ᒋᓴᐢ ᑳᑮᓇᐣᑕᐃᐧᐋᐨ ᑳᑭᐦᑭᓑᑳᑯᓂᐨ ᒪᒋᐊᒑᐦᑲᐧᐣ
5
ᒋᓴᐢ ᒦᓇ ᐅᑭᐦᑭᓅᐦᐊᒪᐋᐧᑲᓇᐣ ᑮᐋᔓᑳᒣᐦᐊᒨᐠ ᓵᑲᐦᐃᑲᓃᐣᐠ ᐃᐦᐃᒫ ᐅᑕᐦᑮᐋᐧ ᑫᕒᐊᓯᐃᐧᓂᓂᐊᐧᐠ.
2 ᐊᐦᐲ ᒋᓴᐢ ᐁᐦᑲᐹᐨ ᒌᒫᓂᐣᐠ,
ᔐᒫᐠ ᐅᑮ ᐱᓈᑭᓑᑳᑰᐣ ᓈᐯᐊᐧᐣ ᒪᒋᐊᐦᒑᐦᑲᐧᐣ ᐁᐲᐣᒋᓑᑳᑯᓂᐨ ᓇᐦᐃᓂᑐᐃᐧᑲᒥᑰᐣᐠ ᐁᐦᐅᐣᑐᓭᓂᐣᐨ.
3 ᐊᐧᐦᐊᐁᐧ ᓈᐯ ᐁᑮᑲᐯᔑᐨ ᐃᐦᐃᒫ ᓇᐦᐃᓂᑐᐃᐧᑲᒥᑰᐣᐠ,
ᒦᓇ ᑳᐃᐧᐣ ᐊᐊᐧᔑᒣ ᐊᐃᐧᔭ ᒋᐅᐣᒋ ᑲᓑᑭᐦᐋᐨ ᒋᒪᒫᐣᒋᑲᐧᐱᓈᐨ ᐲᐋᐧᐱᑯ ᓴᑲᐱᓯᓃᔮᐱᓂ ᐁᐦᐋᓇ ᐋᐸᑕᓂᓂᐠ.
4 ᒥᐦᔒᓇᐧ ᐋᓇᑮ ᒪᒫᒋᑲᐧᐱᓱᐨ ᐅᓂᐣᒌᐣᐠ ᒦᓇ ᐅᓯᑎᐣᐠ,
ᔖᑰᐨ ᐅᑮ ᐹᐸᑭᐱᑑᓇᐣ ᐲᐋᐧᐱᑯᐦᔮᐲᐣ ᐃᐦᐃᒫ ᐅᓂᐣᒌᐣᐠ ᒦᓇ ᐅᓯᑎᐣᐠ.
ᑳᐃᐧᐣ ᐊᐃᐧᔮ ᒋᐅᐣᒋ ᑌᐱᐊᐲᐦᒋ ᒪᓑᑲᐃᐧᓰᐨ ᒋᑮᑭᐦᒋᐃᐧᐦᐋᐨ.
5 ᐁᑎᐱᐦᑳᓂᐠ ᒦᓇ ᐁᑮᔑᑳᓂᐠ ᒦᐦᐃᒫ ᑳᐊᔮᐨ ᒣᑫᐧᐦᐄ ᓇᐦᐃᓂᑐᐃᐧᑲᒥᑰᐣᐠ ᒦᓇ ᑳᐃᔑ ᐸᐲᐦᑲᐧᑎᓈᓂᐠ ᐁᑮ ᔖᔖᑯᐁᐧᐨ ᑲᔦ ᐁᑮ ᐹᐦᐯᔑᐁᐧᐸᐦᐅᑎᓱᐨ ᐊᐦᓯᓃᐣ.
