᑮ ᐱᓇᓯᐦᑳᑰᐣ ᐁᑮᐦᐃᑯᐨ,

“ᐱᑲᐧᒋᐦᐊᐦᐃᐣᐠ ᐅᐦᐅᒫ,

ᒦᓇ ᐋᔕᐱᐣ ᐅᓅᓈᑯᔑᐣ.

36 ᒫᒌᓂᔕᐦᐅᑯᐠ ᐊᐃᐧᔭᐠ ᒋᐃᔖᐋᐧᐨ ᑳᐃᔑ ᐯᔑᓈᑲᓂᑭᐣ ᐋᐧᐦᑲᐦᐃ ᑕᐃᐧᓀᓴᐣ ᒋᐊᑖᐁᐧᑕᒫᓱᐋᐧᐨ ᑫᑯᓀᐣ ᑫᒦᒋᐋᐧᐨ.”

37 ᒋᓴᐢ ᐅᑮᓇᐦᑲᐁᐧᔑᐦᐋᐣ,

“ᑮᓇᐋᐧ ᒦᓂᐦᑯᐠ ᑫᑰᓀᐣ ᑫᒦᒋᐋᐧᐨ.”

ᐅᑮᐦᐃᓈᐋᐧᐣ ᒋᓴᓲᐣ,

“ᓃᔕᐧ ᒥᑖᐦᓱᒥᑕᓇ ᐃᓂᑯᐠ ᐋᐧᐹᐱᐦᑯ ᔔᓂᔮᓈᐦᐱᑰᐣ ᐁᑎᐸᐦᐊᒪᐋᐧᑲᓅᐨ ᐅᑕᓄᐦᑮ,

ᒦᓇᐦᐃ ᒥᓂᑯᐠ ᑫᒣᑎᓂᑫᔮᐣᐠ ᒋᐊᑖᐁᐧᔮᐣᐠ ᒦᒋᒼ ᒋᐊᔕᒫᔮᐣᐠ.”

38 “ᐋᐣᑕᐦᓰᐣ ᐁᔮᐋᐧᔦᐠ ᐋᓇᐦᑯᓈᐠ ?”

ᐅᑮ ᐃᔑᑲᑫᐧᒋᒫᐣ.

“ᒫᒑᐠ ᐊᐣᑕᐃᐧᓈᐱᔫᐠ.”

ᐊᐦᐲ ᑳᑭᐦᑫᐣᑕᒧᐋᐧᐨ ᑮᐃᐦᑭᑐᐊᐧᐠ,

“ᓂᔮᓇᐣ ᐋᓇᐦᑯᓈᐦᓴᐠ ᒦᓇ ᓃᔑᐣ ᑭᓅᔐᐠ.”

39 ᒋᓴᐢ ᐅᑮᐦᐃᓈᐣ ᒋᐸᐲᐦᑭᓴᐳᐋᐧᐨ ᐊᐃᐧᔭᐠ ᑳᐃᔑ ᒪᓑᑯᔒᐊᐧᓂᓂᐠ.

40 ᒥᑖᐦᓱᒥᑕᓇ ᒦᓇ ᓂᔮᓄᒥᑕᓇ ᑮᐃᔑ ᐋᐧᐅᐦᑲᐧᐳᐊᐧᐠ.

41 ᒋᓴᐢ ᐅᑮᐅᑖᐦᐱᓈᐣ ᓂᔮᓇᐣ ᐋᓇᐦᑯᓈᓴᐣ ᒦᓇ ᓃᔑᐣ ᑭᓅᔐᐣ ᐁᑮᐃᓈᐱᐨ ᐃᓑᐱᒥᐣᐠ ᑭᐦᒋᑮᔑᑯᐣᐠ,

ᑮᓇᓈᐦᑯᒥ ᒦᓇ ᐅᑮᐸᐦᑫᐧᓈᐣ ᐋᓇᐦᑯᓈᐣ.

ᐅᑮᒦᓈᐣ ᐅᑭᐦᑭᓅᐦᐊᒪᐋᐧᑲᓇᐣ ᒋᐊᑭᓀᒦᓈᓂᐨ ᐊᐃᐧᔭᐣ.

