ᒋᓴᐢ ᐁᐦᐋᐁᐧᐦᒋᑳᑫᐨ ᐅᑮᐦᑎᑫᐣ
4
ᒦᓇᐋᐧ ᒋᓴᐢ ᑮᐊᓂ ᒫᒌᑭᐦᑭᓅᐦᐊᒫᑫ ᓵᑲᐦᐃᑲᓃᐣᐠ.
ᑮᒥᐦᔒᓄᐊᐧᐠ ᐊᐃᐧᔭᐠ ᐃᐦᐃᒫ ᐁᑮ ᐋᐧᐦᑲᑲᐸᐃᐧᑖᑯᐨ.
ᑮᐴᓯ ᒌᒫᓂᐣᐠ ᐁᑮ ᓂᒥᓈᐁᐧᓇᐣᐠ ᐁᑮᐦᐊᐱᐨ,
ᒣᑳᐧᐨ ᐊᐃᐧᔭᐠ ᐁᐦᐊᔮᐋᐧᐨ ᓈᓀᐤ ᓵᑲᐦᐃᑲᓂᐣᐠ.
2 ᒥᐦᔒᐣ ᑫᑰᓇᐣ ᐅᑮ ᑭᐦᑭᓄᐦᐊᒪᐋᐧᐣ ᐁᐦᐋᐁᐧᐦᒋᑫᐨ ᒦᓇ ᐁᑮᐦᐃᑭᑐᐨ ᐅᑭᐦᑭᓄᐦᐊᒫᑫᐃᐧᓂᐣᐠ,
3 “ᓇᐣᑐᐦᑕᒧᐠ,
ᐯᔑᐠ ᐅᑭᐦᑎᑫ ᐁᑮᒫᒑᐨ ᐁᑮ ᐊᐣᑕᐊᐧᐦᓭᐁᐧᐱᓇᐣᑭᐣ ᑭᐦᑎᑳᓀᓴᐣ.
4 ᒣᑳᐧᐨ ᐁᐊᐧᐦᓭᐁᐧᐱᓇᐣᑭᐣ ᑭᐦᑎᑳᓀᓴᐣ,
ᐋᐣᑕ ᑮᐃᔑᐸᐣᑭᓯᓅᐣ ᐸᐦᑫᑲᓇ,
ᐱᓀᔒᔕᐠ ᐅᑮ ᐱᑭᑖᓈᐋᐧ.
5 ᐋᐣᑕ ᑮᐃᔑ ᐸᐣᑭᓯᓅᐣ ᑳᐃᔑ ᐊᓯᓃᐃᐧᐦᑲᒥᑳᐠ ᐁᑳ ᒥᐢᑕᐦᐃ ᑳᐃᔑ ᐊᐦᑮᐊᐧᐣᐠ,
ᔐᒫᐠ ᑮᓂᐦᑖᐃᐧᑮᒪᑲᓅᐣ ᐊᓂᓑ ᐁᑳ ᐁᑭᐸᑲᐦᑲᒥᐦᑳᐠ.
6 ᐊᐦᐲ ᐲᓱᒼ ᑳᓵᑳᓯᑫᐨ ᑮᒑᑭᑌᐊᐧᐣ ᑭᐦᑎᑳᓇᐣ,
ᒦᓇ ᑮᓂᐴᒪᑲᓅᐣ ᐊᓂᓑ ᐁᑳ ᐁᑮ ᐅᐣᒋ ᐅᒌᐱᐦᑯᐊᐧᐣᑭᐣ ᐊᓈᒥᐣᐠ.