6 ᐊᐦᐲ ᑳᐋᐧᐸᒫᐨ ᒋᓴᓲᐣ ᑳᐊᐦᑯ ᑌᐱᓈᑲᐧᓂᓂᐠ,
ᑮᐃᐸᐦᑑ ᒦᓇ ᑮᐸᐣᑭᔑᐣ ᐁᐅᐣᒋᒌᑲᐧᓇᐱᐨ ᐁᓈᓴᒦᓂᐣᐨ.
7 ᑮᑭᐦᒋᔖᑯᐁᐧ,
“ᑫᑯᓀᐣ ᓇᐣᑕᐁᐧᐣᑕᒪᐃᐧᔑᔭᐣ ᒋᓴᐢ ᑳᐅᑯᓯᓯᒥᐠ ᑳᐃᓑᐯᐣᑖᑯᓯᐨ ᑭᔐᒪᓂᑑ?
ᐁᐅᐣᒋ ᐊᐦᐱᒧᔮᐣ ᑭᔐᒪᓂᑑ ᐁᑳ ᒋᑲᑲᐧᑕᑭᐦᐃᔑᔭᐣ.”
8 ᒋᓴᐢ ᐋᔕ ᐅᑮ ᑲᓅᓈᐸᓃᐣ,
“ᓵᑲᐦᐊᐣ ᐃᐦᐃᒫ ᓈᐯᐦᑳᐣᐠ ᑮᐣ ᒪᒋᐊᐦᒑᐠ.”
9 ᐁᑲᐧᐦᐱᐣ ᒋᓴᐢ ᐅᑮ ᑲᑫᐧᒋᒫᐣ,
“ᐋᓃᐣ ᐁᔑᓂᑳᓯᔭᐣ ?”
11 ᐃᐦᐃᒫ ᓀᔮᒪᑎᐣ ᑮᐊᔮᐊᐧᐠ ᒥᐦᔒᐣ ᑰᐦᑰᔕᐠ ᐁᐄᐧᐦᓯᓂᐋᐧᐨ.
12 ᒪᒋᐊᐦᒑᑲᐧᐠ ᐁᑮ ᐸᑯᐦᓭᓂᒫᐋᐧᐨ ᒋᓴᓲᐣ,
“ᐃᐦᐃᒫ ᐃᔑᓂᔕᐦᐅᔑᓈᐣ ᒣᑫᐧᐦᐃ ᑰᐦᑰᔕᐠ ᑳᐃᔑ ᐊᔮᐋᐧᐨ ᒋᐲᐣᒋᓑᑲᐊᐧᔮᐣᐠ.”
13 ᒦᑕᓑ ᑳᐃᔑ ᐸᑭᑎᓈᐨ,
ᒪᒋᐊᐦᒑᑲᐧᐠ ᑮᐱᓵᑲᐦᐊᒨᐠ ᐃᐦᐃᒫ ᓈᐯᐦᑳᐣᐠ ᒦᓇ ᐁᑮ ᐲᐣᑎᑫᓑᑲᐋᐧᐋᐧᐨ ᑰᐦᑰᔕᐣ.
ᐁᑮᒥᐦᔒᓄᐋᐧᐨ ᐃᑭ ᑰᐦᑰᔕᐠ ᓈᐣᑕ ᓃᔕᐧ ᑭᐦᒋᒥᑖᐦᓱᒥᑕᓇ ᐁᑮᑕᓱᐋᐧᐨ,
ᐁᑮᓈᓯᐲᐸᐦᐃᑐᐋᐧᐨ ᑳᐃᔑ ᑮᓑᑲᑎᓈᓂᐠ ᓵᑲᐦᐃᑲᓃᐣᐠ,
ᐁᑮᓂᓵᐹᐁᐧᐋᐧᐨ.