ᒋᓴᐢ ᑲᔦ ᐅᑮᓀᓈᐃᐧᓈᐣ ᓃᔑᐣ ᑭᓅᔐᐣ ᒋᐊᑭᓀᒦᓃᐣᑖᐧ ᐊᐃᐧᔭᐠ.

42 ᑲᐦᑭᓇ ᑮᑌᐱᐄᐧᐦᓯᓄᐋᐧᐠ ᒦᓇ ᑮᓇᐦᐁᐣᑕᒨᐠ.

43 ᑭᐦᑭᓅᐦᐊᒪᐋᐧᑲᓇᐠ ᐅᑮᒨᔕᑭᓇᓈᐋᐧ ᑳᐃᓑᑯᐦᓭᓂᑭᐣ ᒥᑖᐦᓱ ᓃᔓᔖᑊ ᐊᐧᑕᐲᐊᓯᐊᐧᒋᑲᓇᐣ ᐁᔖᑲᓑᑭᓀᓂᑭᐣ ᐋᓇᐦᑯᓈᓴᐣ ᒦᓇ ᑭᓅᔐᐣ.

44 ᐃᑭᐁᐧᓂᐊᐧᐠ ᑳᑮᐄᐧᐦᓯᓂᐋᐧᐨ ᓈᐣᑕ ᓂᔮᓇᐧ ᑭᐦᒋᒥᑖᐦᓱᒥᑕᓇ ᑮᑕᓱᐊᐧᐠ ᓈᐯᐊᐧᐠ.

45 ᔐᒫᐠ ᒋᓴᐢ ᐅᑮᑲᓅᓈᐣ ᐅᑭᐦᑭᓅᐦᐊᒪᐋᐧᑲᓇᐣ ᒋᐴᓯᓂᐣᐨ ᒌᒫᓂᐣᐠ ᒋᓃᐊᐱᐦᒋ ᐋᔓᐦᐊᒥᓂᐨ ᐯᐟᓭᑕ ᑖᐃᐧᓂᐣᐠ,

ᒋᓴᐢ ᐅᑮᐦᐃᓈᐣ ᐃᐦᐃᒫ ᑳᐊᔮᓂᐨ ᒋᑮᐁᐧᓂᐣᐨ.

46 ᐊᐦᐱᐣ ᑳᐃᓑᑲᐧ ᓇᑲᓈᒋᐣ ᑮᐦᐃᔖ ᐱᐦᑲᐧᑎᓈᐣᐠ ᐁᑮᐊᔭᒥᐦᒋᑫᐨ.

47 ᐁᑲᐧᐦᐱᐣ ᐋᔕ ᐁᐊᓅᓈᑯᔑᐣᐠ,

ᐋᔕ ᓈᓀᐤ ᓵᑲᐦᐃᑲᓃᐣᐠ ᑮᐊᔮᐊᐧᐠ ᑭᐦᑭᓅᐦᐊᒪᐋᐧᑲᓇᐠ,

ᐁᑲᐧᐄᐧᐣ ᒋᓴᐢ ᐄᐧᓀᐦᑕ ᐃᐦᐃᒫ ᑮᐦᐊᔮ ᐱᑲᐧᑕᐦᑮᐣᐠ.

48 ᐅᑮᐋᐧᐸᒫᐣ ᐅᑭᐦᑭᓅᐦᐊᒪᐋᐧᑲᓇᐣ ᐁᓰᐣᒌᓂᐨ ᐁᐦᐊᔓᐋᐧᐦᑲᐧᔓᐁᐧᓂᐣᐨ,

ᐊᓂᓑ ᐁᐅᐣᒋᓑᑲᐃᐧᓄᐁᐧᓂᐠ.

ᐄᐧᐸᐨ ᐁᑭᔐᐹᔮᐠ ᒋᓴᐢ ᐅᑮᓈᓯᐦᑲᐋᐧᐣ ᐁᑮᐱᒧᐦᓭᐨ ᐊᐧᑭᒋᐲᐣᐠ.

ᑫᑳᐟ ᐁᐦᐊᓂᐊᓭᓑᑲᐋᐧᒋᐣ,

49 ᔖᑰᐨ ᐊᐦᐱᐣ ᑳᐋᐧᐸᒥᑯᐨ ᐁᐱᒧᐦᓭᐨ ᐊᐧᑭᒋᐲᐣᐠ,

ᒌᐸᔾ ᒫᐃᐧᓇᐦᐊ ᐁᑮᐃᓀᐣᑕᒧᐋᐧᐨ,

ᑮᔖᑯᐁᐧᐊᐧᐠ.