7 ᐋᐣᑕ ᑮᐃᔑ ᐸᐣᑭᓯᓅᐣ ᑳᐃᐧᒥᓇᑭᔑᔮᑎᑯᐣᐠ ᑮᓂᐦᑖᐃᐧᑭᓅᐣ ᒦᓇ ᑮᑭᐱᓑᑲᒨᑲᓅᐣ ᐃᓂᐁᐧᓂᐊᐧᐣ ᐅᑳᐃᐧᒥᓇᑭᔑᔮᑎᑰᐣ,
ᑳᐃᐧᐣ ᒋᐅᐣᒋ ᒦᓂᔑᐊᐧᐣᑭᐣ ᑭᐦᑎᑳᓀᓴᐣ.
8 ᑯᑕᑭᔭᐣ ᑮᐃᔑ ᐸᐣᑭᓯᓅᐣ ᑳᐃᔑ ᒥᓈᐧᔑᐣᐠ ᐊᐦᑭ,
ᑮᐅᒼᐱᑭᓅᐣ ᒦᓇ ᐁᑮ ᐊᓂᑮᔑᓂᐦᑖᐃᐧᑭᐦᑭᐣ,
ᐁᑮ ᐊᓂᒦᓂᔑᐊᐧᐣᑭᐣ ᐊᐊᐧᔑᒣ ᒥᓂᑯᐠ ᓂᐦᓱᒥᑕᓇ,
ᒦᓇ ᓂᐣᑯᑕᐧᐦᓱᒥᑕᓇ,
ᒦᓇ ᒥᑖᐦᓱᒥᑕᓇ.”
9 ᒋᓴᐢ ᑮᐃᐦᑭᑐ,
“ᐊᐃᐧᔭ ᑳᐅᑕᐊᐧᑳᐨ ᒋᓅᐣᑕᐣᐠ,
ᑮᔮᒼ ᐅᑲᓅᐣᑖᐣ.”
10 ᐊᐦᐲ ᐁᐯᔑᑯᐨ,
ᐃᑭᐁᐧᓂᐊᐧᐠ ᑳᓃᔓᔖᐳᓂᐣᐨ ᐅᑭᐦᑭᓅᐦᐊᒪᐋᐧᑲᓇᐣ ᒦᓇ ᑯᑕᑭᔭᐣ ᐃᐦᐃᒫ ᑳᐊᔮᓂᐨ ᐅᑮ ᑲᑫᐧᒋᒥᑰᐣ ᐃᓂᐁᐧᓂᐊᐧᐣ ᐋᐁᐧᐦᒋᑲᓇᐣ.
11 ᐅᑮᐦᐃᓈᐣ,
“ᑮᓇᐋᐧ ᑭᑮᒦᓂᑯᓇᐋᐧ ᐁᑳ ᑳᑭᐦᑫᐣᒋᑳᑌᓂᐠ ᑭᔐᒪᓂᑑ ᐅᑑᑭᒫᐃᐧᐃᐧᐣ.
ᐁᑲᐧᐃᐧᐣ ᐃᑭᐁᐧᓂᐊᐧᐠ ᐊᑲᐧᒋᔭᐦᐃᐣᐠ ᑳᐊᔮᐋᐧᐨ ᑲᐦᑭᓇ ᐋᐁᐧᐦᒋᑲᓂᐠ ᑮᐅᐣᒋ ᐃᐧᐣᑕᒪᐋᐧᐊᐧᐠ ᑫᑰᓇᐣ.
12 “ ‘ᒥᐦᔒᓈᐧ ᐁᐦᐋᓇ ᐋᐧᐸᐣᑕᒧᐋᐧᐨ,
ᔖᑰᐨ ᑳᐃᐧᐣ ᐅᑲᓂᐦᓯᑕᐁᐧᐣᑕᓰᓈᐋᐧ,
ᑲᔦ ᐁᐦᐋᓇ ᓇᐣᑐᐦᑕᒧᐋᐧᐨ ᔖᑰᐨ ᑳᐃᐧᐣ ᑕᓂᓯᑐᐦᑕᓰᐊᐧᐠ.