14 ᐃᑭᐁᐧᓂᐊᐧᐠ ᑳᑲᓇᐁᐧᓂᒫᐋᐧᐨ ᑰᐦᑰᔕᐣ ᑮᒫᒋᐸᐦᐃᑎᐊᐧᐠ ᐁᑮ ᐊᐣᑕᐃᐧᑎᐹᒋᒧᐋᐧᐨ ᑖᐃᐧᓂᐣᐠ ᒦᓇ ᐊᐧᑳᐦᐃ ᑳᐊᔮᓂᐣᐨ,
ᑮᐃᔖᐊᐧᐠ ᐊᐃᐧᔭᐠ ᐁᑮ ᐊᐣᑕᐃᐧᓈᐳᐋᐧᐨ ᑳᑮᐃᔑᐁᐧᐸᓂᓂᐠ.
15 ᐁᑲᐧᐦᐱᐣ ᐅᑮᐱᓈᓯᐦᑲᐋᐧᐋᐧᐣ ᒋᓴᓲᐣ,
ᐁᑮ ᐋᐧᐸᒫᐋᐧᐨ ᓈᐯᐊᐧᐣ ᑳᐲᐣᒋᓑᑯᐦᐸᐣ ᒥᐦᔒᐣ ᒪᒋᐊᐦᒑᐦᑲᐧᐣ ᐁᐊᐱᓂᐣᐨ ᐁᑭᑳᐱᓱᓂᐣᐨ ᑲᐧᔭᐠ ᐁᐃᔑ ᒫᒥᑐᓀᐣᒋᑲᓂᓂᐨ,
ᒦᓇ ᐁᑮᓭᑭᓯᐋᐧᐨ.
16 ᐃᑭᐁᐧᓂᐊᐧᐠ ᑳᑮᐋᐧᐸᐣᑫᐋᐧᐨ ᐅᑮᐃᐧᐣᑕᒪᐋᐧᐋᐧᐣ ᐊᐃᐧᔭᐣ ᑳᑮᐃᔑᐁᐧᐱᓯᓂᐨ ᑳᐲᐣᒋᓑᑳᑯᐦᐸᐣ ᒪᒋᐊᐦᒑᐦᑲᐧᐣ ᒦᓇ ᑲᔦ ᐅᑮᐃᐧᐣᑖᓈᐋᐧ ᑳᑮᐃᔑᐁᐧᐱᓯᓂᐣᐨ ᑰᐦᑰᔕᐣ.
17 ᐁᑲᐧᐦᐱᐣ ᐊᐃᐧᔭᐠ ᐅᑮ ᑲᓅᓈᐋᐧᐣ ᐁᐸᑯᐦᓭᓂᒫᐋᐧᐨ ᒋᓴᓲᐣ ᒋᓃᑲᑌᓑᑳᓂᐣᐨ ᐃᐦᐃᒫ ᐅᑕᐦᑮᐋᐧ.
18 ᐊᐦᐲ ᒋᓴᐢ ᐁᐊᓂᐴᓯᐨ ᒌᒫᓂᐣᐠ,
ᐊᐦᐊᐁᐧ ᓈᐯ ᑳᐲᐣᒋᓑᑳᑯᐦᐸᐣ ᒪᒋᐊᐦᒑᐦᑲᐧᐣ ᐅᑮᐸᑯᐦᓭᓂᒥᑰᐣ ᐁᐦᐃᐧᒫᒋᐃᐧᒌᐃᐧᑯᐨ.
19 ᑳᐃᐧᐣ ᒋᓴᐢ ᒋᐅᐣᒋ ᐸᑭᑎᓈᐨ,
ᔖᑰᐨ ᐅᑮᐦᐃᓈᐣ,
“ᒫᒑᐣ ᑮᐁᐧᐣ ᒋᐃᐧᐣᑕᒪᐊᐧᑖᐧ ᑭᑎᐯᓂᒫᑲᓇᐠ ᐋᓃᐣ ᒥᓂᑰᐠ ᑳᑎᐯᐣᒋᑫᐨ ᑳᑮᑑᑕᒪᐃᐧᐠ ᒦᓇ ᑳᑮᐃᔑ ᑭᑎᒫᑭᓇᐃᐧᐠ.”