50 ᑲᐦᑭᓇ ᐁᑮ ᐋᐧᐸᒫᐋᐧᐨ ᒦᓇ ᐁᑮ ᓭᑭᓯᐋᐧᐨ.

ᔐᒫᐠ ᐅᑮᑲᓅᓈᐣ ᐁᐃᐦᑭᑐᐨ,

“ᑳᐃᐧᐣ ᓭᑭᓯᔪᐠ,

ᓃᐣ ᔕ.”

51 ᑮᐴᓯ ᒌᒫᓂᐣᐠ ᐁᑲᐧᐦᐱᐣ ᑮᑭᐱᐦᒋᓄᐁᐧ.

ᒥᑐᓂ ᑮᒫᒪᑳᑌᐣᑕᒨᐠ.

52 ᑳᐃᐧᐣ ᒋᐅᐣᒋ ᓂᓯᑕᐁᐧᐣᑕᒧᐋᐧᐨ ᑫᑰᓀᐣ ᐃᐦᐃᐁᐧ ᑳᑮᐅᐣᒋ ᐸᑫᐧᓂᒥᐣᐨ ᐋᓇᐦᑯᓈᐣ,

ᐊᓂᓑ ᑮᒪᓑᑲᐊᐧᐦᑌᓂ ᐅᑌᐦᐄᐋᐧ.

53 ᐊᐦᐱᐣ ᑳᐊᔕᐊᐧᐦᐊᒨᐋᐧᐨ ᑮᑕᑯᐦᔑᓅᐠ ᐃᐦᐃᒫ ᑫᓀᓴᕒᐃᐟ ᐊᐦᑮᐣᐠ ᐅᑮ ᑭᐦᒋᐊᐧᐦᐱᑑᓈᐋᐧ ᐅᒌᒫᓂᐋᐧ.

54 ᐊᐦᐲ ᐁᐦᑲᐹᐋᐧᐨ ᒌᒫᓂᐣᐠ,

ᒋᓴᐢ ᐅᑮ ᓂᐦᓯᑕᐃᐧᓈᑰᐣ ᐊᐃᐧᔭᐣ.

55 ᑮᐹᐹᒼᐸᐦᐃᑎᐊᐧᐠ ᒥᓯᐁᐧ ᐃᐦᐃᒫ ᐊᐦᑮᐣᐠ ᒦᓇ ᑳᔮᐦᑯᓯᓂᐨ ᐅᑕᐱᔔᒥᓂᓃᐣ ᑳᐱᒥᔑᓂᓂᐣᐨ ᐅᑮᐦᐃᔓᑕᒪᐋᐧᐋᐧᐣ ᒋᓴᓲᐣ ᐁᓅᐣᑕᒧᐋᐧᐨ ᐃᐦᐃᒫ ᐁᐦᐊᔮᓂᐨ.

56 ᐋᐣᑎ ᐱᑯᐦ ᒋᓴᐢ ᑳᐊᐃᔖᐨ ᑕᔒᐦᑫᐃᐧᓂᐣᐠ,

ᑭᐦᒋᑖᐃᐧᓂᐣᐠ ᓈᐣᑕ ᐅᐦᐱᒣᐦᐃ,

ᐅᑮᐲᓈᐋᐧᐣ ᑳᐋᐦᑯᓯᓂᐨ ᑳᑕᓇᑖᐋᐧᓂᐊᐧᓂᐠ.

ᐅᑮ ᐸᑯᐦᓭᓂᒫᐋᐧᐣ ᒋᓴᓲᐣ ᒋᐸᑭᑎᓂᑯᐋᐧᐨ ᒋᓵᒥᓈᒥᓂᐨ ᑳᐃᔑ ᑎᐦᑎᐱᑲᐧᑌᓂᐠ ᐅᒪᑰᑖᓃᐣ,

ᑲᐦᑭᓇ ᑳᑮᓵᒥᓈᐋᐧᐨ ᑮᒥᓄᐊᔮᐊᐧᐠ.