ᑮᓑᐱᐣ ᑕᓑ ᓂᓯᑐᐦᑕᒧᐋᐧᐦᐸᐣ ᑕᑮᑫᐧᑭᐱᒫᑎᓯᐊᐧᐠ ᒦᓇ ᒋᐴᓀᐣᑕᒪᐃᐧᐣᑖᐧ.’ ”
13 ᐁᑲᐧ ᒋᓴᐢ ᐅᑮᐦᐃᓈᐣ,
“ᑳᐃᐧᓇ ᒋᓂᓯᑐᐦᑕᒣᐠ ᐅᐦᐅᐁᐧ ᐋᐁᐧᐦᒋᑲᐣ ?
ᐋᐣᑎ ᑕᓑ ᑫᑮᐅᐣᒋ ᓂᓯᑐᐦᑕᒣᑭᐸᐣ ᑲᐦᑭᓇ ᐋᐁᐧᐦᒋᑲᓇᐣ ?
14 ᑭᐦᑎᑫᐃᐧᓂ ᐊᒦᐦᐋᐁᐧ ᑳᐸᐹᒧᐃᐧᐣᑕᐣᐠ ᑭᔐᒪᓂᑑ ᐅᑎᐦᑭᑐᐃᐧᓂᓃᐣ.
15 ᓈᐣᑕ ᐊᐃᐧᔭᐠ ᐃᔑᐊᔮᐊᐧᐠ ᑖᐱᓑᑰᐨ ᑭᐦᑎᑳᓇᐣ ᑳᐸᐣᑭᓯᑭᐣ ᐸᐦᑫᑲᓇ,
ᐃᐦᐃᒫ ᐃᐦᑭᑐᐃᐧᐣ ᑳᐃᔑ ᐊᐧᓭᐁᐧᐱᓂᑳᑌᐠ.
ᐊᐦᐲ ᑳᓅᐣᑕᒧᐋᐧᐨ,
ᒪᒋᒪᓂᑑ ᔐᒫᐠ ᐲᔖ ᒦᓇ ᐁᐱᐅᑖᐦᐱᓈᐣᐠ ᐃᐦᐃᐁᐧᓂ ᐃᐦᑭᑐᐃᐧᐣ ᑳᑮᑭᐦᑎᑳᑌᓂᑭᐸᐣ ᐅᐱᒫᑎᓯᐃᐧᓂᐋᐧ.
16 ᑯᑕᑭᔭᐠ ᑖᐱᓑᑰᐨ ᐃᔑᐊᔮᐊᐧᐠ ᑭᐦᑎᑳᐣ ᑳᐸᐣᑭᓯᐠ ᑳᐃᔑ ᐊᐦᓯᓃᐃᐧᐦᑲᒥᑳᐠ,
ᐁᓅᐣᑕᒧᐋᐧᐨ ᐃᐦᑭᑐᐃᐧᓂ ᔐᒫᐠ ᐅᑑᑖᐦᐱᓈᓈᐋᐧ ᐁᒥᓀᐧᐣᑕᒧᐋᐧᐨ.
17 ᐊᒦᑕᓑ ᑖᐱᓑᑰᐨ ᐁᑳ ᐁᐅᒌᐱᐦᑯᐃᐧᐋᐧᐨ ᐊᐦᒋᓇ ᐱᑯᐦ ᐁᐦᑕ ᑌᐯᐧᔦᐣᑕᒨᐠ.
ᐊᐦᐲ ᐁᐦᐅᑎᓯᑯᐋᐧᐨ ᐊᓂᒥᓯᐃᐧᓂ ᒦᓇ ᑲᑳᐧᑕᑭᓯᐃᐧᓂ ᐅᐦᐅᐁᐧ ᐃᐦᑭᑐᐃᐧᓂ ᐅᐣᒋ,
ᔐᒫᐠ ᐸᐣᑭᔑᓅᐠ.