20 ᓈᐯ ᑮᒫᒑ ᐁᑮ ᐸᐹᒥᐃᐧᐣᑕᒫᑫᐨ ᐋᓃᐣ ᒋᓴᓲᐣ ᑳᑮᑑᑕᒫᑯᐨ ᐃᐦᐃᒫ ᑎᑳᐳᓬᐃᐢ ᐊᐦᑮᐣᐠ.
ᑲᐦᑭᓇ ᐊᐃᐧᔭᐠ ᑮᒫᒪᑳᑌᐣᑕᒨᐠ.
ᒋᓴᐢ ᑳᑮᐊᐣᑕᐃᐧᐦᐋᐨ ᒑᐃᕒᐊᐢ ᐅᑖᓂᓴᐣ ᒦᓇ ᐯᔑᐠ ᐃᐦᑫᐧᐊᐧᐣ
21 ᐊᐦᐲ ᒋᓴᐢ ᑳᑮᐁᐧᐋᔔᑳᒣᐦᐊᐣᐠ ᑫᐧᐦᑲᑳᒼ,
ᒥᐦᔒᐣ ᐊᐃᐧᔭᐠ ᑮᒫᐊᐧᒋᐦᐃᑐᐊᐧᐠ ᐁᑮ ᐋᐧᐦᑳᓑᑳᐋᐧᐋᐧᐨ ᒋᓴᓲᐣ ᒣᑳᐧᐨ ᒌᑫᐤ ᓵᑲᐦᐃᑲᓂᐣᐠ ᐁᐦᐊᔮᐨ.
22 ᐁᑲᐧ ᐯᔑᐠ ᑮᐲᔖ ᑳᐅᑭᒫᑲᑕᐣᐠ ᒍᐊᐧᐠ ᐅᑕᔭᒥᐦᐋᐃᐧ ᒫᐊᐧᒋᐦᐃᑐᐃᐧᑲᒥᑯᐋᐧ,
ᒑᐃᕒᐊᐢ ᐁᐃᔑᓂᐦᑳᓱᐨ.
ᐊᐦᐱᐣ ᑳᐋᐧᐸᒫᐨ ᒋᓴᓲᐣ ᑮᐸᐣᑭᔒᐣ ᐅᓯᑎᓃᐣ ᐃᓀᐦᑫ,
23 ᒫᐊᐧᐨ ᐁᑮᐸᑯᐦᓭᓂᒫᐨ ᐁᐦᐃᓈᐨ,
“ᓂᑖᓂᓭᐢ ᐋᔕ ᑫᑳᐟ ᐃᓑᑳᐧᐱᒫᑎᓯ.
ᐲᔖᐣ ᒋᐱᓵᒥᓇᐨ ᒋᒥᓄᐊᔮᐨ ᒦᓇ ᒋᐱᒫᑎᓯᐨ.”
24 ᐁᑲᐧ ᒋᓴᐢ ᐅᑮᒫᒋᐃᐧᒌᐋᐧᐣ.
ᒥᔒᐣ ᐊᐃᐧᔭᐠ ᐅᑮ ᐱᒥᓂᔕᐦᐅᑰᐣ ᑲᔦ ᐁᑮ ᐁᓈᓄ ᓂᐁᐧᐱᓑᑰᑖᑎᐋᐧᐨ ᑳᐃᔑᐊᔮᐨ.
25 ᐃᐦᐃᒫ ᑮᐦᐊᔮ ᐃᐦᑫᐧ ᐁᑮ ᐅᐣᒋᑲᐃᐧᓂᐠ ᐅᒥᐢᑯ ᓃᔓᔕᑊ ᑕᐦᓱ ᐊᐦᑮ.