18 ᑯᑕᑭᔭᐠ ᐃᔑᐊᔮᐊᐧᐠ ᑖᐱᓑᑰᐨ ᑭᐦᑎᑳᐣ ᐁᐸᐣᑭᓯᐣᐠ ᑳᐃᔑ ᐅᑳᐃᐧᒥᓇᑭᔒᑳᐠ.
ᐅᓅᐣᑖᓈᐋᐧ ᐃᐦᑭᑐᐃᐧᓂ,
19 ᔖᑰᐨ ᐁᒥᑯᓑᑳᑌᐣᑕᒥᐦᐁᐧᒪᑲᐠ ᐅᐦᐅᐁᐧ ᐱᒫᑎᓯᐃᐧᐣ,
ᑳᐊᐧᔨᔑᐦᐃᐁᐧᒪᑲᐠ ᐁᐧᓅᑎᓯᐃᐧᐣ ᒦᓇ ᑯᑕᑭᔭᐣ ᒧᓴᐁᐧᐣᑕᒧᐃᐧᓇᐣ,
ᐁᐲᐣᑎᑫᒪᑲᐠ ᒦᓇ ᐁᑭᐱᓑᑲᒨᒪᑲᐠ ᐃᐦᑭᑐᐃᐧᐣ ᐁᑳ ᒋᑮᒦᓂᔑᐊᐧᐣᐠ.
20 ᑯᑕᑭᔭᐠ ᐃᔑᐊᔮᐊᐧᐠ ᑖᐱᓑᑰᐨ ᐁᐸᑭᑎᓂᑳᑌᐠ ᑭᐦᑎᑳᐣ ᐃᐦᐃᒫ ᑳᐃᔑ ᒥᓄᐦᑲᒥᑳᐠ,
ᐁᓅᐣᑕᒧᐋᐧᐨ ᐃᐦᑭᑐᐃᐧᓂ,
ᐅᑮᐅᑖᐦᐱᓈᓈᐋᐧ ᒦᓇ ᐁᓂᐦᑖᐃᐧᑭᐦᑭᐣ ᓂᐦᓱᒥᑕᓇ,
ᓂᐣᑯᑖᐧᓱᒥᑕᓇ,
ᓈᐣᑕ ᑲᔦ ᒥᑖᐦᓱᒥᑕᓇ ᒥᓂᑯᐠ.”
ᒋᓴᐢ ᐁᐦᐋᐁᐧᐦᒋᑳᑫᐨ ᐋᐧᐦᑌᓂᒫᑲᓂ
21 ᒋᓴᐢ ᐅᑮᐦᐃᓈᐣ,
“ᑭᐲᑑᐣ ᓇ ᐋᐧᐦᑌᓂᑲᐣ ᐃᐦᐃᒫ ᐁᐃᔑᐊᐦᑑᔭᐣ ᔒᐸᐦᐄ ᐊᓯᐊᐧᒋᑲᓂᐠ ᓈᐣᑕ ᔒᐹᐦᐄ ᓂᐯᐃᐧᓂᐣᐠ ?
ᑳᐃᐧᓇ ᑭᑕᐦᑑᓰᐣ ᐃᐦᐃᒫ ᐋᐧᐦᑌᓂᒫᑲᓈᑎᑯᐣᐠ ?
22 ᑫᑰᐣ ᑳᑳᒋᑳᑌᐠ ᑕᒧᔐᐋᐧᐸᐣᒋᑳᑌ,
ᒦᓇ ᐱᑯᐦ ᑫᑰᐣ ᐃᐦᐃᐁᐧ ᑳᔭᑲᐧᓇᐦᐃᑳᑌᐠ ᑕᒧᔐᓈᑲᐧᐣ.
23 ᐊᐃᐧᔭ ᑳᐅᐦᑕᐊᐧᑳᐨ ᒋᓅᐣᑕᐣᐠ,
ᑮᔮᒼ ᐅᑲᓅᐣᑖᐣ.”