26 ᐁᑮᐃᐧᓴᑫᐣᑕᐣᐠ ᐋᓇᑮ ᑲᑫᐧᐊᐣᑕᐃᐧᐦᐃᑯᐨ ᒥᐦᔒᐣ ᒪᓑᑭᑮᐃᐧᓂᐊᐧᐣ ᒦᓇ ᒥᐢᑕᐦᐃ ᐁᑮ ᒣᐦᑎᓂᑫᐨ ᒥᓂᑯᐠ ᑳᑮᐊᔮᐋᐧᐨ ᔔᓂᔮᓇᐣ,
ᑳᐃᐧᐣ ᒋᐅᐣᒋ ᐃᐧᒥᓄᐊᔮᐨ ᐋᐣᒋᑯ ᐱᑯᐦ ᑮᐊᓂᐋᐦᑯᓯ.
27 ᐊᐦᐊᐁᐧ ᐃᐦᑫᐧ ᐁᑮᓅᐣᑕᐣᐠ ᐁᑎᐹᒋᒥᒥᐣᐨ ᒋᓴᓲᐣ,
ᐅᑖᓈᐣᐠ ᐅᑮ ᐅᐣᒋ ᐱᓈᓯᐦᑳᐋᐧᐣ ᒣᑫᐧᐦᐃ ᑳᐃᔑ ᒥᐦᔒᓄᓈᓂᐊᐧᓂᓂᐠ ᒦᓇ ᐁᑮᓵᒥᓇᐣᐠ ᐅᒪᑰᑖᓃᐣ,
28 ᐊᓂᓑ ᐁᑮᐃᓀᐣᑕᐣᐠ,
“ᑮᓑᐱᐣ ᑲᓇᑫ ᓵᒥᓇᒪᐧᐠ ᐅᒪᑰᐟ,
ᓂᑲᒥᓄᐊᔮ.”
29 ᔐᒫᐠ ᑮᐳᓂᐅᐣᒋᑲᐃᐧᓂᓂ ᐅᒥᐢᑯ ᒦᓇ ᐅᑮᑭᐦᑫᐣᑖᐣ ᐅᐄᐧᔭᐃᐧᐣᐠ ᐁᒥᓄᐊᔮᐨ ᑳᑮᐃᔑ ᑲᑲᐧᑕᑭᑑᐨ.
30 ᔐᒫᐠ ᒋᓴᐢ ᐅᑮᑭᐦᑫᐣᑖᐣ ᐅᒪᓑᑲᐃᐧᓰᐃᐧᐣ ᐁᓵᑲᐦᐊᒧᒪᑲᓂᐠ.
ᒋᓴᐢ ᑮᑫᐧᑭᑳᐸᐃᐧ ᑳᐃᔑ ᒥᐦᔒᓄᓈᓂᐊᐧᓂᓂᐠ ᐁᑮᐃᐦᑭᑐᐨ,
“ᐊᐊᐧᓀᐣ ᑳᓵᒥᓇᐣᐠ ᓂᒪᑰᑖᓂ?”
31 ᐅᑮᐦᐃᑰᐣ ᐅᑭᐦᑭᓅᐦᐊᒪᐋᐧᑲᓇᐣ,
“ᑭᐋᐧᐸᒫᐠ ᓇ ᑳᐲᐦᒋᒥᔒᓄᐋᐧᐨ ᐊᐃᐧᔭᐠ ᑳᓵᓵᒥᓑᑲᐃᐧᑳᐧ,
ᐁᑲᐧ ᐁᐦᐃᑭᑎᔭᐣ ‘ᐊᐊᐧᓀᐣ ᑳᓵᒥᓂᔑᐨ?’ ”
32 ᔖᑰᐨ ᑮᔮᐱᐨ ᒋᓴᐢ ᑮᐋᐃᓈᐱ ᐁᐃᐧᐋᐧᐸᒫᐨ ᐊᐊᐧᓀᓇᐣ ᑳᑑᑕᒥᓂᐣᐨ.