24 ᒋᓴᐢ ᑮᐦᐃᑭᑐ,
“ᐊᔮᐣᑳᐧᒣᐣᑕᒧᐠ ᑫᑯᓀᐣ ᑳᓅᐣᑕᒣᐠ,
ᐃᐦᐃᐁᐧ ᒦᓂᐁᐧᐃᐧᐣ ᑫᔮᐸᒋᑑᔦᐠ,
ᒦᐦᐃᐁᐧ ᐯᔑᑲᐧᐣ ᑫᐃᔑ ᒦᓂᑰᔦᐠ ᓈᐣᑕ ᐊᐊᐧᔑᒣ.
25 ᐱᑯᐦ ᐊᐃᐧᔭ ᑳᐊᔮᐨ ᐊᐊᐧᔑᒣ ᑮᔮᐱᐨ ᑕᒦᓈᑲᓅ,
ᐱᑯᐦ ᐊᐃᐧᔭ ᐁᑳ ᑳᐊᔮᐨ ᑕᐅᑖᐦᐱᓂᑳᑌᓂ ᐃᐦᐃᐁᐧᓂ ᑳᐊᔮᐨ.”
ᒋᓴᐢ ᐁᐦᐋᐁᐧᐦᒋᑳᑫᐨ ᑳᓂᒫᒌ ᓂᑖᐃᐧᑭᓂᐠ ᑭᐦᑎᑳᓀᓴᐣ
26 ᒋᓴᐢ ᒦᓇᐋᐧ ᑮᐊᓃᐦᑭᑐ,
“ᒦᐦᐅᐁᐧ ᑭᔐᒪᓂᑑ ᐅᑑᑭᒫᐃᐧᐣ ᐁᐃᔑᓈᑲᐧᓂᐠ ᑖᐱᓑᑰᐨ ᓈᐯ ᐁᐊᐧᓭᐁᐧᐱᓇᐣᑭᐣ ᑭᐦᑎᑳᓀᓴᐣ ᐊᐧᑭᑕᐦᑲᒥᐠ.
27 ᓂᐹ ᐁᑎᐦᐱᑳᓂᐠ ᒦᓇ ᐊᐧᓂᓑᑳ ᐁᑮᔑᑳᓂᐠ,
ᑭᐦᑎᑳᓀᓴᐣ ᓵᑭᑭᓅᐣ ᒦᓇ ᒫᒌᑭᓅᐣ,
ᐋᓇᐄᐧᓂᑯ ᐁᑳ ᐁᑭᐦᑫᐣᑕᐣᐠ ᐋᐣᑎ ᐁᐧᐣᒋ ᒫᒌᑭᓂᑭᐣ.
28 ᑎᐱᓇᐁᐧ ᐱᑯᐦ ᐊᐦᑮᐦᑳᐣᐠ ᐅᐣᒋ ᓂᐦᑖᐃᐧᑭ ᐸᐦᑫᐧᔑᑲᐣ,
ᓂᐢᑕᒼ ᐁᐊᓂᒪᓑᑯᔑᐊᐧᐣᐠ,
ᐁᑲᐧᐦᐱᐣ ᐁᓅᐦᑎᑳᐧᓂᐊᐧᐣᐠ,
ᐲᓂᐢ ᐁᓂᑮᔑᓂᐦᑖᐃᐧᑭᐠ.
29 ᐊᐦᐲ ᑕᓑ ᐁᑮᔑ ᓂᑖᐃᐧᑭᑭᐣ,
ᔐᒫᐠ ᐅᒪᓂᔖᓇᐣ ᐊᓂᓑ ᐋᔕ ᐁᐅᒋᐦᒋᐦᓭᐠ ᒋᒫᐊᐧᒋᐦᒋᑳᑌᑭᐣ.”