33 ᐁᑲᐧ ᐃᐦᑫᐧ ᐁᑭᐦᑫᐣᑕᐣᐠ ᑳᑮᐃᔑ ᓇᓈᐣᑕᐃᐧᐦᐃᑯᐃᐧᔑᐨ,
ᑮᐲᔖ ᐁᑮ ᐸᐣᑭᔑᐣ ᒋᓴᐢ ᐅᓯᑎᐣᐠ ᐃᓇᐦᑫ ᐁᑮᓂᓂᑭᓭᐨ ᐁᓭᑭᓯᐨ,
ᑲᐦᑭᓇ ᑫᑰᓂ ᐅᑮ ᐃᐧᐣᑕᒪᐋᐧᐣ ᑌᐯᐧᐃᐧᓂᐣᐠ.
34 ᒋᓴᐢ ᐅᑮᐦᐃᓈᐣ,
“ᓂᑖᓂᐢ,
ᑭᑌᐯᐧᔦᐣᑕᒧᐃᐧᐣ ᑭᓇᐣᑕᐃᐧᐦᐃᑯᐣ.
ᒫᒑᐣ ᐸᔭᐦᑕᑫᓂᒧᐃᐧᓂᐣᐠ ᑳᐃᐧᐣ ᒦᓇᐋᐧ ᑲᐃᔑ ᑲᑲᐧᑕᑭᐦᑐᓰᐣ.”
35 ᒣᑳᐧᐨ ᑮᔮᐱᐨ ᒋᓴᐢ ᐁᑲᑭᑐᐨ,
ᐋᐣᑕ ᓈᐯᐊᐧᐣ ᑮᐱᑕᑯᐦᔑᓅᐠ ᒑᐃᕒᐊᐢ ᐅᐊᐧᑲᐦᐃᑲᓂᐣᐠ ᐁᑮ ᐅᐣᑐᓭᐋᐧᐨ,
ᑳᐅᑭᒫᑲᑕᐣᐠ ᒍᐊᐧᐠ ᐅᑕᔭᒥᐦᐋᐃᐧ ᒫᐊᐧᒋᐦᐃᑐᐃᐧᑲᒥᑯᐋᐧ ᐁᑮᐦᐃᓈᐋᐧᐨ,
“ᑭᑖᓂᐢ ᑮᐃᓑᑲᐧᐱᒫᑎᓯ,
ᑳᐃᐧᐣ ᑮᔮᐱᐨ ᒥᑯᓑᑳᒋᐦᐃᐠ ᐅᑭᐦᑭᓅᐦᐊᒫᑫ.”
36 ᑳᐃᐧᐣ ᒋᐅᐣᒋ ᐸᐹᒥᐦᑕᐋᐧᒋᐣ ᑳᐃᐦᑭᑐᓂᐨ,
ᒋᓴᐢ ᐅᑮᐦᐃᓈᐣ ᐊᔭᒥᐦᐋᐃᐧ ᐅᓃᑳᓃᐦᑕᒫᑫ ᒑᐃᕒᐊᐢ,
“ᑳᐃᐧᐣ ᒥᑯᓑᑳᑌᐣᑕᐣ,
ᐱᑯᐦ ᑌᐯᐧᐦᑕᐣ.”
37 ᑳᐃᐧᐣ ᒋᐅᐣᒋ ᐸᑭᑎᓈᐨ ᐊᐃᐧᔭᐣ ᒋᐱᒥᓂᔕᐦᐅᑯᐨ ᐱᑯᐦ ᐁᐦᑕ ᐲᑕᕒᐊᐧᐣ,
ᒉᒥᐢ ᒦᓇ ᒐᐧᐣ ᐅᐄᐧᒋᐦᑫᐧᓯᐊᐧᐣ ᒉᒥᐢ.