ᒋᓴᐢ ᐁᐦᐋᐁᐧᐦᒋᑳᑫᐨ ᒫᐊᐧᐨ ᑳᔭᑳᓯᐣᐠ ᑭᐦᑎᑳᓀᐢ
30 ᒦᓇᐋᐧ ᑮᐊᓃᐦᑭᑐ,
“ᐋᓃᐣ ᑫᐃᐦᑭᑎᔭᐣᑭᐸᐣ ᑭᔐᒪᓂᑑ ᐅᑑᑭᒫᐃᐧᐣ ᐁᐃᔑᓈᑲᐧᓂᓂᐠ,
ᓈᐣᑕ ᑫᑯᓀᐣ ᐋᐁᐧᐦᒋᑲᐣ ᑫᑮᐋᐸᒋᐦᑐᔭᐣᑭᐸᐣ ᑫᑮᐅᐣᒋ ᑭᐦᑭᓄᐋᐧᑌᐣᑖᑲᐧᐦᑭᐸᐣ ?
31 ᐃᓀᐣᑖᑲᐧᐣ ᑖᐱᓑᑰᐨ ᐃᐦᐃᐁᐧ ᐯᔑᐠ ᑭᐦᑎᑳᓀᐢ,
ᒫᐊᐧᐨ ᐁᔮᑳᓯᐣᐠ ᐁᑭᐦᑎᑳᑕᒪᐣ ᐊᐦᑮᐦᑳᐣᐠ.
32 ᐊᐦᐲ ᐁᑭᐦᑎᑳᑌᐠ,
ᐊᓂᓂᐦᑖᐃᐧᑮᒪᑲᐣ ᒦᓇ ᒫᐊᐧᐨ ᐁᐦᐊᓂᑭᐦᒋᒥᔖᐠ ᒦᓇ ᐁᑭᐦᒋᐊᐧᑎᑲᐧᓂᐊᐧᐣᑭᐣ,
ᐲᓂᓑ ᐱᓀᔒᔕᐠ ᐁᑮ ᐲᐊᐧᐦᓯᓱᓂᐦᑫᐋᐧᐨ ᑳᐃᔑ ᐋᑲᐋᐧᐦᑌᓂᐠ.”
33 ᒥᐦᔒᐣ ᐅᓄᐁᐧᓂᐊᐧᐣ ᑑᐦᑳᓇᐣ ᐋᐁᐧᐦᒋᑲᓇᐣ ᒋᓴᐢ ᐅᑮ ᐃᔑᐃᐧᐣᑕᒪᐋᐧᐣ ᐃᐦᑭᑐᐃᐧᓇᐣ,
ᒥᓂᑯᐠ ᑫᐃᔑ ᓂᓯᑐᐦᑕᒥᓂᐨ.
34 ᐋᐁᐧᐦᒋᑲᓂ ᐁᐦᑕ ᐅᑮ ᐋᐸᐦᒋᑑᐣ ᐁᐄᐧᐊᔭᒥᐦᐋᒋᐣ.
ᐊᐦᐲᑕᓑ ᐄᐧᓀᐦᑕᐋᐧ ᐁᐦᐊᔮᐋᐧᐨ ᐅᑭᐦᑭᓅᐦᐊᒪᐋᐧᑲᓇᐣ,
ᐅᑮ ᐋᐧᐄᐧᐣᑕᒪᐋᐧᐣ ᑲᐦᑭᓇ ᑫᑰᓇᐣ.
ᒋᓴᐢ ᑳᑮᑭᐱᐦᑎᓇᐣᐠ ᑳᑭᐦᒋᓅᑎᓂᓂᐠ
35 ᐃᐦᐃᐁᐧ ᐁᑮᔑᑳᐠ ᐁᐦᐊᓅᓈᑯᐦᔑᐣᐠ,
ᐅᑭᐦᑭᓅᐦᐊᒪᐋᐧᑲᓇᐣ ᒋᓴᐢ ᐅᑮᐦᐃᓈᐣ,
“ᑲᐃᔖᒥᐣ ᑫᐧᐦᑲᑳᒼ ᐊᑳᒥᐣᐠ.”