38 ᐊᐦᐲ ᑳᐱᑕᑯᔑᓄᐋᐧᐨ ᐊᔭᒥᐦᐋᐃᐧ ᐅᓃᑳᓃᐦᑕᒫᑫ ᐅᐊᐧᑳᐦᐃᑲᓂᐣᐠ,
ᒋᓴᐢ ᐅᑮᐋᐧᐸᐣᑖᐣ ᑳᐃᓇᐦᑲᒥᑲᓂᐠ.
ᐊᐃᐧᔭᐠ ᐁᒪᐃᐧᐋᐧᐨ ᒦᓇ ᐁᑭᐦᒋᑲᑲᐧᑕᑲᑌᒧᓈᓂᐊᐧᐣᐠ.
39 ᒋᓴᐢ ᑮᐱᐣᑎᑫ ᒦᓇ ᐁᑮᐦᐃᓈᒋᐣ,
“ᑫᑯᓀᐣ ᐁᐧᐣᒋᒥᑯᓑᑳᒋᐊᔮᔦᐠ ᒦᓇ ᑳᒪᐃᐧᔦᐠ ?
ᑳᐃᐧᐣ ᐃᐦᑫᐧᓭᐢ ᓂᐳᓰᐣ,
ᓂᐹ ᐱᑯᐦ.”
40 ᐅᑮᐦᐸᐹᐱᐦᐋᐋᐧᐣ.
ᑳᐃᓑᑲᐧ ᓵᑭᒋᓂᔕᐦᐋᐧᒋᐣ,
ᐅᑮᐃᔑᐃᐧᓈᐣ ᐅᑖᑖᒥᓃᐣ ᒦᓇ ᐅᒫᒫᒥᓃᐣ ᑕᑯ ᑭᐦᑭᓅᐦᐊᒪᐋᐧᑲᓇᐠ ᑳᐃᐧᒋᐃᐧᑯᐨ,
ᑮᐱᐣᑎᑫᐊᐧᐠ ᐃᐦᐃᒫ ᐃᐦᑫᐧᓭᓴᐣ ᑳᐃᔑ ᐱᒥᔑᓂᓂᐨ.
41 ᒋᓴᐢ ᐅᑮᓴᑭᓂᒌᓈᐣ ᐅᑮᐦᐃᓈᐣ,
“ᑖᓬᐃᑕ ᑰᒼ.”
(ᐃᐦᐃᐁᐧ ᑳᐃᒋᑳᑌᐠ “ᐃᐦᑫᐧᓭᐢ ᐊᐧᓂᓑᑳᐣ ᑭᑎᓂᐣ.”)
42 ᔐᒫᐠ ᑮᐊᐧᓂᓑᑳ ᐃᐦᑫᐧᓭᐢ ᒦᓇ ᐁᑮᐸᐹᒧᓭᐨ ᐁᑮ ᓃᔓᔖᐱᔭᑮᐃᐧᓀᐨ.
ᐊᐦᐲᑕᓑ ᐅᐦᐅᐁᐧ ᑳᐃᔑᐁᐧᐸᐠ ᑮᑭᐦᒋᒫᒪᑳᑌᐣᑕᒧᐠ ᐃᑭᐁᐧᓂᐊᐧᐠ ᑳᑮᐲᐣᑎᑫᐃᐧᒋᐃᐧᑯᐨ.
43 ᒥᑐᓂ ᐅᑮ ᐊᔮᐣᑳᐧᒥᒫᐣ ᐁᑳ ᐊᐃᐧᔭᐣ ᒋᑭᐦᑫᐣᑕᒥᓂᐨ ᐅᐦᐅᐁᐧ ᑳᑮᐃᓯᓭᓂᐠ,
ᒦᓇ ᐁᑮ ᐃᐧᐣᑕᒪᐋᐧᐨ ᒋᒦᓂᒥᐣᐨ ᑫᑰᓂ ᑫᒦᒋᐨ ᐅᓄᐁᐧᓂᐊᐧᐣ ᐃᐦᑫᐧᓭᓴᐣ.