36 ᐅᑮᓇᑲᓈᐋᐧᐣ ᑳᒥᐦᔒᓄᓂᐨ ᐊᐃᐧᔭᐣ,
ᐁᑮ ᒫᒌᐃᐧᓈᐋᐧᐨ ᒋᓴᓲᐣ ᐃᐦᐃᒫ ᑳᔭᐱᓂᐣᐨ ᐲᐣᒋᒌᒫᐣ.
ᒌᒫᓇᐣ ᑮᐦᐊᔮᐊᐧᐣ ᑯᑕᑭᔭᐣ ᑳᐄᐧᑕᐦᐅᒥᑯᐨ.
37 ᑫᑕᐦᑕᐄᐧᐣ ᑮᑭᐦᒋᐸᑭᒋᓂᐁᐧ ᐁᑮ ᐲᐣᑖᐦᐅᑌᐠ ᒌᒫᐣ,
ᑫᑳᐟ ᐁᑮ ᒨᓑᑭᓀᐲᐠ.
38 ᒋᓴᐢ ᑮᐊᔮ ᐅᑖᓈᐣᐠ ᒌᒫᓂᐣᐠ ᐁᑮᓂᐹᐨ,
ᐊᐦᐸᐳᐃᐧᓂ ᐁᑮ ᐊᐦᐱᐦᑫᐧᐦᔑᒧᐨ.
ᐅᑭᐦᑭᓅᐦᐊᒪᐋᐧᑲᓇᐣ ᐅᑮᐊᒪᒋᐦᐃᑰᐣ ᐁᑮᐦᐃᑯᐨ,
“ᐅᑭᐦᑭᓅᐦᐊᒫᑫ,
ᑳᐃᐧᓇᐦᐅ ᓈᐣᑕ ᒋᐃᓀᐣᑕᒪᐣ ᑮᓑᐱᐣ ᓂᐦᓵᐹᐁᐧᔭᐣᐠ ?”
39 ᑮᐊᐧᓂᓑᑳ,
ᐁᑮ ᑲᓅᐣᑕᐣᐠ ᓅᑎᓂᓂ ᒦᓇ ᓵᑲᐦᐃᑲᓃᓂ,
“ᐸᔭᐦᑕᑭᐊᔮᐣ,”
ᐁᑲᐧᐦᐱᐣ ᑮᑭᐱᐦᒋᓂᐁᐧ ᒥᑐᓂ ᐊᐦᐱᐣ ᐁᑮ ᐊᓈᐧᐦᑎᐣᐠ.
40 ᒋᓴᐢ ᐅᑮᐦᐃᓈᐣ ᐅᑭᐦᑭᓅᐦᐊᒪᐋᐧᑲᓇᐣ,
“ᑫᑯᓀᐣ ᐁᐧᐣᒋ ᐊᐦᐲᐦᒋ ᓭᑭᓯᔦᐠ ?
ᑳᐃᐧᓇᐦᐅ ᒪᐦᔑ ᒋᐅᑌᐯᐧᔦᐣᑕᒧᐃᐧᓂᔦᐠ ?”
41 ᑭᐦᑭᓅᐦᐊᒪᐋᐧᑲᓇᐠ ᑮᑭᐦᒋᓭᑭᓯᐊᐧᐠ ᒦᓇ ᐁᑮ ᑲᑫᐧᒋᒥᑐᐋᐧᐨ,
“ᐊᐊᐧᓀᐣ ᐊᐧᐦᐊᐁᐧ?
ᑲᔦ ᐱᑯᐦ ᓅᑎᓂᓂ ᒦᓇ ᓵᑲᐦᐃᑲᓃᓂ ᐁᓇᓇᐦᐃᑖᑯᐨ.”